Kapas Eis Seni Ekkewe Chon Allea

Apwangapwangen ewe fopwul Meri a efisi och feiengau lupwen a koluesini Jises?

Ussun porausen “uputiuen Jises”, ewe Paipel a era: “Mwirin inan we Meri a kofoteni Josef, nge mwen ar resaamwo feilfengen a pwa pwe neminewe a pwopwo me won Ngun mi Fel.” (Mattu 1:18) Ewer, a lamot wiisen an Kot we ngun mi fel lon an Meri we pwopwo.

Iwe nge, met ren Meri? An we sokul a alisaata an we pwopwo? Ach nengeni an Kot kewe pwon ngeni Eperiem, Aisek, Jekop, Juta me King Tafit​—⁠samasamen Meri kewe​—⁠a aiti ngenikich pwe mi lamot pwe ewe monukol epwe wesewesen mwirimwiriir. (Keneses 22:18; 26:24; 28:10-14; 49:10; 2 Samuel 7:16) Epwe chok ifa ussun noun Meri we epwe wor an pwungun pochokkulen alemwir ngeni an Kot kewe pwon? Epwe lamot pwe ewe monukol wesewesen noun Meri.​—Luk 3:23-34.

Noun Jiowa we chonlang a pwa ngeni ewe fopwul Meri, a era: “Kete niuokus, Meri, pun ka fen kuna chen me ren Kot. O nengeni, kopwele kolu o nouni emon at, o kopwe aita ngeni Jises.” (Luk 1:30, 31) Ren an emon fefin epwe kolu, mi lamot pwe ewe sokulen fefin epwe maarita. A ffat pwe Jiowa a efisi maaritaan ewe sokul lon an Meri leenien monukol. A fori ei mettoch ren an awilalo manauan noun we alaemon seni ewe leenien ngun ngeni fonufan.​—Kalesia 4:4.

Emon fefin ese unusoch mi tongeni koluesini emon monukol mi unusoch, esor tipis lon fituken inisin? Ifa pwungun ewe allukun alemwir ren an emon mi unusoch epwe chufengen me emon ese unusoch? Chechchemeni mwo pwe ewe ngun mi fel a wiisen awilalo manamanen manauen Jises we mi unusoch me efisi ewe kolu. Ei foffor a toluelo ewe limengau lon sokulen Meri. Ina popun mi tongeni koluesini emon mi unusoch seni le poputaan.

Ese lifilifin ifa ussun sokulen Meri a maarita, nge kich mi tongeni luku pwe mwokutukutun an Kot ngun mi fel a alluku sopwochun an Jiowa angang. Ewe chonlang Kapriel a awewei ngeni Meri: “Ewe ngun mi fel epwe feitiu wom, o nurun manamanen ewe mi Fokkun Tekia epwe pwolukelo. Iei minne, ewe monukol epwe uputiu epwe iteni mi fel, ewe Noun Kot.” (Luk 1:35) Ewer, an Kot ngun mi fel a foruta, lon kapas awewe, och tittin tumun mi pinei och feiengau are lapalap ese unusoch an epwe alimengaua ewe sosoicha a mamaarita seni ewe fansoun kolu tori an epwe fisilo.

A ffat pwe manauan Jises mi unusoch a fis pokiten Seman we lon lang nge esap pokiten emon aramas. Jiowa a “ammolata eu inis” fan itan, me Jises​—seni ewe fansoun kolu feita​—mi wesewesen emon “esor limengau, emon mi aimu seni chon tipis.”​—Ipru 7:26; 10:5.

[Picture on page 31]

“Kopwele kolu o nouni emon at”