En mi Álleasochisi Ekkewe Kapasen Éúréúr?

1. Ekiseló chék, met Jises epwele féri?

SIA manaw lón ei fansoun epwele fis watteen ekkesiwil. Ekiseló chék, Jises epwe apwúngú aramas meinisin mi manaw wóón ei fénúfan. A áweweei met ekkewe repwe fis wóón fénúfan me mwen epwe féri an angangen kapwúng. A áiti ngeni néún kewe chón káé “esissillen” an nónnóm me “sópwólóón ótóten ei fénúfan.” (Mat. 24:3) Ena a mak lón Mattu sópwun 24 me 25, Mark sópwun 13, me Luk sópwun 21.

2. Met sipwele káé lón ei lesen, me pwata epwe álilliséch ngenikich?

² Jises a áeá úlúngát kapas áwewe pwe epwe álisikich le mmólnetá. Ra ussun minen éúréúr ngenikich. Ikkeei ekkeei kapas áwewe: Ekkewe siip me ekkewe siike, ekkewe fépwúl mi tipáchem me ekkewe mi tiparoch, me ekkewe féún talent. Eú me eú ekkena kapas áwewe ra álisikich le weweiti pwe Jises epwe apwúngú emén me emén alóngólóng wóón an féffér. Atun sipwe káésefál ekkena kapas áwewe, sipwe ppii ikkefa ekkewe lesen me ifa ussun sia tongeni apwénúretá. Ewe áeúin sipwele káé, ina ewe kapas áwewe ussun ekkewe siip me ekkewe siike.

EKKEWE SIIP ME EKKEWE SIIKE

3. Ineet Jises epwe apwúngú aramas?

³ Lón ewe kapas áwewe ussun ekkewe siip me ekkewe siike, Jises a erá pwe epwe apwúngú aramas alóngólóng wóón meefier ussun ewe kapas allim me iká iir mi álisaatá pwiin kewe mi kepit. (Mat. 25:​31-46) Atun ewe “riáfféú mi lapalap,” Jises epwe féri an na kapwúng me mwen chék fisin ewe Armaketon. (Mat. 24:21) Ussun chék án emén chón masen siip áimuni ekkewe siip seni ekkewe siike, Jises epwe áimuni chókkewe mi túppwél le álisaatá pwiin kewe mi kepit, seni chókkewe rese álisiiretá.

4. Me ren Aisea 11:​3, 4, pwata sia tongeni lúkúlúk pwe Jises epwe apwúngú aramas fán pwúng? (Pwal ppii ewe sasing wóón péén.)

⁴ Ewe Paipel a apasa pwe lupwen Jises epwe féri án Jiowa kapwúng, fansoun meinisin epwe apwúngú aramas fán pwúng. (Álleani Aisea 11:​3, 4.) A kakkatol án aramas féffér, ekiek, me kapas, kapachelong féfférúr ngeni pwiin kewe mi kepit. (Mat. 12:​36, 37; 25:40) Jises epwe silei ié kewe mi álisaatá pwiin kewe mi kepit me ar angang.a Eú me lein ekkewe mettóch mi fókkun aúchea emén a tongeni féri pwe epwe álisaatá pwiin Kraist kana, ina an álisiir lón ewe angangen afalafal. Jises epwe apwúngaló pwe iir aramas “pwúng,” me epwe suuk ngeniir ar repwe “kúna manaw esemuch” wóón fénúfan. (Mat. 25:46; Pwár. 7:​16, 17) Ina eú watteen feiéch ngeni chókkewe mi akkamwéchú ar túppwél. Iká repwe akkamwéchú ar túppwél atun me mwirin ewe riáfféú mi lapalap, iwe iter epwe makkeffóch “lón ewe puken manaw.”—Pwár. 20:15.

