Kosap Fokkun Ükütiu Seni Om Alapalo Om Meefi Kilisou
“Kot, ifa lapalapen ai aucheani om kewe ekiek! Ifa lapalapen chommongun om kewe ekiek!”—KÖLFEL 139:17.
A FOKKUN amwarar minne ekkoch chon loom ra küna. Atun an a försefäl imwenfelin Jiowa we lon Jerusalem, ewe Samolfel Lapalap Hilkia a küna “ewe puken allük än ewe Samol mi Lapalap, ekewe allük Kot a ngeni Moses,” iwe, ese mwääl, ina ewe äkkäeüin kapi a mak 800 som ier me mwan! Ka tongeni ekieki ika ifa meefien King Josia lupwen ra isetiu ena puk mwen mesan? Enlet, a fokkun aücheani me mwittir ereni ewe seker Safan pwe epwe älleä ngeni.—2 Kronika 34:14-18.
2 Ikenäi, fite bilion aramas ra tongeni älleäni ewe Paipel, inaamwo mi unus are ese unus. Sipwe itä ekieki pwe ese kon lamot pokiten a chöufetäl ewe Paipel? Aapwi, a fokkun lamot! Popun pun a masou ren ekiekin Kot pwe sipwe feiöch ren.(2 Timoti 3:16) Iei meefien ewe sou makkei kölfel Tafit ussun än Kot we kapas, a makkei: “Kot, ifa lapalapen ai aucheani om kewe ekiek! Ifa lapalapen chommongun om kewe ekiek!”—Kölfel 139:17.
3 Ese fokkun kükkünülo än Tafit aücheani Jiowa, an we Kapas, me an we kokkot fän iten fel mi enlet. Ekkewe chommong kölfel mi amwarar Tafit a makker ra pwäratä meefian. Awewe chök, lon Kölfel 27:4, a makkei: “Eu mettoch üa tüngorei ewe Samol mi Lapalap, eu mettoch chök üa mochen: Pwe üpwe nonom lon imwen ewe Samol mi Lapalap lon ränin manauei meinisin, pwe üpwe ingeiti an kirikiröch o kütta öüröürei me ren me lon imwan imwenfel.” Lupwen a kerän äeüin mak lon fosun Ipru, ewe kapas “nengeni ren kilisou” a wewe ngeni ekilonei, etittina, attola ren pwapwa, meseik le katol, ingeiti. A ffatöch pwe Tafit emön mwän mi wewefichiti an riri ngeni Kot, a enletin aücheani mettoch meinisin minne Jiowa a akkawora fän iten an epwe apöchökkülatä an lükü, me a fokkun meseik ren iteiten pworaus mi enlet Kot a pwärawu. A mürinnö ach sipwe äppirü ükükün watteen an kilisou.—Kölfel 19:7-11.
Aücheani Ach Tufichin Silei Ekkewe Pworaus Mi Enlet lon Paipel
4 Ach wewefichiti än Kot we Kapas esap alongolong woon ach tipatchem are ach fiti sukul tekia, pwe ekkeei mettoch mi kan tongeni efisi lamalam tekia. Iwe nge, a alongolong woon än Jiowa kirekiröch, ewe a ngeni aramas mi tipetekison me letip-wenechar, ir kewe mi mirititi ar osupwang lon pekin ngün. (Mattu 5:3; 1 Jon 5:20) Lupwen Jises a ekilonei ewe pworaus pwe epwe makketiu lon läng iten ekkoch aramas rese unusöch, “a pwapwa ren Ngün mi Fel, o a apasa: ‘Ua kilisou ngonuk, Semei, Samolun lang me fonufan, pwe ka amonalo ekkeei mettoch seni chon tipatchem me chon wewe, nge ka pwarirelo ngeni monukol.’”—Luk 10:17-21.
5 Mwirin an eäni ena iotek seni lon letipan, Jises a sapelo ren nöün kewe chon käeö, me a apasa: “Mi feioch masen ekkewe aramas mi kuna minne oua kuna; pun upwe apasa ngenikemi, pwe chommong soufos, pwal king, ra mochen nengeni minne oua kuna, nge rese fen nengeni, o ra pwal mochen rong minne oua rong, nge rese fen rong.” Ewer, Jises a pesei nöün kewe chon äppirü mi tuppwöl ar resap aücheangaüa ekkewe pworaus mi enlet mi pwä ngeniir ussun ewe Mwu. Rese pwälo ngeni nöün Kot kewe chon angang lon ekkewe täppin aramas loom, iwe, rese pwal fokkun pwälo ngeni “chon tipatchem me chon wewe” lon ränin Jises we!—Luk 10:23, 24.
