Manau fan kinamwe lon eu Fonufan mi Fo
Lupwen ka katol ewe lios won ei taropwe, met meefiom? Letipom ese fokkun tipeni om kopwe kuna ewe kinamwe, pwapwa, me lukulukoch usun chok ka kuna lon ewe nios? Enlet, epwe ina. Nge epwe eu chok ttan, are eu minen anchang, ach sipwe luku pwe ekkeei sokkun lapalap repwe tongeni fis won ei fonufan?
Ese mwaal, lap ngeni aramas meinisin ra eani ena ekiek. Ikenai a kan fifis maun, atai alluk, echik, semwen, me an aramas chinnapelo—nge ikkeei ekkoch chok me lein ekkewe fitikokon fonufan. Nge, a wor popun an epwe wor ach apilukuluk. Ren porausen mwach kkan, ewe Paipel a apasa pwe sia “witiwiti ewe lang mi fo me eu fonufan mi fo, me ren [an Kot we] pwon, ikewe pung epwe nonnom ie.”—2 Piter 3:13; Aisea 65:17.
Me ren ewe Paipel, ekkeei “lang mi fo” me “fonufan mi fo” esap ir wesewesen eu lang sefo me fonufan sefo. Wesewesen lang me fonufan, ra fen unusoch seni ar we ra foruta, me ewe Paipel a pwarata pwe repwe nonnom tori feilfeilo chok. (Kol Fel 89:36, 37; 104:5) Ewe “fonufan mi fo” a wewe ngeni eu mwichen aramas mi pung ar repwe manau won fonufan, me ewe “lang mi fo” a wewe ngeni eu muun lang mi unusoch, are nemenem, epwe wisen nemeni ewe mwichen aramas won fonufan. Nge, mei wor popun ach sipwe luku pwe epwe tongeni fis “eu fonufan mi fo,” are eu otot sefo mi lingoch?
Iwe, ekieki mwo won ei mettoch pwe ikkena ekkewe sokkun lapalap Kot a akkom akkota fan iten fonufan. A anomu ewe aeuin pean aramas lon eu Paratis itan Ichen me awisa ngenir eu wis mi amwarar: “Oupwe ukkuwa me chochchommongelo me akauralo ewe fonufan me nennemeni.” (Kenesis 1:28) Ewer, Kot a akkota pwe repwe nounou me achoufetalei ar Paratis won unusen fonufan. Inaamwo ika ra filata pwe repwe alleasolapa Kot, me annetata pwe ese fich ngenir ar repwe manau tori feilfeilo chok, nge ese siwil an Kot we kokkot. Iwe, epwe fokkun pwonuta lon ewe fonufan mi fo!—Aisea 55:11.
A enlet pwe lupwen ka eani ewe Iotekin ach Samol, me tingor pwe an Kot we Muu epwe feito, ka wesewesen tingorei Kot pwe an we muu epwe limetau seni ei fonufan mettoch meinisin mi ngau me nemenalo ewe otot mi fo. (Mattu 6:9) Iwe, sia tongeni luku pwe Kot epwe polueni ena iotek, pun an we Kapas a pwonei: “Ekkewe mi pung repwe pwisin fonueni fonufan, o repwe nonnom lon feilfeilo chok.”—Kol Fel 37:29.
Manau lon An Kot we Fonufan mi Fo
An Kot we Muu epwe atoto ngeni ei fonufan ekkewe sokkun feioch esor aukukun lollol, ren an epwe apwonueta ekkewe mettoch meinisin mi murinno Kot a fen akkota seni le popun fan iten noun kewe aramas repwe pwapwaesini manauer won fonufan. Iwe, esap chuen wor oput, me apap, iwe, fetal, fetal, aramas meinisin repwe kan chiechiochfengen. Lon ewe Paipel, Kot a pwonei pwe epwe ‘aukatiu ekkewe maun ekis meinisin won fonufan.’ “Ekkewe muu resap chuen maunfengen, resap pwal chuen kaeo maun.”—Kol Fel 46:9; Aisea 2:4.
