Kopwe Tipetekison le Anomukolo fän Emmwenien Ekkewe Chon Mas Mi Tong
“Iwe, oupwe alleasochisi ekkewe chon emmwenikemi, o nonnom fan nemenier.”—IPRU 13:17.
JIOWA KOT me Nöün we, Jises Kraist ir me rüüemön Chon Mas mi tong. Aisea a oesini: “Kot ewe Samol mi Lapalap a feito pwe epwe nemenem fän pöchökül. . . . Iwe, epwe tümwünü nöün mwichen sip usun eman chon mas, epwe pwal achufengeni ekewe apanen sip o ekiretä fän mwärin, nge ekewe inelapen sip epwe emwenirela fän kinamwe.”—Aisea 40:10, 11.
2 Ena oesini a pwönütä akkom lupwen eü kükkün mwichen chon Jus ra liwinlo Juta lon 537 B.C.E. (2 Kronika 36:22, 23) A pwönütä sefäl lupwen Jises a angasalo lusun ekkewe aramas mi kepit seni “Papilon mi Lapalap” lon 1919 ussun chök King Sairos a angasalo ekkewe chon Jus seni Papilon loom. (Pwarata 18:2; Aisea 44:28) Jises I pöün Jiowa fän iten nemenem. Epwe ionfengenni ekkewe siip me tüttümünüür ren tong. Jises a apasa: “Ngang ewe chon masen siip mi murinno. Ua sinei nei kewe, o nei kewe ra pwal sineiei.”—Jon 10:14.
3 Ewe oesini lon Aisea 40:10, 11 a menlapei än Jiowa tong mi pwälo lupwen a mammasa nöün kewe aramas. (Kol Fel 23:1-6) Jises a kan pwäri an tong fän iten nöün kewe chon käeö me aramas meinisin atun an afalafal woon fönüfan. (Mattu 11:28-30; Mark 6:34) Jiowa me Jises ra fokkun oputa kirikiringaüen ekkewe chon mas, weween ekkewe meilap lon Israel mi kan chüri me tümününgaü ngeni ekkewe aramas ra wisen älisi. (Isikiel 34:2-10; Mattu 23:3, 4, 15) Jiowa a eäni ei pwon: “Iei mine üpwe amanaua nei sip kana, pwe esap chüen wor eman epwe ariaföüür, üpwe pwal apwüngüür meinisin o aimwüfeseni ekewe sip mi mürina seni ekewe mi ngau. Iwe, üpwe awisa eman chök chon mas pwe epwe tümwünüür. I epwe usun chök nei chon angang Tafit, epwe foleniir, epwe pwal ar chon mas.” (Isikiel 34:22, 23) Lon ei fansoun mwen ewe sopwoloon, Jises Kraist, ewe Tafit mi Lapalap, i ewe “emon chok chon maser” Jiowa a seikatä woon ekkewe chon Kraist mi kepit fengen me “ekkewe ekkoch siip.” Ir nöün Kot kewe chon angang woon fönüfan.—Jon 10:16.
Liffang Seni Läng fän Iten ewe Mwichefel
4 Lupwen Jiowa a ngeni nöün kewe chon angang woon fönüfan “emon chok chon maser,” Jises Kraist, a ngeni ewe Mwichefelin Chon Kraist eü liffang mi fokkun aüchea. A wor oesini ussun ei liffang, ewe Sou Emmwen lon läng, lon Aisea 55:4: “Nengeni, üa awisa pwe epwe souemwen me samolun mwü kana, epwe pwärätä ngeni aramasen fanüfan ai manaman.” Ekkewe chon Kraist mi kepit fengen me chiener lon ewe “mwich mi fokkun lapalap” ra ioifengen seni mwu, einang, aramas, me kapas meinisin. (Pwarata 5:9, 10; 7:9) Ir meinisin ra wewe ngeni eü mwichefel woon unusen fönüfan, “eu chok mwich,” fän “emön chok chon maser,” Kraist Jises.
5 Jises a pwal fangolo eü liffang mi aüchea ngeni an we mwichefel woon fönüfan. A ngeniir kisin chon mas mi äkkäppirü Jiowa me Jises ren ar mammasa ewe pwiin siip fän tong. Ewe aposel Paul a fos ussun ei liffang lon nöün we taropwe ngeni ekkewe chon Kraist lon Efisus. A makkei: “Lupwen a feita won, a emmwenata chommong chon eolo, o a pwal liffang ngeni aramas.” A liffang ngeniir mwän mi asimau ir “repwe wiseni chon kuno, ekkoch soufos, ekkoch misineri, pwal ekkoch wanparon me sounpetak, pwe repwe aunusochulo ekkewe aramas mi fel, o repwe fori ewe angangen alisi, o repwe aufichieta ewe inisin Kraist.”—Efisus 4:8, 11, 12.
