Ewe ‘Chon Angang Mi Tuppwel’ A Pasini Ewe Fansoun Atittin!
“A fen tori ewe fansoun pwe apung epwe popueta ren chon le imwen Kot.”—1 Piter 4:17.
1. Met Jises a kuna lupwen a atittina ewe “chon angang”?
LON Pentekos 33 C.3., Jises a seikata ewe “chon angang” pwe epwe awora mongo lon ekkewe fansoun mi fich fan iten “pisekin” kewe. Lon 1914, Jises a wiseni ewe wis King, iwe, ekiselo chok mwirin, a tori fansoun an epwe atittina ena “chon angang.” Iwe, a kuna pwe lap ngeni meinisin chon ena mwichen chon angang ra annetata pwe ir mi “tuppwel o tipatchem.” Ina popun, a seikata i “won pisekin meinisin.” (Mattu 24:45-47) Iwe nge, mei pwal wor emon chon angang mi ingau, nge ese tuppwol are mirit.
“Ewe Chon Angang mi Ingau”
2, 3. Ia “ewe chon angang mi ingau” a feito me ia, me ifan ussun a fisita?
2 Jises a kapas ussun ewe chon angang mi ingau mwirin an a kapas ussun “ewe chon angang mi tuppwel o tipatchem.” A apasa: “Nge are ewe chon angang mi ingau epwe apasa lon letipan, ‘Eli ai we masta epwe mangoto,’ o epwe popueta ninni chienan kewe, o eti ekkewe mi puchen achi le momongo o ukkun; iwe, mastaan ewe chon angang epwe feito lon eu ran atewe ese mo ekieki usun, pwal lon eu klok atewe ese mo sinei, o epwe ninningaua i o alluku pwe epwe eti chon likotuputup, ikewe epwe wor kechiu me akarungi ie.” (Mattu 24:48-51) Ekkewe kapas “ewe chon angang mi ingau” ra achema ngenikich ussun alon Jises me mwan ussun ewe chon angang mi tuppwol me tipatchem. Ewer, ewe “chon angang mi ingau”, ir ra pin choni ewe chon angang mi tuppwol.a Ifa ussun?
3 Mwen 1914, chommong chon ewe mwichen chon angang mi tuppwol ra wesewesen aneanei pwe repwe nonnom ren ewe mwan apupulu-sefo lon lang lon ena ier, nge ese pwonueta ar apilukuluk. Pokiten ena me pwal ekkoch mettoch mi fisita, chommong ra lichipung, me ekkoch ra letipengau. Ekkoch leir ra poputa le ‘ninni’ pwiir kewe me lom ren ar fos me ar chiechi ngeni “ekkewe mi puchen achi,” ekkewe lamalamen Kristendom.—Aisea 28:1-3; 32:6.
4. Met Jises a fori ngeni ewe “chon angang mi ingau” me ekkewe ekkoch meinisin mi eani ewe chok sokkun ngun?
4 Lo, lo, lo, ekkeei aramas mi pin choni Chon Kraist ra wiliti “ewe chon angang mi ingau,” iwe, Jises a “ninningaua i.” Ifa ussun? A poutiirelo, iwe, a pwal pout senir ar apilukulukun manau lon lang. Iwe nge, rese muttir kuna ninni. Repwe akkom kechiu me akarungi lon “ewe rochopwak lukun” ewe mwichefelin Chon Kraist. (Mattu 8:12) Seni ena fansoun, pwal akkaemon chon kepit ra eani ena sokkun ngun mi ingau, iwe, ra chiechi ngeni ewe “chon angang mi ingau. Ekkoch me lein “ekkewe ekkoch siip” ra pwal eani ar kirikiringau. (Jon 10:16) Meinisin ekkena chon u ngeni Kraist repwe kuna ewe chok “rochopwak lukun” lon pekin ngun.
5. Ifa ussun fofforun ewe chon angang mi tuppwol me tipatchem a sokko seni fofforun ewe “chon angang mi ingau”?
5 Iwe, ewe chon angang mi tuppwol me tipatchem a pwal kuna ekkewe sokkun sossot “ewe chon angang mi ingau” a kuna. Iwe nge, rese song, nge ra siwiliochu ar ekiek. (2 Korint 13:11) A pochokkuleta ar tongei Jiowa me pwiir kewe. Mwiriloon, ir “urulapen o pwal longolongun ewe enlet” lon ekkeei “ranin le sopolon” mi fitikoko.—1 Timoti 3:15; 2 Timoti 3:1.
