Än Jiowa we Kapas A Manau
Menlapen Pworaus Seni ewe Änimuen Kinikinin ewe Puken Kölfel
ELI ir kewe mi wöüöch repwe apasa: “Amwo nöüch kewe ät repwe wewe ngeni irä mi määr pöchökkül lon ar alüal, nge nöüch kewe nengngin repwe wewe ngeni üren lepwokuku mi rup pwe alingen lon imwen king. Amwo ach kewe lenien iseis repwe ur, . . . nöüch kewe sip repwe oupwätiu ngeröü.” Eli repwe pwal erä, “Feiöchün chon ekewe mwu a toriir ekei sokun feiöch.” Iwe nge, sokko seni ena, ewe sou makkei kölfel a apasa: “Feiöchün chon ekewe mwu mi eäni Kot ewe Samol mi Lapalap.” (Kölfel 144:12-15) Itä pwata esap ina ussur? Jiowa ewe Kot mi pwapwa, iwe, ir kewe mi fel ngeni i repwe pwal pwapwa. (1 Timoti 1:11) Mi ffatöch enletin ena pworaus lon ewe amüchüloon mwichen kölfel, Kölfel 107 ngeni 150.
Ewe änimuen kinikinin ewe puken Kölfel a pwal menlapei lapalapen Jiowa kewe mi tekia, pachelong an tong mi kirekiröch, an enlet, me mürinnöön. Ükükün watteen ach mirititi lapalapen Kot, pwal ina chök ükükün ach sipwe tongei me niuokkusiti i. Epwe efisi ach pwapwa. A ifa me watteen mürinnöön ewe pworaus lon Kinikin Nimu lon ewe puken Kölfel!—Ipru 4:12.
PWAPWA POKITEN ÄN JIOWA TONG ENLET
(Kölfel 107:1–119:176)
Ekkewe chon Jus mi liwin seni ar eolo lon Papilon ra kölü, “Ir repwe kilisou ngeni ewe Samol mi Lapalap pokiten an tong ellet, pwal pokiten an kewe föför mi amwarar ngeni chon fanüfän.” (Kölfel 107:8, 15, 21, 31) Tafit a mwareiti Kot ren an kölü, “Pun om tong ellet a tekia seni ekewe läng, om allükülük a tori ekewe kuchu.” (Kölfel 108:4) Lon ewe köl mwirin, a iotek: “Ai Samol mi Lapalap ai Kot, kopwe alisiei, kopwe amanauaei lon om tong ellet.” (Kölfel 109:18, 19, 26) Kölfel 110 a oesini ussun än ewe Messaia nemenem. Kölfel 111:10 a erä, “Niuokusiti ewe Samol mi Lapalap, iei poputän tipachem.” Me ren ewe kölfel mwirin, “A feiöch ewe aramas mi niuokusiti ewe Samol mi Lapalap.”—Kölfel 112:1.
Kölfel 113 ngeni 118 ra iteni ekkewe Hallel Kölfel pun fän chommong ra nöünöü ewe kapas “Hallelujah,” are “Mwareiti Jah!” Lon ewe aülüngätin senturi, chon Jus ra makketiu pworausen ekkewe eörenien loom, iwe, a iteni ewe Mishnah. Ra eäni ekkena köl lon fansoun Pasofer me pwal lon ekkewe ülüngät fetellapen chon Jus. Ewe kölfel mi ttam seni meinisin ekkewe kölfel me sopwun lon ewe Paipel, Kölfel 119 a itelapei än Jiowa we kapas are pworaus mi pwälo.
Pölüen Ekkewe Kapas Eis Ussun Ewe Paipel:
109:23—Met weween alon Tafit lupwen a erä: “Üpwe le morola usun nürün och mettoch a morola lekuniol”? Lon köl, Tafit a pwäri meefian pwe a chök arapoto an mälo.—Kölfel 102:11.
110:1, 2—Met an “[Tafit] we Samol,” Jises Kraist, a föri atun a mommot peliefichin Kot? Mwirin an we manausefäl, Jises a feitä läng me a witiwit peliefichin Kot tori 1914 pwe epwe poputä an nemenemen King. Lon ena fansoun, Jises a nemenem won nöün kewe chon äppirü mi kepit, a emmweniir lon ar angangen afalafal me föralo chon käeö me pwal ammolneeretä pwe repwe eti i le nemenem lon an we Mwu.—Mattu 24:14; 28:18-20; Luk 22:28-30.
