Nouch Kewe —Ir Alemwiriach Mi Fokkun Auchea
“Nengeni, nouch kewe at, iei mi alemwiriach me ren ewe SAMOL, o uwan ewe leenien monukol, pwal iei liwinich.”—KOL FEL 127:3.
EKIEKI mwo ekkewe mettoch mi amwarar Jiowa a atufichi lupwen a forata ewe aemonun mwan me fefin. Ewe sam, Atam, me ewe inelap, If, ra awora kifetiir kewe mi maarita lon an If leenien monukol tori a aramaselo—ewe aemonun monukol. (Keneses 4:1) Tori ach ei fansoun, sia ingemwareiti ewe fansoun kolu me nounoutiuen emon monukol me aramas ra apasa pwe ina eu manaman seni lang.
2 Lon 270 som ran, ewe kukkun kifetin a akkom fisita lon ewe inelap pokiten an nonnom ren ewe sam a wiliiti emon monukol mei wor fite trilion ekkeei kifetin. A wor lon ewe aewin kifetin ekkewe alluk mi lamot fan iten kefisitaan lap seni 200 sokkopaten kifetin. Pokiten ekkeei alluk aramas rese tongeni unusen weweitiir, ekkewe kifetin mi fokkun tokorara ra maarita me ren eu kokkot me lapalap fan iten ar repwe wiliiti emon aramas mi manau!
3 Me reom, io a forata ewe monukol? Ren enletin, i ewe emon a akkom efisata sokkun manau meinisin. Ewe soumak kol mi fel a eani ei kol: “Oupwe sinei pwe ewe SAMOL, iei i mi Kot! I chok a fen forikicheta, iwe, kich mi noun kewe.” (Kol Fel 100:3) Sam me in kana, oua silei pwe noumi monukol ese fisita pokiten watteen ami tipatchem. Emon Kot ese aukuuk tipatcheman chok a tongeni akkota ei manaman; fisitaan monumanau mi fo. Ren fite ngerou ier, aramas mi tipatchem ra apasa pwe fisitaan emon monukol lon luken inan ina an ewe Chon Forata Mi Lapalap angang. Nge en?—Kol Fel 139:13-16.
4 Iwe nge, Jiowa emon Chon Forata a chok popueta ewe kokkot mi atufichi an mwan me fefin nounou nge ese ekieki are aucheaani ekkewe nau ra nounatiu? A ina ussun ekkoch aramas, nge Jiowa ese ina ussun. (Kol Fel 78:38-40) Ewe Paipel a apasa lon Kol Fel 127:3: “Nengeni, nouch kewe at, iei mi alemwiriach me ren ewe SAMOL, o uwan ewe leenien monukol, pwal iei liwinich.” Iei sipwe ekkekieki weween eu alemwir me met a pwaralo ngenikich.
Eu Alemwir Me Eu Feioch
5 Eu alemwir a ussun chok eu liffang. Fan chommong ekkewe sam me in ra angang weires fan iten ar repwe tufichin likit ngeni nour kewe eu alemwir. Neman ewe alemwir epwe wewe ngeni moni, fonu, are eu pisek ra acheni. Ese lifilifil met sokkun ewe alemwir, a pwari an ewe sam me in tongei nour kewe. Ewe Paipel a apasa pwe Kot a ngeni ekkewe sam me in nour kewe ussun chok eu alemwir. Ir eu liffang mi tong seni Kot. Ika en sam are in, kopwe apasa pwe me reom, noum kewe eu liffang seni ewe Chon Forata lang me fonufan?
6 Jiowa a awora ei liffang pokiten a mochen pwe mwirimwirin Atam me If kewe repwe fonueni unusen ewe fonufan. (Keneses 1:27, 28; Aisea 45:18) Jiowa ese forata emon me emon chon fonufan, ussun chok a forata ekkewe fite milion chon lang. (Kol Fel 104:4; Pwarata 4:11) Iwe, filien Kot pwe epwe forata aramas ren ewe tufichin nounatiu semirit mi lapalapeni lapalapen semer me iner kewe. A ifa me watteen ewe wiis mi amwarar me auchea pwe emon inelap me emon sam a tongeni nounatiu me tumunuochu emon aramas mi fo! Sam me in kana, oua kilisou ngeni Jiowa ren an atufichi ami pwapwaesini ei alemwir mi fokkun auchea?
