Ekkewe Sarafo Mi Apwapwai Letipen Jiowa
Ekkeei lesen ra ffor akkaewin fan iten ekkewe sarafo lein Chon Pwarata Jiowa. Ina popun, sia peseikemi sarafo oupwe kaeofichi ekkeei lesen me uwawu meefiemi lupwen ewe mwichefel a kaeo ei lesen lon Ewe Leenien Mas.
“Nei, kopwe tipachem o apwapwai lelukei, pwe upwe tongeni palueni atewe mi aitengauaei.”—An Salomon Fos 27:11.
1, 2. Awewei mwo ika pokiten ka saani ekkewe mettochun fonufan esap fich ngonuk om kopwe wiliiti chon Kraist. (Rom 7:21)
ANCHANGEI mwo pwe ka shop fan iten ufom kewe. Atun om katonfetal, ka kuna echo uf ka fokkun saani. A ussun ita pwe ewe anuan me stylin a fokkun fich ngonuk, me a pwal kukkun liwinin. Nge mwirin ka chekiochu ewe uf. Ka mairu lupwen ka kuna pwe ewe mangak a matatar le pwunun, me ese kon teeteoch. Inaamwo ika ka fokkun saani nge, ese och. Kopwe ita mooni ena esin pisek?
2 Alollofengenni mwo ena poraus ngeni met epwe tongeni fis ngonuk, emon sarafo chon Kraist. Le poputaan, ekkewe mettoch lon ei fonufan—ussun chok ena uf—ra nikinikin murinno. Ren chok awewe, eli chienom kewe lon sukul repwe fiti pari mi apwapwa, aea safeien opuchopuch, un sakau, date, me lisowu mwaal. Fan ekkoch, ka pwal mochen fori? Ka pwal mochen ekis neni pwapwaan manauer? Ika pwe wuu, kesap muttir ekieki pwe en emon aramasingau me ese fich ngonuk om kopwe wiliiti emon chon Kraist. Pun ren enletin, ewe Paipel a apasa pwe etipetipaen fonufan a fokkun pochokkul—pwal mwo nge ngeni emon mi mochen apwapwai Kot.—2 Timoti 4:10.
3 Iei mwo, kose mochen nengeniochu met ei fonufan a awora, ussun chok om chekiochu echo uf ka mochen mooni. Iwe, pwisin eisinuk, ‘Ifa lapalapen ei otot?’ Ewe Paipel a apasa pwe “ewe fonufan epwe morelo.” (1 Jon 2:17) Ewe pwapwa sipwe angei seni fonufan esap nommottam. Pwal och, liwinin fofforingau a fokkun watte. Ese wewe ngeni eu feioch. Emon chon Kraist mi likiitu fan met a eita ngeni “ewe riaffou mi feito seni an aeamwaalli ewe fansoun le kukkunun,” a apasa: “Ewe fonufan a nikinikin apwapwa me ameseik. A mochen kopwe luku pwe kopwe angei pwapwaan fonufan nge esap fiti metek. Nge ese tufich ena. Ewe fonufan epwe chok nounou en, nge lupwen a wes le nounou en, epwe poutukolo.” Pwata kopwe asolapa om fansoun le kukkunum won ena esin manau mi ngau?
Tumun Seni “Ewe Mi Ingau”
4 Ekkewe sarafo me lein Chon Pwarata Jiowa ra miritiiti pwe ei otot ese tongeni awora och mettoch mi murinno, ina popun rese mochen chiechi ngeni ei fonufan. (Jemes 4:4) En emon lein ekkeei sarafo mi tuppwol? Ika pwe wuu, sia mochen apungok. Pwungun pwe ese mecheres om kopwe u ngeni etipetipaen chienom kewe me ese mecheres om kopwe sokkolo seniir, nge mei wor emon epwe tongeni alisuk.