110:4—Met Jiowa a ‘pwon fän akapel, nge esap siwili an ekiek’? Ena akkapön a wewe ngeni än Jiowa we pwon pwe Jises Kraist epwe wisen King me Samol Fel mi Lapalap.—Luk 22:29.
113:3—Ifa ussun aramas repwe mwareiti iten Jiowa we “seni tötän akkar tori a tuputiu”? Ese chök wewe ngeni epwi aramas ra fel ngeni Kot iteiten rän. Seni tötään ewe akkar lon ötiuen fönüfan tori an a tuputiu lon notoun fönüfan, ttinen ewe akkar a asarama unusen fönüfan. Pwal ussun chök, aramas won unusen fönüfan repwe mwareiti Jiowa. Esap tongeni fis ena ika esor angang mi kokkotöch. Kich Chon Pwäratä Jiowa, mei wor wisach mi aüchea ach sipwe mwareiti Kot me föfföri ewe angangen esilefeili ewe Mwu ren tinikken.
116:15—Ifa ükükün watteen an ‘a aüchea me fän mesen ewe Samol mi Lapalap mälan nöün kewe chon pin’? Ekkewe chon fel ngeni Jiowa ra kon aüchea ngeni i pwe esap tongeni mutatä mäloon ena mwichen aramas. Ika Jiowa epwe mut ngeni an epwe fis, epwe ussun itä nge ekkewe chon oputa i ra pöchökkül lap seni i. Pwal eü, esap chüen wor lusun me won fönüfan pwe repwe longolongun ewe fönüfan sefö.
119:71—Ifa ussun ach küna riäfföü epwe tongeni öchitikich? Fansoun weires epwe tongeni äiti ngenikich lamoten ach sipwe alapalo ach lükülük won Jiowa, ikkiotek ngeni, me achocho le käkkäeö ewe Paipel me apwönüetä minne a mak lon. Pwal eü, minne sipwe föfföri fän riäfföü epwe pwäratä ekkoch apwangapwangach kewe sipwe tongeni angang won. Riäfföü esap efisi ach letipengaü ika sipwe mut ngeni an epwe amürinnölo lapalapach.
119:96—Met weween ‘sopwoloon mettoch meinisin mi unusöch’? Ewe sou makkei kölfel a kapas ussun unusöch me ren ekiekin aramas. Eli a silei pwe mi chök aüküük än aramas ekiek ussun unusöch. Iwe nge, än Kot allük esap wor aüküükün. A tongeni emmweni kinikinin manauach meinisin. Ewe New International Version a erä, “Üa küna pwe mi wor öüküükün mettoch meinisin [mi unusöch], nge om allük esap wor öüküükün.”
119:164—Met lamoten än ewe sou makkei kölfel mwareiti Kot “fän fisu lon eü rän”? Fän chommong, ewe nampa fisu a wewe ngeni unus. Ina minne, ewe sou makkei kölfel a erä pwe mi fich ngeni Jiowa an epwe angei ling ika kapasen mwareiti meinisin.
Ekkewe Lesen Fän Itach:
107:27-31. Tipatchemen fönüfan epwe ‘osukosuk’ lupwen epwe war Armaketon, iwe, aramas ‘resap chüen silei minne repwe föri.’ (Pwäratä 16:14, 16) Esap tongeni seläni aramas seni mälo. Ir chök mi kükkütta amanau seni Jiowa repwe manau pwe repwe “kilisou ngeni [i] pokiten an tong ellet.”
109:30, 31; 110:5. Lape ngeni fansoun, esor tümünün peliefichin emön sounfiu mi kamwoch ewe tittin maun lepeliefefinan. Lon kapas monomon, Jiowa a nom “[lepelifichin]” nöün kewe chon angang, pwe epwe fiffiu fän äsengesiir. A awora tümün me älillis ngeniir—iwe, ina eü popun aüchea ach sipwe “mwareiti i”!
113:4-9. A kon tekia Jiowa pwe epwe pworetiu fän iten an epwe “nennetiu won ekkewe lang.” Iwe nge, a ümöümöch ngeni ekkewe mi kisikis, ekkewe mi wöüngaü, me ekkewe fefin mi riit. Ewe Samol mi Lapalap Jiowa a tipetekison me a mochen pwe ekkewe chon fel ngeni I repwe pwal tipetekison.—Jemes 4:6.