Ekkewe Fopwul mi Mirit me Ekkewe mi Tiparoch
6. (a) Ifa ussun Jises a awewei tipatchemen noun we mwichen chon angang? (b) Mwen 1914, ifa ewe poraus ekkewe Chon Kraist mi kepit ra afalafala?
6 Mwirin an a kapas ussun “ewe chon angang mi ingau,” Jises a eani ruu kapas monomon pwe epwe pwarata ewe popun ekkoch Chon Kraist mi kepit ra tuppwol me mirit nge esap ina ussun pwal ekkoch.b Ren an epwe aitiir ussun ewe mettoch mirit, a apasa: “Iwe, ewe muun lang epwe wewe ngeni engol fopul ra angei nour kewe lamp o feilo pwe repwe souni emon mwan apupulu-sefo. Iwe, limmon leir ra tiparoch, nge limmon leir ra tipatchem. Pun lupwen ekkewe mi tiparoch ra angei nour kewe lamp, rese pwal uwei aloloun. Nge ekkewe mi tipatchem ra uwei aloloun lon por, fiti nour kewe lamp.” (Mattu 25:1-4) Ekkewe engol fopul ra achema ngenikich ussun ekkewe Chon Kraist mi kepit mwen 1914. Ra esinna seni ar kakkaeo pwe epwele war ewe mwan apupulu-sefo, Jises Kraist. Ina minne, ra “feilo” souni, iwe, ra pworacho le afalafala ewe poraus pwe “fansoun ekkewe muun re Jentail” epwe muchulo lon 1914.—Luk 21:24.
7. Inet me pwata ekkewe Chon Kraist mi kepit ra ‘mour,’ lon kapas monomon?
7 Mei pwung ar ekiek. Fansoun ekkewe muu ra muchulo lon 1914, me a poputa nemenemen an Kot we Muu fan Kraist Jises. Nge a fis lon lang le monomon. Won fonufan, aramas ra poputa le kuna ewe “riaffou” mi fen oesini. (Pwarata 12:10, 12) Iwe, a tori eu fansoun sossot. Pokiten rese kon lien weweoch, ekkewe Chon Kraist mi kepit ra ekieki pwe “ewe mwan apupulu-sefo a mangoto.” Pokiten ra osukosuk me kuna koput seni aramasen fonufan, ra mangolo me arapakan ukutiu seni ewe angangen afalafal. Ussun chok ekkewe fopwul lon ewe kapas monomon, ra “aiessum o mour” lon pekin ngun, ussun chok ekkewe Chon Kraist mi rikilo mwirin maloon noun Jises kewe aposel.—Mattu 25:5; Pwarata 11:7, 8; 12:17.
8. Met a emmwen ngeni ewe koko: “Nengeni, ewe mwan apupulu-sefo!”, iwe, a tori fansoun ekkewe Chon Kraist mi kepit ar repwe fori met?
8 Iwe, lon 1919 a fis och mettoch aramas rese ekieki epwe fis. Sia alleani: “Nge lukenipwin a wor eu koko, ‘Nengeni, ewe mwan apupulu-sefo! Ou feilo pwe oupwe souni.’ Iwe, ekkewe fopul meinisin ra pwata o fori nour kewe lamp.” (Mattu 25:6, 7) Atun ussun ita nge a fokkun watte ar apilukulukungau, a katou eu koko pwe repwe fori och angang! Lon 1918, Jises, “ewe chon kunoon ewe pwon,” a wareiti imwenfelin Jiowa lon pekin ngun fan iten an epwe limeti an Kot we mwichefel. (Malakai 3:1) Iei, a lamot ngeni ekkewe Chon Kraist ar repwe feilo souni lon kiannin ewe imwenfel won fonufan. A tori ewe fansoun ar repwe “tittinoch.”—Aisea 60:1; Filipai 2:14, 15.
9, 10. Lon 1919, pwata ekkoch Chon Kraist ra “tipatchem” me ekkoch ra “tiparoch”?
