Ka Peppeni Än Jiowa Pwüüng Le Nemenem?

“Oupwe apasa me lein chon ekewe mwü, ‘Ewe Samol mi Lapalap a nemenem.’”—KÖLFEL 96:10.

1, 2. (a) Ifa ewe mettoch mi fokkun lamot a fis fän Oktoper 29 C.E.? (b) Met lamoten ena mettoch ngeni Jises?

EÜ METTOCH mi fokkun lamot, nge esaamwo fis fän eü me mwan woon fönüfan, a fis fän Oktoper lon 29 C.E. Iei makkeien Mattu, ewe mi wisen makkei eü puken Pworaus Allim: “Lupwen a wes an Jises papatais, a muttir feita seni ewe konik, o nengeni, lang a suukulo, o [Jon Papatais] a kuna Ngunun Kot, pwe a feitiu usun chok emon lisom, o a sotiu won. Iwe, nengeni, och mongungu seni lang a apasa, ‘Iei nei at mi achengicheng rei; ua unusen pwapwa ren.’” Meinisin ekkewe fömön mi wisen makkei puken Pworaus Allim ra makkei ena pworaus.—Mattu 3:16, 17; Mark 1:9-11; Luk 3:21, 22; Jon 1:32-34.

² Ewe ngün mi fel mi feitiu woon Jises a affata pwe i ewe Emön mi Kepit, weween, ewe Messaia, are Kraist. (Jon 1:33) Mwirin fansoun langattam, a fen pwä ewe “mwirimwir” mi pwonetiu lon kapas monomon! A ütä mwen Jon Papatais ewe emön Setan epwe kküü epinipinin pechen, nge mwirin, i epwe puri möküren ena nampa eü chon appölüa Jiowa me an nemenem. (Keneses 3:15) Seni ena fansoun feffeilo, Jises a wewefichiiti pwe epwe achocho ngeni an epwe apwönüetä än Jiowa kokkot ussun an nemenem me ewe Mwu.

3. Met Jises a föri pwe epwe mmolnetä ngeni wisan we, wisen an epwe atekiatäi än Jiowa pwüüng le nemenem?

³ Ren an epwe mmolnetä ngeni wisan we, “Jesus a ur ren Ngünmifel lupwen a liwinsefäl seni ewe chanpupu Jortan, iwe, Ngünmifel a emwenala lon fanüapö.” (Luk 4:1; Mark 1:12) Me ikewe ie, Jises a tongeni ekilapei ren ükükün 40 rän ewe popun alongolongun kapwüng Setan a eppietä fän iten nemenem me minne epwe föri pwe epwe tufichin atekiatäi än Jiowa nemenem. Ena minen kapwüng a kküü meinisin förien Kot kewe mi mirit lon läng me pwal woon fönüfan. Ina minne, epwe mürinnö ach sipwe käeö ussun tuppwölün Jises lon unusen manauan me ppii met sipwe föri ren ach sipwe affata pwe sia pwal mochen atekiatäi än Jiowa pwüüng le nemenem.—Hiop 1:6-12; 2:2-6.

Setan A Efisi Tipemwaramwaren Än Jiowa Pwüüng le Nemenem

4. Ren met sokkun föfför Setan a eppietä ewe popun alongolongun kapwüng ussun pwüüng le nemenem?

⁴ Pwüngün pwe Setan a silei meinisin ekkena pworaus mi mak asan. Iwe, a mwittir poputä an fiu ngeni ewe äkkäemönün “mwirimwirin” ewe “fefin” lon kapas monomon. (Keneses 3:15) Setan a sotuni Jises fän ülüngät ren an pese ngeni an epwe föri minne epwe pwisin feiöch ren, nge esap met Seman we a mochen an epwe föri. Ewe aülüngätin sossot a äkkäeüin eppietä ewe popun alongolongun kapwüng fän iten nemenem. Setan a eppi ngeni Jises “mwün fanüfan meinisin me linger” iwe, iei alon ngeni: “Ekei mettoch meinisin üpwe ngonuk, are kopwe chapetiu mwei o fel ngeniei.” Jises a wewefichiiti pwe ewe Tefil a nemeni “mwün fanüfan meinisin,” iwe, a affata An ekiek ussun ewe popun alongolongun kapwüng fän iten pwüüng le nemenem ren alon ei: “Kopwe sü seniei, Satan! Pun a mak lon ekewe Toropwe mi Pin, ‘Kopwe fel ngeni [Jiowa] om Kot o angang ngeni i chök.’”—Mattu 4:8-10.

