Kopwe Mammasa Satan A Mochen Oromókóló!

1. Áweweei ifa usun emén chónláng a wiliti Satan.

A WOR atun me lóóm emén chónláng a pwapwaiti an ririéch ngeni Jiowa. Nge mwirin och fansoun, a poputá le mochen aramas repwe fel ngeni. I ese péútaaló an na mochen mi ngaw, nge a fen mut ngeni an epwe lallapóló tori an a tipis ren. (Jas. 1:14, 15) Sia silei pwe iten ena chónláng iei “Satan,” ewe “ese núkúchar lón ewe enlet.” A ú ngeni Jiowa me a wiliti “semen chon chofona.”​—Joh. 8:44; NW.

2, 3. Met ekkewe kapas “Satan,” “Tefil,” ‘serepenit,’ me “trakon” ra áiti ngenikich usun ewe ákkáeúin chón oputa Jiowa?

² Seni ewe atun Satan a ú ngeni Jiowa, i ewe ákkáeúin chón oputa Jiowa, me a pwal oputa aramas meinisin. Ekkewe itelap Satan a iteit seni ra pwáraatá úkúkún watteen ngawan. Satan a wewe ngeni “Chón Ú Ngeni,” weween pwe ena chónláng mi ngaw ese peni án Jiowa pwúúng le nemenem, nge a fen oputa me maun ngeni ren úkúkún an péchékkúl. Ewe mettóch Satan a mochen lap seni meinisin, an epwe muchúló án Jiowa nemenem.

³ Lón Pwärätä 12:9, Satan a pwal iteni Tefil, weween “Chón Pweni.” Ena it a áchema ngenikich pwe Satan a eitengawa Jiowa ren an erá pwe i emén chón chofona. Ewe itiitin kapas “ewe serepenitin lom” a áchema ngenikich ewe fansoun Satan a néúnéú emén serepenit le otupu Efa. Ewe itiitin kapas “trakon mi watte” a áweweei pwe Satan a usun emén manmwacho mi eniweniw, pún a fókkun kirikiringaw me a mochen eppeti minne Jiowa a tipeni me arosaló Néún kewe aramas.

4. Met sipwe káé lón ei lesen?

⁴ A ffat pwe Satan i ewe ákkáeúin chón oput a tongeni eingawaló ach ririéch ngeni Jiowa. Ina popun a lamot án Paipel ei éúréúr: “Oupwe amolakemi o mamasa, pun Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.” (1 Pet. 5:8) Pokiten ena éúréúr, ei lesen epwe pwóróus usun úlúngát napanapen Satan epwe menlapei lamoten ach sipwe túmúnúkich seni ena emén mi ngaw, mi oputa Jiowa me Néún kewe aramas.

SATAN MI MANAMAN

5, 6. (a) Apwóróusa ekkóch pwóróus mi affata pwe ekkewe chónláng ra “manaman.” (b) Met weween án Paipel erá pwe Satan a wor an “nemenem won mäla”?

⁵ Ekkewe chónláng ra “manaman.” (Kölf. 103:20, Testament Mi Fö) Iir ra tekia seni aramas, iwe a watte ar tipachem me péchékkúl seniir. Pwúngún, ekkewe chónláng mi múrinné ra áeá ar manaman ren ekkewe popun mi múrinné. Áwewe chék, lón eú atun emén néún Jiowa chónláng a nieló 185,000 soufiun Asiria. Saminne emén aramas a tongeni féri ena, me epwe pwal mwo nge weires ngeni unusen eú mwichen soufiu. (2 King 19:35) Lón pwal eú atun, emén chónláng a áeá an manaman me tipachem le angasaaló néún Jesus kewe aposel seni lón kalapus. Inaamwo ika ekkewe chón masen imwen fétek ra nónnóm nge rese meefi án ena chónláng suuki lokkun ekkewe asam, atowu ekkewe aposel, me lokkesefálieló ekkewe asam!​—Föf. 5:18-23.

⁶ Ekkewe chónláng mi tuppwél ra áeá ar manaman ren ekkewe popun mi múrinné, nge Satan a áeá an manaman le féri minne mi ngaw. Me a watte an manaman me péchékkúl an etipetip! Paipel a apasa pwe Satan i “samolun ei fanüfan” me “koten ei fanüfan.” (Joh. 12:31; 2 Kor. 4:4) Satan ewe Tefil a pwal mwo nge wor an “nemenem won mäla.” (Ipru 2:14) Esap weween pwe pwisin i a nieló emén me emén aramas. Iwe, met chék weween ena? An oputa aramas me mochen nireló a chéúfetál wóón fénúfan. Pwal eú, pokiten Efa a lúkú án Satan kapas chofona me Atam a álleasolapa Kot, iwe tipis me máló a tori aramas meinisin. (Rom 5:12) Ikkena ekkewe popun Paipel a erá pwe ewe Tefil a wor an “nemenem won mäla.” Jesus a eita ngeni Satan, “eman chon niela aramas.” (Joh. 8:44) A ifan me manamanen ena chón oputakich!

