Än Jiowa we Kapas A Manau
Menlapen Pworaus Seni ewe Puken Mark
EWE puken Mark a mwochomwoch me lein ekkewe rüänü puken Kapas Allim. Jon Mark a makkei ena puk 30 som ier mwirin än Jises we mälo me manausefäl, iwe, a makkei chommong pworaus mi amwarar ussun än Jises angangen afalafal ükükün ülüngät esopw ier.
Ewe puken Mark a mak fän iten ekkewe Jentail, äkkäeüin chon Rom, iwe, a affata pwe Jises, Nöün Kot we, a kan föri manaman me a tinikken le afalafalfetäl. A menlapei än Jises kewe föfför lap seni minne a eäni afalafal. Ach käkkäeö än Mark we Kapas Allim epwe apöchökkülatä ach lükü ewe Messaia me epwe amwökütükich pwe sipwe tinikken le esilefeili än Kot we pworaus lon ewe angangen afalafal.—Ipru 4:12.
EWE ANGANGEN AFALAFAL MI LAP LON KALILI
Mwirin an mak ussun än Jon Papatais angang me än Jises nonnom 40 rän lon ewe fönüpöön lon chök 14 wokisin, Mark a poputä le mak ussun än Jises angangen afalafal lon Kalili. Än Mark nöünöü ewe kapas “muttir” a ämeef ngenikich pwe a fokkun atapwalapwal ewe pworaus.—Mark 1:10, 12.
Lon kis seni ülüngät ier, Jises a awesi an afalafal lon Kalili fän ülüngät. Mark a makkei lape ngeni ekkewe pworaus lon en me tettelin atun a fis. Ese kapachelong lon ewe puken Mark pworausen än Jises Afalafal woon ewe Chuuk me pwal ekkoch afalafal mi ttam.
Pölüen Kapas Eis Ussun Ekkeei Wokisin:
1:15—A pwönütä “ewe fansoun [mi fil]” fän iten met? Jises a apasa pwe ewe fansoun mi fil a pwönüetä fän iten an epwe poputä an angangen afalafal. Pokiten Jises a nonnom woon fönüfan lon wisan we, wisen King mi filitä, ewe Mwuun Kot a arapoto. Aramas mi letipwenechar ra tongeni ngüüri an angangen afalafal me föri minne epwe atoto rer än Kot chen.
1:44; 3:12; 7:36—Met popun Jises ese mochen pwe aramas repwe esilefetälei pworausen an kewe manaman? Jises ese mochen pwe än aramas lükü epwe alongolong woon pworaus mi amwarar, tunommong, are mwääl, nge a mochen pwe repwe pwisin küna pisekin ännet pwe i ewe Kraist, iwe, ar lükü epwe alongolong woon ekkena pisekin ännet nge sap woon alon aramas. (Ais. 42:1-4; Mt. 8:4; 9:30; 12:15-21; 16:20; Luk 5:14) Nge ese ina ussun ren ewe mwän mi piin wor ngün limengaü woon lon Kerasa. Jises a ereni pwe epwe feilo lon imwan we me apworausa ngeni märärin kewe ussun minne a fis. Pokiten aramasen ekkewe fönü mi pwelli Kerasa ra fen tingorei Jises pwe epwe feilo seniir, Jises esap chüen chuuriir. Än ewe mwan nonnom leir me pwäratä minne Jises a föri fän itan epwe tongeni pwölüelo pworausen mäloon ekkewe pik.—Mark 5:1-20; Luk 8:26-39.
2:28—Met popun Jises a iteni “Samolun ranin fel”? Ewe aposel Paul a makkei, “Ewe Allük a chök ngünüen ekewe mettoch mi mürina repwe feito.” (Ipru 10:1) Ewe Allük a apasa pwe ewe Räninfel epwe fis mwirin wonu ränin angang, me Jises a echikaratä chommong aramas lon Räninfel. A liosuetä än aramas asösö fän kinamwe me pwal ekkoch feiöch epwe tori aramas lon ewe Engeröü Ierin Nemenemen Kraist mwirin sopwoloon än Setan nemenemengaü mi eriäfföüür. Ina minne, Kingen ena Mwu epwe pwal iteni “Samolun raninfel.”—Mt. 12:8; Luk 6:5.
