Chokewe Mi Likiitu Fan Folun Ira Lon Fituker

“A ngeniei efoch folun ira lon fitukei, emon chon kuno seni Satan, pwe epwe ninniei.”​—2 KORINT 12:7.

1. Ikkefa ekkoch fitikoko mi tottori aramas ikenai?

EN mi kan achocho ngeni om kopwe likiitu fan och sossot mi chok sopwosopwolo? Ika ina, sap minne en mi alaemon chok. Lon ekkeei “fansoun weires,” chon Kraist mi tuppwol ra kan achocho ngeni ar repwe likiitu fan ar kuna riaffou seni chon u ngeniir, osukosuk lon famili, samau, aurek ren nafochun moni, osukosuk lon letiper, maloon attonger kewe, me pwal fitu sokkun mettoch mi chouniir. (2 Timoti 3:​1-5) Lon ekkoch fonu, chommong ra tongeni malo pokiten lengita me maun.

² Ekkena sokkun fitikoko repwe tongeni ameef ngeni emon pwe esap tufichin likiitu, akkaewin ika fitu sokkun mettoch mi weires epwe warepok. Nengeni mwo minne An Salomon Fos 24:10 a apasa: “Are ka apilukingau lon fansoun riafou, om pochokul a kisikis.” Ewer, ika sia apilukingau ren ach kewe sossot, epwe tongeni molo ach pochokkul, ewe mi wesewesen lamot ngenikich, me epwe tongeni akukkunalo ach ekiekin likiitu tori ewe sopwoloon. Ifa ussun?

³ Iwe, apilukingau epwe tongeni efisata apap lon ekiekich. Ren chok awewe, a mecheres ach sipwe kon ekimmong ussun mettoch mi aweiresikich, iwe mwirin, epwe ssenuk ach aureki pwisin manauach. Eli ekkoch repwe kota ren Kot, “Pwata ka mut ngeni ei mettoch an epwe fis lon manauei?” Ika ena sokkun ekiek ese pwung epwe ffotolong lon letipen emon, epwe tongeni atai an chengel me an apilukoch. Emon chon angangen Kot epwe tongeni meefi watte letipechou, iwe mwirin, epwe fangeta lon “ewe maun mi murinno, ewe maunen luku.”​—1 Timoti 6:​12.

⁴ Esap efisien Jiowa Kot ach kewe sossot. (Jemes 1:​13) Ekkoch sossot ra torikich pokiten chok ach achocho ngeni ach sipwe tuppwol ngeni. Mi enlet pwe meinisin mi angang ngeni Jiowa repwe kuna oput seni ewe nampa eu chon appolua Jiowa, Setan ewe Tefil. Lon ewe lusun fansoun mwochomwoch a nom ren, ena kot mi ngau, “koten ei fonufan,” a kan sotuni le etipetipa ekkan aramas mi tongei Jiowa pwe repwe ukutiu seni ar foffori letipan. (2 Korint 4:4) Setan a ekkeriaffou unusen ewe mwicheichen pwiich kewe won unusen fonufan ukuukun an tufich. (1 Piter 5:9) Pwungun pwe sap minne efisien Setan meinisin ach kewe fitikoko, nge epwe tongeni awattei ekkewe fitikoko mi torikich, pun a ekiekin alapalo ach apwangapwang.

⁵ Iwe nge, inaamwo ika epwe tongeni wenewenen aniuaniu Setan are an kewe pisekin maun, nge sipwe tongeni pworaiti i! Pwata a ina ussun ach lukuluk? Pun Jiowa Kot a mammaun fan asengesich! A fen akkota pwe noun kewe chon angang repwe silei ussun an Setan kewe rau mi ngau. (2 Korint 2:​11) Mi enlet pwe ewe Kapasen Kot a awora chommong poraus ussun ekkewe sossot mi eriaffou chon Kraist mi enlet. Ewe Paipel a nounou ei ititin kapas “efoch folun ira lon fitukei” fan iten ewe aposel Paul. Met popun? Sipwe pi ifa ussun ewe Kapasen Kot a awewei ena ititin kapas. Iwe mwirin, sipwe kuna pwe an Jiowa alillis a lamot ngenikich meinisin fan iten ach sipwe tufichin pworaiti sossot.

