Älisi Aramas Le Älleäsochisi Äitien Paipel
“O ussun ekkewe pwikil mi nom lon pwul murinno, iei ir mi rong ewe kapas, o ra amwochu lon letiper mi enlet o murinno. Iwe, ra ukuwa lon ar likiitu.”—LUK 8:15.
“EWE puk a fokkun echipwör. Nei kewe chon käeö ra fokkun pwapwaiti. Ua fokkun sani. Ei puk a atufichikich ach sipwe poputäni käeöön Paipel ngeni aramas lon chök ena atun sia kerän chuuri.” Iei alon emön Chon Pwäratä Jiowa, chon afalafal full time, ussun ewe puk What Does the Bible Really Teach? (Ifa Wesewesen Äitien Paipel?)a Pwal iei alon emön chon afalafal chinnap ussun ena puk: “Ua fen älisi chommong aramas ar repwe silei Jiowa lon ükükün 50 ier lon ei angangen afalafal. Nge ua küna pwe ei puk mi kkolo öchchün. Ekkewe kapas awewe me lios ra mmen apwapwa.” A ina chök pwal meefiom ussun ewe puk Bible Teach (Äitien Paipel)? Ei puken aweween Paipel a för pwe kopwe tongeni apwönüetäöchü än Jises we allük, a erä: “Iei minne, oupwe feilo asoulangalo chon fonu meinisin, . . . oupwe afalafaler pwe repwe alleasochisi mettoch meinisin minne ua alluku ngenikemi.”—Mattu 28:19, 20.
2 Ese mwääl, letipen Jiowa a pwapwa atun a küna orun 6.6 milion nöün kewe Chon Pwäratä ar ra älleäsochisi än Jises allük pwe repwe föralo chon käeö. (Än Salomon Fos 27:11) A pwälo pwe Jiowa a efeiöchü ar achocho. Awewe chök, lon ewe ier 2005, ewe kapas allim a fen afalafalfetäl lon 235 fönü me a wor orun 6,061,500 chon käeö. Ina popun, chommong aramas ra rongorong me etiwa ewe kapasen Kot me ‘rese angei ussun kapasen aramas chok, pwe usun kapasen Kot mi enlet.’ (1 Tesalonika 2:13) Lon ekkewe ruu ier ra lo, lap seni esopw milion mineföön chon käeö ra fen atipeeüfengenni manauer ngeni än Jiowa kewe allük me ra fangolo manauer ngeni Kot.
3 Ka fen meefi ewe pwapwa mi popu seni om käeö Paipel ngeni emön? Woon unusen fönüfan mei chüen wor aramas mi eäni ‘letip mi enlet o mürinnö’, me lupwen ra rongorong ewe kapas ussun letipen Kot “ra amwöchü . . . Iwe, ra ukuwa lon ar likiitu.” (Luk 8:11-15) Sipwe nengeni ifa ussun sipwe nöünöü ewe puk Bible Teach lon ach angangen föralo chon käeö. Sipwe ätittina ülüngät kapas eis: (1) Ifa ussun kopwe poputäni eü käeöön Paipel? (2) Ikkefa ekkewe napanapen asukula aramas a kon mürinnö? (3) Ifa ussun kopwe älisi emön an esap chök emön chon käeö Paipel nge epwe pwal wiliti emön senseen ewe Paipel?
Ifa Ussun Kopwe Poputäni Eü Käeöön Paipel
4 Ika emön a tingoreok om kopwe ngafelo epek ewe warawar mi wämmong, ese mwääl kosap mochen föri. Nge ika epwe uwoutiu faü kopwe tongeni ipwetiu woon pwe kopwe tongeni pwerelo lepekin ewe warawar, eli kopwe tipemecheres le pwerelo. A pwal ina chök ussun, eli emön chon imw epwe tipemwaramwareiti an tufichin käeö Paipel pokiten chommongun an angang Eli a ekieki pwe epwe alusalo watteen fansoun me epwe kon weires epwe käkkäeö Paipel. Ifa ussun kopwe älisi ewe chon imw pwe esap ina ussun meefian? Ka tongeni nöünöü ewe puk Bible Teach lon om käeö ngeni fitu chök pworaus mi aüchea ren chök fitu minich le emmweni emönnewe pwe epwe käeö ewe Paipel iteitan. Ika ka ammolnaöchü iteiten fansoun kopwe chuurisefälli ewe chon imw, epwe ussun chök om uwoutiu faü pwe epwe ipwetiu woon lon an chiechiöch ngeni Jiowa.
