Käkkäeö “Ekkewe Le Olololun Kot”

“Ewe Ngun a kukutta mettoch meinisin, tori ekkewe le olololun Kot.”—1 KORINT 2:10.

1. Ikkefa ekkoch pworaus enlet seni Paipel ra efisi pwapwaan ekkewe mineföön chon käeö Paipel?

LAPE ngenikich lon ewe mwichefelin Chon Kraist sia tongeni chechchemeni ach pwapwa atun sia kerän käeö ewe enlet. Sia küna lamoten iten Jiowa we, pwata a mutatä riäfföü, ewe popun ekkoch aramas repwe feitä läng, me met epwe fis ngeni ekkewe ekkoch aramas mi tuppwöl lon mwach kkan. Eli sia piin käkkäeö ewe Paipel, nge a op senikich ekkena mettoch, ussun a op seni lape ngeni aramas. Sia ussun chök emön mwän mi netiu me woon säät ngeni ewe piru fan, nge ese mesemes äntios, iwe, ese ffatöch ekkewe mettoch mi lingöch me fän säät. Nge ren an mesemes äntios are nom woon efoch mota mi kilas epin, epwe fokkun meseikeiti an kerän küna ekkewe ään mi lingöch, ekkewe iik, me ekkewe mönün leset. Pwal ina chök ussun, lupwen emön Chon Pwäratä Jiowa a poputä le älisikich le weweiti ewe Paipel, sia kerän küna “ekkewe le olololun Kot.”—1 Korint 2:8-10.

2. Pwata a tongeni nomofochelo pwapwaach seni ach käkkäeö än Kot we Kapas?

² Itä sipwe pwapwa ren kisikisin ach silei ekkewe pworaus enlet seni Paipel? A kapachelong lon “ekkewe le olololun Kot” än Chon Kraist weweiti än Kot tipatchem mi pwä ngeniir ren ngün mi fel nge a op seni ekkewe ekkoch aramas. (1 Korint 2:7) Pokiten ese aükük än Kot tipatchem, sipwe chengel le käeö ussun an kewe föfför! Sisap tongeni silei mettoch meinisin ussun tipatchemen än Kot kewe al. Epwe tongeni nomofochelo ewe pwapwa sia meefi atun sia kerän weweiti ekkewe popun käeö lon Paipel ika sipwe kükkütta “ekkewe le olololun Kot.”

3. Pwata a lamot ach weweiti ekkewe popun a wor ach lükü?

³ Pwata a lamot ach sipwe weweiti ekkena “olololun Kot”? Ach weweiti, sap chök minne sia lükü nge ewe popun sia lükü, weween, longolongun ach lükü, epwe apöchökkülatä ach lükü me ach lükülük woon minne sia ächiföüa. Ewe Paipel a erenikich pwe sipwe äeä ach tufichin weweiti le “pwarata minne letipen Kot, minne mi murinno o fich o unusoch.” (Rom 12:1, 2) Ach weweiti ewe popun Jiowa a pesekich le manaueni ewe manau mi fich ngeni epwe apöchökküla ach tipeppos le älleäsochisi i. Ina popun, ach silei “ekkewe le olololun Kot” epwe tongeni apöchökkülakich pwe sisap föfföringaü fän sossot me epwe achchüngükich pwe sipwe “achocho ngeni fofor-murinno.”—Taitos 2:14.

4. Ikkefa ekkewe mettoch ra kapachelong lon käeöön Paipel?

⁴ A lamot sipwe käkkäeö ika sipwe weweiti ekkewe pworaus mi alollool. Iwe nge, käeö ese löllö ngeni ach sipwe chök älleäni eü pworaus. A wewe ngeni ach sipwe nennengeni ewe pworaus le ppii ifa ussun a riri ngeni minne sia fen silei. (2 Timoti 1:13) A kapachelong ach sipwe weweiti ekkewe popun a mak och pworaus. Epwe pwal kapachelong lon ach käeöön Paipel ach sipwe ekilonei ifa ussun sipwe tongeni apwönüetä minne sia käeö pwe sipwe filiöch me älisi aramas. Pwal eü, pokiten “ekkewe puk meinisin ra pop seni Ngunun Kot, [me] ra pwal lamot,” epwe kapachelong lon ach käeö “iteiten kapas meinisin mi tou seni auen Kot.” (2 Timoti 3:16, 17; Mattu 4:4) Käeöön Paipel epwe tongeni weires! Nge a pwal apwapwa, me esap kon weires ach sipwe weweiti “ekkewe le olololun Kot.”