Kaeo Seni An Jises Leenien Appiru
7 A solap pwe sam me in meinisin rese ekieki pwe nour kewe eu feioch. Chommong rese wesewesen tongei nour kewe. Ekkena sam me in rese lapalapeni lapalapen Jiowa me Noun we. (Kol Fel 27:10; Aisea 49:15) Ekieki mwo ifa ussun a sokkofesen an Jises tongei semirit me an ekkena sam me in. Pwal mwo nge mwen a wiliiti emon chon fonufan—lupwen Jises emon ngun mi fokkun manaman lon lang—ewe Paipel a apasa pwe a “pwapwa ren ekewe aramasen fanufan.” (An Salomon Fos 8:31) A mmen watte an tongei chon fonufan pwe a awora ewe moon kepich fan iter ren an fangolo manauan pwe sia tongeni manau feilfeilo chok.—Mattu 20:28; Jon 10:18.
8 Lupwen a nonnom won fonufan, Jises a isetiu eu leenien appiru mi murinno fan iten ekkewe sam me in. Ekieki mwo met a fori. Pwal mwo nge lupwen a wor an angang me a osukosuk, a chuen tawe ngeni an epwe nonnom ren ekkewe semirit. A atola ar kuloufengen lon ewe leenien amomo me a pwal eani awewe won lapalaper lupwen a asukula aramas. (Mattu 11:16, 17) Atun an saingoon sai ngeni Jerusalem, Jises a silei pwe epwe riaffou me malo. Neman noun kewe chon kaeo ra mochen tumunu Jises seni osukosuk lupwen ra asuelo ekkewe semirit. Nge Jises a apwungu ekkewe chon kaeo. A pwari an “pwapwa” ren ekkewe semirit lupwen a apasa: “Oupwe mut ngeni ekkewe semirit pwe repwe feito rei, nge ousap pinei ir.”—Mark 10:13, 14.
9 Sia tongeni kaeo seni an Jises leenien appiru. Lupwen semirit ra chuto rech, met sia fori—pwal mwo nge lupwen sia osukosuk? Sia appiru Jises? Met a lamot ngeni semirit, akkaewin seni iner kewe me semer, a ina met Jises a tipemecheres le fangolo ngeniir—an fansoun me an ekilapeer. Ren enletin, kapas ussun chok “ua tongeok” mi fokkun lamot. Iwe nge, ach kewe foffor ra pochokkul lap seni ach kapas. Om tongeer ese chok pwalo ren met ka apasa nge a fokkun pwalo ren met ka fori. A pwalo ren ekkewe awa ka nonnom rer, ewe tumun ka awora, me ren om ekilapei met ra lolileniesini. Inaamwo ika ka foffori ekkena mettoch meinisin nge, neman esap muttir uwani ewe uwa ka mochen kuna. A lamot mosonottam. Sia tongeni kaeo mosonottam ren ach appiru ifa ussun Jises a alisi noun kewe chon kaeo.
An Jises Mosonottam Me Tong
10 Jises a silei pwe noun kewe chon kaeo ra kan aninifengen ussun io leir a lap seni meinisin. Fan eu, mwirin a tori Kaperniom me noun kewe chon kaeo, Jises a eani kapas eis: “ ‘Meet ewe oua ani aninifengen ren won al?’ Nge ra chok fanafanelo won pun ra aninifengen lefiler won al ika io leir epwe lap seni meinisin.” Jises ese eani kapas mi chou ren an epwe apwunguur, nge a aiti ngeniir eu lesen ren an epwe asukuleer ussun tekisosson. (Mark 9:33-37) An we kait a sopwoch? Ese muttir sopwoch. Mwirin wonu maram, Jemes me Jon ra ereni iner pwe epwe tingor fan iter wiiser mi tekia lon ewe Muu. Iwe, pwal lon ei fansoun, Jises a mosonottam le awenechara ar ekiek.—Mattu 20:20-28.