5 Iwe nge, me mwen kopwe älisi emön le küna feiöch seni ewe puk Bible Teach, a lamot kopwe akkom silefichi ewe puk. Ka fen älleäni unusen ewe puk? Eü pean pwüpwülü a uwei ewe puk lupwen ra feilo asösö lon pwal eü fönü me ra poputä le älleäni atun ra kunou woon ppi. Lupwen emön fefin chon amömö ngeni turist a pwereto rer, ewe chon amömö a küna itelapen ewe puk What Does the Bible Really Teach? Iwe a ereni ekkewe pwüpwülü pwe fen ekiselo chök, a iotek ngeni Kot ussun ena chök kapas eis, me a tingorei Kot an epwe pölüeni. Ewe pean pwüpwülü ra pwapwa le anöünöü ngeni ewe fefin ewe puk. Iwe, ka fen ‘awora eü fansoun’ pwe kopwe älleäni ei puk, eli iei ewe oruuen fansoun, atun ka kan witiwiti om appointment, are lon fansoun asösö lon sukul are leenien angang? (Efisus 5:15,16) Ika kopwe föri ena, kopwe loom sileöchü masouan ena puken aweween Paipel me atufichuk le apworausa ngeni ekkewe ekkoch ussun ei puk.
6 Lupwen ka anöünöü ngeni aramas ese lifilifil ewe puk, kopwe nöünöüfichi ekkewe sasing, wokisin, me ekkewe kapas eis lon pekin taropwe 4, 5, me 6. Awewe chök, kopwe poputä ren om kapas eis ngeni, “Ren chommongun ekkewe osukosuk aramas ra küna ikenäi, me reom, ifa ewe emmwen mi mürinnö?” Mwirin om aüselingaöchü meefien ewe chon imw, älleäni 2 Timoti 3:16, 17, me awewe ngeni pwe ewe Paipel a awora eü mettoch epwe pwäkini osukosuken aramas. Mwirin, äiti ngeni ewe chon imw pekin taropwe 4 me 5 me eisini: “Me lein ekkewe osukosuk a fen liosutiu lon ekkeei pekin taropwe, menni leir a fokkun aosukosukok?” Lupwen ewe chon imw a itini eü, ngeni ewe puk pwe epwe kamwöch atun kopwe älleäni ewe wokisin seni noum Paipel mi weneiti minne ewe chon imw a itini. Mwirin, älleäni pekin taropwe 6 me eisini ewe chon imw, “Menni lein ekkewe wonu kapas eis a mak fan ka mochen silei pölüan?” Lupwen ewe chon imw a filatä eü, äiti ngeni ewe sopwun lon ewe puk mi pölüeni an we kapas eis, likiti ngeni ewe puk me akkota inet atun kopwe tongeni chuurisefälli me pworausfengen woon ena kapas eis.
7 Ttaman ena esin afalafal mi mak asan epwe chök nimu minich. Iwe nge, lon chök ekkena fitu minich oua fosfengen, kopwe fen silei meefien ewe chon imw, älleäni me aweweei ruu wokisin, me akkota om kopwe chuurisefälli ewe chon imw. Eli ekisi chök ämi pworausfengen, epwe eü minen apöchökkül me aurur a kerän pwal küna ren fansoun langattam. Ina popun, pwal mwo nge ewe emön mi tawengaü epwe tongeni pwapwaiti an epwe alapalo ämi fansoun käeöfengen fän iten om kopwe älisi i le aleni ‘ewe al mi emmwen ngeni manau.’ (Mattu 7:14) Lo, lo, lo, lupwen epwe lapolo än ewe chon imw pwapwaiti ewe käeö, kopwe tongeni attamaalo ewe fansoun käeö. Kopwe tongeni tingorei ewe chon imw pwe oupwe mommotfengen pwe epwe ekis ttam ämi fansoun käeö.
Ekkewe Napanapen Asukula Aramas Mi Kon Mürinnö
8 Lupwen ewe chon käeö a poputä le älleäsochisi äitien ewe Paipel, eli epwe küna sossot mi tongeni eppeti an feffeitä. Ewe aposel Paul a erä: “Iwe, ir meinisin mi mochen manaueni ewe manau mi fich ngeni Kot lon Kraist Jises repwe kuna riaffou.” (2 Timoti 3:12) Paul a alöllöfengenni ekkewe sossot me ekkei mi kan kenalo ekkewe pisekin imw mi apwangapwang nge esap choweän kolt, silfer, me pwal ekkoch faü mi aüchea. (1 Korint 3:10-13, 1 Piter 1:6,7) Ren om kopwe älisi noum we chon käeö pwe epwe ämääraatä ekkewe napanap mi lamot pwe epwe üppos fän ekkewe sossot, kopwe älisi i le aüfichietä an lükü ren ekkewe mettoch resap mwittir karelo.
