Sipwe Kukutta Ewe “Foun Pwei Mi Fokkun Auchea” Lon Ei Fansoun
“Ei poraus allimen ewe muu epwe afalafalfeil won unusen fonufan pwe epwe eu minen pwarata.”—MATTU 24:14, NW.
EWE Muun Kot eu poraus mi fokkun lamot lein chon Jus lon ewe atun an Jises feitiu fonufan. (Mattu 3:1, 2; 4:23-25; Jon 1:49) Iwe nge, le poputaan a lap me leir rese unusen weweiti ika epwe ifa ukuukun watteen an nemenem me rese pwal weweiti pwe epwe eu nemenem lon lang. (Jon 3:1-5) Pwal mwo nge ekkoch mi wiliiti noun Jises chon kaeo rese unusen silei weween an Kot we Muu are minne repwe fori pwe repwe kuna feiochun ar repwe wiliiti chienen Kraist kewe chon nemenem.—Mattu 20:20-22; Luk 19:11; Fofor 1:6.
2 Mwirin, Jises a mosonottamen aiti ngeni noun kewe chon kaeo chommong lesen, pachelong ewe kapas awewe ussun ewe foun pwei mi fokkun auchea, ewe sia kaeo ussun lon ewe lesen mi akkom mwen ei, iwe, a aiti ngeniir lamoten ar repwe angang weires le kutta ewe Muun lang. (Mattu 6:33; 13:45, 46; Luk 13:23, 24) Ese mwaal a wesewesen chung letiper pun ra muttir wiliiti chon afalafal mi tinikken me pwora, chon afalafala poraus allimen ewe Muu lon ekkewe fonu towau, ussun an a wesewesen ffatolo lon ewe puken Fofor.—Fofor 1:8; Kolose 1:23.
3 Iwe, ifa ussun lon ach ei fansoun? Ekkewe feioch lon eu paratis won fonufan fan ewe muu a suuk ngeni chommong, chommong aramas. Lon an Jises we oesini mi lapalap ussun “sopwoloon ei otot,” a mmen ffatoch alon ei: “Ei poraus allimen ewe muu epwe afalafalfeil won unusen fonufan pwe epwe eu minen pwarata ngeni muu meinisin; iwe mwirin, epwe war ewe sopwoloon.” (Mattu 24:3-14, NW; Mark 13:10) A pwal awewei pwe ena angang mi fokkun watte epwe pwonuta, inaamwo ika epwe wor minen eppet me fansoun weires, are pwal mwo nge watte riaffou. Iwe nge, iei an kapasen anukunuk: “Ewe emon mi likiitu tori ewe sopwoloon, ina i ewe emon epwe kuna manau.” (Mattu 24:9-13) Ekkena mettoch meinisin ra wewe ngeni pwe aramas repwe pennuku pwisin letiper me angang ren unusen tufichir pwe a ina ussun ewe chon amomo mi saifetal lon an Jises we kapas awewe. Lon ei fansoun, mei wor aramas mi pwarata ena sokkun luku me tinikken le kutta ewe Muu?
Chengelin An Aramas Kuna ewe Enlet
4 Ewe chon amomo lon an Jises kapas awewe a mmen chengel lupwen a kuna efou “foun pwei mi fokkun auchea.” Ena chengel a amwokutu i pwe epwe fori minne chok a tufich ngeni pwe epwe nouni ewe foun pwei. (Ipru 12:1) Lon ei fansoun, poraus mi enlet ussun Kot me an we Muu a pwal luki me achungu letipen aramas. Iwe, a achchema ngenikich ussun alon Brother A. H. Macmillan, ewe mi makkei porausen an pwisin kutta Kot me an kokkot ngeni aramas lon ewe puk itan Faith on the March. Iei alon: “Minne ua fen kuna fite ngerou aramas ra kan kuna iteiten ier meinisin. Iwe, ir aramas mi ussun en me ngang, pun ir chon meinisin sokkun muu, einang, lewo me a sokkopat ierir. Ewe enlet ese kan lifilifil aramas. A kan luki sokkun aramas meinisin.”