3:5; 7:34; 8:12—Ifa ussun Mark epwe tongeni silei titchikin meefien Jises? Mark esap emön me lein ekkewe 12 aposel, ese pwal ekketi Jises. Me ren kapasen eöreni, Mark a silei chommong pworaus seni ewe aposel Piter, emön chiechian we.—1 Piter 5:13.
6:51, 52—Met weween “ekkewe pilawa” ekkewe chon käeö rese wewefichi ussun? Fitu chök awa me mwan, Jises a amöngööni 5,000 mwan pwal fefin me semirit ren nimeföü chök pilawa me ruuemön iik. Ürürün pwe ekkewe chon käeö repwe wewefich ussun “ekkewe pilawa” pwe Jises a angei tufichin an epwe föri ekkena manaman seni Jiowa Kot. (Mark 6:41-44) Ika ra wewefichiti ükükün watteen ewe manaman Jises a angei, resap kon lien mäirü lupwen a fetäl woon matau.
8:22-26—Met popun Jises a apöchökkülatä emön mi chun lon ruu kinikin? Eli a föri ena pwe epwe pwäratä kirekiröch ngeni ewe mwän. An anenneloi ewe mwän ekis me ekis a älisi ätewe mi chun an epwe eörenalo tinekkenin me saramen ewe akkar ekis me ekis.
Ikkeei Ekkoch Lesen Fän Itach:
2:18; 7:11; 12:18; 13:3. Mark a aweweei ekkewe eöreni, kapas, lükü, me leeni ekkewe chon älleä sap iir chon Jus rese silei. Awewe chök, a affata pwe ekkewe Farisi ra kan “echikifel,” pwe ewe korpan “a wewe ngeni minen asor ngeni Kot,” pwe ekkewe Satusi ra “apasa pwe esor manausefäl,” pwe ra tongeni “küna” ewe imwenfel seni “ewe Chukun Olif.” Mark ese mak ussun tettelin samasamen ewe Messaia, pun ekkewe chon Jus chök repwe mochen silei ussun. Iwe, Mark a isetiu eü leenien äppirü mi mürinnö fän itach. Sipwe äfänni nonnomun ekkewe mi aüseling ngenikich lupwen sipwe afalafal lon ach kewe mwich are ngeni chon lükün.
3:21. Märärin Jises kewe rese lükü. Ina minne, Jises a silei meefien chokkewe mi küna esiit are turunufas seni märäriir kewe rese lükü.
3:31-35. Lupwen a papatais, Jises a wiliti Nöün Kot we lon pekin ngün, me “ewe Jerusalem asan,” inan we. (Kal. 4:26) Seni ena fansoun feffeilo, nöün Jises kewe chon käeö ra ächengicheng me ren lap seni märärin kewe lon pekin futuk. A äiti ngenikich ach sipwe akkomwa ekkewe mettochun ngün lon manauach.—Mt. 12:46-50; Luk 8:19-21.
8:32-34. Sipwe mwittir esilla me pöütalo än aramas pesekich ach sipwe aleni ewe alen mecheres. Itä ürürün emön chon äppirü Kraist epwe “peluku ekiekin,” weween, epwe apasa aapw ngeni pwisin an kewe mocheniangaü. Epwe tipemecheres le “mwarei an iraan ninni,” pwe epwe küna weires, säü, riäfföü-mwääl, are pwal mwo nge mälo pokiten i emön chon Kraist. Iwe, epwe “tapwelo mwirin” lon ipwen Jises, me äkkäppirü i feffeilo. Kich nöün Jises kewe chon käeö sipwe ämääraatä me akkamwöchü ewe ngünün pennüküolo pwisin letipach ussun chök Jises Kraist.—Mt. 16:21-25; Luk 9:22, 23.