5 Ekiselo chok mwen Jises a malo, a iotek pwe Jiowa epwe “amwochu” noun kewe chon kaeo pokiten “ewe mi ingau.” (Jon 17:15) Mei wor popun mi murinno Jises a tingor iei ussun. A silei pwe esap mecheres fan iten noun kewe chon kaeo ar repwe tuppwol, ese lifilifil ierir. Met popun? Eu popun, ussun chok met Jises a fen apasa, mei wor emon chon oputa noun kewe chon kaeo—“ewe mi ingau,” Setan ewe Tefil. Ewe Paipel a apasa pwe ei ngun mi ngau “a fefeilfetal usun chok emon laion mi orior, o a kukutta emon pwe epwe oromalo.”—1 Piter 5:8.
6 Lon unusen uruwoon fonufan, Setan a pwapwaesini an wato foffor mi fokkun ngau ngeni aramas. Ekieki mwo ekkewe riaffou watte Setan a wato ngeni Jop me an we famili. (Hiop 1:13-19; 2:7) Eli ka fen rongorong porausen fonufan lon anein manauom mi lapalapeni lapalapen Setan mi mwanesol. Ewe Tefil a feilfetal ren an epwe oromalo emon, me ese umoumoch ngeni ekkewe sarafo. Ren chok awewe, le poputaan ewe aewin senturi C.E., Erot a ekiekin nnielo ekkewe at, ruu ierir are kis seni, lon Petleem. (Mattu 2:16) Ese mwaal pwe Setan a amwokutu Erot ren an epwe nnielo ewe at epwe wiliiti ewe Mesaia mi pwonetiu lon mwach kkan me wato an Kot kapwung won Setan! (Keneses 3:15) A ffat pwe Setan ese tongei ekkewe sarafo. A chok mochen oromalo aramas meinisin. Ena poraus a fokkun pwung akkaewin iei, pokiten Setan a fen koturutiu fonufan, “lon an song mi lap, pun a sinei pwe an we fansoun a chok mochomoch.”—Pwarata 12:9, 12.
7 An Setan “song mi lap,” a fokkun mwaalfesen me an Jiowa ‘umoumoch.’ (Luk 1:78) Jiowa a pwarata tong mi lap seni meinisin. Ren enletin, pokiten ach Chon Forata a fokkun lapalapeni ei lapalap, ewe Paipel a apasa: “Kot mi tong.” (1 Jon 4:8) A ifa me watteen sokkofesennin ewe koten ei otot me ewe Kot ka tongeni fel ngeni! Setan a mochen oromalokich, Jiowa “ese mochen pwe emon epwe poutmwalilo.” (2 Piter 3:9) A ekieki pwe manauen aramas meinisin mi auchea—kapachelong manauom. Lupwen Jiowa a peseok lon an Kapas pwe kopwe imulo seni fonufan, ese sotun ekisalo om pwapwaiti manauom are aukuku om ngaselo. (Jon 15:19) Nge, a tumunuk pokiten ewe mi ingau. Semom lon lang a mochen och mettoch mi murinno seni ewe pwapwaan fonufan mi muttir morolo. A mochen pwe kopwe angei ewe “manau mi enlet”—manau esemuch lon paratis won fonufan. (1 Timoti 6:17-19) Jiowa a mochen pwe kopwe sopwoch, me a peppeseok pwe kopwe achocho ngeni ena. (1 Timoti 2:4) Pwal och, mei wor an Jiowa etiwetiw fan itom mi sokkolo lapalapan. Met ena?
“Apwapwai Lelukei”
8 Ka fen kamo eu liffang fan iten emon chienom me mwirin ka atola lupwen a mesan emelimel ren an pwapwa me kilisou lupwen a angei? Ese mwaal ka ekiekifichi ussun met sokkun liffang epwe murinno fan iten emonnewe. Iwe, iei kopwe ekieki ussun ei kapas eis: Met sokkun liffang kopwe tongeni ngeni ewe mi Foruketa, Jiowa Kot? Le poputaan, sia ekieki pwe mi tiparoch ach eani ena esin ekiek. Met sokkun mettoch ewe Mi Lapalap Seni Meinisin a osupwang seni aramas? Met ese fen nonnom ren kopwe tongeni ngeni? Ewe Paipel a polueni lon An Salomon Fos 27:11: “Nei, kopwe tipachem o apwapwai lelukei, pwe upwe tongeni palueni atewe mi aitengauaei.”