5 Pwungun ekkena kapas a pwalo iteiten ier pun leluken fitepuku ngerou aramas mi wenechar letiper a chung ren poraus allimen an Kot we Muu pwe repwe fangolo manauer ngeni Jiowa me fori letipan. A pwal ina ussun ewe 2004 service year, ewe mi poputa fan September 2003, nge a muchulo fan August 2004. Lon ekkena 12 maram, 262,416 aramas ra esissinnata pwe ra fen fangolo manauer ngeni Jiowa ren ar papatais lon konik. A fis ena mettoch lon 235 fonu, nge Chon Pwarata Jiowa ra eani 6,085,387 Bible study iteiten wiik ren ar repwe alisi aramas mi eani sokkopaten angang me ir chon chommong sokkun muu, einang, me fos, pwe repwe silei ewe enlet seni an Kot we Kapas, nge ina ewe enlet mi emmwen ngeni manau.—Pwarata 7:9.
6 Pwata a tufichin pwonuta ekkena mettoch meinisin? Esor tipemwaramwar pwe Jiowa a kan luki chokana mi tipemecheres. (Jon 6:65; Fofor 13:48) Iwe nge, a pwal lamot ewe ngunun pennuku manau me tinikken mi nom ren ir kewe mi aea manauer le kutta ewe Muu. Iei makkeien Brother Macmillan lupwen a 79 ierin: “Seni ewe fansoun ai keran aewin kaeo ussun ekkewe pwon mi suuk ngeni chon fonufan mi nom fan nemenien samau me malo, ai apilukuluk lon ena poraus mi pwalo lon Paipel ese mwo kukkunulo tori iei. Lon chok ena fansoun a pposolo letipei fan iten ai upwe sissileilo minne Paipel a aiti ngenikich pwe upwe tongeni alisi pwal fitemon mi ussi, weween, ir kewe mi mochen silei ussun ewe Kot mi Unusen Tekia, Jiowa, me an kewe kokkot mi murinno ngeni aramas.”
7 Ena ngunun mwasangasang a pwal pwalo lein noun Jiowa kewe chon angang lon ei fansoun. Ren chok awewe, mei wor emon itan Daniela seni Vienna, Austria. Iei alon neminna: “Seni le kukkuni, Kot a nampa eu lein chienei kewe. Seni inet ewe ua mochen silei itan pun me rei nge ese lien och ei kapas ‘Kot.’ Nge ua witiwit tori a 17 ieri, lupwen Chon Pwarata Jiowa ra feito ren imwei. Ra awewei mettoch meinisin ua mochen silei ussun Kot. Iwe, ina ewe fansoun ua keran silei ewe enlet, me ua fokkun mmeseik! A fokkun watte ai mmeseik pwe iwe ua poputa le afalafal ngeni aramas meinisin.” An mwasangasang a muttir atoto kapasen esiit seni chienan kewe chon sukul. Daniela a pwal apasa pwe “Nge me rei a ussun ita ua kuna pwopwpwonutaan an Paipel kewe oesini, pun ua fen kaeo pwe Jises a apasa nge aramas repwe oput me eriaffou noun kewe chon kaeo fan asengesin itan we. Ua fokkun mairu me pwapwa.” Ekiselo mwirin, Daniela a fangolo manauan ngeni Jiowa, a papatais, iwe, a poputa an achocho ngeni angangen misineri. Mwirin an pupulu, Daniela me puluwan we Helmut ra poputa le afalafal lein chon Africa, chon China, chon Philippines, me chon India lon Vienna. Iei Daniela me Helmut ir misineri lon notouooren Africa.
