Akkapwönüetä Met Kot A Kütta Seni Ir Kewe Mi Mochen Papatais
“Meeta epwe pineikich pwe usap papaptaiselo?”—FÖFÖR 8:36.
1, 2. Ifa ussun Filip a poputä le fos ngeni ewe nöüwisin Itiopia, iwe, met popun sia silei pwe ei mwän a fokkun achocho ngeni mettochun ngün?
EÜ ARE ruu ier mwirin mäloon Jises, emön nöüwis a säitiu won ewe ääl seni Jerusalem ngeni Kasa. Towauen an säi won waan we wakon ina epwe lap seni engeröü mwail. Ei mwän a fokkun achocho lon an lamalam. A fen säilo Jerusalem seni fönüan we Itiopia ren an epwe fel ngeni Kot ikewe ie. Atun a liwinlo fönüan, ei chon lükü a fokkun äeäöchü ewe fansoun ren an älleaani ewe Kapasen Kot. Jiowa a apareni met ei mwän mi letipöch a föri. A nöünöü emön chon läng ren an epwe ereni Filip pwe epwe afalafal ngeni ewe mwän.—Fofor 8:26-28.
2 Eörenien chon loom pwe repwe leüwommong le ällea. Ina popun a mecheres fän iten Filip an epwe poputä le fos ngeni ewe nöüwisin Itiopia. Filip a rongorong pwe ewe mwän a ällea seni ewe puken Aisea. Eü chök kapas eis a achüngü letipen ewe mwän: “Ifa usun, ka wewe minne ka alleani?” Ena kapas eis a emmwen ngeni ar porausfengen ussun Aisea 53:7, 8. Mwirin, Filip a “a afalafala ngeni i ewe kapas allim usun Jises.”—Fofor 8:29-35.
3, 4. (a) Met popun Filip a muttir papataisi ewe re Itiopia? (b) Ikkefa ekkewe kapas eis sipwe ekiek won?
3 Lon chök eü fansoun mwochomwoch, ewe re Itiopia a weweiti wiisen Jises lon än Kot we kokkot, fengen me ewe lamoten an epwe papatais pwe epwe wiliiti nöün Kraist chon käeö. Iwe, lupwen ewe re Itiopia a küna eü konik, a eisini Filip: “Meeta epwe pineikich pwe usap papataiselo?” Mi ekis sokkolo lapalapen an ewe re Itiopia papatais pün a fen pin fel ngeni Kot me lon ewe lamalamen Jus. Pwal eü, eli esap wor atun epwe wor emön epwe tongeni papataisi i ren fansoun langattam lon fönüan. Nge pwal eü mettoch a lamot, ätei a fen weweiti me a fokkun mochen föri met Kot a kütta seni i. Filip a tipeeü ngeni an we tingor. Iwe, a papataisi ewe mwän. Mwirin an papatais, ewe re Itiopia “a chok pwapwa o [a] feilo lon an we al.” Ese mwääl pwe a fokkun achocho le afalafala ewe kapas allim lon fönüan we.—Fofor 8:36-39.
4 Inaamwo ika fangoloon manauach ngeni Kot me ach papatais mwirin esap ir mettoch mi pwas sipwe ekis chök ekieki ussur nge, porausen ewe re Itiopia a pwäri ngenikich pwe, fän ekkoch, aramas ra muttir papatais mwirin ar kerän rongorong ewe enlet seni Paipel.a Ina popun sipwe ekieki ussun ekkeei kapas eis: Ifa ussun sipwe ammonlatä fän iten ach papatais? Ifa lamoten ierin emön epwe papatais? Ifa üküükün än emön feffeitä lon pekin ngün mwen epwe papatais? Me pwal eü kapas eis mi lamot, met popun Jiowa a mochen pwe nöün kewe chon angang repwe papatais?
Eü Ätipeeü Mi Lamot
5, 6. (a) Ifa ussun nöün Kot kewe aramas loom ra pölüeniöchü än Jiowa tong? (b) Ifa ewe riri lefilach me Jiowa mwirin sia papatais?