5. Met sokkun mettoch mi fokkun weires Jises epwe wisen apwönüetä?

⁵ Manauen Jises a affata pwe a akkomwa an ekiekin atekiatäi än Jiowa pwüüng le nemenem. Jises a silefichi pwe ren an epwe tufichin änneta pwe a pwüng än Kot nemenem, epwe tuppwöl tori an mälo le pöün Setan, nge me ren ewe oesini, ina weween än Setan afölü epinipinin pechen “mwirimwirin” ewe fefin lon kapas monomon. (Mattu 16:21; 17:12) Epwe pwal wisen chon pwäratä pwe Jiowa epwe äeä ewe Mwuun Kot fän iten an epwe akkufu Setan me aliwinato ngeni förian kewe meinisin kinamwe me kokkotöch. (Mattu 6:9, 10) Met Jises a föri ren an epwe apwönüetä wisan we mi fokkun watte?

“Ewe Mwuun Kot A Arapoto”

6. Ifa ussun Jises a affata pwe Kot epwe äeä ewe Mwu fän iten an epwe “atala än Tefil angang”?

⁶ Akkomw, “Jesus a feila Kalilea o arongafeili ewe Pworausen Manau seni Kot. A apasa, ‘A tori ewe fansoun, Mwün Kot a arapoto.’” (Mark 1:14, 15) Fen iei wesewesen alon: “Upwe fokun afalafala ewe Pworausen Manau usun Mwün Kot lon pwal ekoch telinimw, pun iei popun Kot a tinieito.” (Luk 4:18-21, 43) Jises a feilfetäl ekis meinisin lon fönüen Israel, a “afalafala ewe Pworausen Manau usun Mwün Kot.” (Luk 8:1) Jises a pwal föri chommong manaman, awewe chök, ren an amöngööni fite ngeröü, a aluaielo äsepwäl me mölümöl, a echikara chon samau, me a amanauatä chon mälo. Ren ekkena manaman, Jises a änneta pwe Kot epwe tongeni amoielo riäfföü are mettoch mi ngaü meinisin mi fis pokiten ekkewe föfförün ü ngeni Kot lon Ichen, iwe, epwe ina ussun an epwe “atala än Tefil angang.”—1 Jon 3:8.

7. Jises a akünölo nöün kewe chon käeö pwe repwe fet, me met a fis pokiten ar angang?

⁷ Jises a ionfengenni eü kümiin nöün chon käeö mi tuppwöl, iwe, a asukuler lon ewe angangen afalafala pworaus allimen ewe Mwu pwe ena pworaus epwe tongeni chöüfetäl ekis meinisin. Akkomw, a akünölo 12 nöün kewe aposel pwe repwe wisen “afalafala usun ewe Mwün Kot.” (Luk 9:1, 2) Mwirin, a tinalo pwal 70 pwe repwe esilefeili ei pworaus: “Mwün Kot a arapoto remi.” (Luk 10:1, 8, 9) Lupwen ekkena chon käeö ra liwin me apworausa ngeni Jises minne ra föri lon ewe angangen afalafala pworausen ewe Mwu, iei alon ngeniir: “Üa küna Satan pwe a turutiu seni läng usun chök fifi.”—Luk 10:17, 18.

8. Ren unusen manauan, met Jises a affata?

⁸ Jises a achocho ren unusen an tufich pwe epwe afalafal ussun ewe Mwu. A angang weires le rän me le pwin, nge a pwal ächchika minne manauen aramas a kan kinamwe ren. Iei alon: “Ekewe foks a wor pwanger, ekewe machang a wor faser, nge Nöün Aramas esap wor eu leni ia epwe konola ie o asösö.” (Luk 9:58; Mark 6:31; Jon 4:31-34) Ekis chök mwen an mälo, Jises a pwora le ereni Pontius Pailat: “Popun ai uputiu o tolong lon ei fanüfan, pwe üpwe pwärätä mine a let.” (Jon 18:37) Unusen manauen Jises a affata pwe sap minne a feitiu fönüfan fän iten an epwe chök emön sense mi lapalap are chon föri manaman are pwal mwo nge emön Chon Amanau mi asoresini manauan, nge fän iten an epwe atekiatäi än Jiowa pwüüng le nemenem me wisen chon pwäratä ussun än Kot tufichin apwönüetä letipan ren an äeä ewe Mwu.—Jon 14:6.