Ir rese Fangeta
8 Pwungun pwe ewe angangen misineri eu me lein ekkewe mettoch noun Jiowa kewe aramas lon ei fansoun ra kan pwarata ar tong ngeni Kot me ar tuppwol ngeni an we Muu ren. Ussun ewe chon amomo lon an Jises we kapas awewe, ir kewe mi fiti ena angang ra tipemecheresin sai ngeni fonu mi towau fan asengesin ewe Muu. A enlet pwe ekkena misineri rese sai fan iten ar repwe kuna poraus allimen ewe Muu; nge ra kan uwei ena poraus ngeni aramas mi nonnom lon fonu mi towau, iwe, ra kan asukuler me alisiir pwe repwe noun Jises Kraist chon kaeo. (Mattu 28:19, 20) Lon chommong fonu, ra likiitu fan mettoch mi sokkolo weiresin. Nge a mmen watte liwinin ar likiitu.
9 Sipwe eani awewe won ewe fonu itan Central African Republic, pun lon ewe ier chon fiti Achechchemenien maloon Kraist a ukuukun 16,184, nge ena ukuukun a lap seni nampaan chon afalafala porausen ewe Muu lon ena fonu won fan fisu. Pokiten chommong leeni lon ena fonu esor fiifi, aramas ra kan fori ar angang lukun imwer kewe fan nurun ira. Ina minne, a kan pwal ina ussun an ekkewe misineri fori ar angang, weween, ra kan kaeo ngeni aramas lukun imwer kewe fan nurun ira. A saramaram me patapat lukun, nge a wor pwal eu feiochun. Chon ena fonu ra mmen aucheani ewe Paipel, me fan chommong aramas ra popporausfengen ussun lamalam. Fan chommong, aramas mi fetal won al ra kuna ar kaeo ngeni aramas, iwe, ra chok pwal fiti ewe kaeo.
10 Ina popun, lupwen emon misineri a kaeo ngeni emon lon Paipel lukun imwan, emon aluwol mi nonnom lon ewe epek a pwereto, iwe, a apasa pwe pokiten esaamwo wor emon mi chuuri i, a mochen pwe ewe misineri epwe feilo ren me kaeo Paipel ngeni. Ewe misineri a pwapwa le fori ena mettoch, iwe iei, ewe aluwol a muttir feffeita lon pekin ngun. Lon ena fonu, fan chommong ekkewe polis ra kan auloi Chon Pwarata Jiowa won al, nge esap fan iten ar repwe ngeniir taropween kokkoon kapwung are pakking, pwe fan iten ar repwe angei seniir ewe Leenien Mas me Awake! are ren ar repwe apasa ar kilisou ren eu poraus ra mmen efich lon ekkena chassi.
11 Chommong lein ir kewe mi poputa lon ewe angangen misineri 40 are 50 ier lom ra chuen fiti ena angang tori iei. A fet ochchun ewe leenien appiru ra isetiu rech pokiten watteen ar luku me likiitu! Lon ekkewe 42 ier ra lo, eu pupulu ra angangfengen lon ewe wiis misineri lon ulungat fonu. Iei alon ewe mwan: “A wor fansoun weires. Ren chok awewe, a urikem malaria ukuukun 35 ier. Iwe nge, esap fan eu am meefi pwe a lamot mwaal am filata ewe angangen misineri.” Iei alon puluwan we: “Fansoun meinisin a wor chommong mettoch am aua kilisou ren. A mmen apwapwa ewe angangen afalafal, me a mecheres ach sipwe poputa le kaeo ngeni aramas lon Paipel. Lupwen am aua kuna an ekkewe chon kaeo fiffiti mwich me ar sissilefengenniir, a ussun an chon eu famili chufengen iteiten fansoun meinisin.”