11 A tori fansoun ewe Pasofer fan iten 33 C.E., me Jises epwe mongo ewe Pasofer fengen me noun kewe aposel. Lupwen ra tolong lon ewe ruum asan, esor emon leir a mochen tolu pechen chienan kewe—eu angang mi tekisosson fan iten chon angang are fefin. (1 Samuel 25:41; 1 Timoti 5:10) A ifa me watteen riaffoun Jises lupwen a pwalo pwe a chuen auchea ngeni noun kewe chon kaeo io leir a lapalap! Iwe, Jises a tolu pechen emon me emon leir me a peseer ar repwe angang ngeni ekkewe ekkoch. (Jon 13:4-17) A ina met ra fori? Ewe Paipel a apasa pwe lon ena pwinin “ra popueta aninifengen usun io epwe lapalap.”—Luk 22:24.
12 Ami sam me in, lupwen noumi kewe rese auseling ngeni ami fon, iwe, oua meefi meefien Jises? Nengeni pwe Jises ese fang me eani ewe ekiek pwe noun kewe aposel rese tongeni siwil inaamwo ika ra mmang le apwonueta alon an we fon. Mwirin och fansoun, an mosonottam a uwaoch. (1 Jon 3:14, 18) Sam me in kana, oupwe feioch seni ami appiru an Jises tong me mosonottam, me ousap fangeta lon ami achocho le emiriiti noumi kewe.
13 A lamot pwe ekkewe kukkun repwe meefi pwe semer me iner kewe ra tongeer me ekkekieki ussur. Jises a mochen silei met noun kewe chon kaeo ra ekieki ussun, iwe, a auselingeer lupwen ra eani kapas eis. A pwal eisiniir ifa ar ekiek ussun ekkoch poraus. (Mattu 17:25-27) Pwungun pwe kait mi murinno a kapachelong auselingoch me ekiek ussun ewe emon mi kaeo. Emon sam are in epwe nemeni an mochen asuelo noun mi eani kapas eis ren an muttir apasa: “Sulo! Ua osukosuk.” Ika ewe sam are in a wesewesen osukosuk, a tongeni ereni noun we pwe repwe porausfengen lon pwal eu fansoun, me esap monuki an epwe fos ngeni noun we. Iei ussun ewe semirit epwe meefi pwe seman me inan ra wesewesen tongei i, me epwe mecheresilo an fos ngeni seman me inan lupwen a wor an poraus mi lamot.
14 A och sam me in repwe foropachei nour kewe? Iwe, ekkewe sam me in ra tongeni kaeo seni Jises. Ewe Paipel a apasa pwe Jises a “foropachei ir, a iseta poun wor, o a afeiochur.” (Mark 10:16) Iwe, me reom, met ekkena kukkun ra fori? Epwe fen chung letiper me repwe mochen arap ngeni Jises! Ika ekkewe sam me in me ekkewe nau ra enletin saanifengenniir me tongeefengeniir, iwe, ekkewe nau repwe tipemecheres le auseling ngeniir lupwen ra achocho le emiriitiir me asukuleer.
Ifa Ukuukun Fansoun
15 Ekkoch ra tipemwaramwareiti pwe ekkewe nau ra osupwangen watteen an semer me iner fansoun me tong. Eu ekiek ussun kalisitaan semirit mi choufetal iei a aporausa ekkewe sam me in pwe ese lamot ar repwe nonnom ren nour kewe ren fansoun langattam ika ra wesewesen nounouochu ewe fansoun mwochomwoch ra nonnomfengen rer me akkotaochu met repwe fori. Ena kokkot mi auchea me a alisata menemenochun ewe kukkun?
16 Emon soumak a fosfengen me chommong semirit a apasa pwe ekkewe semirit “ra mochen pwe semer kewe me iner repwe alapalo ewe fansoun repwe nonnom rer,” fengen me “an semer me iner kewe ekilapeer chok lupwen ra nonnomfengen.” A lamot met emon sense lon eu sukul tekia a apasa: “Ewe ekiek pwe sipwe chok akkotaochu ewe fansoun mwochomwoch sia nonnomfengen me nouch kewe a fisita seni an ekkewe sam me in mengiringir. Aramas ra sotun le akinamwelo letiper lupwen ra ekisalo ewe fansoun ra nonnomfengen me nour kewe.” Ifa ukuukun ewe fansoun ekkewe sam me in repwe nonnomfengen me nour kewe?
