Met Wesewesen Popun Sia Manau?

PWATA A LAMOT PÖLÜWEN EI KAPAS EIS? Esor och mettoch mi aniuokkus ngeni aramas lap seni ar repwe ekieki pwe manau ese wor weween me ese wor popun. Iwe nge, emön mi silefichi popun a manau epwe mökürochou fän weires. Viktor E. Frankl, emön tokterin waan meefi, a pwal manauewu seni ewe ninni lon ewe Oruuen Maunen Fönüfan (Holocaust), a makkei: “Ese wor och mettoch lon ei fönüfan epwe älisi emön le likiitü fän riäfföü chapur lap seni an epwe silei pwe mei wor weween manauan.”

Iwe nge, a wor chommong sokkopaten memmeef woon ei pworaus. Chommong ra erä pwe ina wisen emön me emön ar repwe pwisin filatä ika ifa weween manau. Nge ekkoch mi lükü pwe sia fis seni sarü ra asukula pwe ese wor weween manau.

Enletin pwe sipwe tipatchem me mirit ika sipwe kütta weween manau me ren ewe Chon Fangoto Manau, Jiowa Kot. Sipwe ekieki met an we Kapas a apasa ren ei pworaus.

Met ewe Paipel A Apasa?

Ewe Paipel a erä pwe mi wor wesewesen eü popun a förütä mwän me fefin. Jiowa a ngeni popuch kewe ei allük.

Keneses 1:28. “Oupwe nöünöü o achomongakemi pwe fanüfan epwe masou remi o nom fän nemeniemi. Oupwe nemeni ekewe ikenen leset me ekewe mansüsü me mönün won unusen fanüfan.”

Kot a akkota pwe Atam me If me nöür kewe repwe föralo pwe unusen fönüfan epwe eü paratis. Ese akkota pwe aramas repwe chinnapelo me mälo. Ese pwal mochen aramas repwe angaüalo fönüfan. Iwe nge, pokiten popuch kewe ra fen filingaü, sia kan alemwiri tipis me mälo. (Keneses 3:2-6; Rom 5:12) Inaamwo, nge än Jiowa we kokkot esap siwil. Iwe, ekiselo chök nge ewe fönüfan epwe wiliti eü paratis.​—Aisea 55:10, 11.

Lupwen Jiowa a förikich, a ngenikich tufichin inisich me tufichin ekiekich pwe sipwe tongeni apwönüetä an kokkot. Nge ese förikich pwe sipwe imulo seni i. Nengeni ifa ussun än Kot kokkot fän itach a fen makketiu lon ewe Paipel.

Än Salomon Afalafal 12:13. “Iwe, oupwe rong ei kapasen lesopolan: Oupwe niueiti Kot o alesochisi an kewe allük, pun iei a fichiti aramas meinisin.”

Mika 6:8. “Met [Jiowa] a mochen pwe kopwe fori? A mochen pwe kopwe fori mine a pwung o eani kirikiroch, kopwe pwal tipetekison fan mesen om we Kot.”

Mattu 22:37-39. “‘Kopwe echeni ewe Samol om Kot ren unusen lelukom, ren unusen ngünum pwal ren unusen ekiekum.’ Iei ewe allük mi lap me aüchea seni meinisin. Nge ewe aruuen allük mi fokkun aüchea a usun chök ewe aeuin: ‘Kopwe echeni chon arum usun chök püsin om echenuk.’”

Ifa Ussun Än ewe Paipel Pölüweni A Enletin Ekinamwei Ekiekich

Ika eü mwesin epwe öch angangan, emön epwe äeäöchü lon eü kokkot ewe chon föratä a fen akkota. Pwal ina chök ussun sipwe tümünükich seni feiengaü lon pekin ngün, pekin ekiek, me pekin inis ren ach äkkäeä manauach ren ewe popun ewe Chon Förikich a filatä. Sipwe äfänni ifa ussun ach silei än Kot we kokkot epwe ngenikich kinamwe lon kinikinin manauach meinisin.

Lupwen aramas ra filatä met a kon lamot lon manauer, chommong ra achocho le alapalo tufichin nonnomur ren moni me pisek. Iwe nge, Paipel a öüröürakich, “chokewe mi mochen ar repwe pisekisek ra tolong lon sosot o ra tup lon eu särin chomong sokun mochenia mi umwes me afeiengau, ra atururelong lon feiengau me pöütüla.”​—1 Timoti 6:9, 10.

Iwe nge, ekkoch ra fen silei pwe ar tongei Jiowa a lamot lap seni moni ra chök menemenöch. (1 Timoti 6:7, 8) Ra alamota ar angang weires pun ra silei pwe ina wiser ar repwe atufichi pwisin manauer. (Efisus 4:28) Nge ra pwal fokkun ekiekifichi än Jises kapasen öüröür: “Esap wor emön a tongeni angang ngeni ruoman samol. Pun epwe oput emon, nge epwe echeni ewe emön, ika epwe tipeni eman nge epwe turunufasei ewe eman. Ousap tongeni angangeppök ngeni Kot me wöün fanüfan.”​—Mattu 6:24.

Ina minne, iir mi tongei Kot resap akkomwa ar angangen pau are chechcheei wöüür pwe epwe nampa eü lon manauer, nge ra unusen akkomwa ar föfföri letipen Kot. Ra silei pwe ika repwe ekieki letipen Kot akkom lon manauer, iwe, Jiowa epwe tüttümünüür. Enlet, Jiowa a ekieki pwe ina wisan a mmen lamot an epwe föri.​—Mattu 6:25-33.

Lon ar föfför ngeni aramas, chommong ra pwisin akkomwer. Ikenäi, ese chüen wor kinamwe woon fönüfan pun “aramas [ra] tongei pwisin ir, . . . esor ar chen.” (2 Timoti 3:2, 3) Lupwen emön a elichippünguur are ese tipeeü ngeni meefier, ra “tipekoum, pwal song, pwal kapasechou, pwal esiit.” (Efisus 4:31) Nafangaüen engilo esap efisatä kinamween ekiekiir, nge epwe chök “efisätä anini.”​—Än Salomon Fos 15:18.

Nge ra sokkolo iir kewe mi älleäsochisi än Kot allük pwe repwe tongei chon orur ussun pwisin iir, pun ra “umoumochfengen o kirokirochfengen, [repwe] pwal omusamusfengen [lefiler].” (Efisus 4:32; Kolose 3:13) Inaamwo ika ekkoch rese kirekiröch ngeniir, nge ra achocho le äppirü Jises. Lupwen ätewe a küna koput, “esap pwal pölüeni lon kapas mi ngau.” (1 Piter 2:23) Ussun chök Jises, ra weweiti pwe ar älisi aramas epwe atoto kinamween letiper, inaamwo ika ekkoch resap kilisou ren minne ra föri fän äsengesiir. (Mattu 20:25-28; Jon 13:14, 15; Fofor 20:35) Jiowa a fangolo an we ngün mi fel ngeniir mi äppirü Nöün we, iwe, an we ngün mi fel a uwaani kinamwe mi enlet lon manauer.​—Kalesia 5:22.

Iwe nge, ifa ussun om ekiek ussun mwachkkan epwe kküü kinamween ekiekum?

[Sasing lón pekin taropwe 4]

A lamot ngeni aramas ar repwe silei titchikin popun ra manau

[Sasing lón pekin taropwe 5]

Jises a äiti ngenikich ifa ussun sipwe küna kinamween ekiekich