9 Ewe sou mak köl fel a alöllööü “pwonen ewe SAMOL” ngeni “silfer mi alimelimochu lon sitof mi pwichikar won pwul, silfer mi fen alimelimoch fan fisu.” (Kölfel 12:6) Pwüngün, ewe Paipel a masou ren ekkewe mettoch mi aüchea sipwe äeä le aüfichietä lükü mi pöchökkül. (Kölfel 19:7-11; Än Salomon Fos 2:1-6) Ewe puk Bible Teach a äiti ngonuk ifa ussun kopwe lipwäköch le nöünöüfichi ewe Paipel.
10 Atun ewe käeö, älisi ewe chon käeö an epwe ekilapei ekkewe wokisin mi kawor lon eü me eü sopwun. Nöünöü ekkewe kapas eis pwe kopwe älisi ewe chon käeö an epwe weweiti ekkewe wokisin mi lamot lon Paipel me ifa ussun epwe apwönüretä lon pwisin manauan. Tümünü pwe kosap ereni met epwe föri. Nge kopwe äppirü Jises. Lupwen emön mwän mi silelap lon ewe Allük a kapas eis ngeni, Jises a pölüeni: “Meeta a fen makketiu lon ewe alluk? Ifa ussun om alleani?” Ewe mwän a pölüeni me ren ewe Paipel, me Jises a äiti ngeni ifa ussun epwe apwönüetä ewe kapasen emmwen lon pwisin manauan. Jises a pwal nöünöü eü kapas awewe pwe epwe älisi ewe mwän le esinna ifa ussun ei lesen a kkü i. (Luk 10:25-37) Ewe puk Bible Teach a masou ren ekkewe kapas awewe mi mecheres kopwe tongeni nöünöü le älisi ewe chon käeö le apwönüetä ekkewe wokisin lon manauan.
11 Ewe puk Bible Teach a äeä kapas mi mecheres ren an epwe aweweei ewe Kapasen Kot, ussun än Jises äeä kapas mi mecheres le aweweei ekkewe pworaus mi alolloon. (Mattu 7:28, 29) Äppirü än Jises we leenien äppirü. Kopwe nöünöü ekkewe kapas mi mecheres, ffatöch, me pwüng lon om aweweei ekkewe pworaus. Kosap amwittiri ewe käeö. Nge kopwe filatä fitu parakraf oupwe käeö atun oupwe käeöfengen iteiten fansoun me ren nonnomun me tufichin ewe chon käeö. Jises a silei ükükün tufichin nöün kewe chon käeö, ina popun ese pwal achchour ren chommong pworaus ese ki rer lon ena atun.—Jon 16:12.
12 Le sopwochikin ewe puk Bible Teach, mei wor ewe kinikin itan Aweween Ekkoch Pworaus mi affatatiu 14 itelap. Kopwe wisen filatä ifa ussun kopwe nöünöü ekkeei itelap ren om kopwe älisi osupwangen ewe chon käeö. Awewe chök, ika a weires ngeni emön chon käeö an epwe weweiti och pworaus are a wor an kapas eis woon eü sokkun ekiek pokiten minne a piin lükü, eli epwe naf ika kopwe chök äiti ngeni ena kinikin itan Aweween Ekkoch Pworaus mi weneiti an we kapas eis me mut ngeni an epwe pwisin käeö ewe pworaus. Iwe nge, fän ekkoch epwe lamot om kopwe pwisin awewe ngeni ewe chon käeö ewe lesen lon ena kinikin. A pwal wor lon ena kinikin ekkewe lesen lon Paipel mi lamot ussun “‘Soul’ and ‘Spirit’—What Do These Terms Really Mean?” (“Ewe ‘Ngün’ me ewe ‘Manamanen Manau’—Met Wesewesen Weween Ekkeei Kapas?”) me “Identifying ‘Babylon the Great’.” (“Esinna ‘Papilon mi Lapalap’”) Kopwe tongeni filatä ika kopwe käeö ekkeei itelap ngeni noum we chon käeö. Pokiten ese wor kapas eis fän iten ekkewe lesen lon ewe Aweween Ekkoch Pworaus, a lamot kopwe silefichi ekkewe lesen pwe kopwe tongeni eäni ekkewe sokkun kapas eis mi mürinnö.