17 Poluen ena kapas eis ese mak lon ewe Paipel. Iwe nge, ewe Paipel a pesei ekkewe sam me in lon Israel ar repwe fosfengen me nour kewe lupwen ra nonnom lon imwer kewe, lupwen ra fetal won ewe aal, lupwen ra konetiu, me lupwen ra pwata. (Tuteronomi 6:7) A ffat seni ei poraus pwe ekkewe sam me in repwe fos ngeni nour kewe me asukuleer fan chommong iteiten ran.
18 Jises a sopwoch lon an emiriiti noun kewe chon kaeo lupwen ra mongofengen are saifengen, iwe, pwal mwo nge lupwen ra asosofengen. A alamota ekkewe fansoun mi murinno meinisin fan iten an epwe asukuleer. (Mark 6:31, 32; Luk 8:1; 22:14) Pwal ussun chok, ekkewe sam me in chon Kraist repwe kukkutta me alamota ekkewe fansoun mi suuk ngeniir fan iten fisitaan me kalisitaan porausfengen me emiriitiin nour kewe lon alen Jiowa kewe.
Met Kopwe Ait Ngeniir Me Ifa Ussun Kopwe Aitiir
19 Esap naf om nonnom ren noum kewe are pwal mwo nge om asukuleer ika kopwe amaariochuur. A pwal lamot met kopwe asukuleer. Nengeni ifa ussun ewe Paipel a menlapei met kopwe asukuleer: “Ekei kapas ua alluk ngonuk ikenai . . . kopwe achocho le aiti ngeni noum kewe.” Ikkefa “ekei kapas” mi lamot ngeni semirit? Ir ekkewe kapas ra keran katowu: “Kopwe echeni ewe Samol mi Lapalap om Kot ren unusen lelukom, ren unusen ngunum, pwal ren unusen tufichum.” (Tuteronomi 6:5-7) Alon Jises, ena alluk ewe mi lamot seni meinisin lein an Kot kewe alluk. (Mark 12:28-30) A lamot seni meinisin an ekkewe sam me in ait ngeni nour kewe ussun Jiowa, ren ar awewe ngeniir ewe popun i chok a fich ngeni ach fel ren unusen ngunuch me tong.
20 Iwe nge, “ekei kapas” ekkewe sam me in repwe ait ngeni nour kewe ese chok wewe ngeni ar repwe tongei Kot ren unusen letiper. Kopwe kuna pwe lon ewe sopwun akkom, Moses a enniwilisefalli ekkewe alluk Kot a makkei won ekkewe sileit fau—ekkewe Alluk Engol. A kapachelong lon ekkeei alluk pwe aramas resap kapas chofona, sola, nnii manau, are lisowu mwaal. (Tuteronomi 5:11-22) Iwe, iei ussun ekkewe sam me in loom ra kaeo ewe lamoten ar repwe ait ngeni nour kewe minne mi pwung me mwaal. Sam me in chon Kraist ikenai repwe awora ena esin kait ika nour kewe repwe menemenoch me pwapwa iei me lon mwach kkan.
21 Nengeni ifa ussun ekkewe sam me in ra rongorong ifa ussun repwe asukula nour kewe ussun “ekkeei kapas,” are ekkeei alluk: “Kopwe achocho le aiti ngeni noum kewe.” “Aiti ngeni” a wewe ngeni ach sipwe “asukuleer me achema ngeniir ren ach ekkenniwili ekkewe kapas fan chommong: peppeseer are fotukalong lon tupuwer.” Iwe, Kot a ussun ita ereni ekkewe sam me in pwe repwe popueta eu kokkotun kaeo ussun ewe Paipel fan iten ar repwe fotukalong ekkewe mettochun ngun lon ekiekin nour kewe.
22 Ekkewe sam me in repwe angang weires ren ar repwe popueta ena esin kokkot. Ewe Paipel a apasa: “Kopwe fotireta won poum pwe eu pisekin achem, kopwe pwal fotireta won chamwom. Iwe, kopwe makereta won penkasamen imwom pwal won asamalapen om telinimw.” (Tuteronomi 6:8, 9) Sap minne pwe ekkewe sam me in repwe wesewesen makkei an Kot kewe alluk won penkasamen imwer kewe me won asamen ewe ttit, foti echo kapi ngeni poun nour kewe, me pwal eu won chamwer. Iwe, repwe akkachema ngeni nour kewe ussun ekkeei alluk pwe ra tongeni ekiek won iteitan.