5 Mwirin Jiowa a angasalo Israel seni fän nemenien Isip, a ereniir pwe repwe ‘nöün aramas.’ Epwe tongeer me tümünüür, iwe, repwe wiliiti “eu mwü mi pin.” Chon Israel repwe angei ekkeei feiöch ika repwe pölüeniöchü än Kot tong. Ina met ekkewe aramas ra föri ren ar tipeeü le föri ‘meinisin mine ewe Samol mi Lapalap a apasa repwe fori,’ lupwen a fisitä ar we ätipeeü ren Jiowa. (Ekistos 19:4-9) Lupwen Jises a nonnom won fönüfan, a allük ngeni nöün kewe chon käeö pwe repwe käeö ngeni aramas seni ekkewe fönü meinisin. Repwe asukula me papataisi chokkewe mi etiwa an afalafal. Chiechöch me Kot a longolong won ach lükü Jises me papatais.—Mattu 28:19, 20; Fofor 2:38, 41.
6 Ekkeei poraus lon ewe Paipel ra äiti ngenikich pwe Jiowa a efeiöchü ekkewe aramas mi eäni me apwönüetä ar pwon ngeni i. A lamot ngeni chon Kraist ar repwe fangolo manauer ngeni Kot me papatais ika repwe küna feiöch seni Jiowa. Sia apposa letipach ngeni ach sipwe älleasochisi an kewe allük me kütta an emmwen. (Kol Fel 48:14) Lupwen sia föri ena, Jiowa a ussun itä amwöchü pöüch ren an epwe emmwenikich won ewe aal mi mürinnö.—Kol Fel 73:23; Aisea 30:21; 41:10, 13.
7. Met popun emön epwe pwisin filatä pwe epwe papatais?
7 Itä ach tongei Jiowa me ach mochen angang ngeni i epwe amwökütükich le föri ekkeei mettoch. Kesap papatais pokiten emön a apasa pwe a fen naf om käeö are pokiten chienom kewe repwe papatais. Nge, eli sam me in are chon Kraist mi asimau repwe chök pesei emön an epwe ekieki ussun papatais. Ewe aposel Piter a pesei ekkewe chon rongorong lon ränin Pentekos pwe repwe “papataiselo.” (Fofor 2:38) Iwe nge, ach fangolo manauach ngeni Jiowa, filiach. Emön esap fili fän itach. Sipwe pwisin filatä pwe sipwe föri letipen Kot.—Kol Fel 40:8.
Mmonlöch Fän Iten Papatais
8, 9. (a) Met popun papataisin mönükol ese pwüng me ren ewe Paipel? (b) Ika emön semirit a mochen papatais, epwe ifa üküükün an feffeitä lon pekin ngün?
8 Ifa ussun, mei naf tipatchemen emön semirit fän iten an epwe filatä pwe epwe fangolo manauan ngeni Kot? Ewe Paipel ese affata lon menni ierin manauan emön a tongeni papatais. Nge mönükol rese tongeni wiliiti chon lükü, anganga ar lükü, are fangolo manauer ngeni Kot. (Fofor 8:12) Emön sou käeo uruwo (Augustus Neander) a apasa lon nöün we puk (General History of the Christian Religion and Church) pwe: “Akkom, aramas watte chök ra papatais pokiten ekkewe mwän ra weweiti pwe papatais me lükü ra ririfengen.”
9 Ekkoch semirit ra aücheaani mettochun ngün lupwen ra chüen kükkün, nge pwal ekkoch resaamwo aücheaani mettochun ngün le kükkünür. Iwe nge, mwen emön semirit epwe papatais, epwe chiechöch me Jiowa, epwe weweiti ekkewe poraus mi lamot lon Paipel, me epwe pwal weweöchüüti weween an fangolo manauan ngeni Jiowa, ussun chök emön mi watte a weweiti.
