“Kot . . . A Amärätä Ekewe Irä”!

“Ewe chon fotuki me ewe chon atütü esap wor aüchear, nge Kot echök ewe mi aüchea, pun a amärätä ekewe irä.”​—1 KOR. 3:7.

1. Kich “chon angangen Kot” ika sia föri menni angang?

“CHON angangen Kot.” A ina ussun ewe aposel Paul a aweweei ewe wis mi aüchea kich meinisin sia tongeni pwapwaesini. (Älleani 1 Korint 3:5-9.) Paul a kapas ussun ewe angangen föralo chon käeö. A apöpööü ngeni angangen fotukatiw me achöchönü pwikil. Ika sipwe lipwäköch lon ena angang mi aüchea, a lamot än Jiowa älillis. Paul a ächema ngenikich pwe “Kot a amärätä ekewe irä.”

2. Pwata epwe älisikich le eäni ekiek pwüng ussun ach angangen afalafal ika sia mirititi pwe ‘Kot a wisen ämääraatä’?

² Ena pworaus a älisikich pwe sipwe tipetekison me eäni ekiek pwüng ussun ach angangen afalafal. Inaamwo ika sipwe achocho le afalafal me asukula chon käeö, nge ling meinisin epwe lo ngeni Jiowa lupwen emön epwe wiliti mineföön Chon Kraist. Pwata? Pun inaamwo ika sipwe achocho ükükün ach tufich, nge esor emön leich a unusen weweiti mämmäärin än emön ririöch ngeni Kot, iwe, ese pwal wor ach nemenem woon. A pwüng minne King Salomon a makkei: “Kosap tongeni silei än Kot angang, ewe mi föri mettoch meinisin.”​—SalAf. 11:5.

3. Ifa ussun sipwe tongeni apöpööü ewe angangen fotukatiw pwikil ngeni ewe angangen föralo chon käeö?

³ Itä sipwe letipengaw ren ach angang pokiten sise weweiti ifa ussun emön epwe wiliti Chon Kraist? Aapw. Sipwe fen mwasangasang me mwötöres. King Salomon a apasa: “Lesosor kopwe amorafeili föün irä, kopwe pwal amorafeili lekuniol. Pun kosap silei meni leir epwe märöch, ika repwe märöch meinisin.” (SalAf. 11:6) Enlet, lupwen sia fotukatiw wesewesen pwikil, sise silei ika epwe pwükütä, sise pwal silei ia epwe pwük ia. Sise tongeni nemeni chommong napanap. Epwe pwal ina ussun ren ewe angangen föralo chon käeö. Jises a menlapei ena pworaus lon ruu kapas monomon mi makketiw lon Mark Kapas Allim, sopwun 4. Sipwe ppii met sipwe tongeni käeö seni ekkena ruu kapas monomon.

Sokkopaten Pwül

4, 5. Apworausa än Jises kapas monomon ussun ewe chon aparasafetälei pwikil.

⁴ Ussun an a mak lon Mark 4:1-9, Jises a aweweei pworausen emön chon amora mi amorafeili ekkoch pwikil mi moretiw woon sokkopaten leeni: “Oupwe auseling! Nengeni, emon chon amora a feilo pwe epwe amorafeili. Iwe, lupwen an amorafeili, ekkoch pwikil ra moretiu won ewe al, o mansusu ra feilo analo. Nge ekkoch ra moretiu won achau, ikewe ese chommong pwulun ie. Iwe, a marikai, pun ese malul ewe pwul. Nge lupwen ewe akkar a tota, a pwichitir, o ra pwaselo, pun esor warer. Nge pwal ekkoch ra moretiu lein ira folufol, o ekkewe ira folufol ra mamarita o pwolurelo. Iwe, rese tongeni uwa. Nge ekkoch ra moretiu won pwul murinno. Iwe, ra pukuta o mamarita tori ra uwa, ekkoch ra uwani ilik, ekkoch wone, ekkoch ipuku.”

⁵ Lon fansoun Jises, aramas ra aparasafetälei pwikil. Ewe chon amora a uwei ekkewe pwikil lepwülün üfan are lon eü tuken pwikil me a aparasafetälei. Iwe, lon ei kapas monomon, ewe chon amora ese fotukatiw pwikil woon pwül mi sokkofesen. Nge ekkewe pwikil mi parasfetäl ra moretiw lon sokkopaten leeni.

