‘Afalafaler Pwe Repwe Alleasochisi Mettoch Meinisin Minne Ua Alluku Ngenikemi’
“Feilo foralo chon kaeo . . . , oupwe afalafaler pwe repwe alleasochisi mettoch meinisin ua alluku ngenikemi.”—MATEUS 28:19, 20.
1. Met ewe chon kaeo Filip me ewe re Itiopia ra porausfengen ussun?
EWE mwan seni Itiopia a fen sai ngeni Jerusalem. Me ikkewe ie, a fel ngeni ewe Kot a tongei, Jiowa. Ese mwaal, a pwal tongei an Kot we Kapas. Atun an a liwiniti pukun leenian me won waan we woken, a alleani kapiin makkeien ewe soufos Aisea lupwen Filip, emon noun Kraist we chon kaeo, a chuuri. Filip a eisini ewe re Itiopia: “Ifa usun, ka wewe minne ka alleani?” Ewe mwan a polueni: “Pwe ifa usun, mi tufich rei, are esor emon chon emmweniei?” Filip a alisi ena chon kaeo Paipel mi letip-wenechar pwe epwe wiliti emon noun Kraist we chon appiru.—Fofor 8:26-39.
2. (a) Pwata a lamot poluen ewe re Itiopia? (b) Ikkefa ekkewe kapas eis epwe polu ussun an Kraist we alluk pwe noun kewe chon appiru repwe foralo chon kaeo?
2 Minne ewe re Itiopia a apasa a wor lamotan ngenikich. A apasa: ‘Pwe ifa usun, mi tufich rei, are esor emon chon emmweniei.’ Ewer, a lamot an epwe wor emon chon emmwen pwe epwe weweiti minne a allea. Iwe, alon atewe a pwarata lamoten eu kapasen emmwen mi titchik a kapachelong lon an Jises we alluk pwe sipwe foralo chon kaeo. Ifa ena kapasen emmwen? Ren ach sipwe kuna poluan, sipwe sopweilo ach kaeo ussun alon Jises mi mak lon Mateus 28. Ewe lesen mwen ei a itelapei ekkewe kapas eis pwata? me ia? Iwe iei, sipwe kaeo pwal ruu kapas eis mi weneiti an Kraist alluk pwe sipwe foralo chon kaeo—met? me ineet?
“Oupwe Afalafaler pwe Repwe Alleasochisi Mettoch Meinisin”
3. (a) Ifa ussun emon epwe tongeni wiliti emon noun Kraist we chon kaeo? (b) Met epwe kapachelong lon ewe angangen foralo chon kaeo?
3 Met a lamot ach sipwe aitir pwe sipwe alisi aramas ar repwe wiliti noun Kraist kewe chon kaeo? Jises a alluku noun kewe chon kaeo: “Iei minne, oupwe feilo foralo chon kaeo seni chon fonu meinisin, oupwe papataisir fan iten ewe Sam, me ewe Nau, me ewe ngun mi fel, oupwe afalafaler pwe repwe alleasochisi mettoch meinisin minne ua alluku ngenikemi.” (Mateus 28:19, 20, NW) Ina minne, a lamot ach sipwe aitir ekkewe mettoch Kraist a alluku.a Iwe nge, met epwe allukuluku pwe emon mi kakkaeo an Jises kewe alluk esap chok wiliti emon noun Jises chon kaeo nge epwe pwal lillikiitu? Sia tongeni kuna eu lesen mi lamot lon an Jises filiochu an kapas. Nengeni, ese chok apasa: ‘Oupwe afalafaler mettoch meinisin minne ua alluku ngenikemi.’ Nge, a apasa: ‘Oupwe afalafaler pwe repwe alleasochisi mettoch meinisin ua alluku ngenikemi.’ (Mateus 19:17) Met weween ena?
4. (a) Met weween an emon epwe alleasochisi eu alluk? (b) Awewe mwo ifa ussun sipwe aiti ngeni emon an epwe alleasochisi an Kraist we alluk.