9 Ese mwaal ka fen silei seni om kaeo lon ewe Pailel pwe Setan ewe Tefil ewe mi esiita Jiowa. Setan a apasa pwe aramas mi angang ngeni Kot ra chok fori, esap pokiten tong, nge pokiten met repwe angei seni. Alon Setan, pwe repwe muttir likitalo fel mi limelimoch ika repwe riaffou. Ren chok awewe, ekieki mwo met Setan a apasa ngeni Jiowa ussun ewe mwan mi pwung itan Jop: “Ifa usun, kosap tiela inisin me chon leimwan, pwal meinisin mine a eani seni feiengau? Ka afeiochu angangen poun pwe noun pwiin sip me kow ra chomongola won ewe fanu. Nge kopwe aitiela poum o atapa meinisin mine a eani, murin epwe fokun amamasinuk.”—Hiop 1:10, 11.
10 Ussun chok a pwalo lon ei poraus lon ewe Paipel, Setan a efisata tipemwaramwar esap chok ussun an Jop tuppwol nge pwal ussun tuppwolun ir meinisin mi angang ngeni Kot—kapachelong en. Pwungun pwe, a kapas ussun aramas ese lifilifil lupwen a ereni Jiowa: “Eman aramas [esap Jop chok nge ese lifilifil io] epwe fangala meinisin mine a eani fan iten manauan.” (Hiop 2:4) Ka kuna wiisom lon ei popun alongolongun kapwung mi lamot? Ussun a mak lon An Salomon Fos 27:11, Jiowa a apasa pwe mei wor och mettoch kopwe tongeni ngeni i—eu popun epwe tongeni polueni ewe mi aitengaua i, Setan. Ekieki mwo—ewe Sou Nemenemen Mettoch Meinisin a tingoreok om kopwe angolong lon kaworen poluen ewe popun alongolongun kapwung mi lap seni meinisin. A ifa me watteen wiisom me ewe tufich mi sokkolo lapalapan a suuk ngonuk! Kopwe tongeni apwonueta met Jiowa a tingoreok om kopwe fori? Jop a fen fori. (Hiop 2:9, 10) Jises me pwal chommong seni me loom tori ikenai ra fori, kapachelong chommong sarafo. (Filipai 2:8; Pwarata 6:9) Kopwe pwal tongeni fori. Nge, pwungun pwe esor emon a tongeni nonnom lefilen ekkewe ruu pekin. Ren om kewe foffor, kopwe pwarata pwe ka alisata an Setan esiita Kot are an Jiowa polueni Setan. Menni kopwe filata?
Jiowa A Tongeok!
11 Filiom a lamot ngeni Jiowa? Esap pwe a fen naf choochoon ekkewe aramas mi tuppwol pwe Kot epwe polueni Setan? Pwungun pwe ewe Tefil a apasa pwe esor epwe angang ngeni Jiowa pokiten tong, nge a fen affat pwe met a apasa ese pwung. Nge, Jiowa a mochen pwe en kopwe peni i lon ei popun alongolongun kapwung mi weneiti an pwungun nemenem pokiten a tongeok. Jises a apasa: “Esap iei tipen Semei we mi nonnom lang, pwe emon me lein ekkewe mi kisikis epwe poutmwalilo.”—Mattu 18:14.
12 A ffat pwe Jiowa a fokkun mochen silei menni aal kopwe filata. Nge met a lamot seni ena, ifa ussun filiom epwe kku Jiowa. Ewe Paipel a affata pwe fofforochun are fofforingauen aramas a kku letipen Jiowa. Ren chok awewe, lupwen ekkewe chon Israel ra chok ukku ngeni, “ra achou” Jiowa. (Kol Fel 78:40, 41) Mwen ewe Nooter lon ranin Noa we, lupwen ‘an aramas foforingau a fokun watte,’ Jiowa ‘a fokun weires lon letipan.’ (Keneses 6:5, 6) Ekieki mwo weween ei poraus. Ika ka filingau, kopwe tongeni akinasa om Chon Forata. Sap minne pwe Kot mi apwangapwang are a mwokutukut chok me ren meefian. Nge, a tongeok me a ekieki met epwe efeiochuk. Iwe, ika ka filioch, ka apwapwai letipen Jiowa. A pwapwa esap chok pwe a chuen tongeni polueni Setan nge, pokiten iei epwe tongeni wiliiti ewe Chon Efeiochuk. A ina an mochen. (Ipru 11:6) Mwa met ren watteen an Semom, Jiowa Kot tong fan itom!