Meefier Nge “Mettoch Meinisin Piipi Chok”
12 Lupwen ewe chon amomo mi saifetal a kuna efou foun pwei mi fokkun auchea, “a feilo, a muttir amomolo mettoch meinisin mi nom ren, iwe, a moni.” (Mattu 13:46) An tipemecheresin likitalo minne mi ussun ita auchea, a ina lapalapen ir kewe mi enletin aucheani lamoten ewe Muu. Iei alon ewe aposel Paul, nge i emon mi wiiseni ewe wiis mi auchea, wiisen an epwe eti Kraist le lingeni lingen ewe Muu: “Ngang ua pwal meefi pwe mettoch meinisin mi lamot mwaal pokiten an a somolo aucheaan ai silei Kraist Jises ai Samol. Pokiten i ua fen likitalo mettoch meinisin, iwe, ua meefi pwe ir piipi chok, fan iten ai upwe eti Kraist.”—Filipai 3:8, NW.
13 Lon ei fansoun chommong ra pwal ina ussun, pun ra tipemecheresin siwili manauer ren ar repwe kuna feiochun ewe Muu. Ren chok awewe, lon 2003 fan October, emon nouwiis mi 60 ierin, nouwiisin eu sukul lon ewe Czech Republic, a kuna ewe puken alillisin kaeo Paipel itan Sile mi Emmwen ngeni Manau Esemuch. Mwirin an alleani, a muttir kutta Chon Pwarata Jiowa lon leenian we pwe epwe kaeo Paipel seniir. A feffeita lon pekin ngun, iwe, ekiselo chok mwirin, a poputa le fiffiti mwich meinisin. Iwe nge, a fet an ekiekin wiiseni ewe wiis mayor me an ekiekin makkeilong itan fan iten uttuten senator? A filata an epwe achocho ngeni pwal eu wiis, wiisen an epwe emon chon afalafal fan iten ewe Muu. Iei alon: “Ua tufichin ineti ngeni nei kewe chon sukul chommong puken aweween Paipel.” A esissinnata an fangolo manauan ngeni Jiowa ren an papatais lon konik lon eu mwichelap fan ewe maram July lon 2004.
14 A pwal ina ussun meefien fite milion won unusen fonufan ussun poraus allimen ewe Muu. Ra fen imulo seni chon fonufan mi ngau, ra poutalo lapalaper minen lom, ra likitalo chiechier kewe minen lom, me ra ukutiu seni ar chei mettochun fonufan. (Jon 15:19; Efisus 4:22-24; Jemes 4:4; 1 Jon 2:15-17) Pwata ra fori ekkena mettoch meinisin? Popun, pun ra aucheani ekkewe feioch mi popu seni an Kot we Muu lap seni mettoch meinisin ei otot won fonufan a tongeni atoto ngeniir. A pwal ina ussun meefiom ngeni poraus allimen ewe Muu? Letipom a kan amwokutuk pwe kopwe siwili eoreniom kewe, minne ka akkomwa lon manauom, me minne ka ekiekin achocho ngeni pwe repwe tipeeu ngeni letipen Jiowa? Om fori ena mettoch epwe atoto feioch esemuch ngonuk iei me pwal lon mwach kkan.
Ewe Fansoun Ras Epwele Much
15 Iei makkeien ewe sou makkei kol fel: “Noum aramas repwe asoresini pwisin manauer seni lon letiper lon ewe ran kopwe emmweni noum mwichen aramas.” A kapachelong lein ir kewe mi asoresini manauer “ewe mwichen chommong aluwol ussun chok amurenipwin” me “eu mwich mi watte, mwichen fefin mi esilefeili ewe poraus allim.” (Kol Fel 68:11; 110:3, NW) Met a fen fis pokiten noun Jiowa kewe aramas—nge ir mwan me fefin, kukkun me chinnap—ra tinikken me ra pennuku manauer lon ekkeei ranin le sopwoloon?