9:24. Sisap säüäsini ach sipwe pwäratä ach lükü are tingormau pwe epwe lapalo ach lükü.—Luk 17:5.
EWE SAINGOON MARAM
Le sopwoloon 32 C.E., Jises a tori “fonuen Jutia pekiloon Jortan,” me ekkewe pwin aramas ra pwal kiito ren. (Mark 10:1) Mwirin an afalafal ikewe ie, a feilo Jerusalem.
Lon Nisan 8, Jises a nonnom lon Petani. Lupwen a mommot le möngö, emön fefin a tolong me ninatiu löpwokkusun nard woon möküren Jises. A tettelöch än Mark aweweei minne a fis seni fansoun än Jises tolong lon Jerusalem tori an we manausefäl.
Pölüen Kapas Eis Ussun Ekkeei Wokisin:
10:17, 18—Pwata Jises a apwüngü emön mwän lupwen a eita ngeni Jises “Sense mürinnö”? Ren an esap mochen angei ena itelap mi apaatäi, Jises a alingalo Jiowa me a pwäratä pwe mettoch meinisin mi mürinnö a popu seni ewe Kot mi enlet. Pwal eü, Jises a pwäri eü pworaus mi fokkun enlet pwe ewe Chon Föratä mettoch meinisin, Jiowa Kot, i chök a wor an pwüüng le föratiu allükün minne mi öch me minne mi ngaü.—Mt. 19:16, 17; Luk 18:18, 19.
14:25—Met weween alon Jises lupwen a ereni nöün kewe aposel mi tuppwöl: “Usap chuen un ei chonun iraan wain tori ranin ai upwe unsefal lon muun Kot”? Sap minne Jises a erä pwe mei wor wesewesen wain lon läng. Iwe nge, pokiten fän ekkoch, wain a liosuetä fansoun apwapwa, Jises a kapas ussun pwapwaan an epwe chuurisefälli nöün kewe chon äppirü mi kepit lon ewe Mwu lupwen repwe manausefällitä.—Kölf. 104:15; Mt. 26:29.
14:51, 52—Iö ewe alüwöl a “sulo nge selelo chok”? Mark chök a mak ussun ei pworaus, ina popun, neman a kapas ussun pwisin i.
15:34—Alon Jises “ai Kot, ai Kot, pwata ka likitieilo?” a itä pwäralo nafangaüen an lükü? Aapw. Inaamwo ika sise silei ewe popun Jises a eäni ekkena kapas, nge alon na a tongeni wewe ngeni pwe Jises a esilla pwe Jiowa ese chüen tüttümünü i fän iten an epwe unusen küna sossotun an tuppwöl. A pwal tongeni wewe ngeni pwe Jises a mochen apwönüetä minne Kölfel 22:1 a oesini ussun i.—Mattu 27:46.
Ikkeei Ekkoch Lesen Fän Itach:
10:6-9. Kot a akkota pwe chon pwüpwülü repwe nonnomfengen. Ina minne, mwan pwüpwülü me fin pwüpwülü resap mwittir ekiekin mufesen, nge repwe achocho le apwönüetä ekkewe kapasen emmwen lon Paipel fän iten ar repwe ataweei osukosuk mi piitä lon ar pwüpwülü.—Mattu 19:4-6.
12:41-44. Pworausen ewe fefin mi wöüngaü mi mä pwülüwan a äiti ngenikich pwe sisap mäicha, nge sipwe awora monien älillis fän iten ewe fel mi enlet.
[Sasing lón pekin taropwe 31]
Met popun Jises a ereni ei mwän an epwe apworausa ngeni märärin kewe mettoch meinisin minne a fis ngeni?