6 Lon ach ei fansoun, a fen lapolo ekkewe popun ach sipwe aücheani pworaus enlet seni läng, pun Jiowa a awora ngeni nöün kewe aramas weweöch ussun an we Kapas ren an nöünöü ewe “chon angang mi tuppwol o tipatchem.” (Mattu 24:45; Taniel 12:10) Iei makkeien ewe soufos Taniel ussun ewe fansoun sopwoloon: “Chomong aramas repwe sotun kütta wewen, nge ar weweiti epwe lapala.” (Taniel 12:4) Kese tipeeü ngeni ena pworaus pwe än aramas silei Kot a “lapala” me chommong möngöön ngün a kawor ngeni nöün Jiowa kewe chon angang?
7 A fokkun watte sokkofesennin wöüöchün nöün Kot kewe aramas lon pekin ngün me watteen fitikokoon ekkewe lamalam lon Papilon mi Lapalap! Ina popun, chommong mi letipengaü are mängaü ren lamalam chofona ra kulliiti lamalam mi enlet. Chokkana mi nikinikin siip resap mochen “chiechi ngeni [Papilon mi Lapalap] lon an kewe tipis,” are “eti i lon an kewe riaffou.” Jiowa fengen me nöün kewe chon angang ra etiwa meinisin ena sokkun aramas ar repwe tolong lon ewe mwichefelin chon Kraist mi enlet.—Pwäratä 18:2-4; 22:17.
Chokkewe Mi Meefi Kilisou Ra Kiito ren Kot
8 Iei än Jiowa oesini ussun imwan we imwenfel lon pekin ngün: “Üpwe amwökütükütü mwün fanüfan meinisin, wöür meinisin epwe tori ei leni, üpwe pwal aurala ei Imwenfel ren ling.” (Akai 2:7) A pwönütä ei oesini mi lingemwarar lon ränin Akai lupwen ekkoch lusun nöün Kot kewe aramas ra liwiniti Jerusalem me aüsefällietä ewe imwenfel. Lon ach ei fansoun, alon Akai kewe ra pwal pwönütä ren än Jiowa we imwenfel mi lap lon pekin ngün.
9 Fite milion aramas ra fen kiito ngeni ena imwenfel lon kapas awewe pwe repwe fel ngeni Kot “ren ngun me enlet,” iwe, iteiten ier lap seni 200,000 som ‘wöün ekkewe mwu’ ra pwal tolong. (Jon 4:23, 24) Awewe chök, me ren repotun ach angangen afalafal woon unusen fönüfan fän iten 2006, a wor 248,327 ra papatais ren esissilen ar fangolo manauer ngeni Jiowa. Weween, kapachelapen mineföön chon afalafal iteiten rän, 680! Ar tongei ewe enlet me ar mochen angang ngeni Jiowa ren ar esilefeili pworausen ewe Mwu a änneta pwe Kot a wesewesen lukiir.—Jon 6:44, 65.
10 Chommong lein chokkana mi letip-wenechar ra kiito ngeni ewe enlet pun ra “alefilasefäli lefilen eman chon pwüng me eman aramasangau, lefilen ätewe mi angang ngeni Kot me ätewe esap angang ngeni.” (Malakai 3:18) Ekieki pworausen Wayne me Virginia, eü pwüpwülü mi fen piin fiti ewe lamalamen Pirostan nge mei wor chommong ar kewe kapas eis rese pölü. Ra oput maun, me ra osukosuk me letipengaü lupwen ra küna ekkewe nöüwisen lamalam ar ra efeiöchü sounfiu me pisekin maun. Atun ar ra chinnapelo, ra meefi nge chiener kewe rese ätenekiir, inaamwo ika fitu ier Virginia emön senseen kinter. Ra apasa, “Esor a äämwakem are eis ika äm mi pöchökkül lon pekin ngün. Ra chök mochen angei senikem nöüm moni. Meefiem pwe a ussun itä nge esor lamotem.” A pwal lapolo ar lichippüng lupwen chon ar mwichefel ra mutatä lisowu lefilen mwän me mwän, fefin me fefin.