7. Ifa usun ekkewe chónláng mi ngaw ra pwáraaló pwe iir mi manaman?

⁷ Lupwen sia ú ngeni Satan, sia pwal ú ngeni meinisin chienan kewe le álleasolapa án Kot nemenem, kapachelong eú mwichemmongun chónláng mi ngaw mi pwal ú ngeni Kot. (Pwär. 12:3, 4) Fán chómmóng, ekkewe chónláng mi ngaw ra pwáraaló watteen ar manaman ren ar fókkun eriáfféwú chókkewe ra nemeniir. (Mat. 8:28-32; Mark. 5:1-5) Kosap fókkun ekieki pwe a chék kúkkún manamanen ekkena chónláng mi ngaw me ar we sou nemenem. (Mat. 9:34) Ika esap pwúlún Jiowa, sisap fókkun sópwéch lón ach mammaun ngeni Satan.

SATAN A FÓKKUN KIRIKIRINGAW

8. (a) Met Satan a achocho le féri? (Ppii ewe sasing lepoputáán ei lesen.) (b) Ren minne ka pwisin kúna lón manawom, ifa usun ei fénúfan a fókkun kirikiringaw usun chék Satan?

⁸ Ewe aposel Petrus a áwewefengeni Satan me “eman laion mi wörüwör.” Me ren eú puk, ewe kapasen Krik mi afféú ngeni “wörüwör” a wewe ngeni “púchérún emén manmwacho mi fókkun echik” me arochongaw. A ina usun Satan ren fókkun kirikiringawan! Inaamwo ika unusen fénúfan a fen nóm fán nemenien Satan, nge i a chúen usun emén laion mi echik, a chúen mochen pwal ocheei aramas. (1 Joh. 5:19) Satan a kon nefotofot wóón ekkewe mi kepit mi chúen nóm wóón fénúfan, me chiener kewe ‘ekoch sip.’ (Joh. 10:16; Pwär. 12:17) Satan a fókkun mochen arosaló néún Jiowa kewe aramas. Ekkewe riáfféúmwáál meinisin Satan a kan efisi ngeni ekkewe popun Chón Kraist me pwal ngeni ekkewe Chón Kraist ikenái ra pwáraatá úkúkún watteen kirikiringawan.

9, 10. (a) Ifa usun Satan a sótun pinei pwénútáán minne Jiowa a tipeni me ren ewe mwúún Israel? (Apwóróusa ekkóch pwóróus.) (b) Met popun Satan a kon mesááni ewe mwúún Israel lóóm? (c) Me reom, met meefien ewe Tefil lupwen emén néún Jiowa chón angang ikenái a ttur lón tipis watte?

⁹ Atun Satan a sótun pinei pwénútáán minne Kot a tipeni, a pwal wor och mettóch a pwári úkúkún an kirikiringaw. Emén laion mi fókkun echik ese tongei ewe man a mochen liapeni. Ese tongei me mwen epwele nieló, me ese meefi niamam mwirin. Pwal ina chék usun, Satan a fen pwáraatá pwe ese meefi úméúméch ngeni chókkewe a sótun oromiireló. Áwewe chék, met meefiom, epwe ifa ekiekin Satan iteiten fansoun a kúna án ekkewe chón Israel ttur lón tipisin lisowumwáál me tipemmóng? Ka tongeni anchangei pwapwaan Satan ren liapan kana, usun emén laion mi wérúwér, lupwen a kúna pwúnúngawen án Simri tipisin lisowumwáál me án Kehasi tipemmóng?​—Num. 25:6-8, 14, 15; 2 King 5:20-27.

¹⁰ Mi wor popun Satan a kon mesááni ekkewe chón Israel lóóm. Pún ewe Messaia epwe feito seni chón ena mwú, me i ewe emén epwe puri mékúren Satan me ánnetatá án Jiowa pwúúng le nemenem. (Ken. 3:15) Satan ese mochen pwe ekkewe chón Israel repwe ririéch ngeni Jiowa, me a achocho le eingawereló ren tipis. Kosap ekieki pwe Satan a meefi attongen Tafit lupwen a tipisin lisowu ngeni pwúlúwen emén are a tongei Moses lupwen a kúna kapwúng me esap tongeni tolong lón ewe Fénúen Pwon. Ese mwáál Satan a fen pwapwa lupwen emén néún Jiowa chón angang a féri eú tipis watte. Ewe Tefil a pwal tongeni áeá ekkena mettóch le eitengawa Jiowa.​—SalF. 27:11.