Jiowa A Älisi ekkewe mi Tipetekison Ar Repwe Weweöch

5. Iö kewe ra tongeni weweiti “ekkewe le olololun Kot”?

⁵ Inaamwo ika kese fen angöch lon sukul me kese eöreni om kopwe käkkäeö, nge kesap ekieki pwe kesap tongeni weweiti “ekkewe le olololun Kot.” Atun Jises a afalafal woon fönüfan, Jiowa ese pwäri ngeni chon tipatchem me chon wewe weween An kokkot, nge a pwäri ngeni ekkewe rese käeö lon sukulen rappai me aramas kisikis mi tipetekison mi etiwa än nöün Kot we chon angang käkkäeö ngeniir. Iir ra ussun chök mönükol lupwen sipwe apöpöfengenniir me ekkewe chon fiti sukul. (Mattu 11:25; Fofor 4:13) Ren “minne Kot a fen ammolata ngenir mi tongei i,” ewe aposel Paul a mak ngeni chiechian kewe chon lükü: “Kot a fen pwarata ekkeei mettoch ngenikich ren ewe Ngun. Pun ewe Ngun a kukutta mettoch meinisin, tori ekkewe le olololun Kot.”—1 Korint 2:9, 10.

6. Met weween 1 Korint 2:10?

⁶ Ifa ussun än Kot ngün a kükkütta “mettoch meinisin, tori ekkewe le olololun Kot”? Ese pwäri ewe enlet ngeni emön me emön Chon Kraist, nge Jiowa a äeä an we ngün pwe epwe emmweni an mwicheich pwe epwe aweweöchü Paipel ngeni nöün kewe aramas mi tipeeüfengen. (Fofor 20:28; Efisus 4:3-6) A löllö chök minne ekkewe mwichefel meinisin woon unusen fönüfan ra käkkäeö me lon Paipel, iwe, ekis me ekis, repwe käeö unusen masouen Paipel. Ewe ngün mi fel a älisi chon ewe mwichefel pwe repwe eäni ewe ekiek mi atufichiir le weweiti “ekkewe le olololun Kot.”—Fofor 5:32.

Met A Kapachelong lon “ekkewe le olololun Kot”

7. Pwata chommong aramas rese weweiti “ekkewe le olololun Kot”?

⁷ Sisap ekieki pwe “ekkewe le olololun Kot” repwe weires ach sipwe weweitiir. Sileien “ekkewe le olololun Kot” a opelo seni lape ngeni aramas, sap pokiten a weires än aramas weweiti ewe tipatchemen Kot, nge pokiten Setan a otupu aramas pwe repwe tunalo ewe älillis Jiowa a awora me ren an we mwicheich.—2 Korint 4:3, 4.