5. Ifa ewe lesen sia káé seni ewe kapas áwewe ussun ekkewe siip me ekkewe siike, nge ié a tongeni kúna feiéch seni?

⁵ Pwáári pwe en emén mi túppwél. Án Jises ei kapas áwewe ussun ekkewe siip me ekkewe siike, a kon áwenewen ngeni chókkewe mi eáni ápilúkúlúkún manaw wóón fénúfan. Ra pwáári pwe a wor ar lúkú ren ar álisaatá pwiin Kraist kewe lón ewe angangen afalafal me fitipachei án ewe chón angang mi túppwél me tipáchem emmwen, ewe mi kefil me ren Jises. (Mat. 24:45) Nge a pwal lamot án chókkewe mi eáni ápilúkúlúkún manaw lón láng repwe álleasochisi ena kapasen éúréúr lón ena kapas áwewe. Pwata? Pún Jises a pwal kakkatol féfférúr, ekiekiir, me met ra eáni kapas. A pwal lamot repwe pwáári pwe iir mi túppwél. Ren enletin, Jises a pwal eáni ruu kapas áwewe mi masou ren kapasen éúréúr mi tichik fán iten ekkewe mi kepit. Sipwe pwal kúna ekkena kapas áwewe me lón Mattu sópwun 25. Iei sipwele pwóróus wóón ewe kapas áwewe ussun ekkewe fépwúl mi tipáchem me ekkewe mi tiparoch.

EKKEWE FÉPWÚL MI TIPÁCHEM ME EKKEWE MI TIPAROCH

6. Ifa ussun ekkewe nimmén fépwúl ra pwáári pwe iir mi tipáchem? (Mattu 25:​6-10)

⁶ Lón án Jises we kapas áwewe ussun ekkewe fépwúl, i a fós ussun engol fépwúl mi feiló pwe repwe chuuri ewe mwán apwúpwúlú. (Mat. 25:​1-4) Iir meinisin ra áneán ar repwe fitaalong ena mwán apwúpwúlú lón ewe kametipen apwúpwúlú. Jises a erá pwe nimmén me leir ra “tipáchem” nge ekkewe pwal nimmén ra “tiparoch.” Ekkewe fépwúl mi tipáchem ra mmólnetá me mammasa. Ra mmólnetá le witiwiti ewe mwán apwúpwúlú tori an epwe war, inaamwo iká epwe war lukenipwin. Ina minne, ra uwou néúr lamp pwe repwe saram lón ewe kiroch. Ra pwal mwo nge uwou aléléér assoun iká ena mwán apwúpwúlú e mmang le war. Iir ra fókkun mmólnetá pwe epwe chék kúkkú néúr kewe lamp. (Álleani Mattu 25:​6-10.) Lupwen ewe mwán apwúpwúlú a war, ekkewe fépwúl mi tipáchem ra fitaalong lón ewe kametipen apwúpwúlú. Pwal ina ussun ren ekkewe Chón Kraist mi kepit, iká ra pwáári ar mmólnetá ren ar mammasa me túppwél tori án ewe Kraist waroto, iwe repwe angei liiwiniir le fiti ewe Mwán Apwúpwúlú, Jises, lón an we Mwú lón láng.b (Pwár. 7:​1-3) Nge ifa ussun ren ekkewe nimmén fépwúl mi tiparoch?

7. Met a fis ngeni ekkewe nimmén fépwúl mi tiparoch, me pwata?

⁷ Ekkewe nimmén fépwúl mi tiparoch ra sókko seni ekkewe fépwúl mi tipáchem pún iir rese mmólnetá atun ewe mwán apwúpwúlú a war. Epwele pé néúr kewe lamp me rese pwal uwou aléléér. Atun ra rong pwe ekiseló chék ewe mwán apwúpwúlú epwele war, ra feiló kamé aléléén néúr kewe lamp. Iwe, atun ewe mwán apwúpwúlú a war, iir resaamwo war. Lón ena atun, “ekkewe fépwúl mi mmólnetá ra fitaalong lón ewe kametipen apwúpwúlú, me ewe asam a kappúngúló.” (Mat. 25:10) Ekiseló mwirin, ekkewe fépwúl mi tiparoch ra war me ra mochen tolong, iwe ewe mwán apwúpwúlú a ereniir: “Úse fókkun silekemi.” (Mat. 25:​11, 12) Ekkena fépwúl rese mmólnetá le witiwiti ewe mwán apwúpwúlú tori an epwe war, inaamwo iká epwe ekis mmangoto. Ifa ewe lesen fán iten ekkewe mi kepit?