13 “Are ewe Samol ese auta ewe im, ekkewe chon auta re chok angangmwal,” alon Kölfel 127:1. Ina popun, kopwe iotek ngeni Jiowa fän iten an älillis atun kopwe mmolnetä le käeö ngeni emön. Om iotek me le poputään me le sopwoloon ewe käeö epwe pwäralo alolloolun om chiechiöchfengen me Jiowa. Pesei ewe chon käeö an epwe iotek fän iten tipatchem pwe epwe weweiti an we Kapas me pöchökkül le apwönüetä an we emmwen. (Jemes 1:5) Ika a föri ena, ewe chon käeö epwe meefi pöchökkül le likiitü fän sossot me epwe pöppöchökülelo an lükü.
Älisi Ekkewe Chon Käeö le Wiliti Sense
14 Ika nöüch kewe chon käeö Paipel repwe älleäsochisi “mettoch meinisin” minne Jises a allükü ngeni nöün kewe chon käeö, a lamot pwe repwe feffeitä le wiliti sense nge resap chök chon käeö Paipel. (Mattu. 28:19, 20; Fofor. 1:6-8) Ifa ussun kopwe älisi ewe chon käeö an epwe feffeitä lon pekin ngün?
15 Seni le poputään om käeö, etiwa ewe chon käeö an epwe fiti mwich. Awewe ngeni pwe lon ekkewe mwich, ka fen angei ewe älillis pwe kopwe wiliti emön senseen ewe Kapasen Kot. Lon ekkewe fitu wiik mwirin, mwirin ewe käeö, awewe ngeni noum we chon käeö ewe kokkotun käit lon pekin ngün ka küna lon ekkewe mwich me mwichelap. Kopwe mwasangasang le apworausa ngeni ekkewe feiöch ka angei lon ekkeei mwich. (Ipru 10:24, 25) Lupwen ewe chon käeö a poputä le fiffiti ekkewe mwich iteitan, iwe ekiselo eli epwe tongeni wiliti emön senseen ewe Kapasen Kot.
16 Älisi ewe chon käeö an epwe isetiu ekkoch mettoch epwe tongeni achocho ngeni me epwe tufichin ttikeri. Awewe chök, pesei an epwe apworausa ngeni emön chienan are aramasan minne a fen käeö. Pwal och, pesei an epwe achocho le älleäni unusen ewe Paipel. Ika ka älisi an epwe föratä me eörenalo ewe kokkotun älleään Paipel, epwe tongeni älisi i pwal mwo nge mwirin an papatais. Pwal eü, pwata kese pesei ewe chon käeö an epwe mwaren amwöchülükün eü chök wokisin lon Paipel mi pölüeni eü kapas eis mi lamot lon eü me eü sopwun lon ewe puk Bible Teach? Ika epwe föri ina ussun, epwe wiliti “emon chon angang esap saueiti och mettoch, emon mi forfichi lon an anganga ewe kapas mi enlet.”—2 Timoti 2:15.
17 Kosap chök äiti ngeni ewe chon käeö pwe epwe chök ekkenniwili are menlapei masouen ekkewe wokisin lon Paipel, nge kopwe pwal pesei an epwe aweweei ifa ussun ewe wokisin a pölüeni än ekkewe aramas kapas eis ussun an lükü. Oupwe tongeni praktis ren om kopwe pwomweni pwe en emön aramasan are chienan chon angang mi eisini an epwe awewe ngeni minne a lükü. Lupwen ewe chon käeö a pölüeni, äiti ngeni ifa ussun epwe pölüeni fän “mosonoson o mennin.”—1 Piter 3:15.
18 Mwirin och fansoun, epwe tufich ngeni ewe chon käeö an epwe fiti ewe angangen afalafal. Menlapei ngeni pwe ina eü wis mi aüchea an epwe tongeni fiti ei angangen afalafal. (2 Korint 4:1, 7) Lupwen ekkewe elter ra apwüngalo pwe mi tufich pwe ewe chon käeö epwe wiliti chon afalafal esaamwo papatais, älisi i an epwe ammolnatä eü afalafal mi mecheres, iwe mwirin, oupwe mwin le afalafal. Iteitan, oupwe akkangangfengen lon ekkewe pwal ekkoch sokkun angangen afalafal, me äiti ngeni ifa ussun epwe ammolnatä me lipwäköchülo lon an chuurisefälli aramas. Pwisin om leenien äppirü mi mürinnö epwe fokkun älisi i.—Luk 6:40.