8. Ikkefa ekkewe mettoch mi alollool Paul a kapas ussun lon ewe aülüngätin sopwun lon nöün we taropwe ngeni Chon Efisus?

⁸ Ewe aülüngätin sopwun lon nöün Paul we taropwe ngeni chon Efisus a pwäratä pwe a kapachelong lon “ekkewe le olololun Kot” chommong pworaus mi enlet lape ngeni nöün Jiowa kewe aramas ra weweöchüiti, ussun choweän esissilletään ewe mwirimwir mi pwonetiu, filien ekkewe mi eäni ewe äpilükülükün manau lon läng seni me lein aramas, me Mwuun ewe Messaia. Paul a makkei: “Ewe poraus ese mo esinei ngeni ekkewe aramas lon ekkewe pilon lom, usun chok lon ei fansoun a fen pwarata ngeni noun kewe chon kuno me noun kewe soufos mi fel ren ewe Ngun. Iwe, iei ewe monomon, pwe ekkewe Jentail repwe eti ekkewe Jus le alemwiri, lon eu chok inis, o repwe pipisekfengen lefiler ewe pwon lon Kraist Jises.” Paul a apasa pwe epwe wisen “aiti ngeni aramas meinisin meeta ewe ekiek usun ewe poraus mi monomon, ewe mi monelo seni chok lom lom lon Kot.”—Efisus 3:5-9.

9. Pwata sia feiöch le weweiti “ekkewe le olololun Kot”?

⁹ Paul a aweweei letipen Kot pwe “epwe esinei ngeni ekkewe mu pwal ekkewe nemenem lon lang an Kot we tipatchem mi fakkun mesemesekkis.” (Efisus 3:10) Chonläng ra tongeni käeö seni ar nengeni me weweiti tipatchemen än Jiowa föfför ngeni ewe mwichefelin Chon Kraist. A mmen watte feiöchüch le weweiti minne pwal mwo nge ekkewe chonläng ra mochen silei! (1 Piter 1:10-12) Mwirin, Paul a apasa pwe sipwe “meefi meeta cholapan, are langattaman, are tekian, are alollolun” lüküen Chon Kraist. (Efisus 3:11, 18) Iei, sipwe käeö ekkoch pworaus mi alollool mi tongeni awatteelo ach wewe.

Ekkoch Pworaus mi Alollool

10, 11. Me ren ewe Paipel, ineet Jises a wiliti ewe äkkäemönün kinikinin “mwirimwirin” nöün Kot we “fefin” lon läng?

¹⁰ Sia silei pwe Jises, i äkkäemönün kinikinin ewe “mwirimwir,” lon kapas monomon, weween, nöün än Kot we mwicheich lon läng mi liosutiu ren emön “fefin” lon Keneses 3:15. Ren ach sipwe alapalo ach weweiti, sipwe eis: ‘Ineet Jises a wiliti ewe mwirimwir mi pwonetiu? A fis mwen an a feitiu fönüfan, are atun a uputiu woon fönüfan, are atun an papatais, are lupwen a manausefäl?’

¹¹ Kot a pwon pwe an we mwicheich lon läng, ewe a liosutiu ren ewe “fefin” lon ewe oesini, epwe efisi ewe mwirimwir mi puri möküren ewe serepenit. Iwe, fite ngeröü ier ra lo, nge ewe fefin ese awora ewe mwirimwir mi tufichin nielo Setan me atai an kewe angang. Ina minne, än Aisea we oesini a apasa pwe a “rit” me “riaföü lon letipan.” (Ais. 54:1, 5, 6) Lo, lo, lo, Jises a uputiu lon Petleem. Nge mwirin chök an papataiselo, lupwen a kepit ren ewe ngün mi fel, me a wiliti emön nöün Kot we mi sokkolo aücheaan an riri ngeni Kot, Jiowa a apasa: “Iei nei.” (Mattu 3:17; Jon 3:3) Iwe, a kerän pwälo ewe äkkäemönün kinikinin “mwirimwirin” ewe fefin. Ekiselo mwirin, nöün Jises kewe chon käeö ra pwal kepit ren ewe ngün mi fel. Nöün Jiowa we “fefin,” ewe a meefi pwe i “eman fefin mi rit” fansoun langattam, a kerän tongeni “püpüchör ren pwapwa.”—Aisea 54:1, NW; Kalesia 3:29.

12, 13. Ikkefa ekkewe wokisin mi pwäratä pwe meinisin Chon Kraist mi kepit woon fönüfan ra wewe ngeni “ewe chon angang mi tuppwel o tipatchem”?