8-9. Ifa ewe lesen ekkewe mi kepit ra tongeni káé seni ewe kapas áwewe ussun ekkewe fépwúl? (Pwal ppii ewe sasing.)

⁸ Pwáári pwe ka mmólnetá me mammasa. Jises ese erá pwe epwe wor ruu sókkun kúmien mi kepit, eú repwe mmólnetá le witiwit tori sópwólóón ei ótót, me eú resap. Nge, a áweweei met epwe fis ngeni ekkewe mi kepit iká rese mmólnetá le likiitú me túppwél tori sópwólóón. Iká rese mmólnetá, iwe resap tongeni angei liiwiniir. (Jon 14:​3, 4) A mmen fókkun alólilen iká rese mmólnetá! Ese lifilifil iká sia eáni ápilúkúlúkún manaw lón láng are wóón fénúfan, nge a lamot ngenikich meinisin ach sipwe álleasochisi ewe éúréúr lón ewe kapas áwewe ussun ekkewe fépwúl. A lamot án emén me emén kich sipwe mammasa, mmólnetá, me likiitú tori sópwólóón.—Mat. 24:13.

⁹ Mwirin án Jises eáni ewe kapas áwewe ussun ekkewe fépwúl ren an epwe áiti ngenikich aúchean ach sipwe mmólnetá me mammasa, a pwal eáni ewe kapas áwewe ussun ekkewe talent. Ena kapas áwewe a menlapei aúchean ach sipwe tinikken le angang weires.

EKKEWE TALENT

10. Ifa ussun ekkewe rúúemén chón angang ra pwáári pwe iir mi túppwél? (Mattu 25:​19-23)

¹⁰ Lón án Jises we kapas áwewe ussun ekkewe talent, a fós ussun rúúemén chón angang mi túppwél ngeni néúr we masta, me emén ese túppwél. (Mat. 25:​14-18) Ekkena rúúemén chón angang ra pwáári ar túppwél ren ar achocho le anganga néún ar we masta we moni pwe epwe wor manawan. Me mwen án ewe masta epwe sáiló ekis, a ngeniir néún kewe talent, ina och watteen moni. Ekkena rúúemén chón angang mi túppwél ra fókkun tinikken me ra néúnéúéchú ewe moni. Met mwirilóón? Atun néúr we masta a liwinsefál, a wor manawen ewe moni e ngeniir. Ewe masta a apúnger me ra ‘fiti néúr [na] masta le pwapwa.’ (Álleani Mattu 25:​19-23.) Nge met a fis ngeni ewe aúlúménún chón angang? A fetei ewe moni néún we masta e ngeni?

11. Met a fis ngeni ewe chón angang mi “chipwang,” me pwata?

¹¹ Ewe aúlúménún chón angang a angei eú talent nge a “chipwang.” Néún we masta a ekieki pwe i epwe néúnéúéchú ena talent. Nge, a fen ireeló fán pwúl. Iwe, atun ewe masta a liwin, ena chón angang a ngenisefáli ewe chék eféú talent. Ena chón angang ese eáni ekiek mi pwúng. Ese omusomus ren an ese amanawa néún ewe masta we moni, nge fán kirikiringaw a fen kér ngeni ena masta, “emén mwán mi tipepéchékkúl.” Ena chón angang, ese ketiw me ren ena masta. Nge lap seni ena, ewe masta a angei seni ewe talent me ra asúoló seni lón imwen ewe masta na.—Mat. 25:​24, 26-30.