Ewe Popun Sossot a Ussun Folun Ira

⁶ Iei makkeien Paul fan emmwenien ewe ngun mi fel mwirin an kuna watte sossot: “A ngeniei efoch folun ira lon fitukei, emon chon kuno seni Satan, pwe epwe ninniei, pwe ute lamalam tekia.” (2 Korint 12:⁠7) Ifa ena folun ira lon fituken Paul? Epwe fokkun metek ika efoch folun ira a mwochulong fan unuchach. Ina minne, ena kapas awewe a pwarata pwe a wor och mettoch mi eriaffou Paul​—eli lon inisin are letipan, are, ir me ruu. Eli Paul a uri och semmwenin foun mesan are pwal och sokkun apwangapwangen inisin. Are eli ewe folun ira a weneiti chokewe mi apasa pwe ese pwung an Paul wiiseni ewe wiis chon kuno, iwe, ra tipemwaramwar ussun lamoten an angangen afalafala me asukula aramas. (2 Korint 10:​10-​12; 11:​5, 6, 13) Inaamwo ika ese ffat met ena folun ira a wewe ngeni, nge a chok nonnom lon fitukan me esap tongeni chu seni.

⁷ Nengeni mwo pwe ewe folun ira a chok nninni Paul. Ewe kapasen Kriik Paul a nounou a popu seni ewe kapas fan iten “kipwinin pau.” A mak lon Mattu 26:67 lon kapas wesewesan me 1 Korint 4:​11 lon kapas awewe. Lon ekkena wokisin, a pwalo ewe ekiekin an emon kuna kawet ren kafol. Pokiten a watte an Setan oput Jiowa me noun kewe chon angang, esor ach tipemwaramwar pwe ewe Tefil a pwapwa pwe efoch folun ira a nninni Paul. Ikenai, Setan a pwal pwapwa lupwen sipwe meefi riaffou ren efoch folun ira lon fitukach.

⁸ Ina minne, ussun Paul, a lamot ach sipwe silei ifa ussun sipwe tufichin likiitu fan ekkena sokkun folun ira. Ach likiitu epwe emmwen ngeni manau! Chechchemeni mwo pwe Jiowa a mochen sopweelo manauach tori feilfeilo chok lon an we fonufan sefo, ikewe ie esap chuen torikich osukosuk mi ussun folun ira. Ren an epwe alisikich le angei ena feioch mi fokkun amwarar, Kot a fen awora ngenikich chommong leenien appiru lon an we Kapas mi fel, ewe Paipel, iwe, a pwarata pwe noun kewe chon angang mi tuppwol ra fen likiitu fan folun ira lon fituker. Ir mi ussuch, weween, ese sokkolo watteen ar pochokkul me rese unusoch. Ach kaeo ussun ekkoch me lein ena “kuchuun chon pwarata” epwe tongeni alisikich pwe sipwe “likiitu le sa lon ewe kitir mi nom mwach.” (Ipru 12:1) Ach ekilapei minne ra likiitu fan epwe tongeni awattei ach luku pwe sipwe tufichin likiitu fan sokkun folun ira meinisin Setan epwe sotun aea le fiu ngenikich.

Ekkewe Folun Ira mi Eriaffou Mefiposet

⁹ Ekieki mwo Mefiposet, noun Jonatan, chienen Tafit we. Lupwen Mefiposet a limu ierin, a war porausen nninniiloon seman we, Jonatan, me semelapan we, King Saul. Ewe mi wiisen tumunu ena at a kitipopota ren an niuokkus. Neminnewe a “eki o sula fan. Nge lupwen a muttir le su fan, ewe at a turutiu pwe a mwen.” (2 Samuel 4:4) Ese mwaal ina efoch folun ira mi watte Mefiposet a likiitu fan lupwen a maarita.

¹⁰ Fitu ier mwirin, King Tafit, pokiten a watte an tongei Jonatan, a pwarata umoumoch ngeni Mefiposet. Tafit a ngeni atewe meinisin fonuen Saul me a awiisa ngeni Sipa, noun Saul we chon angang, an epwe wiisen tumunu ena fonu. Pwal iei alon Tafit ngeni Mefiposet: “Mefiposet epwe mongo seni ai chepel fansoun meinisin.” (2 Samuel 9:​6-​10) Ese mwaal an Tafit pwarata umoumoch a aururu Mefiposet me a akukkunalo riaffoun an apwangapwang. A ifa me murinnoon ena lesen! Sipwe pwal pwarata kirokiroch ngeni ir mi likiitu fan efoch folun ira lon fituker.

