Ifa Ussun Sipwe Tongeni Ataweei Minne Mi Aweiresi Ach Angangen Afalafal Imw Me Imw
“Am aia chok pworacho lon ach Kot le apasa ngenikemi ewe kapas allimen Kot ren riaffou chapur.”—1 TES. 2:2.
1. Met sokkun mettoch a aweiresi än Jeremaia angang, me pwata a tongeni ataweer?
AWEWE chök meefien Jeremaia me meefiach. Lupwen Jiowa a ereni pwe wisan an epwe emön “soufos ngeni ekkewe mwu,” a kötä: “Ai Kot Samol mi Lapalap, nengeni, usap sile fos, pun ngang eman mi chok ier kukun.” Iwe nge, pokiten an lükü Jiowa, a tipeeü ngeni minne a ereni. (Jer. 1:4-10) Ren lap seni 40 ier, Jeremaia a weiresin angang fän än aramas tenechepwäk ngeni me ar oputa, esiita, me awata i. (Jer. 20:1, 2) Fän ekkoch a mochen fangetä. Iwe nge, a likiitü le aronga och pworaus aramas ra oput. Pokiten än Kot apöchökküla Jeremaia, iwe, a tufichin äwesalo eü angang esap tongeni föri fän pwisin an pöchökkül.—Älleani Jeremaia 20:7-9.
2, 3. Ifa ussun nöün Kot kewe chon angang lon ei fansoun ra küna ekkewe chök sokkun mettoch mi aweiresi än Jeremaia angang?
2 Chommong me lein nöün Jiowa kewe chon angang lon ei fansoun ra weweiti meefien Jeremaia. Lupwen sia akkomw rong ussun ewe angangen afalafal imw me imw, a iei ussun meefien chommong leich: ‘Ina eü mettoch usap tongeni föri.’ Iwe nge, lupwen sia weweiti pwe letipen Jiowa ach sipwe esilefeili ewe pworaus allim, iwe, sia apworai letipach me sia poputä le afalafal. Nge chommong leich ra küna mettoch mi aweiresi ach fiti ewe angangen afalafal. Mi wenewenen pwüng pwe mi weires ach sipwe poputä le afalafal imw me imw me sopwelo ach afalafal tori sopwoloon ei otot mi ngaw.—Mt. 24:13.
3 Nge epwe ifa ussun ika ka käkkäeö Paipel ren älillisin Chon Pwäratä Jiowa me a ekis ttam om fiffiti mwich, nge ka tipemwaramwar ussun om poputä le afalafal imw me imw? Are ifa ussun ika ka fen papatais, nge a weires om kopwe afalafal imw me imw, inaamwo ika ka pöchökkül? Kopwe chök lükü pwe aramas mi sokkopat nonnomur ra kan ataweei mettoch mi aweiresi ar fiffiti are förfichi ewe angangen afalafal imw me imw. Ren älillisin Jiowa, kopwe pwal tongeni ina ussun.
Apworai Lelukom
4. Met popun Paul a tufichin afalafala ewe pworaus allim ren pwora?
4 Ese mwääl ka weweiti pwe ewe angangen afalafal woon unusen fönüfan a kan pwönütä ren än Kot ngün mi fel, nge esap ren pöchökkülen are tipatchemen aramas. (Sek. 4:6) A pwal ina ussun ewe angangen afalafal emön me emön Chon Kraist a föri. (2 Kor. 4:7) Ekieki mwo ewe aposel Paul. Iei makkeian lupwen a chemeni eü fansoun aramas ra kirikiringaw ngeniir me chienan kewe misineri: “Aia fen küna riaföü me itengau lon Filipai . . . nge ach Kot a ngenikem pwora pwe aipwe aiti ngenikemi ewe Pworausen Manau.” (1 Tes. 2:2; Fof. 16:22-24) Eli a weires ach sipwe ekieki pwe Paul, emön chon afalafal mi tinikken, a meefi weiresin an epwe afalafal fän ekkoch. Iwe nge, ussun chök kich, a lamot ngeni Paul an epwe lükü älillisin Jiowa ren an epwe tufichin afalafala ewe pworaus allim fän pwora. (Älleani Efisus 6:18-20) Ifa ussun sipwe tongeni äppirü Paul?