6. Ifa ussun Jises a aweweei ewe kapas monomon ussun ewe chon amora?

⁶ Sap minne sipwe chök esissil ussun weween ena kapas monomon. Jises a pwisin aweweei, ussun a mak lon Mark 4:14-20: “Ewe chon amora a amorafeili ewe kapas. Iwe, ekkewe won ewe al ewe kapas a moretiu ie, lupwen ra rong, Satan a muttirito o angei ewe kapas mi amoratiu lon ir. O usun chok pwal ekkewe mi moretiu won achau, lupwen ra rong ewe kapas, ra chok angeimuttiri ren pwapwa. Nge esor warer lon pwisin ir, ra nonnom chok ekis fansoun. Iwe, lupwen a fis osupwang are riaffou pokiten ewe kapas, ra chok turukaietiu. Pwal ekkoch ekkewe mi moretiu lein ira folufol, ir mi rong ewe kapas, nge aurekin fonufan me otupuen pisek o mochenia ren pwal mettoch ra chok tolong o ra pwoluelo ewe kapas. Iwe, ese tongeni uwa. Nge ekkewe mi moretiu won pwul murinno, ikkena ir mi rong ewe kapas o etiwa. Iwe, ra fen uwa, ekkoch ra uwani ilik, ekkoch wone, ekkoch ipuku.”

7. Met ewe pwikil me ekkewe sokkopaten pwül ra liosuetä?

⁷ Nengeni pwe Jises ese erä pwe a sokkopat ekkewe pwikil. Iwe nge, a kapas ussun eü chök sokkun pwikil mi moretiw woon sokkopaten pwül, iwe, a pwal sokkofesen minne a fis ngeni eü me eü sokkun. Ewe äeüin sokkun pwül a pöchökkül me pachach; ewe oruuan a chächchäk; ewe aülüngätin a pwölülo ren irä fölüföl; me ewe arüänüün a mürinnö me a uwaaöch. (Luk 8:8) Met ewe pwikil a wewe ngeni? Ina pworausen ewe Mwu mi mak lon än Kot we Kapas. (Mt. 13:19) Met ekkewe sokkopaten ppwul ra liosuetä? Aramas mi sokkofesen napanapen letiper.​—Älleani Luk 8:12, 15.

8. (a) Ewe chon amora a liosuetä iö? (b) Pwata a sokkofesen minne aramas ra föri lupwen ra rongorong ewe kapas allim?

⁸ Ewe chon amora a liosuetä iö? A liosuetä nöün Kot kewe chon angang, iir kewe mi esilefeili ewe kapas allim ussun ewe Mwu. Ussun chök Paul me Apollos, ra fotukatiw me achöchönü. Inaamwo ika ra angang weires, nge mi sokkofesen sopwoloon ar angang. Pwata? Pokiten sokkofesennin letipen iir kewe mi rongorong ewe kapas. Lon ewe kapas monomon, ewe chon amora esor an nemenem woon minne epwe fis. Ena pworaus a äkkäeüin aururu letipen pwiich kewe mi tuppwöl ra fen angang weires chommong ier, nge rese kon lien küna uwaan ar angang!a Pwata?

9. Ifa ewe pworaus enlet mi aururukich ewe aposel Paul me Jises ra menlapei?

⁹ Sisap aükü tuppwölün ewe chon amora ren uwaan an angang. Paul a apasa: “Repwe angei liwinir ukukun mi fich ngeni ar angang.” (1 Kor. 3:8) Emön me emön epwe angei liwinin ren ewe angang a föri, nge esap ren uwaan an angang. Jises a pwal menlapei ena pworaus lupwen nöün kewe chon käeö ra war me afalafal. Ra fokkun meseik pun ekkewe timon ra älleasochisiir fän iten Jises. Nge Jises a ereniir: “Ousap pwapwa ren ei sokkun, ren an ekkewe anu ra alleasochisikemi, nge oupwe pwapwa pokiten itemi a fen makketiu lang.” (Luk 10:17-20) Pwal mwo nge emön chon fot, ika ese kini chommong mineföön chon äppirü Jises, sap minne an achocho are lükü ese löllö ngeni än ekkewe ekkoch. Lap ngeni, epwe alongolong woon napanapen letipen ekkewe chon rongorong. Nge ren wesewesan, Kot a wisen ämääri!