¹¹ Mwirin, a tori Mefiposet pwal efoch folun ira lon fitukan. Noun we chon angang Sipa a pweni i mwen mesen King Tafit, nge lon ena atun Tafit a su seni Jerusalem pokiten noun we Apsalom a u ngeni. Sipa a ereni pwe Mefiposet ese tuppwol ngeni, nge a nomolo lon Jerusalem pokiten an ekiekin angei ewe nemenemen king.a Tafit a luku alon Sipa mi chofona me a ngeni ena chon kapas chofona meinisin fonuen Mefiposet!​—2 Samuel 16:​1-4.

¹² Iwe nge, lupwen Mefiposet a chuuri Tafit, a ereni ewe king minne a wesewesen fis. A fen akkammon pwe epwe fiti Tafit, nge Sipa a otupu i, iwe, a era pwe epwe lo fan iten siwilin. Tafit a awenecharasefalli ena mettoch mi mwaal? Esap unusan. A akinifeseni ewe fonu lefilen ekkena ruuemon mwan. Iwe, ina pwal ussun ita efoch folun ira lon fituken Mefiposet. A ita watte an lichipung? A ita anini ngeni Tafit ren an ereni pwe ese pwung minne a fori? Aapw, nge fan tipetekison a nguuri minne ewe king a apwungalo. A annefota minne mi murinno, weween, a chengel pokiten an ewe kingen Israel liwinsefal, nge ese feiengau. Mefiposet a wenewenen isetiu eu leenien appiru mi murinno ren an likiitu fan an pechema, an emon pweni i, me lichipung.​—2 Samuel 19:24-​30.

Nehemaia A Likiitu fan An kewe Sossot

¹³ Ekieki mwo ekkewe folun ira Nehemaia a likiitu fan lupwen a liwiniti ewe telinimw esor tittin, Jerusalem, lon ewe alimuen senturi B.C.E. A kuna pwe ewe telinimw esor minen tumun lon fansoun maun, me ekkewe chon Jus mi liwinsefal ra torotorongau, letipengau, me limengau mwen mesen Jiowa. Inaamwo ika King Artaksasta a awiisa ngeni an epwe forsefalli tittin Jerusalem, nge Nehemaia a kuna pwe kepinan ekkewe fonu orun ra oput minne epwe wiisen fori. “Ra fokun oput pwe eman a feito pwe epwe kutta feiochun chon Israel.”​—Nehemia 2:​10.

¹⁴ Ren unusen ar pochokkul, ekkena chon ekis mi u ngeni Nehemaia ra sotuni le aukatiu an angang. Ese mwaal ar kapasen amosok, kapas chofona, kapasen pweni​—fitifengen me ar nounou spai pwe repwe aletipengaua i​—ra ussun folun ira lon fitukan. A ita kkuf ren tipachchem solaan ir mi oput i? Aapw! A luku Kot ren unusen letipan, nge ese apwangapwangelo. Ina popun, lupwen tittin Jerusalem kewe ra forsefal, ir eu pisekin pwarata ussun an Jiowa peni Nehemaia fan tong.​—Nehemia 4:​1-​12; 6:​1-​19.

¹⁵ Lon wiisan we, wiisen kepina, Nehemaia a pwal kuna chommong fitikoko lein noun Kot kewe aramas. Ekkena fitikoko ra ussun folun ira mi fokkun aweiresi letipan pun ra kku an ekkewe aramas ririfengen me Jiowa. Chon pisekisek ra angei watte liwinin paro moni, me pwiir kewe mi woungau ra amomolo fonuer me pwal mwo nge nour kewe pwe repwe chon kichiniwel ren ar repwe monatiu ar liwinimmang me ar takises ngeni ewe muun Persia. (Nehemia 5:​1-​10) Chommong Jus ra ipweri ewe allukun Sapat me rese awora alillisin chon Lifai me ewe imwen fel. Pwal och, ekkoch ra “pwupwulu ngeni fin Astot, Amon me Moap.” Nehemaia a mmen riaffou ren ekkena mettoch! Nge ese fangeta ren ekkena folun ira. Iteiten fansoun meinisin a tinikken le apochokkula an Kot kewe alluk mi pwung. Ussun Nehemaia, amwo sisap mut ngeni fofforun chon rikilo an epwe aukatiu ach angang ngeni Jiowa fan tuppwol.​—Nehemia 13:10-​13, 23-​27.

