Akkangang Ngeni Jiowa Ren Eu Letip Mi Nukuchar

“Kot, letipei mi nukuchar, letipei mi nukuchar!”​—KOL FEL 57:7.

1. Met popun a tongeni nom rech luku ussun chok ewe luku a nom ren Tafit?

JIOWA mi tongeni anukucharakich lon ach luku, pwe sipwe tongeni kamwochunnuk won ewe lamalamen Kraist mi enlet ussun noun kewe chon angang. (Rom 14:4) Ina popun, sia tongeni eani an ewe soumak kol fel Tafit luku a pwalo lupwen a koluwu: “Kot, letipei a nukuchar.” (Kol Fel 108:1, New World Translation) Ika letipach mi nukuchar, sipwe mochen apwonueta ach pwon ngeni Kot. Pwal ren ach kukkutta emmwen me pochokkul seni i, sipwe uweneweneta, me tipeppos lon letipach me luku ussun chok aramas mi tuppwol, me ‘fansoun meinisin sipwe alapalo ach fori angangen ach we Samol.’​—1 Korint 15:58.

² An Paul kapasen pesepes ngeni noun Jises kewe chon kaeo lon Korint a chuen weneiti ekkewe Chon Kraist ikenai: “Oupwe mamasa, oupwe likiitu lon ach luku, oupwe pworacho usun tipenmwan, oupwe pochokkul.” (1 Korint 16:13) Lon kapasen Kris ei sokkun kapas a weneiti mettoch sipwe sopwosopwolo le fori. Ifa lamoten ei kapasen pesepes?

³ Sipwe tongeni “mamasa” lon pekin ngun ren ach u ngeni ewe Tefil me ren ach arap ngeni Kot. (Jemes 4:​7, 8) Ach lukuluk won Jiowa a atufichikich le amwochu ach tipeeu me ach ‘uppos lon ach luku.’ Oukich​—kapachelong ekkewe chommong fefin leich​—sipwe “pworacho usun tipenmwan” ren ach angang ngeni Kot fan pwora ussun chok chon esileifeili ewe Muu. (Kol Fel 68:11) Sia “pochokkul” ren ach kukkutta pochokkul seni Semach lon lang ren ach sipwe fori letipan.​—Filipai 4:​13.

⁴ Sia pwarata pwe sia fen nguuri ewe luku mi enlet lupwen sia unusen fangolo manauach ngeni Jiowa me esissinata ren ach papataiselo. Nge met a emmwen ngeni ach papatais? Akkom sia kaeo ewe sile mi enlet lon an Kot Kapas. (Jon 17:3) Ei mettoch a uwani luku me a amwokutukich le aier, me pwarata ach letipechou pokiten ekkewe mettoch mi ngau sia fen fori. (Fofor 3:​19; Ipru 11:6) Mwirin sia soulengilo, pokiten sia su seni fofforingau pwe sipwe manaueni manau mi tipeeu ngeni letipen Kot. (Rom 12:2; Efisus 4:​23, 24) Mwirin sia iotek ngeni Jiowa ren ach sipwe unusen fangolo manauach ngeni. (Mattu 16:24; 1 Piter 2:​21) Sia tingor seni Kot mwelien letip mi murinno me papataiselo ren esissinen ach fangolo manauach ngeni i. (1 Piter 3:​21) Ach ekkekieki ussun ekkeei mettoch epwe alisata ach chechchemeni lamoten ach akkangang ngeni pwonutaan ach pwon me ewe lamoten ach akkangang ngeni Jiowa ren letip mi nukuchar.

Sopweilo Om Kukkutta Sile Mi Enlet

⁵ Ren ach sipwe apwonueta ach pwon ngeni Kot, a lamot ach angei sile seni ewe Paipel mi amaaraata luku. Mwa met ren apwapwaan ach angei mongo lon pekin ngun lupwen sia keran rongorong ewe enlet ussun Kot! (Mattu 24:45-​47) Ena “mongo” a fokkun anno​—me a apochokkulakich lon pekin ngun. Iei a lamot ach akkani mongo mi murinno lon pekin ngun pwe sipwe tumunu pwe letipach epwe nukuchar ussun chok noun Jiowa chon angang mi fangolo manauan ngeni.

