Auruur Fan Iten Chokkewe Mi Riaffou
SOU KAEO lamalam me sou ekiek ra fen pwungupwung won ewe popun Kot a fen mut ngeni an aramas riaffou ren eu fansoun mi langattam. Ekkoch ra fen apasa, pokiten ar silei pwe Kot a manaman seni meinisin, pwe sipwe tipi ngeni Kot ren ewe popun aramas ra kukkuna riaffou. Ewe emon a makkei The Clementine Homilies, eu poraus chon Kraist ra makkei atun ewe oruuen senturi nge ese kapachelong lon ewe Paipel, a era pwe Kot a nemeni fonufan ren poun kewe ruuefoch. Ren “poun peliefefin,” ewe Tefil, a efisata riaffou me osukosuk, me ren “poun peliemwan,” Jises, a amanaua me efeiochu aramas.
Pwal ekkoch, pokiten rese tongeni luku pwe Kot a mutata riaffou inaamwo ika ese efisata riaffou, ra luku pwe esor och riaffou. Mary Baker Eddy a makkei: “Ingau a ussun chok onottan mi ngau, esor longolongun. Ika aramas repwe eani ekiek pwe tipis, semmwen, me malo ra ussun chok esor, repwe morolo.”—Science and Health With Key to the Scriptures.
Pokiten ekkewe foffor mi eriaffou aramas ra fen fiffis, akkaewin seni ewe aewin maunen fonufan, chommong ra fen eani ewe ekiek pwe Kot ese tongeni pinei an aramas riaffou.
Iwe nge, an aramas kewe luku pwe Kot a alisata fisitaan riaffou, pwe ese tongeni pinei an a fiffis, are pwe riaffou ese wesewesen fisita, ese tongeni auruuru chokkewe mi riaffou. Me ekkena luku ra unusen mwaalfesen me lapalapen Kot kewe ra pwalo ngenikich lon ewe Paipel chowean pwung, manaman, me tong. (Hiop 34:10, 12; Jeremaia 32:17; 1 Jon 4:8) Iwe, met a mak lon ewe Paipel ussun ewe popun a fen mutata riaffou?
Ifa Ussun Riaffou A Poputa?
Kot ese forata aramas pwe repwe riaffou. Pwungun pwe a ngeni ewe aewin pean aramas, Atam me If, tupuwer me inisir mi unusoch, me a ammonlata eu malamal mi ling repwe nonnom lon, me och angang mi auchea repwe angang ngeni. (Keneses 1:27, 28, 31; 2:8) Iwe nge, sopwosopwolon ar pwapwa a alongolong won ar etiwa an Kot emmwen me an pwungun filata minne mi pwung me mwaal fan iter.
A solap pwe Atam me If rese mochen alleasochisi Kot. Emon chonlang mi u ngeni Kot, Setan ewe Tefil, a etipetipa If an epwe mongo seni ewe iraan “silei och me ngau.” (Keneses 2:17) If a tupulo ren ekiekin an epwe pwisin uta, me a ani ewe uwan ira mi pinei seni, me ekiselo chok Atam a fori ussun we chok.
Pokiten ar poutalo nemenem seni lang, Kot a atowu Atam me If seni ewe Paratis me a poputa ar meefi semmwen, metek, chinnap, me malo. Riaffou a fen wiliiti ewe mettoch aramas meinisin ra meefi.—Keneses 5:29.
Pwakiloon Ewe Popun Alongolongun Kapwung
Eli emon epwe eis, ‘Pwata Kot ese tongeni chok tunalo an Atam me If we tipis?’ Iwe, esap tongeni chok tunalo ewe tipis pokiten an fori ena epwe apwangapwangalo sufol fan iten an nemenem, me epwe tongeni alisata pwal ekkoch ar repwe u ngeni Kot me alapalo riaffou. (An Salomon Afalafal 8:11) Pwal och, an apasa pwe ‘ina chok’ lupwen aramas ra alleasolap, epwe wewe ngeni pwe a ussun ita Kot a chiechi ngeni ewe fofforingau. Ika Kot epwe mwokutukut me ren pwisin an kapasen alongolongun alluk, epwe wiisen mut ngeni Atam me If ar repwe kuna liwinin ar alleasolap.