16 Emon pioneer, are chon afalafal full-time lon India a ekieki ika ifa ussun epwe tongeni kawor alillis ngeni ekkewe ruu milion som aramas mi selingepung lon ena fonu pwe repwe kaeo ussun ewe Muu. (Aisea 35:5) Iwe, neminnewe a fiti eu sukul pwe epwe kaeo fosun chon selingepung. Lon ena sukul, a tufichin kapas ngeni chommong chon selingepung ussun ewe apilukuluk mi longolong won ewe Muu, iwe, a fisita ekkoch kumiin chon kaeo Paipel. Mwirin ekkoch wiik, lap seni engol me ruuemon ra poputa le fiti mwich lon ewe Kingdom Hall. Mwirin, lupwen a fis eu pariin pupulu, ena pioneer a chuuri emon aluwol mi selingepung seni Calcutta, iwe, a chommong an kapas eis me a mmen watte an mochen silei ussun Jiowa. Iwe nge, a wor och osukosuk. Uruurun pwe ena aluwol epwe liwiniiti Calcutta pwe epwe poputa an fiti college, nge a 1,000 mwail towauan, iwe, esor Chon Pwarata Jiowa mi silei fosun chon selingepung ikewe ie. Ren an fokkun achocho ngeni, a etipetipa seman we pwe epwe mut ngeni an epwe sukul lon Bangalore pwe epwe tufichin sopweilo an kaeo Paipel. A feffeita lon pekin ngun, iwe, mwirin ina epwe eu ier, a fangolo manauan ngeni Jiowa. Mwirin, ena mwan a kaeo Paipel ngeni ekkoch aramas mi selingepung, pachelong emon chiechian me le kukkunun. Iei ewe kisin ofes lon India a akkota pwe ekkewe pioneer repwe kaeo fosun chon selingepung ren ar repwe awora alillis ngeni ena sokkun aramas.
17 Lon pekin taropwe 25 ngeni 28 lon ei chassi, kopwe kuna repotun an Chon Pwarata Jiowa angangen afalafal won unusen fonufan fan iten ewe ier 2004 (service year). Kopwe mwo nengenifichi masouan, me pwisin pi ekkewe pisekin annet pwe noun Jiowa kewe aramas won unusen fonufan ra wenewenen achocho le chechchei ewe “foun pwei mi fokkun auchea” lon ei fansoun.
“Kukutta Akkom ewe Muu”
18 Ika sia ekiekisefalli an Jises we kapas awewe ussun ewe chon amomo mi saifetal, sia kuna pwe ese apasa ifa ussun ewe chon amomo epwe kunakun tufichin manauan mwirin an amomolo mettoch meinisin mi nom ren. A pwung ika ekkoch repwe eis: ‘Ifa ussun ewe chon amomo epwe kuna anan mongo, ufan, me imwan pun iei esor och mettoch mi chuen nom ren? Ita met lamoten ena foun pwei ngeni manauan?’ A pwung ekkena kapas eis ika sise eani ekiekin Kot. Nge esap pwe Jises a pesei noun kewe chon kaeo pwe repwe “kuttafichi lom an muu o an pung; iwe, ekkeei mettoch meinisin repwap kapach ngenikemi”? (Mattu 6:31-33) Ewe kapas awewe a menlapei lamoten ach sipwe angang ngeni Kot ren unusen letipach me pwarata tinikken fan iten ewe Muu. A wor eu lesen ngenikich seni ena mettoch?
19 Ese lifilifil ika sia keran poputa le kaeo ussun ewe poraus allim mi amwarar are a fansoun langattam ach kukuttafichi ewe Muu me ach kakkapas ngeni aramas ussun ekkewe feioch mi popu seni, nge a lamot ach sipwe akkomwa ewe Muu lon ekiekich me letipach. Sia manau iei lon fansoun weires, nge mi nukuchar ekkewe popun ach sipwe luku pwe mi wesewesen enlet minne sia kukutta me esor och mettoch mi lollo ngeni—weween, a ussun ewe foun pwei ewe chon amomo a kuna. Minne a fiffis won fonufan me pwonutaan an Paipel kewe oesini ra awora pisekin annet mi nukuchar pwe sia manau le “sopwoloon ei otot.” (Mattu 24:3) Ussun ewe chon amomo mi saifetal, amwo sipwe pwarata pwe sia tinikken le peni an Kot we Muu ren unusen letipach me pwal meefi chengel ren wiisach we mi auchea, wiisen ach sipwe esilefeili ewe poraus allim.—Kol Fel 9:1, 2.