4 An emon epwe alleasochisi eu alluk a wewe ngeni an epwe “atipeeufengenni an kewe foffor” ngeni eu alluk—epwe titchik le fori minne ewe alluk a era are apwonueta. Iwe, epwe ifa ussun sipwe asukula emon pwe epwe alleasochisi ekkewe mettoch Kraist a alluku? Iwe, ekieki mwo ifa ussun emon sense epwe asukula noun kewe chon kaeo allukun untengi chitosa. Eni epwe aiti ngeni noun kewe chon kaeo ussun ekkewe alluk atun ra kaeofengen lon sukul. Iwe nge, ren an epwe aiti ngeni noun kewe chon kaeo ifa ussun repwe alleasochisi ekkena alluk, a lamot an epwe emmwenir atun repwe pwisin untengi waar kewe won al me achocho le apwonueta minne ra fen kaeo. Pwal ussun chok, lupwen sia kaeo Paipel ngeni aramas, sia aitir an Kraist kewe alluk. Iwe nge, a pwal lamot ach sipwe emmweni nouch kewe chon kaeo atun repwe achocho le akkapwonueta an Kraist kewe alluk lon manauer ran me ran me pwal lon ewe angangen afalafal. (Jon 14:15; 1 Jon 2:3) Ina minne, ach sipwe unusen apwonueta an Kraist we alluk pwe sipwe foralo chon kaeo epwe wewe ngeni ach sipwe wisen aitir ekkewe alluk me ifa ussun repwe apwonueta. Epwe ina ussun sipwe tapweilo mwirin ewe leenien appiru Jises me Jiowa ra isetiu.—Kol Fel 48:14; Pwarata 7:17.
5. Pwata epwe ekis weires ngeni emon mi kakkaeo Paipel an epwe alleasochisi an Kraist we alluk pwe epwe fiti ewe angangen foralo chon kaeo?
5 Epwe kapachelong lon ach aiti ngeni aramas pwe repwe alleasochisi an Jises kkewe alluk ach sipwe aitir ar repwe alleasochisi ewe alluk pwe repwe foralo chon kaeo. Ina epwe weires ena me ren ekkoch nouch kkewe chon kaeo. Inaamwo ika ra pin achocho lon eu lamalamen Kristendom, nge ese mwaal nour kewe nouwis rese fen asukuler pwe repwe feilo foralo chon kaeo. Ekkoch nouwisen lamalam ra akkafata pwe ekkewe lamalamen Kristendom ra unusen lipwakingau ren ewe wis ar repwe aiti ngeni nour kewe siip pwe repwe afalafala aramas. Lon an kapas ussun an Jises we alluk pwe repwe feilo me alisi sokkun aramas meinisin ar repwe wiliti chon kaeo, emon sou kaeo Paipel itan Jon R. W. Stott a apasa: “Am ause alleasochisi weween ei alluk, ina ewe apwangapwang mi lapalap seni meinisin lein ekkewe mi era pwe ir Chon Kraist chon afalafal.” Iwe, a pwal apasa: “Am ause kkan pwisin esilefeili am kkewe poraus allim ngeni emon me emon. Fan ekkoch, epwe ussun ita nge am aua kokko kapasen emmwen seni oroset ngeni ekkoch mwan repwele mwalum. Nge am ause tulo faiset pwe aupwe selaniir. Am aua niuokkus pwe aupwe chochchon.”
6. (a) Lupwen sipwe alisi emon chon kaeo Paipel, ifa ussun sipwe tongeni appiru Filip? (b) Ifa ussun sipwe alisata emon chon kaeo lupwen epwe keran poputa le fiti ewe angangen afalafal?