⁶ Epwe lamot achocho ika sipwe alapalo ach sile ussun ewe Paipel. A ussun chok ach kukkutta pisek mi auchea​—eu angang mi weires. Nge a ifa me watteen ach feioch ika sia feffeita lon ‘ach silei Kot’! (An Salomon Fos 2:​1-6) Lupwen emon chon afalafala ewe muu a poputa le kaeo reom, eli a nounou ewe puk Sile Mi Emmwen Ngeni Manau Esemuch. Eli oua poraus ussun eu sopwun lap seni eu chok fansoun kaeo me a watte ewe fansoun oua nounou. Ka feioch lupwen oua alleani me poraus ussun ekkewe wokisin a mak lon ewe lesen. A awewe ngonuk ewe lesen ika a weires le weweiti. Ewe a kaeo ngonuk a mmonloch, tingor fan iten alillisin an Kot ngun, me a alisuk le amaaraata kilisou fan iten ewe enlet.

⁷ Ei angang a murinno, popun pun Paul a makketiu: “Chon kaeo ewe kapas repwe pipisekfengen mettoch meinisin mi murinno me nour kewe sense.” (Kalesia 6:6) Ikei ie ewe kapasen Kris a pwarata pwe aitien an Kot we Kapas ra ekkenniwil lon ekiekin me letipen ewe emon mi “kaeo” ren an rongorong ewe poraus. Om kaeo iei ussun ina met a atufichuk le asukula aramas. (Fofor 18:25) Ren om kopwe tuppwol ngeni om we pwon, a lamot om kopwe amwochu om pochokkul lon pekin ngun me om nukuchar ren om sopwosopwolo le kaeo an Kot we Kapas.​—1 Timoti 4:​13; Taitos 1:​13; 2:2.

Chechchemeni Om Aier Me Om Soulengilo

⁸ Ka chechchemeni om ngaselo lupwen ka fen kaeo ewe enlet, aier, me mwirin om meefi an Kot omusokolo mi alongolong won asorun an Jises moon kepich? (Kol Fel 32:​1-5; Rom 5:8; 1 Piter 3:​18) Pwungun pwe kese mochen liwiniiti ewe manau mi tipis. (2 Piter 2:​20-​22) Eu me lein ekkewe mettoch mi alisata om tikeri ena mettoch, ina om ikkiotek ngeni Jiowa pwe epwe alisuk le amwochu ekkewe lapalap mi fich ngeni Kot, apwonueta om pwon ngeni Kot, me om sopweilo le angang ngeni Kot ren tuppwol.​—2 Piter 3:​11, 12.

⁹ Iwe, ka fen soulengilo ren om kul seni ekkewe foffor mi tipis, me iei kopwe sopweilo om kukkutta alillisin Kot pwe letipom epwe nukuchar. A ussun ita pwe ka sai won efoch aal mi mwaal nge pokiten om nengeni eu map, iei ka sai won efoch aal mi pwung. Kesap riki seni ena aal mi pwung. Kukkutta an Jiowa emmwen, me kopwe uppos le feffetal won ewe alen manau.​—Aisea 30:20, 21; Mattu 7:​13, 14.

Kesap Monuki Om Fangolo Manauom Ngeni Kot Me Om Papataiselo

¹⁰ Chechchemeni mwo pwe ka fen fangolo manauom ngeni Kot lon iotek, pwe kopwe angang ngeni fan tuppwol tori feilfeilo. (Juta 20, 21) Fangolo manau a wewe ngeni pwe sia kaimufesen are imuseni ekkewe ekkoch fan iten eu popun mi pin. (Lifitikos 15:31; 22:2) Om pwon esap fan iten fansoun mwochomwoch chok are eu pwon ngeni aramas. Ka fangolo manauom ngeni ewe Epinikepisom tori feilfeilo, me om apwonueta om pwon a wewe ngeni om tuppwol ngeni Kot lon unusen manauom. Ewer, ‘are sia manau are malo, nge sia chok noun ewe Samol.’ (Rom 14:​7, 8) Ach pwapwa a alongolong won ach anomukich fan letipan me ach sopweilo le angang ngeni ren letip mi nukuchar.

¹¹ Chechchemeni fansoun meinisin pwe om papatais esissinnen om fangolo manauom ngeni Kot. Esor a erianuk, nge ka pwisin filata pwe kopwe papatais. Ka uppos pwe filiom me fofforum repwe tipeeu ngeni letipen Kot ren manauom meinisin? Ka fen tingorei Kot fan iten mwelien letip mi limelimoch me ka papatais ren esissinnen om fangolo manauom ngeni. Amwochu ena mwelien letip mi murinno ren om apwonueta om pwon, me feiochun Jiowa epwe nonnom reom.​—An Salomon Fos 10:22.