9 Nge witi mwo! Lon ewe kapas monomon, ekkoch ekkewe fopwul ra osukosuk. Jises a sopweilo: “Nge ekkewe mi tiparoch ra kapas ngeni ekkewe mi tipatchem, ‘Ou ngenikem och seni ami kena alolou, pun noum keei lamp repwele kunulo.’” (Mattu 25:8) Ika ese wor aloloun, resap ttin ekkewe lamp. Ina minne aloloun ekkewe lamp ra achema ngenikich ussun an Kot we Kapas mi enlet me an we ngun mi fel, iwe, ra apochokkula ekkewe chon fel mi enlet pwe repwe uweifeili saram. (Kol Fel 119:130; Taniel 5:14) Mwen 1919, ekkewe Chon Kraist mi kepit ra akkachocho le wewefichiti letipen Kot ngeniir, inaamwo ika ra apwangapwang lon ena fansoun. Ina minne, lupwen a katou ewe koko pwe repwe uwei saram, ra fen mmolneta.—2 Timoti 4:2; Ipru 10:24, 25.
10 Iwe nge, ekkoch chon kepit rese ammolnata ar ekiek pwe repwe pennukuolo pwisin letiper are angang weires—inaamwo ika ra fokkun mochen souni ewe mwan apupulu-sefo. Ina minne, lupwen a tori fansoun ar repwe afalafala ewe kapas allim, rese mwo mmolneta. (Mattu 24:14) Ra pwal mwo nge sotun ammanga chiener kewe mi achocho, ren ar tingor seniir aloloun ar kewe lamp. Lon an Jises we kapas monomon, ifa ussun ekkewe fopwul mi tipatchem ra poluenir? Ra apasa: “Eli esap fakkun ku ngenikem pwal ngenikemi. A fen och pwe oupwe feilo ren chon amomo o pwisin kamo.” (Mattu 25:9) Iwe, pwal ussun chok, ekkewe Chon Kraist mi kepit mi tuppwol resap fokkun fori minne epwe akukkunatiu ar tufichin uwei saram. Ina minne, ra pasini ewe sossot.
11. Met a fis ngeni ekkewe fopwul mi tiparoch?
11 Jises a awesi: “Nge lupwen ra [ekkewe fopwul mi tiparoch] feilo kamo, ewe mwan apupulu-sefo a waroto. Iwe, ekkewe mi ammolata ra eti i le tolong lon ewe kametip. Iwe, ra apungalo ewe asam. Iwe, mwirin, ekkewe ekkoch fopul ra feilo o ra apasa, ‘Samol, samol, kopwe suuk ngenikem.’ Nge a polueni, ‘Enlet, upwe apasa ngenikemi, use sineikemi.’” (Mattu 25:10-12) Ewer, ekkoch rese mmolneta fan iten warotoon ewe mwan apupulu-sefo. Ina minne, rese pasini ewe atittin me a pout seniir ar tufichin fiti ewe kametipen apupulu. A ifa me watten solapan!
Ewe Kapas Monomon Ussun Ekkewe Talent
12. (a) Met Jises a aea pwe epwe awewei ewe mettoch tuppwol? (b) Io na ewe mwan a “feilo sai”?
12 Mwirin an kapas awewe ussun mirit, Jises a sopweilo le awewei ussun ewe lapalap itan tuppwol. A apasa: “Pun epwe wewe ngeni emon a mochen feilo sai. Iwe, a korato noun kewe chon angang o a alukuluku ngenir pisekin. A ngeni emon limu talent, o a ngeni emon ruu, pwal ngeni emon eu; ngeni akaemon leir usun chok pwisin ar tufich. Iwe, a lo.” (Mattu 25:14, 15) Ewe mwan lon ewe kapas monomon a wewe ngeni Jises pwisin, iwe, “a lo” lupwen a feita lang lon ewe ier 33 C.E. Nge mwen an epwe feita, Jises a alukuluku ngeni noun kewe chon kaeo mi tuppwol “pisekin kewe.” Ifa ussun?
13. Ifa ussun Jises a ammolnata eu leenien angang mi watte me awisa ngeni noun kewe “chon angang” pwe repwe fori ewe angang?
13 Lon an angangen afalafal won fonufan, Jises a ammolnata eu leenien angang mi watte ren an afalafala ewe kapas allim ussun ewe Muu lon unusen ewe fonuen Israel. (Mattu 9:35-38) Mwen an a “feilo sai,” a alukuluku ngeni noun kewe chon kaeo mi tuppwol ena leenien angang, iwe, a apasa: “Iei minne, oupwe feilo asoulangalo chon fonu meinisin, oupwe papataisir fan iten ewe Sam, me ewe Nau, me ewe Ngun mi Fel, oupwe afalafaler pwe repwe alleasochisi mettoch meinisin minne ua alluku ngenikemi.” (Mattu 28:18-20) Ren ekkeei kapas, Jises a awisa ngeni noun kewe “chon angang” ar repwe apwonueta eu angang tori an liwinsefal, “ussun chok pwisin ar tufich.”