En mi Chechchemeni?
• Lon ekkewe ier ra lo, met popun a chommongolo ekkewe chon fel mi enlet?
• Mei fet ekiekin ir kewe mi eani angangen misineri?
• A ifa ussun an aramas siwili manauer pokiten ar etiwa poraus allimen ewe Muu?
• Ifa ewe lesen mi fokkun watte lamotan sia tongeni kaeo seni an Jises we kapas awewe ussun ewe foun pwei mi fokkun auchea?
[Ekkewe kapas eis fan iten ewe lesen]
1, 2. (a) Met meefien chon Jus ussun an Kot we Muu lupwen Jises a nonnom won fonufan? (b) Met Jises a fori ren an epwe affata weween ewe Muu, iwe, met a fis pokiten an angang?
3. Met Jises a apasa ussun ewe Muu fan iten ach ei fansoun?
4. Ifa ussun ewe poraus mi enlet ussun ewe Muu a kan kku are siwili manauen aramas lon ei fansoun?
5. Ikkefa ekkewe uwa mi murinno sia kuna lon repotun ewe 2004 service year?
6. Met popun a kan lapalapalo uwaan ach angang iteiten ier?
7. Menni poraus a affata chengelin me mwasangasangen ir kewe mi kuna poraus mi enlet seni Paipel?
8. Ifa eu mettoch mi murinno chommong ra fori fan iten ar pwarata pwe ra tongei Kot me ra tuppwol ngeni ewe Muu?
9, 10. Ikkefa ekkoch poraus mi fokkun apwapwa ra feito seni ekkewe misineri mi nonnom lon ekkewe fonu mi towau, awewe chok ren Central African Republic?
11. Inaamwo ika a tottoriir fansoun weires, nge met meefien ir kewe mi fiti ewe angangen misineri fansoun langattam?
12. Ifa ussun aramas ra kan pwarata pwe ra miritiiti watteen aucheaan ewe Muu?
13. Ifa ussun emon lon ewe Czech Republic a pwarata an tongei ewe Muu?
14. (a) Poraus allimen ewe Muu a fen amwokutu chommong, chommong aramas pwe repwe fet? (b) Ikkefa ekkewe kapas eis sipwe eisini pwisin kich?
15. Me ren porausen oesini, met noun Kot kewe aramas repwe foffori lon ekkewe ranin le sopwoloon?
16. Uwawu mwo eu poraus mi awewei ifa ussun noun Kot kewe aramas ra akkachocho le alisi aramas pwe repwe kaeo ussun ewe Muu.
17. Kopwe awewei mwo minne ka akkaewin pwapwa ren lon repotun ewe 2004 service year, ewe mi nom lon pekin taropwe 25 tori 28.
18. Met sokkun poraus Jises ese apachalong lon ewe kapas awewe ussun ewe chon amomo mi saifetal, me met popun?
19. Ifa ewe nampa eu lesen sia tongeni kaeo seni an Jises we kapas awewe ussun ewe foun pwei mi fokkun auchea?
[Lios lon pekin taropwe 23]
“Ewe enlet . . . a kan luki sokkun aramas meinisin.”—A. H. Macmillan
[Lios lon pekin taropwe 24]
Daniela me Helmut ra afalafal lein aramas mi eani chommong sokkun fos lon Vienna
[Lios lon pekin taropwe 29]
Ussun ewe chon amomo mi saifetal, ekkewe misineri lon ei fansoun ra kan kuna feioch watte
[Lios lon pekin taropwe 30]
“Noum kewe aramas repwe tipemecheresin asoresini manauer”