¹² Ewe oruuen pworaus mi alollool a fen pwä ngenikich, ina än Kot kokkot pwe epwe filatä 144,000 seni me lein aramas. (Pwäratä 14:1, 4) Sia weweiti me lükü pwe chon kepit meinisin mi manau woon fönüfan lon eü me eü fansoun, iir “ewe chon angang mi tuppwel o tipatchem” Jises a apasa epwe awora “möngö” fän iten nöün kewe chon angang. (Mattu 24:45) Ikkefa ekkewe pworaus seni Paipel ra ännetatä pwüngün ena pworaus? Itä Jises a kapas ussun Chon Kraist meinisin mi apöchökkülatä pwiir kewe ren möngöön ngün?

¹³ Kot a ereni chon Israel: “Ämi nei chon pwäratä pwal nei chon angang. Üa afilikemi.” (Aisea 43:10) Nge lon Nisan 11 lon ewe ier 33 C.E., Jises a ereni ekkewe sou nemenemen Israel pwe Kot ese chüen nöüniir Nöün chon angang. A apasa: “Epwe uwei senikemi ewe muun Kot, o epwe ngeni pwal eu mwichen aramas eka repwe fori uwan.” Iwe, Jises a apasa ngeni ekkewe aramas: “Nengeni, imwemi we epwe pönulo.” (Mattu 21:43; 23:38) Atun iir nöün Jiowa chon angang, ewe mwuun Israel ese tuppwöl are mirit. (Aisea 29:13, 14) Ekiselo mwirin lon chök ena rän, lupwen Jises a eis: “Io ewe chon angang mi tuppwel o tipatchem?” iei wesewesen weween an na kapas eis, ‘Ifa ewe mwu mi mirit epwe siwili Israel me wiliti nöün Kot we chon angang mi tuppwöl?’ Ewe aposel Piter a pölüweni lupwen a ereni ewe mwichefelin Chon Kraist mi kepit: “Nge ami . . . ‘eu mu mi fel, pwisin noun Kot aramas.’” (1 Piter 1:4; 2:9) Ena mwu lon pekin ngün, “ewe Israelin Kot,” a wiliti nöün Jiowa we mineföön chon angang. (Kalesia 6:16) Ussun chök meinisin chon Israel loom iir “emön chon angang,” a pwal ina chök ussun meinisin Chon Kraist mi kepit lon eü me eü fansoun ra wewe ngeni emön “chon angang mi tuppwel o tipatchem.” Sia fokkun feiöch le angei “möngö” seni nöün Kot we chon angang!

Sia Tongeni Pwapwaesini Ach Pwisin Käeö

14. Pwata käeöön Paipel epwe atoto rech pwapwa lap seni ach sipwe chök älleäni pworaus?

¹⁴ Lupwen sia kerän weweöchüiti och pworaus lon ewe Paipel, sia pwapwa pun a kan apöchökkülatä ach lükü, ika met? Ina pwata ach käkkäeö Paipel a kan apwapwa lap seni ach sipwe chök älleäni. Ina minne, lupwen kopwe älleäni ekkewe puken aweween Paipel, pwisin eisinuk: ‘Ifa ussun, ei awewe a löllö ngeni minne üa piin weweiti ussun ei pworaus? Ikkefa pwal ekkoch wokisin are pworaus epwe pwal apöchökkülatä minne ei lesen a affata?’ Ika a lamot om kopwe kütta pwal ekkoch pworaus, makkei ewe kapas eis ka mochen epwe pölü pwe kopwap tongeni käeö ussun.