114:3-7. Ach käkkäeö ussun än Jiowa kewe föfför mi amwarar fän iten nöün kewe aramas ünükkün ewe Setipar, ewe chanpupu Jortan, me ewe Chuuk Sainai epwe fakkun achüngü letipach. Aramas mi liosutiu ren “fönüfan” repwe ingelo, are lon kapas monomon, repwe “chchech”, pokiten ewe Samol.
119:97-101. Ach angei tipatchem, mirit, me wewe seni än Kot we Kapas epwe tümünükich seni feiengaü lon pekin ngün.
119:105. Än Kot we Kapas, ina eü lamp ngeni pechech pun epwe kan älisikich le ataweei osukosuken ikenäi. A pwal asarama aalach lon kapas monomon, pun a oesini ussun än Kot kokkot fän iten mwachkkan.
INAAMWO IKA MEI WOR OSUKOSUK NGE PWAPWA CHOK
(Kölfel 120:1–145:21)
Epwe ifa ussun sipwe tongeni angang won sossot weires me likiitü fän osukosuk? Kölfel 120 ngeni 134 ra affata pölüen ei kapas eis. Sipwe ataweei osukosuk me amwöchü ach pwapwa ren ach kükkütta älillis seni Jiowa. Eli ekkewe chon Israel ra eäni ekkena kölfel mi iteni Kölün Feitä atun ra sai ngeni Jerusalem pwe repwe fiti ar kewe fetellap iteiten ier.
Kölfel 135 me 136 ra aweweei pwe Jiowa emön Chon Föfföri minne a pwapwa ren, nge a sokko seni ekkewe ululun mi lamot-mwääl. Kölfel 136 a för pwe ewe saingoon kinikinin iteiten wokisin epwe pölüeni lepoputään. Kölfel 137 a aweweei ussun letipetaan ekkewe chon Jus lon Papilon mi mochen fel ngeni Jiowa lon Saion. Kölfel 138 ngeni 145, makkeien Tafit. A mochen ‘mwareiti Jiowa ren unusen lelukan.’ Met popun? A apasa, “Üa mwareituk, pokiten a amairü o amwarar om föri ei.” (Kölfel 138:1; 139:14) Lon ekkewe nimu kölfel mwirin, Tafit a tingorei Kot pwe epwe tümünü i seni aramasangaü, pwe epwe pwal küna kapwüng mi pwüng, ngaselo seni chon eriäfföü, me emmwen. A menlapei pwapwaan nöün Jiowa kewe aramas. (Kölfel 144:15) Mwirin an alingalo Kot ren lapalapan me mürinnöön, Tafit a apasa: “Üpwe mwareiti ewe Samol mi Lapalap, mönümanau meinisin repwe mwareiti itan mi pin tori feilfeilachök.”—Kölfel 145:21.
Pölüen Kapas Eis Seni Ekkeei Wokisin:
122:3—Ifa ussun Jerusalem eü telinimw mi “nükünüköch”? Ussun chök lon ekkewe telinimwen loom, aramas ra aüetä ekkewe imw lon Jerusalem pwe repwe chök etietifengen. Ekkewe imw lon ewe telinimw ra chök etieppachfengen, ina popun a mecheres ar repwe tümünüür seni chon oputer. Pwal eü, än ekkewe imw etieppachfengen a atufichi chon ena telinimw ar repwe nükünükfengen fän iten älillis me tümün. A liosuetä än ekkewe 12 einangen Israel tipeeüfengen lon pekin ngün lupwen ra mwichfengen pwe repwe fel.
123:2—Ifa menlapen ewe kapas awewe ussun mesen ekkewe chon angang? Ekkewe chon angang mwän me fefin ra nennengeni pöün emön masta are finesamol ren ruu popun: pwe repwe silei letipan me repwe pwal angei tümün me tufichin manauer. Pwal ussun chök, sia kan nennengeni Jiowa fän iten ach sipwe silelo letipan me angei an chen.
131:1-3—Ifa ussun Tafit a ‘akinamwelo o afanafanaloi ngunun ussun chök emön mwonukol a kinamwe fän oupun inan’? Ussun emön mwonukol a mosonosonolo lepoun inan lupwen a wes le oupwu, Tafit a kaeo an epwe akinamwelo me afanafaneloi ngünün “ussun chok emon monukol a kinamwe fan oupun inan.” Ifa ussun? Ren an esap lamalam tekia me mesan esap tipetekia me pwal ren an esap kükkütta mettoch mi kon amwarar ngeni. Tafit ese kütta an epwe iteföülo, nge a silei aüküükün an kewe tufich me a pwäratä tipetekison. Sipwe tipatchem le äppirü an ekiek, äkkäeüin lupwen sipwe achocho ngeni wis lon ewe mwichefel.