Wisen Chon Rongorong ewe Kapas

10. Met epwe efisi pwe emön mi rong ewe kapas epwe ussun chök pwül mürinnö are esap?

¹⁰ Nge met wisen ekkewe mi rongorong ewe kapas? A fen apwüngalo me loom met repwe föri? Aapw. Filier chök ika repwe ussun chök pwül mürinnö are resap. Enlet, napanapen letipen emön epwe tongeni öchülo ika ngawolo. (Rom 6:17) Lon an we kapas monomon, Jises a apasa pwe “lupwen [ekkoch] ra fen rong” ewe kapas, Setan a feito angei seni lon letiper. Nge sap minne epwe chök fis ena. Jemes 4:7 a pesei Chon Kraist ar repwe “ü ngeni ewe Tefil,” iwe, epwe sü seniir. Jises a aweweei pwe ekkoch ra etiwa ewe kapas ren pwapwa lupwen ra rong, nge ra turutiu fän sossot pun “esor warer.” Nge Paipel a pesei nöün Kot kewe chon angang pwe “warer epwe nom lon ewe longolong” fän iten ar repwe “meefi meeta cholapan, are langattaman, are tekian, are alollolun, o [repwe] pwal sinei ewe tong an Kraist, ewe mi fakkun lap seni an aramas sinei.”​—Ef. 3:17-19; Kol. 2:6, 7.

11. Ifa ussun emön epwe tti seni an epwe mut ngeni aürek me pisek an epwe pwölüelo ewe kapas?

¹¹ Pwal ekkoch mi rongorong ewe kapas ra mut ngeni “aurekin lon ei manau, me ar pisek auchea” ar repwe pwolurelo. (1 Tim. 6:9, 10) Ifa ussun repwe tti seniir ena mettoch? Ewe aposel Paul a pölüweni: “Tongei moni esap nonnom lon letipemi, nge ami oupwe menei minne mi nom remi, pun pwisin i a fen apasa, ‘Usap fakkun likitukelo, o usap fakkun poutukelo.’”​—Ipru 13:5.

12. Pwata a sokkofesen chochoon uwaan chokkewe mi liosutiw ren ewe pwül mürinnö?

¹² Iwe, säingonoon, Jises a apasa pwe chokkewe mi fot woon pwül mürinnö “ekoch leir ra uani ilik, ekoch wone, nge ekoch ipükü.” Inaamwo ika a mürinnö letipen ekkoch mi etiwa ewe kapas me ra uwa, nge minne ra tongeni föri le esilefeili ewe kapas allim epwe alongolong woon en me nonnomun. Awewe chök, watteen ierin are apwangapwangen semwen epwe aükükü minne ekkoch repwe tongeni föri lon ewe angangen afalafal. (Apöpö ngeni Mark 12:43, 44.) Eli esor än ewe chon amora pwikil nemenem woon nonnomun, nge a pwapwa pwe Jiowa a wisen ämääraatä.​—Älleani Kölfel 126:5, 6.

Ewe Chon Amora Pwikil mi Onnut

13, 14. (a) Aweweei pworausen än Jises kapas monomon ussun ewe mwän mi aparasafeili pwikil. (b) Ewe chon amora a liosuetä iö, me met weween ewe pwikil?

¹³ Lon Mark 4:26-29, a wor pwal eü kapas awewe ussun emön chon amora pwikil: “A iei usun ewe muun Kot, usun chok emon epwe amora pwikil won pwul. Iwe, a mour lepwin, o a pwata leran, o ekkewe pwikil ra puk o mamarita, nge atewe ese wewe ren. Ewe pwul a chok pwisin uwa--a akkom ewe chön; mwirin, ira; pwal mwirin, uwan ewe ira. Iwe, lupwen uwan we a mau, a muttir kini, pun a tori fansoun ras.”

¹⁴ Iö ewe chon amora pwikil? Ekkoch lon Kristentom ra lükü pwe a wewe ngeni Jises pwisin. Nge ifa ussun sipwe tongeni erä pwe Jises a onnut me ese weweiti ifa ussun ewe pwikil a pwük me määritä? Enlet, Jises a silei ussun mämmäärin ewe pwikil! Iwe nge, ussun chök ewe sia fen kapas ussun me mwan, ewe chon amora pwikil a liosuetä emön me emön chon esilefeili ewe Mwu mi amworafeili pwikilin ewe Mwu ren ar angangen afalafal fän tinikken. Ewe pwikil mi mworetiw woon pwül a wewe ngeni ewe kapas ra afalafal ussun.

15, 16. Lon an we kapas monomon, ifa ewe pworaus mi enlet Jises a menlapei ussun napanapen määritään efou pwikil me än emön wiliti emön chon Kraist?