Met popun Kot ese chok muttir nnielo ewe aewin pupulu fengen me Setan, ewe emon mi monomon a peseer ar repwe u ngeni Kot? Ren watteen an manaman Kot a tufichin fori ena. Ika a fen fori, esap wor mwirimwirin Atam me If mi alemwiri riaffou me malo seniir. Iwe nge, ena esin pwaraloon manamanen Kot esap anneta ewe pwungun an Kot nemenem won forian kewe meinisin mi mirit. Pwal och, ika Atam me If ra fen malo mwen ar nounou, epwe ussun ita pwe Kot a kkuf ren an we kokkot pwe fonufan epwe masou ren aramas mi unusoch. (Keneses 1:28) Pwal och “Kot esap ussun chok aramas . . . Met a pwonei, a fori; a fos, me a pwonuta.”—Numperis 23:19, Today’s English Version.
Fan an tipatchem mi unusoch, Jiowa a filata an epwe mut ngeni an aramas u ngeni an epwe sopwosopwolo ren och fansoun mi aukuk. Epwe naf ewe fansoun ekkewe chon u ngeni repwe meefi mwiriloon ar u ngeni Kot. Uruwo epwe pwarata an aramas osupwangen emmwen seni lang me ochchun an Kot nemenem mwen an aramas are an Setan nemenem, nge esap wor och tipemwaramwar.
Wesiloon Riaffou
An aramas poutalo an Kot nemenem a fen efisata riaffou wachemuk. A murinno pwe Kot epwe pwaralo an nemenem lon eu lapalap mi sokkolo auchean lupwen epwe awesalo an aramas riaffou me apwonueta letipan won fonufan, ewe a fen kkotolo seni le poputaan. Jises a awewe won kaworen Kot mi sokkolo auchean lupwen a fen aiti ngeni noun kewe ifa ussun repwe iotek: “Semem mi nonnom lang, . . . muom epwe feito, letipom epwe pwonueta, won fonufan usun chok lon lang.”—Mattu 6:9, 10.
Epwele muchulo ewe fansoun Kot a mutata an aramas sotun pwisin nemenemeniir. Ren pwonutaan ewe oesini lon Paipel, Muun we a fen fisita lon lang lon 1914 ren an we King, Jises Kraist. Ekiselo chok, ena Muu epwe arosalo me awesalo an aramas kewe muu meinisin.—Taniel 2:44.
Atun an afalafal mi mwochomwoch won fonufan, Jises a fen alisikich ach sipwe weweiti ekkewe feioch sipwe kuna seni fforsefallin nemenem seni lang. Ekkewe puken Kapas Allim ra awora pisekin annet pwe Jises a tongei aramas mi riaffou. A apochokkula chokkewe mi semmwen, a amongooni chokkewe mi echik, me a amanauata ekkewe mi malo. Pwal mwo nge ewe asapwal me saat ra alleasochisi i. (Mattu 11:5; Mark 4:37-39; Luk 9:11-16) Anchangei mwo met Jises epwe apwonueta lon mwach kkan! Ewe Paipel a pwon pwe fan nemenien Kraist, Kot “epwe tolu seni meser chonun meser meinisin, o esap chuen wor malo, are akurang, are metek, pun ekkewe mettochun lom ra fen morelo.”—Pwarata 21:4.
Auruur Fan Iten Chokkewe Mi Riaffou
Ach silei pwe ewe Kot mi tong me manaman, Jiowa, a tongeikich me, ekiselo chok, epwe awesalo an aramas riaffou, a apochokkulakich! Kopwe luku pwe kopwe tongeni angei ekkewe feioch Muun Kot epwe wato ika kopwe auselinga an ewe Paipel fon: “Oupwe kutta ewe Samol mi Lapalap lupwen oua tongeni kuna, oupwe kori, lupwen a arap.”—Aisea 55:6.
Om akkomwa lon manauom allean me kaeoon an Kot we Kapas epwe alisuk le fori ena. Kopwe silei Kot me ewe emon a tiinato, Jises Kraist. Achocho ngeni om manaueni manauom me ren an Kot kewe minen aukuk me iei ussun, kopwe pwaralo om tipemecheres om kopwe anomuk fan an Kot nemenem. Ena sokkun manau epwe atoto ngonuk pwapwa iei mwo, pwal mwo nge lupwen ekkewe sossot kopwe kuna. Me lon mwach kkan, epwe atufichi om pwapwaiti manauom lon eu fonufan ikewe ese chuen wor riaffou ie.—Jon 17:3.
[Picture on page 5]
Atam me If ra poutalo an Kot nemenem