“A Fen Pwönütä!”

9. Ifa ussun Setan a tufichin afölü epinipinin pechen “mwirimwirin” ewe fefin lon läng?

⁹ Ewe Chon Appölüa Kot, Setan ewe Tefil, a fokkun oput mettoch meinisin Jises a föri fän iten ewe Mwu. Fän chommong, Setan a nöünöü “mwirimwirin,” weween, pelian kewe woon fönüfan lon pekin mwu me lamalam pwe epwe sotuni le aükatiu angangen “mwirimwirin” ewe fefin lon läng. Seni fansoun an Jises uputiu tori le sopwoloon manauan woon fönüfan, Setan me pelian kewe ra kütta manauen Jises. Iwe, fän March are April lon ewe ier 33 C.E., a tori ewe fansoun ewe Nöün Aramas epwe eolo le pöün ewe Chon Appölüa Kot, iwe, Setan epwe afölü epinipinin pechen. (Mattu 20:18, 19; Luk 18:31-33) Ekkewe puken Pworaus Allim ra affata ifa ussun aramas, awewe chök ren Jutas Iskariot, ekkewe samol fel lapalap, sou mak, Farisi, me chon Rom, ra kapachelong lon än Setan raü fän iten an epwe etipisi Jises me efisatä an riäfföün mälo woon efoch irään ninni.—Fofor 2:22, 23.

10. Met Jises a äkkäeüin apwönüetä ren an mälo woon ewe irään ninni?

¹⁰ Met a kan ieto le mökürom lupwen ka ekieki ussun Jises an a nom woon ewe irään ninni, nge a watte an riäfföü fansoun langattam? Eli ka chechchemeni ewe asorun penmanau Jises a awora fän äsengesin chon fönüfan mi tipis. (Mattu 20:28; Jon 15:13) Eli ka mäirü ren ewe watteen tong Jiowa a pwäratä ren an awora ena asor. (Jon 3:16) Eli meefiom a ussun chök meefien ewe sounfiun Rom, nge iei alon pokiten an mäirü: “Enlet, ätei wesewesen Nöün Kot!” (Mattu 27:54) A pwüng ekkena kapas meinisin. Iwe nge, chechchemeni mwo pwe iei amuchuloon an kapas me woon ewe irään ninni: “A fen pwönütä!” (Jon 19:30) Met a fen pwönütä? Inaamwo ika Jises a föri chommong mettoch ren manauan me mäloon, nge esap pwe Jises a äkkäeüin feitiu fönüfan pwe epwe affata än Jiowa pwüüng le nemenem? Iwe, esap pwe a mak lon oesini nge pokiten i “mwirimwirin” ewe fefin lon läng, iwe, epwe küna riäfföün mälo le pöün Setan fän iten an epwe amoielo kapasen esiit meinisin seni iten Jiowa? (Aisea 53:3-7) A mmen chou ekkena mettoch Jises epwe apwönüetä, nge meinisin ra pwönütä. A ifa me watteen minne a wisen föri!

11. Met Jises epwe föri ren an epwe unusen apwönüetä ewe oesini lon Ichen?

¹¹ Pokiten Jises a tuppwöl, a manauetä “eman Ngün mi afisätä manau,” nge esap emön aramas. (1 Korint 15:45; 1 Piter 3:18) Iei än Jiowa pwon ngeni Nöün we mi lingelo: “Kopwe mot lepelifichi tori üpwe anomu chon oputom pwe repwe lenien puun pecheöm.” (Kölfel 110:1) Setan, ewe nampa eü chon föfföringaü, a kapachelong lein “chon koputan,” iwe, pwal iir meinisin mi wewe ngeni “mwirimwirin” Setan. Pokiten Jises, Kingen än Jiowa we Mwuun Messaia, iwe, epwe wisen sou emmweni ewe angangen amoielo meinisin chon ü ngeni Kot lon läng me pwal woon fönüfan. (Pwarata 12:7-9; 19:11-16; 20:1-3, 10) Mwirin, epwe unusen pwönütä ewe oesini lon Keneses 3:15 me ei iotek Jises a äiti ngeni nöün kewe chon käeö: “Mwum epwe war, letipom epwe fis won fanüfan usun chök lon läng.”—Mattu 6:10; Filipai 2:8-11.