6 Ika sia kaeo Paipel ngeni emon mi pin choni eu lamalam mi “niuokkusiiti ar repwe chochchon,” eni epwe weires ngeni an epwe pworaiti an niuokkusiiti an epwe tulo faiset, lon kapas awewe, me alleasochisi an Kraist we alluk pwe epwe foralo chon kaeo. Epwe lamot ngeni alillis. Ina minne, epwe lamot ach sipwe mosonottam ngeni atun sipwe ngeni ewe esin kapasen emmwen mi awattei an weweoch me achungu letipan, ussun chok aitien Filip a asarama ewe re Itiopia me amwokutu pwe epwe papataiselo. (Jon 16:13; Fofor 8:35-38) Pwal eu, ach mochen aiti ngeni nouch kewe chon kaeo pwe repwe alleasochisi ewe alluk pwe repwe foralo chon kaeo epwe amwokutukich ach sipwe fitiir me emmweniir lupwen repwe keran poputa lon ewe angangen afalafala ewe Muu.—Än Salomon Afalafal 4:9, 10; Luk 6:40.
“Mettoch Meinisin”
7. Ikkefa ekkewe alluk epwe kapachelong lon ach aiti ngeni aramas pwe repwe ‘alleasochisi mettoch meinisin’?
7 Sise chok asukula aramas pwe repwe foralo chon kaeo. Jises a alluku pwe sipwe aiti ngeni aramas pwe repwe “alleasochisi mettoch meinisin” minne a alluku. Iwe, a pwal kapachelong ekkewe ruu alluk mi lapalap seni meinisin—pwe repwe tongei Kot me tongei chon oruur. (Mateus 22:37-39) Epwe ifa ussun emon minefoon chon kaeo epwe kaeo ifa ussun an epwe alleasochisi ekkena ruu alluk?
8. Eani kapas awewe ren ifa ussun emon minefoon chon kaeo epwe kaeo an epwe pwarata tong.
8 Ekiekisefalli ussun ewe kapas awewe ussun emon chon kaeo unteng. Atun epwe untengi waan we me lein ekkewe ekkoch chitosa, nge noun we sense epwe nom ren, ewe chon kaeo ese chok auseling ngeni alon noun we sense nge a pwal kaeo seni an nennengeni ekkewe ekkoch chon unteng. Awewe chok, eni ewe sense epwe aiti ngeni pwal emon chon unteng, a kirokiroch le mut ngeni pwal emon an epwe salong akkom mwan; are pwal emon chon unteng mi oturu tenkien waan we pwe esap aosukosuka ekkewe ekkoch chon unteng lupwen repwe ssafengen; are pwal emon chon unteng mi alisi emon mi ta waan we. Ekkena pisekin nengeni ra aiti ngeni ewe chon kaeo ekkoch lesen mi auchea pwisin i epwe tongeni apwonueta atun an epwe unteng. Iwe, epwe pwal ina ussun emon minefoon chon kaeo Paipel mi aleni ewe alen manau, esap chok kaeo seni noun we sense nge pwal seni ekkewe leenien appiru mi murinno epwe kuna lon ewe mwichefel.—Mateus 7:13, 14.
9. Ifa ussun emon minefoon chon kaeo epwe silelo weween an epwe alleasochisi ewe alluk pwe epwe pwarata tong?
9 Awewe chok, eni emon chon kaeo epwe kuna emon in esor puluan we akkachocho le panato noun kkewe semirit ngeni ewe Kingdom Hall. Eni epwe nengeni emon mi letipechou a kan fiffiti ekkewe mwich inaamwo ika a chou letipan, pwal emon chinnap mi ma seni puluan we a uwei chienan kkewe chinnap ngeni iteiten an ewe mwichefel kkewe mwich meinisin, pwal emon sarafo mi fiffiti angangen alimelima ewe Kingdom Hall. Eni ewe chon kaeo Paipel epwe nengeni emon elter lon ewe mwichefel mi wisen emmweni ewe angangen afalafal inaamwo ika a chommong wisan kewe lon ewe mwichefel. Eni epwe chuuri emon Chon Pwarata mi apwangapwang inisin pwe ese tongeni tou seni imwan we, nge i eu minen apochokkul lon pekin ngun ngeni meinisin mi ekketo chuuri i. Eni ewe chon kaeo epwe nengeni eu pean pupulu mi fokkun siwili nonnomun manauer fan iten ar repwe tumunu semer kkewe me iner mi chinnap. Ren an nengeni ekkena sokkun Chon Kraist mi kirokiroch, alillisoch, me kichioch, ewe minefoon chon kaeo epwe kaeo seni ar kkewe leenien appiru weween an epwe alleasochisi an Kraist we alluk pwe epwe tongei Kot me chon orun kewe, akkaeuin chienan kewe chon luku. (An Salomon Fos 24:32; Jon 13:35; Kalesia 6:10; 1 Timoti 5:4, 8; 1 Piter 5:2, 3) Epwe ina ussun emon me emon chon ewe mwichefelin Chon Kraist repwe tongeni—me fen ina wiser ar repwe—wisen sense me chon emmwen.—Mateus 5:16.