6 Ekkena “liffang” ir ekkewe elter Jiowa me Nöün we ra seikireta ren ngün mi fel. Ekkewe elter ra wisen mammasa ekkewe siip fän tong. (Fofor 20:28, 29) Akkom, meinisin ekkeei elter ir chon Kraist mwän mi kepit. Lon Pwarata 1:16, 20 ekkewe “füü” are ‘chon lang’ lon pöümwänin Kraist ra liosuetä ekkewe mwän mi eäni wiser lon ekkewe mwichen elter an ewe mwichefel mi kepit. Ra nom fän än Kraist nemenem. Iwe nge, atun ekkewe ränin le sopwoloon, choochoon ekkewe elter mi kepit a kikkisikisetiu. Lape ngeni ekkewe elter lon än Kraist kewe mwichefel ir chon ekkewe ekkoch siip. Aramas mi tupuni ewe Mwichen Sou Pwüngüpwüng ra seikatä ekkeei elter fän emmwenien ewe ngün mi fel. Ina popun ekkena elter ra pwal nom fän pöümwänin (are, fän emmwenien) ewe Chon Mas mi Mürinnö, Jises Kraist. (Aisea 61:5, 6) Pokiten ekkewe elter lon ach we mwichefel ra akkanomuur fän Kraist, möküren ewe mwichefel, ra fich ngeni ach sipwe angang ngeniir fän tipeeü.—Kolose 1:18.
Älleäsochisi me Anomukolo fän Emmwenien Ekkewe Kisin Chon Mas
7 Ach kewe Chon Mas lon läng, Jiowa Kot me Jises Kraist, ra mochen pwe sipwe älleäsochisi me anomukich fän än ekkewe kisin chon mas emmwen. (1 Piter 5:5) Paul a makkei ei pworaus fän emmwenien ngün mi fel: “Oupwe chechemeni ekkewe chon emmwenikemi, ir mi fen apasa ngenikemi ewe kapasen Kot. Oupwe ekieki usun uwan manauer, o oupwe appiru ar luku. Iwe, oupwe alleasochisi ekkewe chon emmwenikemi, o nonnom fan nemenier; pun ra mamasa ngunumi usun chok ir ekkewe repwe pwarata usun ar angang. Iwe, repwe fori ar angang ren pwapwa, sap ren letipechou, pun are ra letipechou ren ar angang, ami ousap feioch ren.”—Ipru 13:7, 17.
8 Paul a pesekich le “ekieki” are nennengenifichi uwaan föfföröchün ekkewe elter. A mochen pwe sipwe äppirü ar lükü. A pwal fönöükich ach sipwe älleäsochisi ewe emmwen seni ekkeei mwän mi seikitä. R. T. France, emön sou käeö Paipel, a awewei pwe ewe kapas lon fosun Kris mi aföü ngeni “älleäsochis” esap ewe “kapas aramas ra kan nöünöü nge a wewe ngeni ‘tipetipelo,’ weween pwe emön a tipemecheres le etiwa ewe emmwen seni chokkewe a älleäsochis ngeniir.” Sia älleäsochisi ekkewe elter pokiten ina met a mak lon ewe Paipel. Sia pwal älleäsochisiir pokiten ach lükü pwe ra mochen älisatä ewe angang fän iten Mwuun Kot me älisikich ren met epwe öchitikich lon pekin aion me pekin ngün. Sipwe pwapwa ika sia tipemecheres le ekketiwa ar emmwen.
9 Iwe nge, met sipwe föri ika me rech, än ekkewe elter emmwen ese kon lien mürinnö? Ina ewe fansoun a fokkun lamot süföl, weween ach filatä le anomukich fän ar nemenem. A mmen mecheres älleäsochis lupwen a ffat ewe pworaus me sia tipeeü ngeni, nge sipwe pwäralo enletin ach süföl ika sia etiwa ewe emmwen pwal mwo nge lupwen sise kon weweiti ewe emmwen. Ina ewe sokkun süföl a nom ren Piter, ewe a wiliti emön aposel.—Luk 5:4, 5.
Rüänü Popun Sipwe Tipemecheres le Tipeeü
10 Lon Ipru 13:7, 17, ewe aposel Paul a fos ussun rüänü popun sipwe älleäsochisi me süföliti ekkewe elter chon Kraist. Ewe äeüin popun pokiten ra ‘ngenikich ewe kapasen Kot.’ Chemeni mwo ekkewe “liffang,” weween ekkewe aramas Jises a ngeni ekkewe mwichefel “pwe repwe aunusochulo ekkewe aramas mi fel.” (Efisus 4:11, 12) Jises a awenecharasefälli ekiekin me föfförün ekkewe chon Kraist loom ren an nöünöü ekkewe kisin chon mas mi tuppwöl. Ekkoch me leir ra makkei taropwe ngeni ekkewe mwichefel. Kraist a nöünöü elter mi seikitä ren ngün mi fel an epwe emmweni me apöchökküla ekkena chon Kraist loom.—1 Korint 16:15-18; 2 Timoti 2:2; Taitos 1:5.