11. Ifa ewe popun neman Satan a mochen sótuni Sara?

¹¹ Satan a kon oputa ewe tettelin famili ewe Messaia epwe feito seni. Áwewe chék, ekieki met a fis ekiseló mwirin án Kot ereni Apraham pwe epwe wiliti “eu mwü mi watte.” (Ken. 12:1-3) Atun Apraham me Sara ra nóm Isip, Farao a eleenia Sara lón imwan we me neman a mochen epwe wiliti pwúlúwan. Iwe nge, Jiowa a angolong me angasaaló Sara seni ena osukosuk. (Álleani Keneses 12:14-20.) Ekiseló me mwen uputiwen Isaak, a pwal fis ena esin osukosuk me lón Kerar. (Ken. 20:1-7) Itá Satan a wisen akkóta minne a fis lón ekkena atun? Chechchemeni pwe Sara a ló seni leenian we Ur mi wéú me epwe nóm lón tento. Iwe, Satan a itá ekieki pwe Sara epwe tipetipeló ren lingéchún ekkewe imwen king, imwen Farao me Apimelek? Satan a ekieki pwe Sara epwe kirikiringaw ngeni pwúlúwan we me pwal Jiowa ren an pwúlúweni pwal emén? Paipel ese affata, nge sia tongeni lúkú pwe ewe Tefil epwe pwapwa le eingawaló Sara pwe esap chúen tongeni inelapen ewe mwirimwir mi pwonetiw. Saminne Satan epwe mengiringir ika epwe ngawóló án ena fefin mi múrinné pwúpwúlú, itéch, me riri ngeni Jiowa. A ifan me kirikiringawen Satan!

12, 13. (a) Ifa usun Satan a pwáraatá an kirikiringaw mwirin uputiwen Jesus? (b) Me reom, epwe met meefien Satan ngeni ekkewe kúkkún mi tongei Jiowa me achocho le angang ngeni i lón ei fansoun?

¹² Jesus a uputiw fitepúkú ier mwirin Apraham. Sisap ekieki pwe Satan a tongei ena ménúkol ren átéchún. A fen silei pwe ena ménúkol epwe mááritá me wiliti ewe Messaia mi pwonetiw. Jesus, i ewe ákkáeúin kinikinin mwirimwirin Apraham, me ewe epwe wisen “atala än Tefil angang.” (1 Joh. 3:8) Itá Satan mi meefi pwe an epwe nieló emén semirit ina eú féffér mi kon ssenúk ngawan? Aapw. Ese wor án Satan ekiek mi pwúng lón letipan epwe aúkaló an féffér mi ngaw. Satan a mwittir akkóta an epwe nieló ewe semirit Jesus. Ifa usun?

¹³ King Herotes a fókkun song lupwen a rong seni ekkóch soufúú pwe “än chon Juta we king” a uputiw, me a fókkun mochen nieló. (Mat. 2:1-3, 13) Ren an epwe pwénúéchútá an na mochen, a allúk pwe meinisin át ieriir ruu feitiw mi nónnóm lón Petleem me lúkún Petleem repwe ninniiló. (Álleani Mateus 2:13-18.) Jesus ese ninniiló lón ena angangen ninni mi lululó kirikiringawan, iwe nge, met sia káé usun ewe chón oputakich Satan? A ffat pwe ewe Tefil ese aúcheani manawen aramas, me ese pwal mwo nge tongei ekkewe kúkkún. Enlet i “eman laion mi wörüwör.” Kosap ménúki úkúkún watteen kirikiringawan!

SATAN MI OTUPUTUP

14, 15. Ifa usun Satan a “achuna ekiekin letipen chokewe resap lükü” Kot?

¹⁴ Satan ese tongeni okullu aramas seni ewe Kot mi tong, Jiowa, ika pwe ese otupuur. (1 Joh. 4:8) Satan a otupu aramas pwe resap meefi pwe ra “wöüngau lon pekin ngünür,” are meefi lamoten ar repwe ririéch ngeni Kot. (Mat. 5:3) Ren an féri ena, a “achuna ekiekin letipen chokewe resap lükü, pwe resap tongeni küna saramen ewe Pworausen Manau usun ewe lingen Kraist, i ewe mi lapalapeni lapalapen Kot.”​—2 Kor. 4:4.