Filiom A Lamot

¹² Pwungun pwe ar fangolo manauer ngeni Kot me papatais a fen atoto feioch watte ngeni fite milion aramas won unusen fonufan. Lupwen sia esissinnata ach fangolo manauach ngeni Kot ren papatais, sia malo seni lapalapach me loom nge ese wewe ngeni pwe sia poutalo pwisin letipach. Ussun chok chon luku mi kaeo ewe enlet, sia wesewesen fori alon pwisin letipach lupwen sia fangolo manauach ngeni Kot lon iotek me papataiselo. Fangolo manau ngeni Kot me papatais a wewe ngeni ach kaeo letipen Kot me mwirin ach wesewesen filata le fori letipen Kot. (Efisus 5:​17) Iei ussun sia appiru Jises, ewe emon a apwonueta pwisin letipan lupwen a likitaalo ewe angangen taiku, papataiselo, me unusen fori letipen Seman we lon lang.​—Kol Fel 40:​7, 8; Jon 6:​38-​40.

¹³ Jiowa Kot a akkota pwe Noun we epwe “aunusochulo ren riaffou.” Ina popun a lamot an Jises filata pwe epwe likiitu fan ekkena riaffou fan tuppwol. An epwe fori ena, a “iseta an kewe iotek o a tingormau le pupuchor chapur, eti chonun mesan, . . . iwe, Kot a auselinga i pokiten an menniniti i.” (Ipru 2:​10, 18; 5:​7, 8) Ika sia niueiti Kot ussun chok Jises, Kot epwe pwal “auselinga” kich, me sia tongeni luku pwe Jiowa epwe anukuchara kich ussun noun kewe Chon Pwarata.​—Aisea 43:10.

Kopwe Tongeni Amwochu Eu Letip Mi Nukuchar

¹⁴ Met epwe alisuk le amwochu eu letip mi nukuchar me apwonueta om pwon ngeni Kot? Kopwe alleani ewe Paipel iteiten ran ren om kopwe alapalo om silei an Kot we Kapas. Iei eu mettoch ewe “mwich mi tuppwel o tipatchem” a peppeseikich sipwe fori. Ena esin emmwen a kawor pokiten a lamot ach sipwe feffetal lon an Kot enlet ika sia mochen apwonueta ach pwon. Ika an Jiowa mwicheich a tipeeu le esilefetalei luku mi mwaal, esap pesei Chon Pwarata Jiowa me chokkewe ra afalafal ngeni pwe repwe alleani ewe Paipel.

¹⁵ Lupwen sia wiisen filata, ekieki mwo epwe ifa ussun filiach epwe kku ach apwonueta ach pwon ngeni Jiowa. Eli filiach a weneiti ach angang pwe sipwe atufichikich. Ka achocho pwe om angang a alisata feffeitaan fel mi enlet? Inaamwo ika lape ngeni ekkewe manager ra eani lukuluk won tinikkenin me angangochun nour kewe chon angang Chon Kraist mi fen fangolo manauer ngeni Kot nge, ra pwal kuna pwe rese kon ekiekin ar repwe feffeita lon business me rese pwal emmis ngeni ekkewe ekkoch chon angang fan iten ar repwe angei wiiser mi tekia. Ra ina ussun pokiten minne Chon Pwarata ra achocho ngeni esap fan iten repwe wouoch, itefoulo, itoch, are foummong. Fan iten chokkewe mi apwonueta ar pwon ngeni Kot, ar foffori letipen Kot ina ewe mettoch mi lamot seni meinisin. Eu angang mi atufichi manauer esap ina ewe mettoch mi lamot seni meinisin. Ussun chok ewe aposel Paul, ar angangen afalafal ina ewe mettoch mi lamot seni meinisin. (Fofor 18:​3, 4; 2 Tesalonika 3:​7, 8; 1 Timoti 5:8) Ka akkomwa mettochun ewe Muu lon manauom?​—Mattu 6:​25-​33.