5. Ifa eü mettoch epwe tongeni apworai letipach fän iten ach sipwe afalafal?
5 Ren iotek sipwe tongeni apworai lelukach fän iten ach sipwe afalafal. Iei alon emön pioneer: “Üa kan iotek pwe üpwe tongeni kapas fän pwora, pwal iotek pwe ai kapas epwe achchüngü letipen aramas, me pwal iotek pwe üpwe küna pwapwa lon ewe angangen afalafal. Popun, pun iei än Jiowa angang, nge esap pwisin ach, ina minne, sisap tongeni föri och mettoch ika ese nom rech an älillis.” (1 Tes. 5:17) A lamot ngeni oukich meinisin ach sipwe iotek fansoun meinisin ren älillisin än Kot ngün mi fel fän iten ach sipwe tufichin afalafal fän pwora.—Luk 11:9-13.
6, 7. (a) Ifa ewe längipwi Isikiel a küna, me ifa weween? (b) Ewe längipwi mi tori Isikiel a affata menni lesen fän iten nöün Kot kewe chon angang lon ei fansoun?
6 A pwä lon ewe puken Isikiel pwal eü mettoch mi tongeni älisikich pwe sipwe kapas fän pwora. Lon eü längipwi, Jiowa a ngeni Isikiel echö taropwe mi nnum, nge a mak woon rüüepek “pworausen ngüngüres me kechü me feiengau,” iwe, a ereni pwe epwe möngö, nge iei alon: “Nöün aramas, kopwe eni ei toropwe üpwe ngonuk, pwe lukom epwe masou ren.” Met weween ena längipwi? Isikiel epwe lefareni ena pworaus epwe wisen arongafeili. Epwe nom leütün, iwe, epwe nemeni meefian kewe meinisin. Pwal iei makkeien ena soufos: “Mürin üa eni, nge nennen ewe toropwe me lon awei a arar usun chönün chunen.” Isikiel a pwapwaesini an arongafeili än Kot pworaus, pwe a ussun chök an neni chönün pulech. A meefi pwe a fokkun aüchea wisan, wisen an epwe tupuni Jiowa me apwönüetä wisan we seni Kot, inaamwo ika a pöchökkül ewe pworaus a uwei ngeni aramas mi tipeförea.—Älleani Isikiel 2:8–3:4, 7-9.
7 A wor eü lesen mi aüchea lon ena oesini fän iten nöün Kot kewe chon angang lon ei fansoun. Sia pwal esile ngeni aramas och pworaus rese kan mochen rongorong, nge sap minne ra kilisou ren ach angang fansoun meinisin. Ren ach sipwe tufichin meefi fansoun meinisin pwe ach angangen afalafal eü wis mi aüchea seni Kot, a lamot ach sipwe käeö än Kot Kapas iteitan. Ika sipwe käeö ekis chök are epwe kkotongaw ach käeö, iwe, sisap tongeni lefareni än Kot Kapas. Kopwe tongeni amürinnölo are awattei om pwisin älleani me käeö Paipel? Kopwe tongeni alapalo om ekilonei minne ka älleani?—Kölf. 1:2, 3.
Ach Poputääni Pworausfengen Woon Paipel
8. Met a fen älisi ekkoch chon afalafal pwe repwe poputääni pworausfengen woon Paipel lon ewe angangen afalafal imw me imw?
8 Ren chommong chon afalafal, iei ewe nampa eü mettoch mi weires lon ach angangen afalafal imw me imw, met sipwe akkomw apasa lupwen sia kerän chuuri aramas. Pwüngün pwe lon ekkoch leeni, ese lien mecheres ach sipwe poputä le fos ngeni aramas. Ekkoch chon afalafal ra meefi pwe a fen mecheres ar repwe poputä ar afalafal ren och kapas mi mwoch, iwe, eitielo ngeni aramas echö taropwe, ussun an a mak lon ena pwor. Eli itelapen ena taropwe are ewe lios woon epwe kküü letipen ewe aramas, iwe mwirin, sipwe tongeni ekis aweweei ewe popun sia chuuri me ereni och kapas eis. Mi ekis sokko seni ena ach sipwe uwawu ülüchö are fachö sokkun taropwe me eisini ika menni leir a saani. Pwüngün pwe sap minne sia ekiekin chök eineti nöüch kewe taropwe are nöünöü ren iteiten imw meinisin, nge sia mochen poputääni pworausfengen woon Paipel fän iten ach sipwe poputä ach käeö ngeni aramas lon Paipel.