“Amanaua Pwisin En o Pwal Ir Ekkewe mi Aüseling En”
19 Ese mwääl, ina eü angang weires ach sipwe älisi emön an epwe “sineifichi minne mi enlet.” (1 Timoti 2:4) Iwe nge, ese kon lien wor chommong mettoch mi apwapwai manauach mi löllö ngeni ewe pwapwa mi popu seni ach älisi emön le älleäsochisi äitien Paipel kewe. (1 Tesalonika 2:19, 20) Pwüngün pwe ina eü wis mi aüchea ach sipwe wisen “chon angangen Kot mi akangangfengen” le asukula aramas woon unusen fönüfan!—1 Korint 3:9.
20 Ekiselo chök, Jiowa epwe nöünöü Jises me ekkewe chonläng mi manaman an epwe apwüngü “ir kewe rese sinei Kot, pwal ir ekkewe rese alleasochisi ewe kapas allim usun ach Samol Jises.” (2 Tesalonika 1:6-8) Mi tongeni pöüt seni aramas manauer. Kopwe achocho le käeö ngeni mwaren emön chök ewe puk What Does the Bible Really Teach? Lupwen ka fiti ei angang, kopwe tufichin “amanaua pwisin en o pwal ir ekkewe mi aüseling en.” (1 Timoti 4:16) Iei lap seni me loom, a mmen atapwalapwal ach sipwe älisi aramas ar repwe älleäsochisi met ewe Paipel a wesewesen äiti ngenikich.
[Footnote]
a Förien Chon Pwäratä Jiowa.
Met Ka Fen Käeö?
• Met popun an a för ewe puk Bible Teach?
• Ifa ussun kopwe poputä le käeö ngeni aramas ren om nöünöü ewe puk Bible Teach?
• Ikkefa ekkewe lapalapen asukula aramas mi kon mürinnö?
• Ifa ussun kopwe älisi emön chon käeö an epwe wiliti emön chon asukula ewe Kapasen Kot?
[Ekkewe kapas eis fan iten ewe lesen]
1, 2. (a)Met popun an a för ewe puk What Does the Bible Really Teach? (b) Lon ekkewe ier kukkuto, ifa ussun Jiowa a efeiöchü än nöün kewe aramas achocho le föralo chon käeö?
3. Ikkefa ekkewe kapas eis sipwe ätittina lon ei lesen mi weneiti nöünöün ewe puk Bible Teach?
4. Pwata ekkoch ra tipemwaramwareiti ar tufichin käeö ewe Paipel me ifa ussun kopwe älisiir pwe esap ina ussun meefier?
5. Pwata a lamot kopwe älleäni ewe puk Bible Teach?
6, 7. Ifa ussun kopwe nöünöü ewe puk Bible Teach le poputäni ekkewe käeöön Paipel?
8, 9. (a) Ifa ussun kopwe älisi noum we chon käeö le üppos fän ekkewe sossot epwe tongeni küna? (b) Ia sia tongeni küna me ia ekkewe pisek aüchea resap mwittir karelo nge repwe aüfichietä lükü mi pöchökkül?
10. Ifa ussun kopwe älisi ewe chon käeö an epwe ekilapei ewe Paipel?
11. Epwe fitu parakraf kopwe käeö ngeni ewe chon käeö iteiten fansoun?
12. A ifa ussun nöünöün ewe kinikin itan Aweween Ekkoch Pworaus?
13. Ifa lamoten iotek lon apöchökkületään lükü?
14. Mi lamot ngeni chon käeö ar repwe feffeitä ngeni met?
15. Pwata kopwe pesei noum we chon käeö an epwe fiffiti ekkewe mwich?
16, 17. Ikkefa ekkewe mettoch ewe chon käeö a tongeni achocho ngeniir me ttikeriir?
18. Ifa ussun kopwe sopwelo om älisi emön chon käeö lupwen epwe wiliti emön chon afalafal esaamwo papatais?
19, 20. Met sipwe itä achocho ngeni me met popun?
[Lios lon pekin taropwe 15]
Ka kan nöünöüfichi ei puk?
[Lios lon pekin taropwe 13]
Eü pworausfengen mi chök mwochomwoch a tongeni luki emön an epwe pwapwaiti sileien Paipel
[Lios lon pekin taropwe 14]
Ifa ussun kopwe älisi ewe chon käeö pwe epwe ekilapei ewe Paipel?
[Lios lon pekin taropwe 16]
Älisi ewe chon käeö an epwe feffeitä