Chommong Chon Tuppwol ra Likiitu

¹⁶ Lon ewe Paipel a wor porausen chommong aramas mi likiitu fan watte osukosuk mi ussun folun ira. Eu ena sokkun folun ira a popu seni fitikoko lon famili. Puluwen Esau kewe ruuemon ra “fokun ariafouu Isaak me Repeka,” semen me inen Esau. Repeka a pwal apasa pwe a fokkun oput manauan pokiten an nonnom ren ekkena ruuemon fefin. (Keneses 26:34, 35; 27:46) Pwal ekieki mwo Hana me ifa ussun Penina, aruuemonun puluwen Elkana, a “fokun sou asonga o amangaua” pun Hana a rit. Eli fan chommong Hana a meefi ena sokkun riaffou lon imwer we. Penina a pwal eriaffou neminnewe lein aramas​—ese mwaal mwen mesen mararir me chiener kewe​—lupwen ewe famili a feilo ren ewe imwen fel lon Silo. Ena foffor a ussun an etikalong ewe folun ira le alollolun fituken Hana.​—1 Samuel 1:​4-7.

¹⁷ Ekieki mwo minne Tafit a likiitu fan pokiten watteen lolowoon semen puluwan we, King Saul. Ren an epwe selani manauan, Tafit a nonnom lon ekkewe pwangen achau lon ewe fonu mi poon itan Engeti, ikewe ie a kan tota won achau mi tekia me efeiengau. Ese mwaal a watte an riaffou ren an tori ena mettoch ese pwung, pun ese fori och mettoch mi ngau ngeni Saul. Nge ren fite ier Tafit a su seni Saul pokiten an lolowo.​—1 Samuel 24:14, 15; An Salomon Fos 27:4.

¹⁸ Ekieki mwo ewe fitikokoon famili mi kku ewe soufos Osea. Puluwan we a wiliti emon fin lisowu. Ese mwaal an ewe fefin lisowu mwaal a ussun folun ira mi kku letipan. Neman a pwal lapalo riaffoun lupwen neminnewe a nounatiu ruuemon pokiten an lisowu mwaal!​—Osea 1:​2-9.

¹⁹ Pwal och folun ira lon fitukach a popu seni an aramas oputakich. Ekieki mwo minne a fis ngeni ewe soufos Mikaia. Ese mwaal letipen Mikaia a riaffou pokiten an kuna pwe King Ahap a ionfengenni soufos chofona me a luku ar kewe poraus mi fokkun chofona. Iwe, lupwen Mikaia a ereni Ahap pwe meinisin ekkena soufos ra “eani kapas chofona,” met ewe sou emmwen leir a fori? A “posapei” Mikaia! Nge a ngau seni ena minne Ahap a fori lupwen Jiowa a ouroura pwe esap pwonuta an Ahap ekiekin liapenisefalli Ramot-kiliat. Ahap a apasa pwe Mikaia epwe koturulong lon imwen fotek me epwe kukkunulo anan. (1 King 22:​6, 9, 15-​17, 23-​28) Pwal chechchemeni Jeremaia me minne a kuna seni ir mi ekiekin nnielo i.​—Jeremaia 20:​1-9.

²⁰ Maloon attongach kewe pwal iei eu mettoch mi eriaffou, iwe, epwe tongeni an epwe ussun efoch folun ira lon fitukach. Naomi a likiitu fan ewe riaffou a meefi ren maloon puluwan we me noun kewe ruuemon mwan. Neminnewe a liwiniti Petleem fan an letipechou. A ereni chienan kewe pwe repwe ko ngeni Mara, nge esap Naomi, nge ena it a pwarata marasen minne a kuna. Iwe nge, le sopwoloon, Jiowa a efeiochu an likiitu ren an awora emon noun noun, iwe, i emon mi nom lon tettelin ewe Messaia.​—Rut 1:​3-5, 19-​21; 4:​13-​17; Mattu 1:​1, 5.

²¹ Ekieki mwo rukoon Jop lupwen a rong pwe noun kewe engol ra muttir nninniilo, nge mi pwal kapachelong nninniiloon meinisin noun kewe man me noun kewe chon angang. Muttir chok, a ussun ita a fen morolo mettoch meinisin a aucheani! Iwe, lupwen Jop a nikatuttum ren ekkena mettoch, Setan a asemmweni. Eli Jop a ekieki pwe epwe malo ren an samau. A fen kon watte metekin pwe iwe a meefi pwe malo epwe angasalo i seni an riaffou.​—Hiop 1:​13-​20; 2:​7, 8.