Mwirin och fansoun, unusen ewe fonufan epwe wiliti eu paratis. Ewe Paipel a apasa: “Ewe fonu pon me ewe fonu mi pwas repwe pwapwa, me ewe fonu pon epwe mwanek o efisata pon ira usun chok ekkewe rous. . . . Pun lon ekkewe fonupwas ekkewe leenien konik repwe mokkulo, me chanpupu repwe pupu lon ewe fonupwas. Iwe, ppi mi pwichikar ren akkar epwe wiliti eu noomun konik, nge lon ewe fonu mi pwasapwas epwe wor chonuttu.”—Aisea 35:1, 6, 7.
Epwe fokkun wor popun ach sipwe pwapwa won ena Paratisin fonufan. Esap chuen wor aramas mi echik pokiten nafangauen mongo. Ewe Paipel a apasa: “Fonufan a apwonueta an we ras.” (Kol Fel 67:6; 72:16) Aramas meinisin repwe pwapwaesini uwan ar angang, usun chok Kot a pwonei: “Repwe wesewesen fotuki iran kreip o ochei uwan. . . . Sap minne repwe fotuki nge pwal emon epwe mongo seni.”—Aisea 65:21, 22.
Lon an Kot we fonufan mi fo, esap chuen fis pwe chommong aramas repwe nonnomfengen lon eu chok imw are imweni eu imw mi ngauelo, pun Kot a akkota pwe: “Repwe wesewesen aueta imwer kewe me nonnom lon . . . Sap minne repwe aueta nge pwal emon epwe imweni.” Ewe Paipel a pwal pwonei: “Esap chuen fis pwe ra resin angang weires.” (Aisea 65:21-23) Iwe, aramas repwe fokkun pwapwaesini ar angang. Epwe wor auchean manauer, nge esap lamot mwaal.
Mwirin och fansoun, an Kot we Muu epwe pwal mwo nge eliwinato ewe ririn kinamwe a pin fis lon ewe malamalen Ichen lefilen ekkewe man, me lefilen ekkewe man me aramas. Ewe Paipel a apasa: “Ewe wolf epwe nonnomfengen me ewe liemwanin lam ren ekis fansoun, me ewe lepot epwe konfengen me ewe appanen siike, me pwal ewe kukkun kou me ewe atemwanin laion me ewe man mi aumanau repwe nomfengen meinisin, me emon chok kukkun at epwe wisen sou emmwen ngenir.”—Aisea 11:6-9; Osea 2:18.
Kopwe chok anchangei ei mettoch pwe lon ewe Paratisin fonufan esap chuen wor semwen me tterin inisin aramas! An Kot we Kapas a affata ngenikich: “Esap chuen wor emon epwe apasa: ‘Ngang mi samau.’ ” (Aisea 33:24) “[Kot] epwe tolu seni meser iteiten chonun mas meinisin, me malo esap chuen wor, esap pwal chuen wor letipeta are puchor are metek. Ekkewe mettochun lom repwe fen morolo.”—Pwarata 21:4.
A Ifa Usun Epwe Tongeni Tufich Ngonuk
Ese mwaal a fen chunguchung letipom ren an Kot kewe pwon usun manau lon an we fonufan sefo mi pung. Iwe, inaamwo ika ekkoch ra meefi pwe a mmen och ekkena sokkun feioch nge esap tongeni fis, nge mei wesewesen tufich ika epwe feito seni poun ewe chon Forata mi tong.—Kol Fel 145:16; Mika 4:4.
Pungun pwe epwe nom rech ekkoch sokkun tufich ika pwe sia mochen manau tori feilfeilo chok lon ewe Paratisin fonufan epwe feito. Lon an iotek ngeni Kot, Jises a pwarata eu mettoch mi lamot ach sipwe fori, a era: “Iwe, iei weween manau esemuch, pwe repwe silei en, ewe emon chok Kot mi enlet, pwal Jises Kraist ewe ka akunooto.”—Jon 17:3.
Ina minne, ika sia mochen manau lon an Kot we fonufan mi fo, epwe lamot ach sipwe akkom kaeo ifa ewe letipen Kot, mwirin sipwe fori. Pun a wesewesen enlet ei poraus: Ei “fonufan epwe morolo me an kewe mocheniaingau, nge i mi fori letipen Kot epwe nonnom feilfeilo chok,” pwe epwe pwapwaesini ekkewe feioch epwe toto ren seni ewe chon Forikich.—1 Jon 2:17.
Ika ese fen pwa, meinisin ekkewe wokisin lon ei taropwe ra popu seni ewe New World Translation of the Holy Scriptures.