12. Ié ekkewe rúúemén chón angang mi túppwél ra liosuetá?

¹² Ekkewe rúúemén chón angang mi túppwél ra liosuetá ekkewe Chón Kraist mi kepit mi túppwél. Ewe Masta, Jises, a etiwer ar repwe ‘fiti [ewe] masta le pwapwa.’ Ra angei liiwiniir lón láng, ina ewe áeúin manawsefál. (Mat. 25:​21, 23; Pwár. 20:5a) Nge pwóróusen ewe chón angang mi chipwang, a ina eú minen éúréúr fán iten ekkewe mi kepit. Ifa ussun?

13-14. Menni lesen ekkewe mi kepit ra tongeni káé seni ewe kapas áwewe ussun ekkewe talent? (Pwal ppii ewe sasing.)

¹³ Pwáári pwe ka tinikken le angang weires. Ewe kapas áwewe ussun ekkewe talent, a pwal ussun ewe kapas áwewe ussun ekkewe fépwúl. Jises ese apasa pwe ekkewe mi kepit repwe chipwang. Nge a áweweei met epwe fis iká rese chúen tinikken. Repwe sópwongaw lón ar angei ewe “ké me kefil me ren Kot,” me esap mumutá ar repwe tolong lón ewe Mwúún láng.—2 Pit. 1:10.

¹⁴ Án Jises kapas áwewe ussun ekkewe fépwúl me ekkewe talent ra affata pwe mi lamot án meinisin Chón Kraist mi kepit repwe mmólnetá me mammasa, me repwe pwal tinikken le angang weires. Nge itá mi pwal wor met Jises a apasa pwe epwe eú minen éúréúr ngeni ekkewe mi kepit? Ewer! Sia tongeni kúna ena éúréúr seni met a apasa lón Mattu 24:​40, 41.

IÉ KOT EPWE “ANGEALÓ”?

15-16. Ifa ussun Mattu 24:​40, 41 a menlapei lamoten án ekkewe mi kepit repwe mammasa?

¹⁵ Me mwen án Jises apwóróusa ekkewe úlúngát kapas áwewe, a fós ussun eú sáingoon kapwúng fán iten ekkewe mi kepit epwe pwáári ié kewe ra ketiw. A fós ussun rúúemén mwán mi angang lón eú tánipi me rúúemén fefin mi angang lón eú leenien úsúús. Lón eú me eú ekkena kapas áwewe, ussun ra féri eú chék angang, nge Jises a apasa pwe Kot epwe “angealó emén me likitaaló ewe pwal emén.” (Álleani Mattu 24:​40, 41.) Mwirin, iei met a pwal pesei ngeni néún kewe chón káé: “Oupwe mammasa, pún ouse silei menni rán ámi we Samol epwe waroto lón.” (Mat. 24:42) Jises a pwal apasa ena esin mettóch mwirin an apwóróusa ewe kapas áwewe ussun ekkewe fépwúl. (Mat. 25:13) Mi wor ririin ekkena pwóróus? Ussun iir mi ririfengen. Jises epwe “angealó” lón ewe Mwúún láng ekkewe chék mi enletin kepit me túppwél.—Jon 14:3.

¹⁶ Pwáári pwe ka mammasa. Emén mi kepit ese sópweeló le mammasa, esap fit lein ioien ekkewe “mi kefilitá.” (Mat. 24:31) Nge ren meinisin chókkewe mi eáni ápilúkúlúkún manaw wóón fénúfan tori feilfeiló, a lamot ar repwe pwal sópweeló le mammasa me akkamwéchú ar túppwél.