14. Pwata esap lollo chok ukuukun watten ewe angang emon me emon chon angang epwe fori?
14 Ekkena kapas a pwarata pwe sap minne epwe lollo chok nonnomun me tufichin ekkewe Chon Kraist meinisin lon ewe aeuin senturi. Ekkoch, ussun chok Paul me Timoti, ese wor och mettoch a eppeti ar tufichin fiffiti ewe angangen afalafal. Nge nonnomun pwal ekkoch a aukuku minne ra tongeni fori. Awewe chok, ekkoch Chon Kraist, ir chon kichiniwel, iwe, pwal ekkoch ra sessemmwen, chinnap, are mei wor wiser lon ar kewe famili. Pwungun pwe ekkoch wis lon ewe mwichefel esap suuk ngeni meinisin ekkewe chon kaeo. Ekkewe fefin mi kepit me ekkoch mwan mi kepit rese wisen asukul lon ewe mwichefel. (1 Korint 14:34; 1 Timoti 3:1; Jemes 3:1) Iwe nge, ese lifilifil nonnomur, nge meinisin noun Kraist kewe chon kaeo mi kepit—mwan me fefin—repwe wisen angang, iwe, repwe aeafichi ar fansoun me tufichir kewe lon ewe angangen afalafal. Iwe, a pwal ina ussun noun Kraist kewe chon kaeo ikenai.
A Poputa Ewe Fansoun Atittin!
15, 16. (a) Inet a fis ewe fansoun atittin? (b) Ikkefa ekkewe minefoon wis mi suuk pwe ekkewe mi tuppwol repwe ‘fori angang’?
15 A sopweilo ewe kapas monomon: “Iwe, mwirin fansoun langattam, mastaan ekkewe chon angang a liwinto o atittiner.” (Mattu 25:19) Lon 1914—wesewesen fansoun langattam mwirin 33 C.E.—Kraist Jises a poputa an nonnom lon ewe wis king. Ulungat esop ier mwirin, lon 1918, a wareiti ewe imwenfelin Kot lon pekin ngun me a apwonueta alon Piter kewe: “A fen tori ewe fansoun pwe apung epwe popueta ren chon le imwen Kot.” (1 Piter 4:17; Malakai 3:1) A war ewe fansoun atittin.
16 Met ekkewe chon angang, pwiin Jises kewe mi kepit, ra fori ren an ewe King kewe “talent”? Seni 33 C.E. feffeilo, pachelong ekkewe ier mwen 1914, chommong ra angang weires lon an Jises we “angang”. (Mattu 25:16) Pwal mwo nge atun an a fis ewe aeuin maunen fonufan, ra pwarata ar mochen angang ngeni ewe Masta. Iei ewe fansoun mi fich an epwe suuk ngeni ekkewe mi tuppwol ekkoch minefoon wis pwe repwe foffori ‘angang.’ A waroto muchuloon ei ototen mettoch. A lamot pwe ewe kapas allim epwe esilefeil won unusen fonufan. Epwe kini “ewe rasen fonufan.” (Pwarata 14:6, 7, 14-16) A lamot ar repwe ionfengenni lusun chon ewe mwichen wiit me pwal “ewe mwich mi lapalap” me lein ekkewe ekkoch siip.—Pwarata 7:9; Mattu 13:24-30.
17. Ifa ussun ekkewe Chon Kraist mi kepit ra ‘tolong lon chengelin ar we masta’?
17 Ewe fansoun ras, ina eu fansoun apwapwa. (Kol Fel 126:6) Ina minne, lon 1919 lupwen Jises a alapalo wisen pwiin kewe mi kepit, mei fich an a apasa: “Ka fen achocho won mettoch mi kisikis, upwe seikukata won mettoch chommmong. Kopwele tolong lon chengelin om masta.” (Mattu 25:21, 23) Pwal eu, pwapwaan ewe Masta, pokiten a keran wiseni ewe wis King lon an Kot we Muu a lu seni minne sipwe tongeni anchangei. (Kol Fel 45:1, 2, 6, 7) Ewe mwichen chon angang mi tuppwol ra pwal kuna ena pwapwa ren ar tupuni ewe King me alapalo an angang won fonufan. (2 Korint 5:20) Ar pwapwa a pwapwalo lon kapasen ewe oesini lon Aisea 61:10, a era: “Upwe fokun pwapwa ren ewe Samol mi Lapalap, nguni epwe mwanek ren ai Kot. Pun a aufoufa ngeniei manau.”