15. Ikkefa ekkoch pworaus sipwe tongeni käeö me ifa ussun repwe tongeni äkkälisikich?

¹⁵ Ikkefa ekkoch pworaus kopwe tongeni käeö pwe epwe alapalo om mirititi? Kopwe tongeni käeö ussun ekkewe sokkopaten pwon Kot a föri fän iten feiöchün aramas. Kopwe tongeni apöchökkülatä om lükü ren om käkkäeö ekkewe oesini mi pwönütä ren Jises Kraist are käeö eü me eü wokisin lon eü puken oesini lon Paipel. Epwe pwal apöchökkülatä om lükü ika kopwe enniwili uruwoon Chon Pwäratä Jiowa lon ach ei fansoun. Iwe, ika kopwe käeöfichi ekkewe pworaus mi alollool lon Ewe Leenien Mas, epwe alapalo om weweöchüiti ekkoch wokisin lon Paipel. Ekilapei mwo än ewe Paipel awewe pwe epwe affataöchü ewe pworaus. Epwe älisuk le amürinnölo om tufichin “alefila lefilen mine a öch me mine a ngau” pwe kopwe miritilo. (Ipru 5:14) Atun kopwe käeö, makkei ekkewe pworaus mi lamot lon pwisin noum Paipel are woon echö taropwe pwe epwe älisikemi me iir kewe kopwe käeö ngeni.

Älisi Ekkewe Kükkün Ar Repwe Pwapwaesini Käeöön Paipel

16. Ifa ussun kopwe tongeni älisi ekkewe semirit pwe repwe pwapwaesini käeöön Paipel?

¹⁶ Ekkewe sam me in ra tongeni älisi nöür kewe ar repwe ämääraatä ar ririöch ngeni Kot. Kosap ekieki pwe epwe kon weires ngeni ät me nengngin ar repwe weweiti ekkewe pworaus mi alollool. Ika kopwe awisa ngeni ekkewe semirit ar repwe ammolnatä pworausen eü itelap fän iten än ewe famili käeöfengen, kopwe tongeni eisiniir ussun met ra fen käeö. Lon ämi käeöfengen, ekkewe semirit repwe pwal tongeni praktis ar afalafal imw me imw pwe repwe käeö ifa ussun repwe pölüweni kapas eis ussun ar lükü me ännetatä enletin minne ra fen käeö. Pwal och, kopwe tongeni nöünöü ewe puk “See the Good Land” (“Nengeni ewe Fönü mi Mürinnö”)a pwe kopwe äiti ngeniir ekkewe fönü lon Paipel me affata minne oua käeö lon ämi älleään Paipel iteiten wiik.

17. Pwata a lamot ach sipwe itepök me ruuepek lupwen sipwe pwisin käeö Paipel?

¹⁷ A amwarar me apöchökkülatä ach lükü ika sia pwisin käeö pworaus seni Paipel, nge sipwe tümünü pwe resap arikikichelo seni ach mmolnetä fän iten ach kewe mwich. Lon ach kewe mwich, Jiowa a pwal asukulakich ren ewe “chon angang mi tuppwel o tipatchem.” Iwe nge, eli om kütta pwal ekkoch pworaus epwe älisuk le uwawu meefiom lon ekkewe mwich, awewe chök, lon ewe Puk Study are menlapen ewe älleään Paipel iteiten wiik lon ewe Sukulen Afalafal.

18. Pwata a fokkun lamot ach sipwe achocho le käeö “ekkewe le olololun Kot”?

¹⁸ Om käeöfichi ekkewe pworaus mi alollool lon än Kot we Kapas epwe tongeni älisuk le ririöch ngeni Jiowa. Ren an affata lamoten ena esin käeö, ewe Paipel a apasa: “Iwe, mirit a alisi aramas usun chök moni a pwal alisi aramas. Nge iei feiöchün silelap pwe emon mi mirit a tümwünü püsin manauan.” (Än Salomon Afalafal 7:12) Ina minne, om achocho le alapalo om weweiti ekkewe pworaus enlet seni Kot a fokkun lamot. Ewe Paipel a pwon ngeni iir kewe mi kükkütta ewe enlet: “Kopwe . . . fefeitä lon om silei Kot.”—Än Salomon Fos 2:4, 5.

[Footnote]

Ka Tongeni Aweweei?

• Meta “ekkewe le olololun Kot”?

• Pwata esap muchulo ach käkkäeö ekkewe pworaus mi alollool?

• Pwata Chon Kraist meinisin ra tongeni pwapwaesini ar weweiti “ekkewe le olololun Kot”?

• Ifa ussun kopwe alapalo om küna feiöch seni “ekkewe le olololun Kot”?