17. Pwata sisap lólilen ussun ineet atun Jiowa a filaatá le epiti ekkóch ren an we ngún mi fel?

¹⁷ Sia sissileeló Jiowa, ina pwata sia lúkúlúk wóón an féri an angangen kapwúng. Sise lólilen iká a filaatá an epwe epiti ekkóch mi túppwél lón ei fansoun.c Sia chemeni met Jises a apasa ussun ekkewe chón angang mi poputá le angang seni engol me áeúin kulók lón an we kapas áwewe ussun ewe tánipiin kreip. (Mat. 20:​1-16) A chék taitap liiwinin chókkewe mi angang lón ewe tánipiin kreip úkúúkún chék eú awa, ngeni liiwinin chókkewe mi angang unusen rán. A pwal ina ussun, ese lifilifil ineet ekkewe mi kepit ra kefil, nge repwe angei liiwiniir lón láng iká repwe akkamwéchú ar túppwél.

ÁLLEASOCHISI EKKEWE KAPASEN ÉÚRÉÚR

18-19. Ikkefa ekkewe lesen me kapasen éúréúr sia fen káé?

¹⁸ Met sia fen káé? Ren chókkewe mi eáni ewe ápilúkúlúkún manaw tori feilfeiló wóón fénúfan, ewe kapas áwewe ussun siip me siike, a menlapei lamoten ar repwe akkamwéchú ar túppwél ngeni Jiowa iei me atun ewe riáfféú mi lapalap epwele fis. Me mwen chék fisin ewe Armaketon, Jises epwe apwúngaló ekkewe mi túppwél pwe epwe fich ngeniir ar “repwe kúna manaw esemuch.”—Mat. 25:46.

¹⁹ Sia pwal káé ruu kapas áwewe mi awora ekkewe kapasen éúréúr fán iten ekkewe mi kepit. Lón án Jises we kapas áwewe ussun ekkewe fépwúl mi tipáchem me tiparoch, nimmén me leir ra pwáári pwe iir mi tipáchem. Ra mmólnetá me mammasa, me ra mmólnetá le witi ewe mwán apwúpwúlú inaamwo iká epwe mmangoto. Nge ekkewe fépwúl mi tiparoch, rese mmólnetá. Iwe ena mwán apwúpwúlú ese mut ngeniir ar repwe fiti an we kametipen apwúpwúlú. Ina ussun ren kich, a pwal lamot ach sipwe mmólnetá le witiwiti ineet chék Jises epwe asopwaló ei ótót. Pwal eú, lón án Jises we kapas áwewe ussun ekkewe talent, sia káé ussun ekkewe rúúemén chón angang mi túppwél iir mi tinikken le angang weires. Ra angang weires fán iten néúr we masta, iwe a pwapwa rer. Iwe nge, ewe chón angang mi chipwang, ese fókkun ketiw. Ifa ewe lesen? A lamot ach sipwe tinikken lón án Jiowa angang tori sópwólóón. Sáingolóón, sia káé ifa ussun a lamot ngeni ekkewe mi kepit ar repwe sópweeló le mammasa pwe Jises epwe tongeni uweiireló ngeni láng, ina liiwiniir we. Ra fókkun mwétéresiiti ar repwe “chufengen” me Jises lón láng. Mwirin ewe maunen Armaketon, repwe wiliiti pwúlúwen Jises lón apwúpwúlúún ewe Laam.—2 Tes. 2:1; Pwár. 19:9.

20. Met Jiowa epwe féri ngeni chókkewe mi álleasochisi an kewe kapasen éúréúr?

²⁰ Inaamwo iká a arapoto ewe ránin kapwúng, nge ese wor popun ach sipwe niwokkus. Iká sia akkamwéchú ach túppwél, iwe Semach we lón láng epwe fang ngenikich “ewe tufich mi somwoló” pwe sipwe ‘tongeni sópwéch . . . lón ach útá mwen ewe Néún aramas.’ (2 Kor. 4:7; Luk 21:36) Ese lifilifil iká sia eáni ápilúkúlúk lón láng are wóón fénúfan, nge sipwe apwapwaai Semach we iká sia álleasochisi ekkewe kapasen éúréúr lón án Jises kewe kapas áwewe. Ren án Jiowa kirekiréch mi somwoló, epwe mak itach lón ewe puken manaw.—Tan. 12:1; Pwár. 3:5.