Chommong Feioch Iei
13 Ekkewe feioch seni ach angang ngeni Jiowa esap chok fan iten mwach kkan. Chommong sarafo lein Chon Pwarata Jiowa ra feioch ren pwapwa me menemenoch iei. Met popun? Ewe soumak kol mi fel a makkei: “Ekkewe afalafal me ren ewe SAMOL mi chok pung, ra apwapwai letipach.” (Kol Fel 19:8) Jiowa a sileilapei met epwe ochutikich. Ren ewe soufos Aisea, Jiowa a apasa: “Ngang ewe Samol mi Lapalap om we Kot. Ua aiti ngonuk mine kopwe feioch ren, ua pwal emweni ngonuk ewe al kopwe fetal won. Amwo kopwe auselinga ai kewe alluk! Murin om kinamwe epwe wewe ngeni eu chanpupu, nge om pwung epwe wewe ngeni nomongun lematau.”—Aisea 48:17, 18.
14 Om alleasochisi ekkewe kapasen alongolongun alluk lon Paipel epwe alisata om ti sonuk riaffou me letipechou. Ren chok awewe, ewe Paipel a apasa pwe chokkewe mi amaaraata tongen moni “a tu ngeni letiper chommong sokkun lolilen.” (1 Timoti 6:9, 10) Mei wor chienom kewe mi fen feiengau pokiten ar tongei moni ussun chok a mak lon ei wokisin? A watte an ekkoch sarafo liwinimmang pokiten a lamot ngeniir ar repwe ufouf ekkewe uf minefo me ekkewe minefo computer me metakan. Om wiisen awesi om liwinimmang mi watte manauan lupwen ese naf om moni a ussun chok pwe ka fen wiliiti chon kichiniwel!—An Salomon Fos 22:7.
15 Kopwe pwal ekiek ussun lisowu mwaal. Won unusen fonufan iteiten ier, chommong sarafo mi lipich ra pwopwo. Ekkoch ra nounatiu emon monukol nge rese mochen me rese tufichin foleni. Ekkoch ra nnielo ewe monukol lon luker me mwirin mwelien letiper a eriaffour. Mei pwal wor ekkewe sarafo mi uriir semmwenin sikepwach mi chou, ussun chok AIDS. Pwungun pwe, fan iten emon mi silei Jiowa, ewe uwa mi lapalap seni meinisin ina kataloon an ririoch me Jiowa.a (Kalesia 5:19-21) Ina ewe popun ewe Paipel a apasa: “Oupwe su seni lisou.”—1 Korint 6:18.
Angang Ngeni “Ewe Kot Mi Pwapwa”
16 Ewe Paipel a apasa pwe Jiowa “ewe Kot mi pwapwa.” (1 Timoti 1:11, New World Translation) A mochen pwe kopwe pwapwa. Ren enletin, an we Kapas a apasa: “En alual, kopwe pwapwa le alualum, letipom epwe meseik lon fansoun om alual.” (An Salomon Afalafal 11:9) Nge Jiowa a tongeni kuna met epwe fis lon mwach kkan me a tongeni esinna met foffor mi murinno me fofforingau repwe uwaani. Ina popun a fonouk: “Iwe, lealualum kopwe chechemeni ewe mi foruk, mwen ekewe ran mi ngau repwe feito. Pun epwe war ewe fansoun kopwe apasa usun, ‘Usap fokun efich ei fansoun ua nom lon.’ ”—An Salomon Afalafal 12:1.