Eü Leenien Äppirü Fän Itach

12, 13. (a) Met meefien aramas ussun pworaus allimen ewe Mwu lon ei fansoun? (b) Met sipwe pwisin eisini kich ika sia mochen tapwelo mwirin lon ipwen Jises?

¹² Lon ei fansoun, pworaus allimen ewe Mwu a afalafalfeil lon chommong fönü ussun Jises a oesini. (Mattu 24:14) Ina minne, chommong, chommong aramas ra fen fangolo manauer ngeni Kot. Ra kan meseik ren ekkewe feiöch ewe Mwu epwe atoto ngeniir. Ra äneänei ar repwe küna manau esemuch lon kinamwe me nükünüköch lon eü paratis woon fönüfan, iwe, fän chengel ra kan ereni aramas ussun ar äpilükülük. (Kölfel 37:11; 2 Piter 3:13) En emön lein ekkena chon afalafala pworausen ewe Mwu? Ika ina, iwe, a fokkun mürinnö. Iwe nge, a wor och mettoch emön me emön leich epwe ekiekifichi.

¹³ Iei makkeien ewe aposel Piter: “Pun iei mine Kot a körikemi ren, pun Kraist a pwal riaföü fän äsengesimi o likiti ngenikemi eu lenien apirü, pwe oupwe tapwela mürin lon ipwan.” (1 Piter 2:21) Nengeni mwo pwe lon ena fansoun, Piter a mak ussun riäfföün Jises, nge esap an tinikken le afalafal are angöchün le asukula aramas. Piter a küna pwe Jises a fokkun tipemecheres fän iten an epwe küna riäfföü ren an epwe älleasochisi än Jiowa nemenem me änneta pwe Setan emön chon kapas chofona. Iwe, ifa ussun sipwe tongeni äppirü Jises? Sipwe pwisin eisini kich: ‘Epwe ifa ukuukun ai upwe tipemecheresin küna riäfföü fän iten ai upwe peni me asamolu än Jiowa pwüüng le nemenem? Üa kan pwäratä lon manauei me pwal lon ai angangen afalafal pwe a akkomw lon letipei ai atekiatäi än Jiowa pwüüng le nemenem?’—Kolose 3:17.

14, 15. (a) Met Jises a föri lupwen a silei pwe mi mwääl än aramas kapas are ekiek, me met popun? (b) Ifa ewe popun alongolongun kapwüng sipwe chechchemeni fansoun meinisin?

¹⁴ Iteiten rän meinisin sia kan küna sossot me a wor ach kefil woon ekkoch mettoch, mi watte are kükkün. Ach ataweei ekkena mettoch epwe longolongun woon met? Ren chök awewe, ika sipwe küna sossot seni och mettoch mi tongeni aingaüalo ach üöch mwen mesen Kot, met sipwe föri? Lupwen Piter a ereni Jises pwe epwe kirekiröch ngeni pwisin i, met Jises a apasa? A ereni: “Kopwe sü seniei Satan, en eu lenien chepetek ngeniei. Pun om ekiek esap pop seni Kot, nge a pop seni aramas.” (Mattu 16:21-23) Are, ika epwe suuk ngenikich alen ach sipwe tufichin awattei nöüch moni are wisach lon ach angangen lükün, nge epwe tongeni apwangapwangelo ach lükü are ach ririöch ngeni Jiowa ren, iwe met, sisap äppirü Jises? Lupwen Jises a meefi pwe chokkewe mi küna an kewe manaman “ra ekiekin feito o seikätä fän pöchökül pwe epwe ar king,” a mwittir sü seniir.—Jon 6:15.