¹⁵ Jises a apasa pwe ewe chon amora “a mour lepwin, o a pwata leran.” Sap minne a wewe ngeni pwe a tümününgaw. A chök kapas ussun föfförün aramas rän me rän. Ena wokisin a kapas ussun eörenien aramas ar repwe akkangang le rän me okkonnut lepwin. Jises a aweweei met a fis lon ena fansoun, a apasa: “Ekkewe pwikil ra puk o mamarita.” Mwirin, a pwal erä: “Nge atewe ese wewe ren.” A menlapei ewe pworaus pwe “Ewe pwul a chok pwisin uwa.”b

¹⁶ Ifa menlapen än Jises pworaus? Nengeni pwe a ekilapei mämmäärin ewe irä me määrimangan. “Ewe pwul a chok pwisin uwa​—a akkom ewe chön; mwirin, ira; pwal mwirin, uwan ewe ira.” (Mark 4:28) A mämmääritä ekis me ekis me lon en me tettelin. Esor emön epwe tongeni echimwa are emwittiri. A pwal ina chök ussun aramas repwe feffeitä are mämmääritä lon ar wiliti nöün Jises chon käeö. A kan fis lon eü me eü fansoun atun Jiowa epwe mut ngeni ewe enlet an epwe määritä lon letipen emön mi fich ngeni an epwe etiwa ewe kapas.​—Fof. 13:48; Ipru 6:1.

17. Iö kewe ra pwapwa lupwen ewe pwikil mi liosuetä ewe enlet a uwa?

¹⁷ Ifa ussun ewe chon amora a fiti ewe angangen ras “lupwen uwan a mau”? Lupwen Jiowa a ämääri ewe enlet ussun ewe Mwu lon letipen ekkewe mineföön chon käeö, repwe feffeitä tori fansoun ar tong ngeni Kot epwe amwökütüür ar repwe fangolo manauer ngeni. Ra pwäratä pwe ra fen föri ena ren ar papataiselo lon konik. Ekis me ekis, ekkewe mwän mi äsimaüetä repwe tongeni eäni pwal ekkoch wis lon ewe mwichefel. Lupwen emön a wiliti emön chon Kraist, sap chök ewe chon amora epwe kini uwaan ewe Mwu, pwe pwal ekkoch chon afalafal, inaamwo ika rese pwisin fotukatiw ewe pwikil mi efisi ena chon Kraist. (Älleani Jon 4:36-38.) Enlet, “chon amora me chon kini repwe pwapwafengen.”

Ekkewe Lesen Fän Itach Lon ei Fansoun

18, 19. (a) A ifa ussun om enniwili än Jises kewe kapas awewe a apöchökkülok? (b) Met sipwe käeö ussun lon ewe lesen mwirin?

¹⁸ Met sia fen käeö seni ach enniwili ekkena ruu kapas monomon lon Mark sopwun 4? A ffataffatöch pwe mei wor wisach ach sipwe föri ewe angangen fotukatiw pwikil. Sisap fokkun mut ngeni kinetipengen me och osukosuk are weires ar repwe eppeti ach föfföri ei angang. (SalAf. 11:4) Iwe nge, sia pwal kilisou ren ei wis mi aüchea pwe kich, chienen Kot le angang. Jiowa a wisen ämääri aramas ngeni ar repwe wiliti chon Kraist, a pwal efeiöchü ar achocho me pwal ach achocho. Sia weweiti pwe sise tongeni echimwa emön an epwe wiliti emön chon äppirü Kraist. Sisap letipechou are osukosuk ika ra määrimang are rese wiliti Chon Kraist. A kan aururukich ach silei pwe sipwe uwaaöch ika sipwe tuppwöl ngeni Jiowa me ewe angang a awisa ngenikich, ewe angangen afalafala ewe “kapas allim usun ewe mu . . . pwe epwe pwar ngeni einang meinisin.”​—Mt. 24:14.

¹⁹ Met Jises a pwal äiti ngenikich ussun mämmäärin ekkewe mineföön chon käeö me angangen ewe Mwu? Pölüwen ena kapas eis a nom lon pwal ekkoch kapas awewe lon ekkewe puken Kapas Allim. Sipwe nennengeni ekkoch ekkena kapas awewe lon ewe lesen mwirin.

[Footnote]

Ka Chechchemeni?

• Ifa ussun sipwe apöpöfengenni ewe angangen fotukatiw pwikil me ewe angangen afalafala ewe Mwu?

• Ifa ussun Jiowa a aükü tuppwölün emön chon afalafala ewe Mwu?

• Me ren Jises, ifa ussun määrin efoch irä me emön chon käeö ra löllöfengen?

• Ifa ussun “ewe chon amora me ewe chon kini repwe pwapwafengen”?

[Sasing lón pekin taropwe 19]

Pwata Jises a apöpööü emön chon afalafala än Kot we Mwu ngeni emön chon amora pwikil?

[Sasing lón pekin taropwe 21]

Ewe pwül mürinnö a liosuetä chokkewe mi letip-unus ra afalafala ewe Mwu me ren en me nonnomun

[Sasing lón pekin taropwe 22]

Kot a wisen ämääraatä