“Tori Le Sopolon ei Fansoun”
10. (a) Tori ineet sipwe foralo chon kaeo? (b) Ifa ewe leenien appiru Jises a isetiu ren an akkapwonueta wisan kewe?
10 Tori inet sipwe sopweilo le foralo chon kaeo? Tori sopolon ewe ototen mettoch. (Mateus 28:20) Epwe tufich ach sipwe apwonueta ei kinikinin an Jises we alluk? Kich chon eu mwichefel won unusen fonufan, sipwe tipeppos le fori ena mettoch. Lon ekkewe ier ra lo, sia fen pwapwa le aea ach fansoun, manaman, me pisekich fan iten ach sipwe kutta ekkewe “mi fich ngeni manau esemuch.” (Fofor 13:48) Lon ei fansoun, Chon Pwarata Jiowa meinisin ra aea lap seni ulungat milion aua iteiten ranin ewe ier lon ewe angangen afalafala ewe Muu me foralo chon kaeo won unusen fonufan. Sia fori ena pun sia tapweilo mwirin an Jises we leenien appiru. A apasa: “Iei anei, pwe upwe fori letipen ewe emon mi tinieto, o upwe pwal awesalo an angang.” (Jon 4:34, NW) A pwal ina ussun mochenin letipach. (Jon 20:21) Sise mochen chok poputani ewe angang mi alukuluku ngenikich; sia pwal mochen awesalo.—Mateus 24:13; Jon 17:4.
11. Met a fen fis ngeni ekkoch pwich kewe, me met sipwe eisini pwisin kich?
11 Iwe nge, sia lolilen lupwen sia kuna pwe ekkoch me lein chienach kewe chon luku ra apwangapwangelo lon pekin luku me mwiriloon, ra akukkunatiu are ukutiu seni ar alleasochisi an Kraist we alluk pwe repwe foralo chon kaeo. Sipwe tongeni alisiir pwe repwe fitisefalli ewe mwichefel me ewe angangen foralo chon kaeo? (Rom 15:1; Ipru 12:12) Lapalapen an Jises alisi noun kewe aposel atun ra ekis apwangapwang fan eu a pwarata met sipwe pwal tongeni fori ikenai.
Pwarata Ach Ekiekiir
12. (a) Me mwen an Jises we malo, met noun kewe aposel ra fori? (b) Met Jises a fori inaamwo ika noun kkewe aposel ra pwarata apwangapwang watte?
12 Le sopoloon an Jises we angangen afalafal won fonufan, lupwen epwele malo, ekkewe aposel ra “likitalo i, o ra sulo.” Ussun Jises a fen oesini, repwe “kupetfesen ngeni en me leenian.” (Mark 14:50; Jon 16:32) Met Jises a fori ngeni noun kewe aposel mi apwangapwang lon pekin ngun? Ekiselo chok mwirin an we manausefal, Jises a ereni ekkoch noun kewe chon kaeo: “Oute niuokus! Nge oupwele chok feilo o ereni pwii kewe pwe repwe feilo ngeni Kalili. Iwe, repwap kunaei me ikewe.” (Mateus 28:10) Inaamwo ika ekkewe aposel ra pwarata watten ar apwangapwang, nge Jises a chuen koriir “pwii kena.” (Mateus 12:49) Ese ukutiu le eani lukuluk wor. A iei ussun Jises a umoumoch me omusalo tipisir, ussun chok Jiowa a umoumoch me omusalo chon tipis. (2 King 13:23) Ifa ussun sipwe tongeni appiru Jises?