¹⁶ Eli ekkoch ra unusen osukosuk ren sokkopaten aurek mwen ra kaeo ewe enlet. Nge letiper a ur ren pwapwa, kilisou, me tong fan iten Kot lupwen ra etiwa ewe apilukulukun Muu! Ar ekkekieki ussun ekkewe feioch a toriir seni ena atun epwe alisiir le apwonueta ar pwon ngeni Jiowa. Nge, epwe ifa ussun ika aurek watte ussun chommong osukosuken manau a pwoluelo “an Kot Kapas,” ussun chok folufol ra pinei maritaan ekkewe pwikil? (Luk 8:​7, 11, 14; Mattu 13:22; Mark 4:​18, 19) Ika ka meefi pwe ina met a poputa le fis ngonuk are om famili, likiti ngeni Jiowa om kewe osukosuk me tingorei pwe epwe alisuk le maarita lon tong me kilisou. Ika ka likiti ngeni osom kewe, epwe alisuk me epwe ngonuk ewe pochokkul pwe kopwe tongeni sopweilo om angang ngeni ren pwapwa me letip mi nukuchar.​—Kol Fel 55:22; Filipai 4:​6, 7; Pwarata 2:4.

¹⁷ Ikkiotek ngeni Jiowa Kot iteitan, ussun chok ka iotek atun ka fangolo manauom ngeni. (Kol Fel 65:2) Lupwen a toruk sossot le fori minne mi mwaal are lupwen ka kuna riaffou watte, kutta an Kot emmwen me tingor fan iten an we alillis ren om kopwe apwonueta. Chechchemeni ewe lamoten luku, ussun ewe chon kaeo Jemes a makketiu: “Are emon leimi mi osupwang ren tipatchem [pwe epwe likiitu fan sossot], iwe, epwe tingor ren Kot, ewe mi limmol ngeni aramas meinisin, nge ese laleiti emon; iwe, epwe angei. Nge epwe tingor ren luku, o esap tipemwaramwar. Pun aramas mi tipemwaramwar ra usun chok ekkewe noon le set mi asapwal a filieiti o amokutukutu.” (Jemes 1:​5-8) Ika a ussun ita pwe ewe sossot a kon chou, sia tongeni eani lukuluk won ei mettoch: “Esor eu sosot mi torikemi, pwe ekkewe chok mi fen tori aramas meinisin. Kot mi tuppwel, o esap mut ngenikemi sokkun sossot mi lap seni ami tufich, nge ren ekkewe sosot, epwe forata alen angasakemilo, pwe oupwe tongeni pworacho ngeni.”​—1 Korint 10:13.

¹⁸ Nge epwe ifa ussun ika eu tipis watte le monomon a aosukosuka miritin letipom me a apwangapwangaalo om uppos le apwonueta om pwon ngeni Kot? Ika ka aier, om silei pwe Jiowa ‘esap nioput eu letip mi ta o mi wililo’ epwe auruuru letipom. (Kol Fel 51:17) Kutta alillisin ekkewe elter Chon Kraist mi tong, pokiten ren ar appiru Jiowa​—resap alamotongaua om mochen ririochsefal me Semom lon lang. (Kol Fel 103:10-​14; Jemes 5:​13-​15) Iwe, pokiten om pochokkulsefalilo lon pekin ngun me eu letip mi nukuchar, kopwe awenechara ewe aal ka feffetal won me kopwe apwonueta om pwon ngeni Kot.​—Ipru 12:12, 13.

Sopweilo Om Angang Ren Eu Letip Mi Nukuchar

¹⁹ Lon ei fansoun weires, a lamot pwe sipwe achocho le apwonueta ach pwon me sopweilo le angang ngeni Kot ren letip mi nukuchar. Jises a apasa: “Nge are emon epwe likiitu tori sopolon, iwe, epwe manau.” (Mattu 24:13) Pokiten sia manau atun ekkewe “ran le sopolon,” ewe sopwolon epwe tongeni feito ese lifilifil ineet. (2 Timoti 3:1) Pwal och, esor emon leich mi tongeni silei ika sipwe chuen manau lesor. (Jemes 4:​13, 14) Ina popun a fokkun lamot pwe sipwe apwonueta ach pwon ikenai!

²⁰ Ewe aposel Piter a menlapei ei poraus lon noun we oruuen taropwe. A pwarata pwe ussun chok chokkewe rese silei Kot ra malo lon ewe Nooter, ewe fonufan lon kapas awewe, are ewe mwichen aramas mi ppwor, epwe talo lon “ranin Jiowa.” Iwe, Piter a apasa: “Met sokkun aramas ami oupwe wiliti lon manauemi mi fel o mi fich ngeni Kot”! A pwal peseer: “Ami mi achengicheng, pokiten oua fen sinei ekkeei mettoch me lom, oupwe tumunukemi pwe oute mwalilo [ren ekkewe sense mi chofona me aramas rese luku Kot] are turutiu seni ami likiitu.” (2 Piter 3:​5-​17) A mmen solap ika emon mi fen papatais a rikilo me malo lupwen ese amwochu eu letip mi nukuchar!