¹⁵ Lamalam chofona ina eú me lein ekkewe minen otuputup Satan a kon ákkáeá le otupu aramas. Ese mwáál a fókkun pwapwa lupwen a kúna án aramas fel ngeni ar kewe lewo, man, masouen fénúfan me láng, are met chék ra kan fel ngeni me lúkún Jiowa, ewe ese ‘mutata [án aramas] repwe pwan pin ngeni ekkoch god.’ (Eks. 20:5, Kapasen God) Pwal mwo nge chómmóng aramas mi ekieki pwe mi pwúng ar fel ngeni Kot, ra fen nóm fán nemenien ekkewe afalafal mi chofona are eérenien ar kewe lamalam mi chék lamotmwáál. Ra mmen attong, usun chék ekkewe aramas Jiowa a éúréúrer, a erá: “Pwota oua mochen püngütiu moni fän iten mettoch ousap tongeni mongö? Pwota oua angang weires fän iten mine ousap möt ren? Oupwe fokun aüselingaei o föri mine üa ürenikemi. Iwe, epwe wor enemi mongö mi annö, oupwe pwal pwapwaiti uän ewe fanü mi fokun chomong.”​—Ais. 55:2.

16, 17. (a) Pwata Jesus a ereni Petrus: “Kopwe sü seniei Satan”? (b) Ifa usun Satan a tongeni otupukich pwe sisap chúen meefi atapwalen ei fansoun?

¹⁶ Satan a tongeni otupu pwal mwo nge néún Jiowa kewe chón angang mi tinikken. Áwewe chék, ekieki usun met a fis lupwen Jesus a ereni néún kewe chón káé pwe epwele ninniiló. Ese mwáál, Petrus a ekiekin álisi Jesus lupwen a emmwenaaló ekis me ereni: “Ai Samol, Kot epwe ümöümöch ngonuk! Ei esap fokun fis ngonuk!” Nge fán péchékkúl Jesus a ereni: “Kopwe sü seniei Satan.” (Mat. 16:22, 23) Pwata Jesus a eita ngeni Petrus “Satan”? Pokiten Jesus a weweiti met epwele fis. A tori ewe fansoun an epwe máló pwe manawan epwe eú asorun méén kepich me epwe ánnetatá pwe ewe Tefil mi chofona. Lón ena fansoun mi kkóló lamotan lón unusen uruwoon aramas, esap ina ewe fansoun Jesus epwe ekieki pwe esap tolong lón feiengaw. Án Jesus féri ena, weween an esap chúen mammasaéchú, ina met Satan a tipeni.

¹⁷ Sia arapakkan ngeni sópwólóón ei ótót, me kich sia pwal manaw lón eú fansoun mi áweires. Satan a mochen ach sisap mammasafichi, nge sipwe fen kútta kinamweech me núkúnúkéchúch lón ei ótót pwe sisap meefi atapwalen ei fansoun. Kosap mut ngeni an epwe fis ngonuk ena mettóch! Nge kopwe fen “mamasa.” (Mat. 24:42) Kosap fókkun lúkú án Satan kewe pwóróus mi chofona, ekkewe mi erá pwe a chúen towau ewe sópwólóón, are esap fen pwal fis.

18, 19. (a) Ifa usun Satan a sótun otupukich ren met sia eáni ekiek usun pwisin kich? (b) Ifa usun Jiowa a álisikich pwe sipwe mammasafichi?

¹⁸ Satan a sótun otupukich ren pwal eú mettóch. A mochen sipwe lúkú pwe ese fich ngenikich án Kot tong, me esap tongeni omusaaló ach kewe tipis. Ikkena ekkewe pwóróus mi chofona seni Satan. Ekieki mwo, ié we Jiowa esap tongeni wesewesen tongei? Ina i Satan. Ié we Jiowa esap tongeni wesewesen omusaaló tipisin? Pwal chék Satan. Nge ewe Paipel a alúkúlúkú ngenikich: “Kot esap eäni föför esepwüng, esap manlükala ewe angang oua föri me ewe chen oua pwäri ngeni i.” (Ipru 6:10) Jiowa a aúcheani ach achocho le apwapwaai i, me ach angang ngeni esap lusmwáál. (Álleani 1 Korint 15:58.) Iwe, sisap tupuló ren án Satan kewe pwóróus mi chofona.

¹⁹ Sia fen kúna pwe Satan i mi manaman, kirikiringaw, me otuputup. Ifa usun sia tongeni win lón ach maun ngeni ena esin chón oput kich? Jiowa a awora ach minen túmún. An we kapas a áiti ngenikich usun mwékútúkútún Satan, me “sia silei an ekiek.” (2 Kor. 2:11) Ach weweiti ekkewe sokopaten mettóch Satan a áeá le otupukich epwe álisikich le mammasa. Nge ese naf ach chék silei mwékútúkútún Satan. Paipel a erá: “Oupwe ü ngeni Tefil, iwe, epwe sü senikemi.” (Jas. 4:7) Ewe lesen mwirin ei epwe pwóróus wóón úlúngát án Satan minen otuputup sia tongeni fiu ngeni wóón me sipwe win.