Ekkewe Lesen Fän Itach:
120:1, 2, 6, 7. Kapasen pweni me kapasen äfänienin turunufas repwe tongeni äletipengaüa aramas. Ach nemenifichi chönmöngöch epwe pwäri pwe sia “efich kinamwe.”
120:3, 4. Ika a wor emön “chon atuputup,” epwe äkinamwekich ach silei pwe Jiowa epwe awenechara mettoch meinisin lon an we fansoun. Chon pwenikich repwe feiengaü fän pöün “emön mwän mi manaman.” Repwe fakkun küna kapwüng seni Jiowa mi liosutiu ren “moochen chia mi sarara.”
127:1, 2. Lon ach kewe angang meinisin, a lamot ach sipwe kükkütta än Jiowa emmwen.
133:1-3. Tipeeüin nöün Jiowa kewe aramas a äkinamwe, a asösökich, me a mürinnö. Sisap aingaüa ach tipeeüfengen ren ach äkkäpii, änini, are ngününgününgaü.
137:1, 5, 6. Ekkewe chon eolo mi fel ngeni Jiowa ra riri ngeni Saion—ewe kinikinin än Kot we mwicheich won fönüfan lon na fansoun. Nge kich? Kich mi tuppwöl lon ach pach ngeni ewe mwicheich Jiowa a nöünöü ikenäi?
138:2. Jiowa a ‘atekiatä an kapas asen itan we’, weween, pwönüetään mettoch meinisin a fen pwonetiu fän itan we epwe fakkun lu seni minne sia ekieki. Enlet, mettoch mi fakkun amwarar ra nonnom mwach.
139:1-6, 15, 16. Jiowa a silei ach kewe föfför, ekiek, me kapas me mwen ach sipwe apasawu. A silekich lupwen a kerän fis ewe sosoicha, me mwen eü me eü kifetin inis a fisilo. Än Kot silei emön me emön leich a “fokun amwarar” ngenikich. A ifa me watteen an aururukich ach sipwe silei pwe Jiowa ese chök küna ewe sossot a torikich nge a pwal weweiti ifa ussun an a kkükich!
139:7-12. Esor och leeni mi kon towau pwe Kot esap tongeni apöchökkülakich.
139:17, 18. Ach silei Jiowa a kan apwapwakich? (Än Salomon Fos 2:10) Ika ina, mei wor rech eü chanütuun pwapwa esap pöölo. Ekiekin Jiowa kewe ra “chommong seni föün pi.” Epwe chök wokor minne sipwe tongeni kaeo ussun i.
139.23, 24. Ürürün sipwe mochen pwe Jiowa epwe chosani wesewesen ekiekich me letipach ika a wor ‘och mi ngaü lon manauach’—weween, ekiek mi ngaü, mocheniangaü, me föfföringaü—me epwe älisikich le urusawu.
143:4-7. Epwe ifa ussun sipwe likiitü fän riaffou watte? Ewe sou makkei kölfel a äiti ngenikich ewe ki: Ekkekieki ussun föfförün Jiowa kewe, ekilapei minne a akkota, me ikkiotek ngeni fän iten älillis.
“Mwareiti Jiowa, Ami kana Aramas!”
Eü me eü ekkewe arüänüün kinikinin puken kölfel ra sopwolo ren eü kapasen mwareiti Jiowa. (Kölfel 41:13; 72:19, 20; 89:52; 106:48) A pwal ina ussun ewe saingoon kinikin. Kölfel 150:6 a apasa: “Mönümanau meinisin repwe mwareiti ewe Samol mi Lapalap. Ousipwe mwareiti ewe Samol mi Lapalap!” Epwe wesewesen pwönütä lon än Kot we otot sefö.
Iei atun sipwe nenneloi ena fansoun apwapwa, mei wor chommong popun sipwe alingalo ewe Kot mi enlet me mwareiti itan. Lupwen sia ekieki ussun pwapwaach mi popu seni ach silei Jiowa me pacheöch ngeni, ese fen amwökütükich ach sipwe mwareiti i ren eü letip mi kilisou?
[Sasing lon pekin taropwe 29]
Angangen Jiowa kewe ra fakkun arükö
[Sasing lon pekin taropwe 31]
Ekiekin Jiowa kewe ra “chomong seni föün pi”