²¹ Om uppos le apwonueta om pwon ngeni Kot epwe pochokkulelo ika kopwe chechchemeni ewe ranin om papatais mi apwapwa me kutta an Kot alillis pwe om kewe kapas me fofor repwe apwapwai letipan. (An Salomon Fos 27:11) Jiowa ese alichipungu noun kewe aramas, ina popun sipwe tuppwol ngeni. (Kol Fel 94:14) A pwarata umoumoch me tong lupwen a aosukosuka kokkotun ekkewe chon oput ren an epwe angasalo Tafit. Pokiten an kilisou, Tafit a pwarata an uppos, me uwenewenetaan an tong fan iten noun we Chon Angasalo. A kol seni alollolun letipan: “Kot, letipei mi lukuchar, letipei mi chok nukuchar! Upwe kokol, o upwe pwal foruta kol!”​—Kol Fel 57:7.

²² Ussun chok Tafit, Chon Kraist mi enlet rese rikilo seni ar fel ngeni Kot. Ren letip mi nukuchar, ra luku pwe Jiowa ewe a angasereelo me tumunuur, ewe emon ra kolun mwareiti ren pwapwa. Ika letipom a nukuchar, epwe lukuluk won Kot, me ren an alillis kopwe tongeni apwonueta om pwon. Ewer, kopwe ussun chok ewe “emon mi pung” ewe sou mak kol a kol ussun: “Esap niuokusiti rong ingau; letipan mi lukuchar, a chok luku ewe SAMOL.” (Kol Fel 112:​6, 7) Ren om luku lon Kot me om unusen eani lukuluk won i, kopwe tongeni apwonueta om pwon me kopwe sopweilo le angang ngeni Jiowa ren letip mi nukuchar.

Ka Chechchemeni?

• Met popun sipwe sopweilo le angei sile mi enlet ussun ewe Paipel?

• Met popun sipwe ekkekieki ussun ach aier me soulengilo?

• Ifa ussun sia feioch seni ach chechchemeni ach fangolo manauach ngeni Kot me papatais?

• Met epwe alisata ach akkangang ngeni Jiowa ren letip mi nukuchar?

2, 3. Met weween an Paul kapasen pesepes a mak lon 1 Korint 16:13?

4. Met sokkun mettoch sia fori akkom mwen sia papatais ussun chok emon Chon Kraist?

5. Pwata sipwe sopweilo le angei sile seni ewe Paipel?

6. Ifa ussun ka fen angei alillis le aucheani ewe enlet seni Paipel?

7. Met a atufichi emon le asukula aramas ewe enlet seni Kot?

8. Ifa ussun sipwe tongeni amwochu ekkewe foffor mi fich ngeni Kot?

9. Met sokkun manau sipwe manaueni mwirin ach poutalo ekkewe foffor mi tipis?

10. Met sokkun mettoch sipwe ekkieki ussun ach fangolo manauach ngeni Kot?

11. Met popun kopwe chechchemeni om papatais me aucheaan om papatais?

12, 13. Ifa ussun pwisin letipach a riri ngeni ach fangolo manauach ngeni Kot me papatais?

14. Met popun sipwe alleani ewe Paipel iteiten ran?

15. (a) Met sipwe ekieki ussun lupwen mei wor ach kefil? (b) Pwata sia tongeni apasa pwe ewe angang sia fori esap ina ewe mettoch mi lamot seni meinisin lon manauach?

16. Met sipwe tongeni fori ika aurek watte a kon aweiresi ach apwonueta ach pwon ngeni Kot?

17. Ifa ussun sipwe tongeni likiitu fan sossot watte?

18. Met sipwe tongeni fori ika och tipis sia fori le monomon a apwangapwangaalo ach mochen apwonueta ach pwon ngeni Jiowa?

19, 20. Pwata a lamot ach sipwe sopweilo le apwonueta ach pwon ngeni Kot?

21, 22. Ifa ussun ekkewe kapas lon Kol Fel 57:7 a wesewesen pwonueta lon manauen Tafit me lon manauen ekkewe Chon Kraist mi enlet?

[Pictures on page 28]

Ach akkomwa lon manauach an Chon Kraist angangen afalafal epwe alisikich le angang ngeni Jiowa ren letip mi nukuchar

[Picture on page 28]

Ka tumunu om pochokkul lon pekin ngun ren om akkalleani an Kot Kapas iteiten ran?