11 Lon ena atun, nöün nöür we, emön föpwül, me mwirin, nöür we fefin ra wiliti Chon Pwäratä Jiowa. Inaamwo ika akkomwan, Wayne me Virginia ra letipechou ren, nge mwirin ra siwili ar ekiek me ra pwal poputä le käeö Paipel. Wayne a apasa, “Mwirin ülüngät chök maram, äm aua silelo chommong pworausen Paipel lap seni minne äm aua fen käeö lon ekkewe 70 ier ra lo! Äm ausaamwo rongorong fän eü pwe iten Kot Jiowa, iwe, äm ause pwal silei ussun ewe Mwu me ewe Paratis woon fönüfan.” Ekiselo chök, ena pwüpwülü a poputä le fiffiti mwich me pwal ewe angangen afalafal. Virginia a apasa, “Äm aua mochen esile ngeni aramas meinisin ewe enlet.” Ir me ruuemön ra 80 som ierir, iwe, ra papataiselo lon 2005. Ra erä, “Äm aua kapachelong lon eü familien chon Kraist mi enlet.”
Aücheani Ach Tufichin “Lipwäköch ngeni Sokkun Föför Mürinnö Meinisin”
12 Fansoun meinisin Jiowa a kan äkkälisi nöün kewe chon angang ar repwe föfföri letipan. Awewe chök, a ngeni Noa kapasen emmwen mi ffatöch me titchik ren ifa ussun an epwe falei ewe waimw—nge a lamot an epwe pwüng an angang seni lepopun, pun esap tongeni försefälli! Iwe, a ina ussun. Met popun? Pun Noa “a föri meinisin mine Kot a allük ngeni.” (Keneses 6:14-22) Iwe, lon ach ei fansoun Jiowa a pwal älipwäköchü nöün kewe chon angang pwe repwe föfföri letipan. Pwüngün pwe sipwe äkkäeüin afalafala kapas allimen ewe Mwuun Kot, ewe mi fen ütä, me pwal äkkälisi aramas mi tipemecheres ar repwe wiliti nöün Jises Kraist kewe chon käeö. Iwe ach tufichin föri ena mettoch a alongolong woon ach älleäsochis, pwe a ina ussun Noa. Sipwe älleäsochisi ewe emmwen Jiowa a akkawora ren an we Kapas me an we mwicheich.—Mattu 24:14; 28:19, 20.
13 Ren ach sipwe tufichin apwönüetä ena angang, a lamot chapur ach sipwe ‘äeäfichi’ ach we pisekin angang mi nampa eü—ewe Kapasen Kot—ewe mi “lamot ngeni afalafal, ngeni fonou, ngeni amurinnolo, o pwal ngeni angangochun ewe manau mi pung, pwe noun Kot aramas repwe unusoch o pwal lipwakoch ngeni sokkun fofor-murinno meinisin.” (2 Timoti 2:15; 3:16, 17) Ussun chök le manauen ekkewe aposel, Jiowa a pwal äkkäitikich ren ewe mwichefelin Chon Kraist lon ach ei fansoun. Lon ekkewe 99,770 mwichefel woon unusen fönüfan, a kan fiffis ewe Sukulen Afalafal me ewe Service Meeting pwe epwe älisikich lon ewe angangen afalafal. En mi pwäratä om aücheani ekkeei mwich ren om fiffitiir iteitan me pwal ren om akkapwönüetä ekkewe mettoch ka käkkäeö?—Ipru 10:24, 25.
14 Fite milion nöün Kot kewe aramas woon unusen fönüfan ra pwäratä ar aücheani än Jiowa akkasukuler. Awewe chök, lon ewe repotun angangen afalafal lon 2006, 6,741,444 chon afalafala ewe Mwu ra angang ükükün 1,333,966,199 awa lon ekkewe sokkopaten angangen afalafal, pachelong ar käeö ngeni lap seni 6,286,618 aramas lon imwer kewe. Ikkeei ekkoch chök pworaus mi apöchökkülakich lon ewe repotun unusen fönüfan. Kese kan mochen kopwe attolafichi ena repot me pöchökkületä ren, ussun chök pwiich kewe le manauen ekkewe aposel ra pwal pöchökkületä ren repotun lapoloon ewe angangen afalafal lon ar we fansoun.—Fofor 1:15; 2:5-11, 41, 47; 4:4; 6:7.
15 Wachemwuken ekkewe kapasen mwareiti Kot iteiten ier a pwäratä ükükün alolloolun än nöün Jiowa kewe chon angang aücheani ar silei Jiowa me wiser ar repwe chon pwäratä ussun i. (Aisea 43:10) Pwüngün pwe ewe kükkünün asorun mwareiti Kot ekkoch pwiich kewe mi chinnap, semwen, are apwangapwang ra tongeni eäni a ussun chök ewe asor ewe fefin mi mä seni pwülüwan a eäni. Nge sisap mönüki pwe Jiowa me Nöün we ra wesewesen aücheani ir meinisin mi angang ngeni Kot ren unusen letiper, pun ra angang ngeni ükükün ar tufich.—Luk 21:1-4; Kalesia 6:4.