18. Pwata ekkoch rese pasini ewe atittin, iwe, ifa mwiriloon?
18 Mei alolilen pwe ekkoch rese pasini ewe atittin. Sia alleani: “Nge atewe mi angei eu chok talent a pwal feilo. Iwe, a apasa, ‘Masta, ua sinei usum, pwe en emon mi tipepochokkul. Ka kinikin ikewe kose fen fofot ie, ka pwal ikioi seni ikewe kose fan amora ie. Iwe, ua chok niuokus, o ua feilo opalo noum ei talent lon pwul. Nengeni, iei noum moni.’” (Mattu 25:24, 25) Iwe, ussun we chok, ekkoch Chon Kraist mi kepit rese “angang.” Mwen 1914 rese kon lien achocho le esilefeili ar apilukuluk allim ngeni pwal ekkoch aramas, iwe, rese pwal mochen poputa le angang lon 1919. Met Jises a fori pokiten ar lamalam tekia? A angei seniir wiser meinisin. Iwe, a ‘poutau atei mi ese lamot lon ewe rochopwak lukun, ikewe epwe wor kechiu me akarungi ie.’—Mattu 25:28, 30.
A Sopweilo ewe Atittin
19. Ifa ussun an a sopweilo ewe angangen atittin, iwe, met ekkewe Chon Kraist mi kepit ra tipeppos le foffori?
19 Pwungun pwe lap ngeni meinisin mi wiliti noun Kraist kewe chon angang mi kepit lon ewe fansoun sopolon resaamwo angang ngeni Jiowa lupwen Jises a poputa an atittin lon 1918. A ita wewe ngeni pwe resap pwal atittin? Apwi. Ewe angangen atittin a chok poputa lon 1918/19 lupwen ewe mwichen chon angang mi tuppwol me tipatchem a pasini ewe sossot. Emon me emon Chon Kraist mi kepit repwe chuen atittin tori fansoun ar repwe unusen pwau. (Pwarata 7:1-3) Pokiten ar weweiti ei mettoch, pwin Kraist kewe mi kepit ra tipeppos pwe repwe tuppwol le fori ‘ewe angang.’ Ra fokkun mochen ar repwe tipatchem, iwe, a ina ussur ren an epwe nafoch ar alolou pwe ewe saram epwe ttinoch. Ra silei pwe lupwen emon me emon epwe tori muchuloon manauan fan tuppwol, Jises epwe souni i lon leenian we lon lang.—Mattu 24:13; Jon 14:2-4; 1 Korint 15:50, 51.
20. (a) Met ekkewe ekkoch siip ikenai ra tipeppos le foffori? (b) Met ekkewe Chon Kraist mi kepit ra weweiti?
20 Ewe mwich mi lapalap me lein ekkewe ekkoch siip ra akkappiru pwiir kewe mi kepit. Ra weweiti pwe ar sile minne letipen Kot a atoto rer eu wis mi watte. (Isikiel 3:17-21) Ina minne, ren alilisin an Jiowa we Kapas me an we ngun mi fel, ra pwal tumunu pwe epwe nafoch ar alolou ren ar pwisin kaeo me ar mwichfengen. Iwe, ar saram a chok tittinoch ren ar fiffiti ewe angangen afalafal me asukul, weween, ra fiti pwiir kewe mi kepit le foffori ewe ‘angang’. Iwe nge, ekkewe Chon Kraist mi kepit ra weweiti pwe a nonnom lon pour kewe ekkewe talent. Repwe atittin ren ifa ussun ra anganga pisekin ewe Samol. Inaamwo ika ir mi chokisikis, nge rese tongeni likiti ngeni ewe mwich mi lapalap wiser. Ren ar weweiti ei mettoch, ewe chon angang mi tuppwol me tipatchem ra akkachocho le emmweni angangen ewe King, iwe, ra kilisou ren ewe alillis seni chon ewe mwich mi lapalap. Iwe, chon ewe mwich mi lapalap ra sinneni wisen pwiir kewe mi kepit me meefi kilisou ren ar nonnom fan ar emmwen.