13. Epwe ifa ach ekiek ussun ekkewe mi apwangapwangelo lon pekin luku?
13 A lamot sipwe lolileniesini ir kewe mi apwangapwangelo are ukutiu seni ar fiffiti ewe angangen afalafal. Sia chuen chechemeni ar kkewe angangen tong ra pin foffori me lom—eni, ekkoch ren chommong ier. (Ipru 6:10) Sia enletin positiir. (Luk 15:4-7; 1 Tesalonika 2:17) Iwe nge, epwe ifa ussun sipwe tongeni pwari ngeniir ach tonger?
14. Lon ach appiru Jises, ifa ussun sipwe tongeni alisi emon mi apwangapwang?
14 Jises a ereni ekkewe aposel mi letipechou pwe repwe feilo Kalili, iwe, repwe kuna i me ikkewe ie. Weween, Jises a etiwar ngeni eu mwich mi sokkolo aucheaan. (Mateus 28:10) Epwe pwal ina ussun ikenai, sipwe etiwa ekkewe mi apwangapwang lon pekin luku pwe repwe fiti an ewe mwichefelin Chon Kraist kewe mwich, iwe, eni epwe lamot ach sipwe etiwar lap seni fan eu chok. Ren ekkewe aposel, a sopwoch ewe kapasen etiwetiw, pun “ekkewe engol-me-emon chon kaeo ra feilo ngeni Kalili, won ewe chuk Jises a fen aiti ngenir.” (Mateus 28:16) A ifa me watten ach pwapwa lupwen ekkewe mi apwangapwang repwe nguuri ach kewe kapasen etiwatiw me poputasefal le fiffiti an Chon Kraist kkewe mwich!—Luk 15:6.
15. Ifa ussun sipwe tongeni appiru Jises lupwen sipwe etiwa ekkewe mi apwangapwang mi etto ngeni ach we leenien mwich?
15 Met sipwe fori lupwen emon Chon Kraist mi apwangapwang a wareiti ewe Kingdom Hall? Iwe, met Jises a fori lupwen a kuna noun kewe aposel mi apwangapwang lon ena fansoun, lon ewe leenien mwich? “Jises a feilo kapas ngenir.” (Mateus 28:18) Ese chok nennengenir seni touau nge a feilo rer. Anchangei mwo pwapwaan ekkewe aposel lupwen Jises a pwisin feilo rer! Amwo sipwe pwal pwisin mwokutukut me etiwaochu ekkewe mi apwangapwang lon pekin luku mi achocho le fitisefalli ewe mwichefelin Chon Kraist.
16. (a) Met sipwe tongeni kaeo seni lapalapen an Jises foffor ngeni noun kewe chon kaeo? (b) Ifa ussun sipwe tongeni eani an Jises ekiek ussun ekkewe mi apwangapwang? (Nengeni ewe footnote.)
16 Ifa pwal eu mettoch Jises a fori? Akkom, a eani eu kapasen esilesil, a era: “Nemenem meinisin a fen ngeniei.” Oruuan, a apasaou an we alluk, a apasa: “Feilo foralo chon kaeo.” Aulungatin, a eani eu pwon: “Ngang upwe nonnom remi ran meinisin.” Nge ka kuna met Jises ese fori? Ese apwungu ekkewe aposel pokiten ar apwangapwang me tipemwaramwar. (Mateus 28:17) A sopwoch an Jises we foffor? Ewer. Ekiselo chok mwirin, ekkewe aposel ra poputasefal le “afalafala me esileifeili ewe kapas allim.” (Fofor 5:42, NW) Ren ach sipwe appiru Jises ren ach ekiek me foffor ngeni ekkewe mi apwangapwang, eni sipwe pwal kuna uwaochun ach kewe foffor lon ach we mwichefel.b—Fofor 20:35.
“Ngang Upwe Nonnom Remi Ran Meinisin”
17, 18. Ifa ussun alon Jises, “Ngang upwe nonnom remi ran meinisin” a apochokkulakich?