16 Ren an we mwicheich, Jiowa ese chök äkkäitikich fän iten ewe angangen afalafal, nge a pwal akkawora pisekin angang mi fokkun echipwör. Lon ekkewe ier mi chök kanoto, a awora ekkeei puk, Ewe Enlet mi Emmwenikich ngeni Manau Esemuch, En Kopwe Tongeni Manau Tori Feilfeilo chök lon Paratis won Fönüfan, Sile mi Emmwen Ngenikich Manau Esemuch me ewe a kerän katowu, What Does the Bible Really Teach? (Ifa Wesewesen Äitien Paipel?) Chokkewe mi wesewesen aücheani ekkena puk ra nöünöüfichiir lon ewe angangen afalafal.
Nöünöüfichi ewe Puk Bible Teach
17 A wor 19 sopwun, pworausen aweween ekkoch itelapen afalafal (appendix), me kapas mi ffatöch me mecheres lon ewe puk What Does the Bible Really Teach?, iwe, ina wesewesen eü minen älillis mi aüchea lon ewe angangen afalafal. Awewe chök, iei itelapen sopwun 12, “Manaueni ewe Manau mi Apwapwai Kot.” A aweweei ngeni chon käeö ifa ussun repwe tongeni wiliti chiechien Kot, nge chommong aramas rese mwo äteneki are ekieki pwe mei tufich ena. (Jemes 2:23) Iwe, ifa meefien aramas ussun ena puk?
18 Emön elter mi wisen säifetäl lon Australia a repotei pwe aramas ra “mwittir sani me mochen pworausfengen woon” ena puk Bible Teach. A pwal erä pwe pokiten a mecheres ar nöünöü, “chommong chon afalafala ewe Mwu ra meefi nükünüköch me pwapwasefäl lon ewe angangen afalafal. Ese mwääl ina ewe popun ekkoch ra apasa pwe ena puk a ussun chök kolt!”
19 “Ese mwääl Kot a tinukoto,” ina alon emön fefin lon Guyana ngeni ewe pioneer mi ütä penasamen imwan we. Kanoto chök emön mwän a nom ren ena fefin nge esap pwülüwan, iwe, a likitiirelo me nöür kewe rüüemön kükkün ät me nengngin. Ewe pioneer a suuki ewe puk Bible Teach ngeni sopwun 1 me a leüommong le älleäni wokisin 11, fän ewe itelap kisikis, “Met Meefien Kot Ussun Ekkewe Mettoch Ese Pwüng Sia Kükküna?” Iei alon ewe pioneer, “Minne ua älleä ngeni a fokkun kkü letipan. A ütä, a fetäl ngeni lükünüppen an we sitowa, me a kechiu.” Iei, ena fefin a käkkäeö Paipel ren älillisin emön sister me a feffeitä lon pekin ngün.
20 José a nonnom lon Spein, iwe, pwülüwan we a mälo lon eü äkseten. José a sotuni le aururu letipan ren an ükkün säfeien opuchopuch me küt älillis seni tokter. Iwe nge, ekkena tokter rese tongeni pölüeni ei kapas eis José a äkkäeüin osukosuk ren: “Pwata Kot a mut ngeni pwülüwei we an epwe mälo?” Eü rän José a chuuri Francesc, emön chon angang lon an we kompeni. Francesc a ereni pwe repwe pworausfengen ussun sopwun 11 lon ewe puk Bible Teach, itelapan a erä, “Pwata Kot A Mutatä Riäfföü?” Än Paipel awewe me ewe kapas awewe ussun emön sense me nöün we chon käeö a fokkun kkü letipen José. A poputä le käeö fän tinikken, a fiti eü mwichelap, me iei a fiffiti mwich lon ewe Kingdom Hall.
21 Roman, emön chon sopai 40 ierin lon Poland, a kan süföliti ewe Kapasen Kot. Iwe nge, pokiten a fokkun chofo lon an we angang, a üküngaü an käkkäeö Paipel. Iwe nge, a fiti eü mwichelap, iwe, a angei ewe puk Bible Teach. Mwirin, a fokkun mürinnölo napanapan. A apasa, “Lon ei puk, ekkewe afalafalen le popun lon Paipel ra mäsefengen pwe repwe wililo, iwe, wiliti eü lios mi unus, ussun chök eü kamas.” Iei, Roman a käkkäeö ewe Paipel iteitan me a feffeitä lon pekin ngün.