²² A ussun ita ese naf ena ukuukun pwe puluwan we, fan an letipechou me riaffou, a pwereto ren, iwe, a kota: “Kopwe amamasini Kot o mala.” A fet watteen ena folun ira lon fitukan mi meteketek! Mwirin, chienen Jop kewe ulumon rese aururu letipan, nge ra esiita ren ar apasata kapas mi mwaal, iwe, ra tipi ngeni pwe a wor fitu tipis a fen fori le monomon, me ina ewe popun an kuna fitikoko. Ar kewe kapas mi mwaal a etikalong le alollolun fitukan ekkewe folun ira. Pwal chechchemeni mwo pwe Jop ese silei ewe popun ekkena mettoch mi fokkun ngau ra fis ngeni; iwe, ese pwal silei pwe esap malo rer. Iwe nge, lon “ekei feiengau meinisin mi tori Hiop, i esap tipis, esap pwal etipisi Kot ren an amwali mine a fori.” (Hiop 1:​22; 2:​9, 10; 3:3; 14:13; 30:17) Inaamwo ika chommong folun ira kkupok manauan, nge esap fan eu an rikilo seni ewe alen tuppwol. A fet ochchun ena poraus!

²³ Ekkena leenien appiru mi mak asan ekkoch chok me lein chommong. A mak lon Paipel porausen chommong mi ina ussun. Meinisin ekkena chon angang mi tuppwol ra likiitu fan en me an folun ira. Iwe nge, a wor och mettoch ir meinisin ra lollopok won. Ir meinisin rese fangeta lon ar angang ngeni Jiowa. Lon meinisin ar kewe sossot mi eriaffou, ra pworaiti Setan ren ewe pochokkul Jiowa a awora ngeniir. Ifa ussun? Ena lesen mwirin ei epwe polueni ena kapas eis me epwe aiti ngenikich ifa ussun kich sipwe pwal tufichin likiitu fan mettoch meinisin mi ussun folun ira lon fitukach.

[Footnotes]

Ifa Ussun Kopwe Polueni?

• Pwata ekkewe fitikoko mi torikich ra ussun folun ira lon fitukach?

• Ikkefa ekkewe folun ira Mefiposet me Nehemaia ra likiitu fan?

• Menni lein ekkewe poraus lon Paipel ussun ekkewe mwan me fefin mi likiitu fan folun ira mi sokkopat a akkaewin achungu letipom, me met popun?

2, 3. Menni ekiek ese pwung epwe tongeni fisita seni ekkewe fitikoko mi ussun folun ira mi torikich, me ifa ussun ena mettoch epwe tongeni an epwe eu mettoch mi efeiengau?

4, 5. Fan ekkoch, ifa ussun Setan a kapachelong lon ach kewe fitikoko, nge met sokkun lukuluk epwe nom rech?

6. Ifa weween alon Paul lupwen a mak ussun “efoch folun ira” lon fitukan, me eli ena folun ira a wewe ngeni met?

7, 8. (a) Ei kapas “ninni” a pwarata met? (b) Pwata a lamot ach sipwe likiitu fan sokkun folun ira meinisin mi eriaffoukich iei?

9, 10. (a) Ifa ussun a tori Mefiposet efoch folun ira lon fitukan? (b) Ifa ussun King Tafit a pwarata kirokiroch ngeni Mefiposet, me ifa ussun sipwe tongeni appiru Tafit?

11. Met Sipa a apasa ussun Mefiposet, nge pwata sia silei pwe mi chofona alon? (Pi ewe poraus a mak fanchikin.)

12. Met Mefiposet a fori pokiten minne a fis ngeni, me pwata i eu leenien appiru mi murinno ngenikich?

13, 14. Met sokkun folun ira Nehemaia a likiitu fan lupwen a liwiniti Jerusalem pwe epwe forsefalli tittin?

15. Nehemaia a fokkun letipechou pokiten a wor met sokkun mettoch mi ngau lein ekkewe chon Jus?

16-18. Ifa ussun fitikoko lon famili a eriaffou Aisek me Repeka, Hana, Tafit, me Osea?

19. Ifa ussun chon u ngeni ewe soufos Mikaia ra eriaffou letipan?

20. Met sokkun folun ira Naomi a likiitu fan, me met sokkun feioch a kuna le sopwoloon?

21, 22. Met sokkun mettoch a pout seni Jop, me met a fori mwirin?

23. Pwata ekkena chon tuppwol sia fen kaeo ussun ra tufichin likiitu fan folun ira mi sokkopat lon fituker?

[Pictures on page 7]

Mefiposet a likiitu fan an pechema, an emon pweni i, me an lichipung

[Picture on page 8]

Nehemaia a likiitu inaamwo ika chon koputan ra u ngeniR