17 Ikenai, chommong sarafo ra kuna pwapwa watte lon ar angang ngeni Jiowa. Ren chok awewe, Lina, emon sarafo 15-ierin a apasa: “Mei wor sufoli. Inisi a pochokkul pokiten use un suppwa me aea safeien opuchopuch. A toriei emmwen mi auchea seni ewe mwichefel mi alisiei le u ngeni etipetip mi ngau seni Setan. Mesei a misimis ren pwapwa pokiten chiechi mi murinno lon ewe Kingdom Hall. Nge ewe mettoch mi murinno seni meinisin, mei wor ai apilukulukun manau esemuch won fonufan.”
18 Ussun chok Lina, chommong sarafo chon Kraist ra likiitu lon ewe maun fan iten ewe luku, me ina eu mettoch a atoto ngeniir pwapwa. Ra miritiiti pwe inaamwo ika manauer a weires fan ekkoch nge, manauer mi auchea me apilukulukoch. Ina popun, kopwe sopweilo le angang ngeni ewe Kot mi wesewesen tongeiok. Apwapwai letipan, me i epwe apwapwaiok iei me tori feilfeilo!—Kol Fel 5:11.
[Footnotes]
a A mmen aururukich le silei pwe lupwen emon a aier, ukutiu seni fori mi mwaal, me pwarata an kewe tipis, Jiowa “a muttir le amusala tipis.”—Aisea 55:7.
En Mi Chechchemeni?
• Menni feiengau epwe toruk seni “ewe mi ingau,” Setan?
• Ifa ussun kopwe apwapwai letipen Jiowa?
• Ifa ussun ewe Paipel a pwarata pwe Jiowa a tongeok?
• Ikkefa ekkoch ekkewe feioch a pop seni om angang ngeni Jiowa?
3. (a) Pwata a lamot mwaal ach sipwe cheei ekkewe mettochun fonufan? (b) Ifa ussun emon chon Kraist a awewei lamot mwaallin ach cheei mettochun fonufan?
4, 5. (a) Ekiselo chok mwen Jises a malo, met a tingor ngeni Jiowa? (b) Met popun a murinno an tingor?
6. Ifa ussun sia silei pwe Setan ese tongei ekkewe sarafo?
7. (a) Ifa ussun Jiowa me Setan ra sokkofesen? (b) Met meefien Jiowa ussun om pwapwaesini manauom?
8, 9. (a) Met sokkun liffang ka tongeni ngeni Jiowa? (b) Ifa ussun Setan a esiita Jiowa, ussun chok met sia kuna lon porausen Jop?
10. (a) Ifa ussun sia silei pwe Setan ese chok efisata tipemwaramwar ussun an Jop tuppwol? (b) Ifa ussun ewe kapas eis ussun io a wor an pwungun nemenem a weneituk?
11, 12. Mei lamot ngeni Jiowa ika kopwe filata le angang ngeni? Awewei mwo.
13. Ifa ussun om angang ngeni Jiowa a efeiochuk pwal mwo nge ikenai?
14. Ifa ussun ekkewe kapasen alongolongun alluk lon Paipel ra alisuk le ti sonuk ewe riaffoun liwinimmang?
15. Ifa ussun ekkewe kapasen alongolongun alluk lon ewe Paipel ra tumunuk seni ewe riaffou a feito seni lisowu mwaal?
16. (a) Ifa ussun sia silei pwe Jiowa a mochen pwe kopwe pwapwaesini ewe fansoun le kukkunum? (b) Met popun Jiowa a fori ekkewe alluk pwe kopwe alleasochisi?
17, 18. Ifa ussun emon sarafo chon Kraist a pwaralo an pwapwa le angang ngeni Jiowa, me ifa ussun epwe pwal toruk ena esin pwapwa?
[Pictures on page 9]
Jiowa a ekieki ekkewe mettoch mi efeiochuk, nge Setan a kukkutta an epwe oromokolo
[Picture on page 10]
Chommong sarafo ra kuna ewe pwapwa mi lap seni meinisin ren ar angang ngeni Jiowa me chiener kewe chon Kraist