9. Pwata a lamot ach sipwe ammolnöch?
9 Ese lifilifil menni napanap sipwe äeä, nge ach ammolnöch epwe älisikich pwe sipwe fos fän mesemaaü me mwasangasang lon ewe angangen afalafal imw me imw. Iei alon emön pioneer: “A kan lapolo ai pwapwa ika üa ammolnöch. Ika üa ammolnöch, üa wesewesen mochen kapas ngeni aramas.” Iei alon pwal emön pioneer: “Ika üa silei masouen ekkewe puk upwe nöünöü, üa kan mwasangasang ussun ai nöünöü.” Inaamwo ika epwe ekis älisikich ach sipwe ekieki ussun met sipwe apasa, nge chommong ra küna pwe ra kan küna watte älillis ika repwe leüwommong le sossot ar afalafal. Ar föri ena mettoch a älisiir ar repwe ngeni Jiowa minne mi nampa eü.—Kol. 3:23; 2 Tim. 2:15.
10. Met ekkan brother repwe tongeni föri ren ar repwe älisi me efeiöchü chon afalafal fansoun ar repwe chufengen mwen poputään ar angang?
10 Ach kewe mwich mi kkotöch mwen poputään ach angangen afalafal imw me imw ra kan alapalo angöchüch me ach pwapwa lon ach angang. Ika ewe lesenin rän a weneiti ewe angangen afalafal, sipwe tongeni älleani me ekis pworausfengen woon. Iwe nge, wisen ekkan brother mi eäni ewe mwich mwen poputään ach angangen afalafal ar repwe aweweei och afalafal are akkota pwomwan, nge epwe fichiiti ewe leeni ikewe repwe afalafal ie, are repwe uwawu pwal och minen älillis fän iten ewe angangen afalafal lon ena rän. Ena älillis epwe atufichi meinisin pwe repwe angöch le afalafal. Ika ekkan elter me iö kkan mi eäni ena mwich repwe akkammolnöch, iwe, repwe tufichin föri ena, nge ewe mwich epwe wes lon chök ewe ükükün fansoun mi kkotolo ren.—Rom 12:8.
Lamoten Ach Sipwe Aüselingöch
11, 12. Ifa ussun ach aüselingöch pokiten ach meefi riäfföün are osupwangen aramas epwe tongeni luki letiper pwe repwe aüseling ngeni ewe pworaus allim? Aweweei mwo ekkoch pworaus mi affata ena.
11 Sap minne ach akkammolnöch chök, nge pwal ach etenekifichi aramas epwe älisikich fän iten ach sipwe poputääni pworausfengen woon Paipel me apasa met epwe kküü letipen aramas lon ach angangen afalafal. Sipwe tongeni föri ena ren ach aüselingöch. Iei künaen emön elter mi säifetäl: “Ach mosonottam me aüselingöch epwe tongeni luki letipen aramas, iwe, epwe affata pwe sia aücheaaniir.” Ach aüselingöch pokiten ach tongei aramas epwe tongeni suuki letiper, ussun en pworaus mwirin epwe affata.
12 Lon echö taropwe mi katowu lon ewe simpung itan Le Progres, seni Saint-Etienne, France, emön fefin a makkei pwe rüüemön ra pwereto ren imwan we ekiselo mwirin mäloon nöün we nengngin, ülüngät maraman. A makkei: “Üa mwittir esilla pwe iir Chon Pwäratä Jiowa. Ai ekiek nge üpwe chök ereniir ren fos pwetete pwe use mochen aüseling, nge üa küna eü puk ra nöünöü. A kapas ussun ewe popun Kot a mutatä riäfföü. Iwe, üa ereniir pwe repwe tolong pun üa ekiekin awewe ngeniir pwe mi mwääl ar afalafal. . . . Ekkewe chon afalafal ra nonnom ekis lap seni eü awa. Ra aüselingaöchü aloi pokiten ar meefi ai riäfföü watte, iwe, lupwen a tori fansoun ar repwe lo, a fen kinamweelo lelukei, iwe, üa tipeeü ngeni ar repwe liwinsefällito fän eü.” (Rom 12:15) Mwirin, ena fefin a tipeeü ngeni an epwe käeö Paipel. Sia küna pwe sap minne ena fefin a chemeni minne ekkena Chon Pwäratä ra kapas ussun lon ewe fansoun ar ra kerän chufengen, nge ar aüselingaöchü alon.