10. Met emön epwe föri mwen a fangolo manauan ngeni Kot me a papatais?
10 Jises a apasa pwe nöün kewe chon käeö repwe asukula ekkewe minefö ussun an kewe allük meinisin. (Mattu 28:20) Iwe, akkom, a lamot pwe ekkena mineföön chon käeö repwe angei sile mi enlet. Ena sile epwe atufichiir le eäni lükülük won Jiowa me lon an we Kapas. (Rom 10:17; 1 Timoti 2:4; Ipru 11:6) Lupwen ewe poraus mi enlet seni Paipel a achüngü letipen emön, a amwökütü i an epwe aier me kul seni ekkewe mettoch mi ngaü a föfföri me loom. (Fofor 3:19) Iwe, iei a mochen fangolo manauan ngeni Jiowa me papataiselo me ren än Jises allük.
11. Met popun a lamot pwe sia fiffiti ewe angangen afalafal mwen papatais?
11 Pwal eü minen älillis fän iten emön mi feffeitä ngeni papatais a kawor ren ewe angangen afalafala ewe kapas allim ussun ewe Muu. Iei ewe angang mi lamot seni meinisin Jiowa a awiisa ngeni nöün kewe aramas lon ekkewe ränin le sopwoloon. (Mattu 24:14) Chon afalafal resaamwo papatais mi tongeni pwapwaesini ar foffos ngeni aramas ussun ar lükü. Ar fiffiti ewe angangen afalafal mwen ra papatais epwe älisiir pwe repwe achocho me tinikken fän iten ei angang mwirin papatais.—Rom 10:9, 10, 14, 15.
Mei Wor Met A Pinei Om Kopwe Papatais?
12. Met a pinei ekkoch seni ar repwe papatais?
12 Ekkoch rese mochen papatais pokiten rese mochen wiiseni ekkewe wiis mi riri ngeni. Ra silei pwe ra wiisen siwili manauer ren ar repwe älleasochisi än Jiowa kewe allük. Are ra ekieki pwe, mwirin ra papatais, ar älleasochisi ekkena allük epwe kon weires. Eli ekkoch ra eäni ewe ekiek, “Neman üpwe tipis me üpwe katowu seni lon ewe mwichefel.”
13. Lon ränin Jises, met popun ekkoch rese fiti Jises?
13 Lon ränin Jises, ekkoch rese soulängilo pokiten ra niueiti aramaser are ra kon osukosuk. Emön soumak a apasa pwe epwe fiti Jises ese lifilifil ia a feilo ie. Nge, Jises a apasa pwe, fän ekkoch, esor leeni ia epwe on nut ie. Lupwen Jises a etiwa pwal emön, ewe mwän a apasa pwe epwe akkom “peiasini” seman we. Ewe mwän a mochen witiwit tori seman a mälo mwen epwe fiti Jises. Pwal emön a ereni Jises pwe epwe akkom feilo kapong ngeni ‘chon lon imwan.’ Jises a apasa pwe ei sokkun aramas ra “nennesefaliti mwirin.” Iwe, ika aramas ra chipwang ren wiiser ngeni Jises, repwe kunetipingen ren ekkoch popun mi lamot mwääl pwe resap apwönüüretä.—Luk 9:57-62.
14. (a) Met Piter, Antru, Jemes, me Jon ra föri lupwen Jises a etiweer le ataua aramas? (b) Met popun sisap pireir le angei än Jises iok?
14 Mi fokkun sokkolo met Piter, Antru, Jemes, me Jon ra föri. Lupwen Jises a etiweer, “ra muttir likitalo nour kewe epino, o ra feilo mwirin i.” (Mattu 4:19-22) Pokiten ra muttir filatä le fiti Jises, ra meefi me küna pwüngün met Jises a ereniir: “Oupwe pwilitalong ai iok, o kaeo seniei, pun ngang mi mosonoson me tipetekison; iwe, oupwe kuna asosoon ngunumi. Pun ai iok mi murinno, o osei a pwas.” (Mattu 11:29, 30) Mei wor eü iok are wiisach kewe ra fiti papatais nge, Jises a apasa pwe ach apwönüüretä epwe fokkun asösökich pokiten ena wiis are iok a kirökiröch me pwas.