17 Ekkewe sopolon kapas lon an Jises we alluk, “Ngang upwe nonnom remi ran meinisin,” a wor eu kapasen apochokkul ngeni meinisin mi tinikken le apwonueta an Kraist we alluk pwe repwe foralo chon kaeo. Ese lifilifil met ekkewe chon u ngeni ach we angangen afalafala ewe Muu repwe fori me met sokkun kapasen pwen repwe eani, nge esor popun ach sipwe niuokkus. Pwata? Jises, nouch we Masta, mi eani ‘nemenem meinisin lon lang me won fonufan,’ epwe nonnom rech pwe epwe peppenikich!
18 An Jises we pwon, “Ngang upwe nonnom remi ran meinisin”, a fokkun aururukich. Atun sipwe achocho le apwonueta an Kraist we alluk pwe sipwe foralo chon kaeo, sipwe kuna ekkoch ranin pwapwa, nge epwe pwal wor ekkoch ran mi lolilen. (2 Kronika 6:29) Ekkoch leich ra kuna fansoun letipechou lupwen emon attonger we a malo. (Keneses 23:2; Jon 11:33-36) Pwal ekkoch ra chinnapelo, lupwen a kisikiselo pochokkulen inisiir. (Än Salomon Afalafal 12:1-6) Pwal ekkoch ra kuna fansoun weires lupwen a kon watte ar meefi letipechou. (1 Tesalonika 5:14) Iwe, ren chommong leich, a watteta ach osukosuk lon pekin moni. Iwe nge, ese lifilifil met sokkun weires epwe torikich, nge sipwe sopwoch lon ach we angangen afalafal pun Jises a nonnom rech “ran meinisin,” pachelong ekkewe ran mi kon weires seni meinisin lon manauach.—Mateus 11:28-30.
19. (a) Ikkefa ekkewe kapasen emmwen a fiti an Jises we alluk pwe sipwe foralo chon kaeo? (b) Met a atufichikich ach sipwe apwonueta an Kraist we alluk?
19 Ussun sia fen kuna lon ei lesen me pwal lon ewe lesen me mwan, an Jises we alluk pwe sipwe foralo chon kaeo a kku mettoch meinisin sia fen kaeo ussun. Jises a erenikich pwata me ia sipwe apwonueta an we alluk. A pwal erenikich met sipwe eani afalafal me tori ineet sipwe fori ena angang. Pwungun, ach apwonueta ei wis mi lap esap mecheres. Nge ren alillisin an Kraist we nemenem me an nonnom rech, sipwe tongeni apwonueta wisach! Kese tipeeu ngeni?
[Pwóróus fan]
a Eu puken sile a apasa pwe Jises a apasa, “papataisir . . . afalafaler,” nge sap ‘papataisir me afalafaler.’ Ina minne, ewe alluk pwe repwe papataisi me afalafala aramas “esap wesewesen . . . ruu angang mi tettel. Iwe nge, “ewe angangen asukul epwe sopwosopwolo, iwe, epwe fis me mwen fansoun papatais . . . me epwe pwal sopweilo mwirin an emon epwe papatais.”
b Sia tongeni kuna pwal ekkoch poraus ren ifa ussun sipwe ekieki me alisi ekkewe mi apwangapwang lon ewe The Watchtower minen February 1, 2003, pekin taropwe 15-18.
Ifa Ussun Kopwe Polueni?
• Ifa ussun sipwe aiti ngeni aramas pwe repwe alleasochisi minne Jises a alluku?
• Ikkefa ekkewe lesen emon minefoon chon kaeo epwe kaeo seni chon ewe mwichefel?
• Met sipwe tongeni fori pwe sipwe alisi ekkewe mi apwangapwangelo lon pekin luku?
• Ifa ussun an Jises we pwon, “Ngang upwe nonnom remi ran meinisin” epwe apochokkula me aururukich?
[Sasing lón pekin taropwe 26]
A lamot ach sipwe wisen sense me pwal chon emmwen
[Sasing lón pekin taropwe 28]
Emon minefoon chon kaeo epwe kaeo ekkoch lesen mi auchea seni ekkewe leenien appiru ekkewe ekkoch repwe isetiu