13. Ifa ussun sipwe tongeni anapanapa ach afalafal ussun ewe pworaus allim pwe epwe fichiiti emön me emön sipwe chuuri?
13 Ika sipwe aüselingöch pokiten ach tongei aramas, sia ussun itä mut ngeniir ar repwe aweweei ika met popun a lamot ngeniir ewe Mwu. Ika ina, iwe, epwe amecheresi ach sipwe kapas ngeniir ussun ewe pworaus allim. Neman ka fen küna pwe chon afalafal mi sipeöch ra kan aüselingöch. (SalF. 20:5) Ra kan etenekifichi aramas ra chuuri lon ewe angangen afalafal. Sap minne ra chök chechchemeni iter me leenier, pwe pwal minne a aüchea me lamot ngeniir. Ika emön epwe affata met a aüreki, ra kan ppii pworausan me mwittir liwiniti pwe repwe äiti ngeni minne ra küna. Ussun chök ewe aposel Paul, ra anapanapa pworausen ewe Mwu pwe epwe fichiiti emön me emön repwe chuuri. (Älleani 1 Korint 9:19-23.) Ena sokkun älillis seni wesewesen leluker a kan lukeato letipen aramas ngeni ewe pworaus allim me a äppirü “ümöümöchün ach Kot.”—Luk 1:78.
Sipwe Ekieköch Fansoun Meinisin
14. Fansoun ach sipwe afalafal, ifa ussun sipwe tongeni äppirü napanapen Jiowa kewe?
14 A lapolo aücheaan manauach pokiten än Jiowa mut ngenikich ach sipwe tufichin pwisin filatä föfförüch. Inaamwo ika Jiowa a tekia seni mettoch meinisin, nge esap fän eü an epwe eriäni aramas ar repwe angang ngeni, nge a mochen pwe an tong epwe luki letipen aramas, iwe, a kan efeiöchü chokkewe mi pwäratä ar kilisou ren ekkewe mettoch mi fokkun mürinnö a awora ngeniir. (Rom 2:4) Pokiten kich nöün chon afalafal, ürürün pwe sipwe mmolnetä ngeni ach sipwe aweweei ewe pworaus allim lon eü napanap mi fichiiti ach we Kot mi ümöümöch iteiten fansoun meinisin ach sipwe afalafal. (2 Kor. 5:20, 21; 6:3-6) Ren ach sipwe tufichin föri ena, a lamot ach sipwe ekieköch ussun ekkan aramas mi nonnom lon ach we leenien afalafal. Met epwe tongeni älisikich pwe sipwe ina ussun?
15. (a) Jises a äiti ngeni nöün kewe aposel ar repwe fet ika aramas resap efich ar pworaus? (b) Met epwe tongeni älisikich pwe sipwe äkkäeüin ekiekin küt aramas mi mochen aüseling?
15 Jises a ereni nöün kewe chon käeö pwe resap aürek ika ekkoch resap efich ar afalafal, nge repwe äkkäeüin küt aramas mi mochen aüseling. (Älleani Mattu 10:11-15.) Ach akkota pwe sipwe achocho ngeni ekkoch mettoch mi kükkün sipwe tufichin tikeri epwe älisikich le föri ena. Emön brother a meefi pwe i mi ussun chök chon küt kolt. Iei an ekiek: “Üa äneänei ai upwe küna och kolt ikenäi.” Ekiekin pwal emön brother an epwe “chuuri emön aramas mi tipemecheres iteiten wiik me liwinsefälliti mwirin ekkoch chök rän pwe üpwe sopwelo ai älillis ngeni.” Ekkoch chon afalafal ra achocho le älleani ngeni aramas meinisin eü wokisin seni Paipel ika pwe mi tufich. Met sokkun mettoch kopwe tongeni pwisin achocho ngeni?
16. Ikkefa ekkewe popun sipwe sopwelo ach angangen afalafal?
16 Sap minne pwönütään ewe angangen afalafal imw me imw a longolong woon chök än aramas aüseling ngeni ach pworaus. A enlet pwe a lamot ewe angangen afalafal fän iten amanauen aramas mi wenechar letiper, nge a pwal lamot ren pwal fitu popun. Än chon Kraist angangen afalafal a awora ngenikich met sipwe tongeni pwäratä ach tongei Jiowa ren. (1 Jon 5:3) A atufichi ach sisap eäni ewe tipisin ni manau. (Fof. 20:26, 27) A kan öüröüra aramas mi ngaw pwe “a war ewe fansoun pwe [Kot] epwe apwüngü chon fanüfan.” (Pwar. 14:6, 7) Nge lap seni meinisin, ren ewe angangen afalafala ewe pworaus allim, a wor kapasen mwareiti iten Jiowa woon unusen fönüfan. (Kölf. 113:3) Ina minne, ese lifilifil ika aramas repwe aüseling are resap, nge a lamot ach sipwe chök sopwelo ach ekkesilefeili pworausen ewe Mwu. A enlet pwe me ren Jiowa, mi aüchea mettoch meinisin sia föfföri fän iten esilefetälin ewe pworaus allim.—Rom 10:13-15.