11 Ikenäi, Jises a emmwenikich ren “ewe chon angang mi tuppwel o tipatchem.” (Mattu 24:45) Ewe Mwichen Sou Pwüngüpwüng me ekkewe elter mi seikitä ra tupuni ena chon angang mi tuppwöl. Pokiten sia süföliti “ewe chon mas” Jises Kraist, sia älleäsochis ngeni ei fön seni Paul: “Iwe, am aia tingor ngenikemi, pwii kena, pwe oupwe asamolu ekkewe mi angang leimi o nom womi o pwal fonoukemi.”—1 Piter 5:4; 1 Tesalonika 5:12; 1 Timoti 5:17.
12 Oruuan sipwe tipeeü ngeni än ekkewe elter emmwen pokiten ‘ra mammasa ngünüch.’ Ika ra küna och ekiek are föfför a tongeni efeiengaüa ach pöchökkül lon pekin ngün, ra mwittir ngenikich fön mi tongeni awenachara ach ekiek. (Kalesia 6:1) Titchikin weween ewe kapasen Krik fän iten ‘mammasa,’ pwe emön “esap onnut.” Me ren emön sou käeö Paipel, ewe kapas a weneiti “än ewe chon mas unusen achocho le mammasa ekkewe siip.” Pwal och, esap chök pwe ra achocho ngeni wiser nge, fän ekkoch ekkewe elter rese tongeni onnutulo pokiten ar lolileniesini ach pöchökkül lon pekin ngün. Itä sipwe tipemecheres ngeni än ekkewe kisin chon mas emmwen mi tong. Ra sotun le äppirü napanapen än Jises, “ewe chon mas mi lap” tümünü ekkewe siip.—Ipru 13:20.
13 Ewe aülüngätin popun sipwe tipemecheres le angang fän emmwenien ekkewe elter, pokiten “repwe pwarata [ngeni Kot] usun ar angang.” Ekkewe elter ra chechchemeni pwe ir kisin chon mas fän nemenien ekkewe Chon Mas lon läng, Jiowa Kot me Jises Kraist. (Isikiel 34:22-24) Ekkewe siip noun Jiowa. A mööniir “ren chaan” Nöün we. Ina popun Jiowa epwe cheki napanapen än ekkewe kisin chon mas tüttümünü Nöün pwiin siip. Repwe “lolileniesini” ekkewe siip me tongeer. (Fofor 20:28, 29) Jiowa epwe nennengeni napanapen än kich meinisin etiwa an emmwen. (Rom 14:10-12) Ach älleäsochisi ekkewe elter a pwäri pwe sia anomukich fän Kraist, Möküren ewe mwichefel.—Kolose 2:19.
14 Paul a awewei ewe arüänün popun sipwe anomukich fän än ekkewe elter emmwen. A makkei: “Pun are ra letipechou ren ar angang, ami ousap feioch ren.” (Ipru 13:17) A mmen watte wisen ekkewe elter. Ra wisen asukula me mammasa chon ewe mwichefel, emmweniöchü ewe angangen afalafal, tümünü chon le imwer, me angang woon ekkewe osukosuk lon ewe mwichefel. Iwe, oser mi chou. (2 Korint 11:28, 29) Ika sise tipemecheres ngeni ar kewe kokkot epwe chök lapelo choun oser. Ina popun repwe “letipechou” pokiten wiser. Sia tongeni feiengaü lupwen sise tipemecheres pokiten Jiowa esap pwapwa rech. Lupwen sia süföl me tipemecheres le angang rer, ekkewe elter repwe chengel wachemwuk lupwen ra apwönüetä wiser kewe. Ar chengel a pwal älisatä ewe tipeeü me chengelin meinisin mi fiti ewe angangen afalafal ussun än Kot we Mwu.—Rom 15:5, 6.
Pwäppwäralo Ach Süföl
15 Mei wor chommong mettoch sia tongeni föri ren ach sipwe angang fän tipeeü fengen me ekkewe elter. Ekkewe elter ra siwili ränin me kulokun ekkewe mwich mwen ach afalafal pokiten a siwil kokkotun manauen aramas lon ach we territory? Sipwe achocho le älisatä ewe mineföön kokkot. Eli epwe wor ach feiöch pokiten sia föri ena. Ewe service overseer epwe chuuri om we mwich fän iten ewe Puk Study? Sipwe alapalo ach afalafal lon ena wiik. Mei wor wisach fän iten ewe Sukulen Afalafal? Sipwe achocho le eäni wisach. Ach we kumi a wisen limeti ewe Kingdom Hall? Sipwe awora älillis me ren ach pöchökkül. Iei ussun sia pwäri ach süföl fän iten ekkewe mwän Jiowa me Nöün we ra seikiretä le tümünü ewe pwiin siip.