15. Ifa ussun porausen Moses me Jeremaia a pwäri pwe sia tongeni lükülük won än Kot älillis?
15 Aramas ra kan meefi pwe ra mmen lipwäkingaü. Akkom, Moses me Jeremaia ra meefi pwe rese tongeni apwönüetä met Jiowa a awiisa ngeniir. (Ekistos 3:11; Jeremaia 1:6) Iwe, ifa ussun Kot a alükülüküür? Jiowa a ereni Moses: “Ngang üpwe etuk.” Ngeni Jeremaia a apasa: “Ngang upwe etuk o tumwunuk.” (Ekistos 3:12; Jeremaia 1:8) Sia pwal tongeni lükülük won än Kot älillis. Tong fän iten Kot me ach lükülük won i epwe älisikich le akkufu ewe ekiek pwe sisap tongeni apwönüetä ach pwon lupwen sia fangolo manauach ngeni Kot. Ewe aposel Jon a apasa: “Ese i wor niuokus lon tong, nge tong mi unusoch a chok asulo niuokus.” (1 Jon 4:18) Eli emön kükkün ät epwe niuokkus ika a äläemön chök le fetäl, nge a lükülüköch lupwen seman a paani i. Pwal ussun chök, ika sia lükülük won Jiowa ren unusen letipach, i epwe ‘aiti ngenikich ewe al mi pwüng’ lupwen sia feffetäl ünükkün i.—An Salomon Fos 3:5, 6.
Eü Fansoun Mi Ämmäfel
16. Met popun sipwe unusen mwoolo lon ewe konik lupwen sia papatais?
16 Mwen ewe papatais, a kan wor eü afalafal seni ewe Paipel mi awewei lamoten papatais fän iten chon Kraist. Le muchuloon ewe afalafal, ekkewe mi mochen papatais repwe ütä ren ar repwe pölüeni ruu kapas eis. Iei ussun ra pwäralo ar lükü mwen meinisin. (Rom 10:10; nengeni ewe pwoor lon pekin taropwe 13.) Mwirin, inisir epwe mwoolo lon ewe konik ussun chök än Jises papatais. Lon ewe Paipel, Jises a “muttir feitä seni ewe konik” are a “feitä seni lon ewe konik.” (Mattu 3:16; Mark 1:10) A ffat pwe Jon a akokalo inisin Jises lon ewe konik.b Lupwen inisich a unusen mwoolo lon ewe konik, a eliosu ewe siwil mi lapalap lon manauach sia fen föri. A ussun itä pwe sia fen mälo ngeni lapalapach me loom, iwe, sia poputä manauach mi fö lon än Kot angang.
17. Ifa ussun ekkewe chon papatais me chon katol repwe älisatä sufölun ewe fansoun papatais?
17 Papatais eü fansoun chengel nge a pwal watte choun masouan. Me ren ewe Paipel, Jises a iotek lupwen Jon a papataisi i lon ewe Chanpupu Jortan. (Luk 3:21, 22) Meinisin mi mochen papatais lon ei fansoun repwe chechchemeni ena poraus. Ar kewe fos me föfför epwe mürinnö. Pwal och, me ren ewe Paipel, üfach epwe fich ngeni chon Kraist fansoun meinisin. Iwe, epwe fen ifa me watteen ach sipwe fokkun chechchemeni ena fön lon ränin ach papatais. (1 Timoti 2:9) Chon katol repwe pwäratä suföl ren ar aüselingaöchü ewe afalafal me ar kkotöch me föfföröch atun ewe papatais.—1 Korint 14:40.
Ekkewe Feiöch Ra Tori Aramas Mi Papatais
18, 19. Ikkefa ekkewe wiis mi aüchea me feiöch papatais a wato?