17. Ekiselo chök nge aramas repwe weweiti met?
17 Inaamwo ika chommong lon ei fansoun ra kan tunalo ach angangen afalafal, nge ekiselo chök epwe siwil ar ekiek ussun. (Mt. 24:37-39) Jiowa a affata ngeni Isikiel pwe fansoun epwe pwönütä ekkewe pworausen apwüng a wisen esilefeiliir, meinisin chon Israel mi rikilo seni Kot repwe “chök fokun mefi pwe mi wor eman soufos lefiler.” (Is. 2:5) Iwe, pwal ina chök ussun, fansoun Kot epwe apwönüetä an kewe apwüng woon ei otot minen loom, aramas repwe weweiti pwe ewe pworaus Chon Pwäratä Jiowa ra afalafalafeili ekis meinisin me imw me imw a wesewesen popu seni ewe emön chök Kot mi enlet, Jiowa, me nöün kewe Chon Pwäratä ra enletin tupuni i. A ifa me watteen aücheaan wisach, wisen an epwe pachetä wooch itan we me wisen ach sipwe esilefeili an pworaus lon ei fansoun mi fokkun lamot! Fän an pöchökkül, amwo sipwe tongeni ataweei minne mi aweiresi ach angangen afalafal imw me imw.
Ifa Ussun Kopwe Pölüweni?
• Ifa ussun sipwe tongeni apworai letipach fän iten ach sipwe afalafal?
• Met epwe tongeni älisikich le poputääni pworausfengen woon Paipel lon ewe angangen afalafal imw me imw?
• Epwe ifa ussun an epwe tongeni ffat ngeni aramas pwe sia kan wesewesen mochen älisiir?
• Met epwe tongeni älisikich pwe sipwe ekieköch ussun aramas lon ach kewe leenien afalafal fansoun meinisin?
[Box/Picture on page 15]
Eü Alen Poputääni Pworausfengen Woon Paipel
Met sipwe föri le poputään:
◼ Mwirin om kapong ngeni chon eü imw, kopwe tongeni uwawu echö taropwe me apasa, “Popun ai chuuruk ikenäi, pun üa mochen kapas ngonuk ussun ei pworaus mi lamot.”
◼ Are, kopwe tongeni uwawu echö taropwe me apasa, “Üa etto chuuruk ikenäi pun üa mochen silei ika met om ekiek ussun ei pworaus.”
Ika emön a nöüni ewe taropwe:
◼ Kopwe mwittir eisini eü kapas eis mi longolong woon itelapen echö taropwe.
◼ Kopwe aüselingöch ren om kopwe weweiti ekiekin ena emön. Ereni om kilisou ren an uwawu meefian.
Ren om kopwe sopwelo ämi pworausfengen:
◼ Oupwe älleani me kapasfengen ussun eü are ekkoch wokisin lon Paipel, iwe, kopwe anapanapa om afalafal pwe epwe fichiiti ekiekin me meefien ewe emön.
◼ Ika emön a efich minne a rong, kopwe uwawu eü puk me ika pwe mi tufich, kopwe awewe ngeni ifa ussun sia kan nöünöü le käeö Paipel. Ereni pwe ka mochen liwinto fän eü.
[Sasing lón pekin taropwe 17]
Ifa Ussun Kopwe Pölüweni?
• Ifa ussun sipwe tongeni apworai letipach fän iten ach sipwe afalafal?
• Met epwe tongeni älisikich le poputääni pworausfengen woon Paipel lon ewe angangen afalafal imw me imw?
• Epwe ifa ussun an epwe tongeni ffat ngeni aramas pwe sia kan wesewesen mochen älisiir?
• Met epwe tongeni älisikich pwe sipwe ekieköch ussun aramas lon ach kewe leenien afalafal fansoun meinisin?