23 Ikkefa ekkoch mettoch mi fokkun watte lamoter ekkewe sam me in repwe asukula nour kewe? Met popun a lamot pwe ekkewe semirit repwe kait me miritilo ika repwe kuna tumun? Met sokkun alillis a kawor mi alisi ekkewe sam me in ar repwe asukula nour kewe? Ekkeei me pwal ekkoch kapas eis repwe polu lon ewe lesen mwirin ei.
Ifa Ussun Kopwe Polueni?
• Met popun sam me in repwe ekieki pwe nour kewe mi fokkun auchea?
• Sam me in me ekkewe ekkoch ra tongeni kaeo met seni Jises?
• Ifa ukuukun ewe fansoun sam me in repwe nonnom ren nour kewe?
• Ekkewe nau repwe kaeo met, me ifa ussun repwe kaeo?
[Ekkewe kapas eis fan iten ewe lesen]
1. Ifa ussun a fisita ewe aemonun monukol won fonufan?
2. Met popun kopwe apasa pwe met a fis lon an emon fefin leenien monukol a wewe ngeni eu manaman?
3. Pwata chommong aramas mi tipatchem ra apasa pwe Kot ewe emon a efisata ewe tufichin nounou?
4. Ifa eu an aramas lapalap esap lapalapen Jiowa?
5. Met popun semirit ir eu alemwir?
6. Ifa an Kot kokkot lupwen a atufichi aramas ar repwe nounatiu semirit?
7. Ifa ussun Jises a sokko seni ekkoch sam me in ren an ekilapei me tongei “ekkewe aramasen fanufan”?
8. Ifa ussun Jises a isetiu eu leenien appiru mi murinno fan iten ekkewe sam me in?
9. Met popun met sia fori a tongeni lamot seni met sia apasa?
10. Ifa ussun Jises a aiti ngeni noun kewe eu lesen ussun tekisosson, me aitian we a muttir sopwoch?
11. (a) Met noun Jises kewe chon kaeo rese fori lupwen ra nonnom lon ewe ruum asan ren Jises? (b) Met Jises a fori, me a wor uwan an kait lon ena fansoun?
12. Ifa ussun ekkewe sam me in ra tongeni appiru Jises lupwen ra emiriiti nour kewe?
13. Met popun emon sam are in esap chok asuelo noun we fan song lupwen a eani kapas eis?
14. Met ekkewe sam me in ra tongeni kaeo seni Jises ren pwaloon ar tongei nour kewe?
15, 16. Ifa eu ekiek ussun amaariin semirit mi choufetal iei, me ifa eu mettoch a tongeni efisata ena ekiek?
17. Semirit ra osupwangen met seni semer me iner?
18. Ifa ussun Jises a alamota ekkewe tufich ra ppiita ren an epwe emiriiti noun kewe chon kaeo, me ifa ussun ekkewe sam me in ra tongeni kaeo seni met a fori?
19. (a) Pwal met a lamot lukun chok an ekkewe sam me in nonnom ren nour kewe? (b) A fokkun lamot pwe ekkewe sam me in repwe ait ngeni nour kewe ussun met?
20. Kot a awiisa ngeni sam me in loom ar repwe asukula nour kewe ussun met?
21. Ifa weween ewe alluk ‘aiti ngeni’ ekkewe kukkun ussun an Kot we Kapas?
22. Sam me in lon Israel ra wiisen asukula met ngeni nour kewe, me met a wewe ngeni?
23. Met sipwe porausfengen won lon ewe lesen fan iten en wiik?
[Lios lon pekin taropwe 19]
Met sam me in ra tongeni kaeo seni lapalapen an Jises asukula aramas?
[Lios lon pekin taropwe 20]
Inet me ifa ussun sam me in lon Israel repwe asukula nour kewe?
[Lios lon pekin taropwe 21]
Sam me in repwe alisata an nour kewe ekieki ussun aitien Jiowa iteitan