Sopwelo le Ämääraatä Om Kilisou
22 Ussun ewe mwichelap, itelapan “Amanau A Chök Arapoto!” a aweweei, Chon Kraist mi enlet ra äneänei ar repwe küna pwönütään än Kot we pwon, pwonen ar repwe “unusen ngaselo,” nge a tufichin pwönütä ren chchaan Jises we mi ninilo. Ren ach sipwe pwärawu seni letipach ach kilisou ren ena äpilükülük mi aüchea, sipwe äkkäeüin likiitü le limeti “mwelien letipach seni sokun föfför mi lomotongaü, pwe sipwe tongeni angang ngeni ewe Kot mi manau.”—Ipru 9:12, 14.
23 Ewer, iei wesewesen eü manaman, ach küna pwe lap seni wonu milion chon afalafala ewe Mwu ra tuppwöl le likiitü lon ar angang ngeni Kot, inaamwo ika lape ngeni aramas ra chök kükkütta pwisin letiper. A pwal ännetatä pwe nöün Jiowa kewe chon angang ra wesewesen aücheani wiser, wisen ar repwe angang ngeni Kot, nge ra silei pwe ar “angang weires lon ach we Samol esap lamot-mwal.” Amwo ar aücheani wiser na epwe chök mämmääritä!—1 Korint 15:58; Kölfel 110:3.
Ifa Ussun Kopwe Pölüeni?
• Met ewe chon makkei köl mi fel a äiti ngenikich ussun ach aücheani Kot me minne a awora ngenikich lon pekin ngün?
• Ifa ussun alon Akai 2:7 a pwönüetä lon ach ei fansoun?
• Ifa ussun Jiowa a awora pisekin angang ngeni nöün kewe chon angang pwe repwe lipwäköch le angang ngeni?
• Met kopwe tongeni föri ren om kopwe pwäratä pwe ka aücheani mürinnöön Jiowa?
[Ekkewe kapas eis fan iten ewe lesen]
1, 2. Met popun sipwe aücheani än Kot we Kapas, iwe, ifa ussun ewe sou makkei kölfel a pwäratä an aücheani?
3. Met a pwäratä pwe Tafit emön mi wewefichiti an pacheöch ngeni Kot?
4. Met popun Jises a “pwapwa ren ewe Ngün mi Fel”?
5. Pwata nöün Jises kewe chon käeö resap aücheangaüa ekkewe pworaus mi pwä ngeniir ussun ewe Mwu?
6, 7. (a) Met popun sipwe akkaücheäni ewe enlet seni Kot? (b) Ifa sokkofesennin lamalam mi enlet me lamalam mi chofona lon ach ei fansoun?
8, 9. Ifa ussun an a pwönüetä alon Akai 2:7 lon ach ei fansoun?
10, 11. Aweweei mwo eü pworaus ren ifa ussun aramas ra poputä le aücheani ekkewe pworaus mi enlet lon Paipel.
12. Met Jiowa a kan akkawora fän äsengesin nöün kewe chon angang fansoun meinisin, iwe, met sipwe föri ren ach sipwe küna feiöch seni?
13. Ifa ussun Jiowa a kan akkasukulakich?
14. Ifa ussun nöün Jiowa kewe chon angang ra pwäratä ar aücheani wiser we, wisen ar repwe angang ngeni Kot? (Pachelong ekkoch pworaus seni ewe repot lon pekin taropwe 23-26.)
15. Pwata esor popun emön leich epwe meefi letipechou ren an angang ngeni Jiowa ren unusen letipan?
16. Ikkefa ekkoch pisekin angang Kot a awora lon ekkewe ier mi chök kanoto?
17, 18. (a) Menni kinikinin ewe puk Bible Teach (Äitien Paipel) ka sani om kopwe menlapei lon om angangen afalafal? (b) Met emön elter mi wisen säifetäl a apasa ussun ewe puk Bible Teach?
19-21. Aweweei mwo ekkoch pworaus mi menlapei aüchean ewe puk Bible Teach.
22, 23. Ifa ussun sipwe tongeni sopwelo ach pwäratä pwe sia aücheani ewe äpilükülük allim mi nom mwach?
[Chart on page 23-26]
2006 SERVICE YEAR REPORT OF JEHOVAH’S WITNESSES WORLDWIDE
(See Publication)
[Lios lon pekin taropwe 21]
Jiowa a unusen älipwäköchükich pwe sipwe föfföri letipan
[Lios lon pekin taropwe 21]
WHAT DOES THE BIBLE Really TEACH?