21. Ifa ewe kapasen fon a weneiti meinisin Chon Kraist mwen 1919 tori ach ei fansoun?
21 Iwe, inaamwo ika ekkeei ruu kapas monomon ra asaramakich ussun minne a fis orun 1919, nge menlapen ekkewe kapas monomon ra weneiti meinisin ekkewe Chon Kraist mi enlet lon ekkewe ranin le sopolon. Weween, inaamwo ika ewe kapasen pesepes Jises a apasau le muchuloon ewe kapas monomon ussun ekkewe engol fopwul a akkaeuin weneiti ekkewe Chon Kraist mi kepit mwen 1919, nge a pwal weneiti iteiten Chon Kraist meinisin. Ina minne, oukich meinisin sipwe lefareni alon Jises kewe: “Ina minne, oupwe mamasa, pun ousap sinei ranin are ewe fansoun.”—Mattu 25:13.
[Ekkewe pwóróus fan]
a Pwal ussun chok, mwirin maloon ekkewe aposel, ekkewe “wolf mocho” ra popu seni ekkewe Chon Kraist elter mi kepit.—Fofor 20:29, 30.
b Ren pwal eu poraus ussun an Jises kapas monomon, pii Worldwide Security Under the “Prince of Peace,” forien Jehovah’s Witnesses, sopwun 5 me 6.
En mi Tongeni Awewei?
• Inet Jises a atittina noun kewe chon kaeo, iwe, met a kuna?
• Pwata ekkoch Chon Kraist mi kepit ra eani ngunun ewe “chon angang mi ingau”?
• Ifa ussun sipwe tongeni pwarata pwe sia mirit lon pekin ngun?
• Ren ach sipwe akkappiru pwiin Jises kewe mi kepit, ifa ussun sipwe tongeni ‘foffori ewe angang’?
[Pwoor lon pekin taropwe 24]
INET A FEITO JISES?
Lon Mattu sopwun 24 me 25, a aiti ngenikich pwe a wor fitu weween an Jises “feito.” Sap minne epwe wesewesen mwokut lon pekin inis pwe epwe “feito.” Nge a “feito” ren an kulliti aramasen fonufan are noun kewe chon kaeo, iwe, fan chommong a fori pwe epwe apwungur. Ina minne, lon 1914, a “feito” pwe epwe poputa an nonnom lon ewe wis King. (Mattu 16:28; 17:1; Fofor 1:11) Lon 1918 a “feito” lon ewe wis chon kunoon ewe pwon me a poputa le apwungu ekkewe mi era pwe ir chon angang ngeni Jiowa. (Malakai 3:1-3; 1 Piter 4:17) Lon Armaketon, epwe “feito” pwe epwe apwungu ekkewe mi oput Jiowa.—Pwarata 19:11-16.
Ewe “feito” lon Mattu 24:29-44 me 25:31-46 a weneiti fansoun “ewe riaffou mi lapalap.” (Pwarata 7:14) Iwe nge, ewe feito Mattu 24:45 tori 25:30 a kapas ussun fan fitu a wewe ngeni fansoun an epwe apwungu chokewe mi era pwe ir noun kewe chon kaeo seni 1918 feffeilo. Iwe, ren chok awewe, esap pwung ach sipwe apasa pwe efeiochuun ewe chon angang mi tuppwol, kapwungun ekkewe fopul mi tiparoch, me kapungun ewe chon angang mi liseangas, ewe a aopa an ewe Masta we talent, repwe fis lupwen Jises epwe “feito” lon ewe riaffou mi lapalap. Ika epwe ina, weween pwe lon ena fansoun, epwe ussun ita nge chommong me lein ekkewe mi kepit resap tuppwol me epwe lamot an epwe wor siwiliir. Iwe nge, Pwarata 7:3 a aiti ngenikich pwe meinisin noun kewe chon angang Chon Kraist mi kepit ra fen unusen “pwau” mwen ena fansoun riaffou.
[Sasing lon pekin taropwe 22]
Esor feiochun ewe “chon angang mi ingau” lon 1919
[Sasing lon pekin taropwe 23]
Ra fen mmolneta ekkewe fopwul mi tipatchem lupwen a waroto ewe mwan apupulu-sefo
[Sasing lon pekin taropwe 25]
Ewe chon angang mi tuppwol a foffori ewe “angang”
[Sasing lon pekin taropwe 25]
Ewe chon angang mi liseangas ese foffori
[Sasing lon pekin taropwe 26]
Ekkewe mi kepit me chon ewe “mwich mi lapalap” ra sopweilo le atittina ar saram