18 Lupwen sia fangolo manauach ngeni Kot me papataiselo, sia fiti eü famili mi sokkolo lapalapan. Akkom, Jiowa a wiliiti Semach me Chienach. Mwen ach papatais, sia towau seni i, nge iei sia chäsefäl. (2 Korint 5:19; Kolose 1:20) Sia arap ngeni Kot me Kot a arap ngenikich pokiten än Kraist we asor. (Jemes 4:8) Ewe soufos Malakai a awewei ifa ussun Jiowa a äfänni me aüselinga chokkewe mi iteit ren itan. A pwal makkei iter lon nöün we puk. Kot a apasa: “Repwe fokun nei aramas lon ewe ran upwe awora. Ngang upwe eani umoumoch ngeniir, usun eman sam a umoumoch ngeni noun mwan mi angang ngeni.”—Malakai 3:16-18.
19 Papatais a pwal atufichi ach fiti eü mwichen pwiipwi mi watte. Lupwen Piter a eis ussun ekkewe feiöch nöün Jises kewe chon käeö repwe angei pokiten ar angang ngeni Kot, Jises a pwon: “Nge iteiten aramas meinisin mi likitalo imwan kewe, are pwin kewe, are fefinan kewe, are seman, are inan, are noun kewe, are fonuen kewe, fan itei, epwe angei fan ipuku, o epwe kuna manau esemuch.” (Mattu 19:29) Fitu ier mwirin Piter a mak ussun pwiich “soulang lon unusen fonufan.” Ussun chök Piter, sipwe feiöch me sipwe küna älillis seni ena mwichen pwiipwi mi tong.—1 Piter 2:17; 5:9.
20. Ifa ewe äpilükülük mi amwarar a suuk ngenikich lupwen sia papatais?
20 Pwal och, Jises a apasa pwe nöün kewe aramas repwe “küna manau esemuch.” Ewer, lupwen sia fangolo manauach ngeni Kot me sia papatais, sia “amwochu . . . ewe manau mi enlet,” manau esemuch lon än Kot fönüfan sefö. (1 Timoti 6:19) Ei äpilükülük ina ewe alongolongun manau mi mürinnö seni meinisin fän itach me nöüch kewe. A fokkun amwarar me a atufichi ach “aleasochis ngeni ewe Samol mi Lapalap ach we Kot tori feilfeilachök.”—Mika 4:5.
[Footnote]
a Ülüngät ngeröü chon Jus me chon wililo ra pwal muttir papatais mwirin ar rongorong än Piter afalafal lon ränin Pentekos. Iwe, sipwe chechchemeni pwe ir meinisin fengen me ewe re Itiopia ra fen silei ekkewe afalafal me allük lon ewe Paipel.—Fofor 2:37-41.
b Me ren eü puken awewe (Vine’s Expository Dictionary of New Testament Words), ewe kapas lon fosun Kris fän iten papatais (baʹpti·sma) a wewe ngeni “soni emön lon konik, an mwoolo, me an feitä sefäl seni ewe konik.”
En Mi Tongeni Awewei?
• Met popun sisap mut ngeni ach niuokkus pwe sipwe sopwongaü are tipemwaramwar le wiiseni wiisen chon Kraist an epwe pinei senikich ach sipwe papatais?
• Epwe ifa üküükün ach feffeitä lon pekin ngün mwen sia papatais?
• Met popun sisap mut ngeni ach niuokkus pwe sipwe sopwongaü are tipemwaramwar le wiiseni wiisen chon Kraist an epwe pinei senikich ach sipwe papatais?
• Ikkefa ekkewe feiöch mi sokkolo lapalaper nöün Jises kewe chon käeö repwe angei?
[Sasing lon pekin taropwe 17]
“Meeta epwe pineikich pwe usap papatais?”
[Sasing lon pekin taropwe 20]
Papatais eü fansoun chengel nge a pwal watte choun masouan