¹⁵ Pwata Jises a fokkun tipeppos lon ekkena fansoun? Popun, pun a wewefichiiti pwe sap minne ekkena sossot ra chök weneiti pwisin manauan are feiöchün. A mochen föri letipen Seman we me atekiatäi än Jiowa pwüüng le nemenem fansoun meinisin ese lifilifil met mwiriloon. (Mattu 26:50-54) Ina minne, ika ese ffat ngenikich fansoun meinisin ewe popun sia kükküna sossot ussun an a ffatöch ngeni Jises, iwe, sipwe tongeni turulo are rikilo seni Kot. Met popun? Pun sipwe tongeni mecheresin tupulo ren tipatchem solään Setan pwe a mmen angöch le anapanapa minne mi mwääl pwe epwe ussun itä och mettoch mi mürinnö, pwe ina met a föri lupwen a sotuni If.—2 Korint 11:14; 1 Timoti 2:14.

16. Ifa ewe mettoch sipwe äkkäeüin älisi aramas ren?

¹⁶ Lon ach angangen afalafal, sia kan achocho le kapas ngeni aramas ussun minne a kküü manauer me met Paipel a apasa. A öch ena pun epwe tongeni ämmeef ngeniir lamoten ar repwe käeö Paipel. Iwe nge, sap minne sia äkkäeüin ekiekin chök älisi aramas ar repwe silei met Paipel a apasa are met sokkun feiöch än Kot we Mwu epwe atoto rech. Nge, wisach ach sipwe älisiir pwe repwe silei me wewefichiiti ewe popun alongolongun kapwüng. Ra tipeeü ngeni ar repwe wiliti chon Kraist me mwärei ar “irään ninni,” me küna riäfföü fän äsengesin ewe Mwu? (Mark 8:34) Ra mochen ar repwe kapachelong lein chokkewe mi peni än Jiowa pwüüng le nemenem me änneta pwe Setan emön chon kapas chofona me emön chon pweni Kot? (Än Salomon Fos 27:11) Iei eü angang mi aüchea sia eäni, ach sipwe pwisin älisikich me pwal iö kkan ar repwe föri ena mettoch.—1 Timoti 4:16.

Lupwen Kot Epwe Wiliti “Mettoch Meinisin ngeni Aramas Meinisin”

17, 18. Menni fansoun mi fokkun amwarar sia tongeni äneänei ach sipwe küna ika sia kan affata pwe sia peni än Jiowa pwüüng le nemenem?

¹⁷ Fansoun sia achocho ngeni ach sipwe affata ren föfförüch me ach angangen afalafal pwe sia kan peppeni än Jiowa pwüüng le nemenem, sia pwal tongeni äneänei ewe fansoun lupwen Jises Kraist “epwe likiti ngeni Samach Kot muun we.” Ineet epwe fis ena? Ewe aposel Paul a apasa: “Kraist epwe atailo sokkun mu meinisin, me sokkun nemenem, pwal sokkun manaman meinisin, o epwe likiti ngeni Samach Kot muun we; iwe, iei sopolon. Pun epwe nemeni ir tori fansoun an epwe pwisin isetiu ekkewe chon oput i meinisin fan pechen. . . . Iei fansoun ewe Nau epwe pwal anomu pwisin i fan Kot, ewe a fen isetiu mettoch meinisin fan nemenian we, pwe epwe pwapwalo pwe Kot chok i mi mettoch meinisin ngeni aramas meinisin.”—1 Korint 15:24, 25, 28.

¹⁸ Epwe ifa me watteen amwararen ena fansoun lupwen Kot epwe wiliti “mettoch meinisin ngeni aramas meinisin”! Ewe Mwu epwe fen apwönüetä an angang mi aüchea. Meinisin chon ü ngeni än Jiowa pwüüng le nemenem repwe fen morolo. Kinamwe me kokkotöch repwe fen liwinsefällito lon unuselapen läng me fönüfan. Me ren alon ewe sou makkei kölüpin, förien Kot kewe meinisin repwe eäni ei köl: “Oupwe mwareiti [Jiowa] ewe SAMOL ren ewe ling mi fich ngeni itan we . . . Oupwe apasata lein ekkewe mu, ‘[Jiowa], iei i mi king!’”—Kölfel 96:8, 10.

Ka Tongeni Pölüweni Ekkeei Kapas Eis?

• Ifa ussun Jises a atekiatäi än Kot nemenem fansoun meinisin?

• Met Jises a äkkäeüin apwönüetä ren an angangen afalafal me an mälo?

• Ifa ussun sipwe tongeni äppirü Jises fän iten ach sipwe affata pwe sia kan peppeni än Jiowa pwüüng le nemenem?