Met Epwe Fis lon Mwachkkan?
PWATA PÖLÜWEN ENA KAPAS EIS A LAMOT? Ekiekin emön aramas ussun met epwe fis lon mwachkkan a kküü napanapen manauan ikenäi. Ren chök awewe, ekkewe ese kon lien wor ar äpilükülük ren fansoun mwachkkan ra eäni ei sokkun ekiek: “Sipwe chok momongo o ukkun, pun leesor sipwe malo.” (1 Korint 15:32) Ena sokkun ekiek epwe emmweni ngeniir möngömmong, ünüpuch, me aürek nge esap enletin kinamween letiper.
Pwüngün, ika met epwe fis lon fansoun mwachkkan epwe unusen alongolong woon aramas, sipwe äpilükülüküngaü. Äsepwäl, konik, me fönü ra fokkun limengaü lap seni me loom. Feiengaüen maun woon kensi pakutang me angangen akkachofesä a chök lallapolo. Samau me wöüngaü a kküü fite bilion aramas woon unusen fönüfan. Iwe nge, mei wor chommong popun sipwe äpilükülüköch.
Atun aramas rese tufichin affata met epwe fis lon fansoun mwachkkan, Jiowa Kot a aweweei ussun pwisin i, a erä, “Üa osuni me lepopun mine epwe fis le sopolan, üa pwal pwäratä seni ekewe fansoun lom mettoch resamwo fis.” (Aisea 46:10) Met Jiowa a apasa epwe fis lon mwachkkan?
Met ewe Paipel A Apasa
Jiowa esap mut ngeni ewe fönüfan are mönümanau woon fönüfan ar repwe talo. Ina minne, ewe Paipel a pwonei pwe Kot epwe “atai ekkewe chon atailo fonufan.” (Pwarata 11:18) Me ren an we Mwu, are nemenem lon läng, Jiowa epwe limeti ewe fönüfan mi ngaü me eliwinato ekkewe kokkot me lepoputään. (Keneses 1:26-31; 2:8, 9; Mattu 6:9, 10) Ekkewe wokisin seni ewe Paipel mi tettelitiw ra ekis pwäri ngenikich met epwe fis lon mwachkkan, a aweweei ekkewe mettoch repwe fisitä repwe kküü iteiten emön me emön woon fönüfan.
Aisea 35:5, 6. “Mürin, mesen chon mesechun repwe nela, nge selingen chon selingepüng repwe sukula, chon pechemä repwe mwetemwet usun eman chia, nge ekewe chon awemwöch repwe köl fän mweireir. Pun lenien koluk repwe mökküla lon fanüpwas, nge chanpupu repwe pupu lon fanüapö.”
Taniel 2:44. “Ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.”
Jon 5:28, 29. “Pun epwe war ewe fansoun lupwen ekewe sotup meinisin repwe rong [mwelien Jises] o towu seni peiaser.”
Pwäratä 21:3, 4. “Kot epwe pwisin nonnom rer. I epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.”
Napanapen än Paipel Pölüweni A Atoto Ngenikich Kinamween Letipach mi Enlet
Äeüin, ekkewe mettoch ra awewetiu me asan ra kon mürinnö nge a weires ach sipwe lükü. Nge ekkeei pwon seni Kot, nge esap seni aramas. Iwe, Jiowa Kot “ewe esap chofona.”—Taitos 1:2.
Ika ka käeö om kopwe eäni lükülük woon än Kot kewe pwon me apwönüetä an kewe allük lon manauom, kopwe amwöchü kinamween letipom, inaamwo ika a toruk sossot mi weires. Maun, wöüngaü, semmwen, pwal mwo nge osukosuken chinnap are äpilükülüküngaüen mälo, esap wor eü me lein ekkeei mettoch epwe angei sonuk kinamween letipom feilfeilo. Pwata? Pokiten om lükülükü pwe än Kot we Mwu epwe försefälli meinisin ekkewe osukosuk ra chöüfetäl.
Ifa ussun kopwe ämääraatä ena sokkun äpilükülük mi pöchökkül fän iten mwachkkan? Kopwe tongeni ‘asöföla unusen letipom’ me pwäratä lon manauom “met mi mürina me unusöch, pwal met mi apwapwai i.” (Rom 12:2) Eli ka mochen pwal ekkoch pisekin ännet pwe än ewe Paipel kewe pwon ra nüküchar. A fokkun lamot ena esin etittin. Esor pwal och mettoch kopwe föri lon manauom epwe ngonuk watteen kinamween letipom lap seni ena.