16 Fän ekkoch met emön elter a föri esap tipeeü ngeni ewe emmwen seni ewe chon angang mi tuppwöl me an we Mwichen Sou Pwüngüpwüng. Ika ese siwili met a föfföri, epwe pwisin pwäratä ngeni Jiowa, ‘ewe sou tutumunu ngunuch,’ ussun an föfför. (1 Piter 2:25) Iwe nge, ika ekkewe elter ra mwäälilo are angang ngaü, esor popun sipwe süfölüngaü ngeniir. Jiowa ese efeiöchü älleäsolap are ach ü ngeni chokkewe a filiretä.—Numperis 12:1, 2, 9-11.
Jiowa A Efeiöchü Ach Tipemecheres
17 Jiowa a silei pwe ekkewe mwän a seikiretä rese unusöch nge a nöünöü ir. A emmweni ekkena mwän ren ngünün we le mammasa nöün kewe aramas woon fönüfan. Mi enlet fän iten ekkewe elter me kich meinisin pwe “pochokkulen ewe manaman mi nonnom ren Kot, sap ren kich.” (2 Korint 4:7) Ina popun sipwe fokkun kilisou ngeni Jiowa fän iten ewe angang a fiffis ren ekkewe elter mi tuppwöl. Sipwe pwal tipemecheres le föri met ra awisa ngenikich.
18 Ekkewe elter ra achocho le äppirü met Jiowa a apasa ussun ekkewe chon mas mi seikitä woon noun we pwiin siip lon ekkeei ränin le sopwoloon lon Jeremaia 3:15: “Üpwe ngenikemi souemwen mi lelukeni lelukei, repwe emwenikemi fän silelap me weweöch.” Ekkewe elter lon ach kewe mwichefel ra unusen achocho le asukula me tümünü nöün Jiowa kewe siip. Amwo ach kilisou fän iten unusen ar angang epwe fokkun pwäppwälo ren ach tipemecheres le angangfengen rer, ach älleäsochis, me ach süföl. Iei ussun sipwe pwäralo ach kilisou fän iten ekkewe Chon Mas lon läng, Jiowa Kot me Jises Kraist.
Enniwilin Pworaus
• Ifa ussun sia silei pwe Jiowa me Jises Kraist ir Chon Mas mi tong?
• Met popun a pwal lamot süföl fengen me älleäsochis?
• Ifa ussun sipwe tongeni pwäralo ach süföl?
[Ekkewe kapas eis fan iten ewe lesen]
1, 2. Ikkefa ekkewe wokisin ra pwäralo pwe Jiowa me Jises ir Chon Mas mi tong?
3. Ifa ussun a pwälo än Jiowa tong fän iten nöün kewe siip mi riäfföü pokiten kirikiringaüen ekkewe nöüwis?
4, 5. (a) Ifa än Jiowa liffang mi fokkun aüchea ngeni nöün kewe aramas woon fönüfan? (b) Ifa än Jises liffang ngeni an we mwichefel?
6. Met a liosuetä ekkewe elter lon Pwarata 1:16, 20, iwe, met sipwe apasa ussun ekkewe ekkoch siip mi eäni wisen elter?
7. Ifa än Paul we fön ussun ach ekiek ngeni ekkewe elter chon Kraist?
8. Paul a mochen pwe sipwe “ekieki” ussun met, me ifa ussun sipwe “älleäsochis”?
9. Met popun a lamot “süföl” fengen me älleäsochis?
10, 11. Ifa ussun ekkewe elter ra ngeni chiener chon Kraist “ewe Kapasen Kot” me loom me ikenäi?
12. Ifa ussun ekkewe elter ra ‘mammasa ngünüch’?
13. Ngeni iö me ifa ussun ekkewe elter me chon Kraist meinisin repwe pwäratä ussun ar angang?
14. Met epwe emmwen ngeni än ekkewe elter “letipechou,” me epwe met mwiriloon fän itach?
15. Ifa ussun sipwe pwäralo ach älleäsochis me süföl?
16. Met popun sisap ü ngeni emön elter lupwen ese föri wisan me ren än ewe chon angang mi tuppwöl emmwen?
17. Epwe ifa ach ekiek ussun ekkewe elter?
18. Sia kilisou ngeni iö kewe lupwen sia süföliti nöüch kewe elter?
[Lios lon pekin taropwe 13]
Ekkewe elter chon Kraist ra anomur fän än Kraist we emmwen
[Lios lon pekin taropwe 15]
Mei wor chommong sokkun mettoch sipwe föri ren ach sipwe pwäralo pwe sia süföliti ekkewe chon mas Jiowa a seikiretä