Ekkewe Feioch Seni Ach Tongei An Kot We Kapas
“Kosap likitala tipachem, pun epwe tumwunuk. . . . Kopwe kamwochunuk won, pwe i epwe aitochuk.”—AN SALOMON FOS 4:6, 8.
1. Met epwe kapachelong lon ach tongei an Kot we Kapas?
AKKALEAAN Paipel a lamot ngeni emon Chon Kraist. Iwe nge, an emon alleani ewe Paipel ese wewe ngeni pwe a tongei ewe Kapasen Kot. Epwe ifa ussun ika emon a akkalleani ewe Paipel nge mwirin a foffori ekkewe mettoch ewe Paipel a apasa pwe mi ngau? A wewe ngeni pwe ese tongei ewe Kapasen Kot ussun ewe sou makkei Kol Fel 119 a tongei. An tongei ewe Kapasen Kot a emwen ngeni an atipeeufengenni manauan me met Kot a kutta seni.—Kol Fel 119:97, 101, 105.
2. Met sokkun feioch epwe torikich seni tipatchem mi alongolong won ewe Kapasen Kot?
2 An emon manaueni manauan me ren an Kot we Kapas a wewe ngeni sissiwilliin an ekiek me lapalapan. Ena esin foffor a pwarata tipatchem seni Kot, me a wewe ngeni an emon apwonueta alon ewe sile me weweoch a angei seni an kakkaeo ewe Paipel. “Kosap likitala tipachem, pun epwe tumwunuk. Kopwe echeni pwe epwe mamasok. Kopwe fokun aucheani tipachem, pwe i epwe atekiokota, kopwe kamwochunuk won, pwe i epwe aitochuk. Tipachem epwe usun chok epa mwaramwar mi ling won mokurom, epwe fori pwe kopwe mwarini epa mwarin king mi fokun murina.” (An Salomon Fos 4:6, 8, 9) A ifa me murinnoon ei kapasen apochokkul pwe sipwe amaaraata tong fan iten an Kot we Kapas me kuna emmwen seni! Ita ion leich ese mochen kuna tumun, itoch, me ling?
Kuna Tumun Seni Feiengau
3. Lap seni me loom, met popun mi lamot pwe ekkewe Chon Kraist repwe kuna tumun, me seni io?
3 Epwe ifa ussun emon a kuna tumun seni ewe tipatchem a angei seni an kakkaeo me alleasochisi ewe Kapasen Kot? Eu mettoch, a kuna tumun seni Setan ewe Tefil. Jises a aiti ngeni noun kewe chon kaeo le iotek pwe repwe ngaselo seni ewe mi ngau, Satan. (Mattu 6:13) Ikenai, a fokkun lamot ach sipwe apachalong ei tingor lon ach iotek. Setan me noun kewe timon ra fen koturutiu seni lang mwirin 1914, ina popun mei wor an Setan “song mi lap, pun a sinei pwe an we fansoun a chok mochomoch.” (Pwarata 12:9, 10, 12) Lon ei fansoun sopwoloon, eli an we song a fokkun watte pokiten an sopwongau le maun ngeni “ir mi amwochu ekkewe allukun Kot, o uwei ewe pwarata usun Jises.”—Pwarata 12:17.
4. Ifa ussun ekkewe Chon Kraist ra kuna tumun seni an Setan kewe sossot me ssar?
4 Lon an song, Setan a sopweilo le efisata osukosuk fan iten ekkeei chon afalafal Chon Kraist me a alisata riaffou mwaal are efisata ekkoch minen eppet ngeni ar angang. A pwal mochen etipetipa ekkewe chon afalafala ewe Muu le chei ekkewe mettoch ussun itoch won fonufan, tongen kunou, alapaloon pisekir, me kuttaen pwisin ar kewe pwapwa, akkom mwen ar angangen afalafala ewe Muu. Met a tumunu noun Kot kewe chon angang mi tuppwol seni ar resap feiengau seni an Setan sossot are ssarelo lon an kewe ssar? Pwungun pwe, a lamot iotek, ririoch ngeni Jiowa, me luku pwe an kewe pwon epwe pwonueta. Nge ekkeei mettoch meinisin ra riri ngeni ach silei ussun me ach uppos le alleasochisi ekkewe kapasen achechchem lon an Kot we Kapas. Ekkeei kapasen achechchem ra torikich seni ach akkalleani ewe Paipel me ekkewe puken aweween Paipel, ach fiffiti ekkewe mwich an Chon Kraist, ach auseling ngeni ewe fon seni ewe Paipel chienach chon luku ra awora, are ach ekkekieki ekkewe allukun Paipel an Kot ngun mi fel a achema ngenikich.—Aisea 30:21; Jon 14:26; 1 Jon 2:15-17.
5. Ifa ussun tipatchem mi alongolong won an Kot we Kapas mi tongeni tumunu kich?
5 Mei pwal wor och sokkun tumun a tori ir kewe mi tongei an Kot we Kapas. Ren chok awewe, a ti seniir osukosuk lon pekin memmeef me semmwen seni safeien opuchopuch, supwa, me lisowu mwaal. (1 Korint 5:11; 2 Korint 7:1) Rese alisata osukosuk lefilen aramas pokiten uwokuku are kapas pochokkul. (Efisus 4:31) Rese pwal tipemwaramwar ussun ar luku pokiten ar rese etiwa ekiekin are tipatchemen ei fonufan mi likotuputup. (1 Korint 3:19) Pokiten ar tongei an Kot we Kapas, ra kuna tumun seni ekkewe mettoch mi tongeni atai ar ririoch ngeni Kot me ar apilukulukun manau esemuch. Ra achocho le alisi chon orur kewe le eani apilukuluk won ekkewe pwon mi murinno lon ewe Paipel, pun ra silei pwe repwe ‘amanaua pwisin ir o pwal ir ekkewe mi auseling ngeniir.’—1 Timoti 4:16.
6. Ifa ussun tipatchem mi alongolong won an Kot we Kapas mi tongeni tumunu kich pwal mwo nge atun fansoun weires?
6 Pwungun pwe, meinisin—kapachelong chokkewe mi tongei an Kot we Kapas—ra nom fan nemenien “fansoun me ekkewe mettoch sise ekieki pwe epwe fisita.” (An Salomon Afalafal 9:11, New World Translation) Ekkoch leich epwe kuna taifun me chechchechin fonu, semmwen, accident, are feiengau mi efisata malo. Nge, sia chuen kuna tumun. Esor osukosuk epwe efeiengaua emon tori feilfeilo ika a enletin tongei ewe Kapasen Kot. Ina popun, sisap kon osukosuk ren met epwe tongeni fis lon mwach kkan. Ika sia fen ammonlata me ren ach tufich, epwe och ika sipwe likiti ekkewe mettoch le poun Jiowa me sisap mut ngeni an epwe pout senikich ach kinamwe pokiten ekkewe minen alolilen. (Mattu 6:33, 34; Filipai 4:6, 7) Sia mochen chechchemeni ewe apilukulukun manausefal me ewe manau mi murinno epwe feito lupwen Kot epwe ‘forisefalli mettoch meinisin pwe repwe sefo.’—Pwarata 21:5; Jon 11:25.
Pwarata Pwe En “Ppwul Murinno”
7. Ifa ewe kapas awewe Jises a ereni ewe mwichen aramas mi auseling ngeni?
7 Eu me lein an Jises kewe kapas awewe a menlapei ewe lamoten ach eani ekiek pwung ussun an Kot we Kapas. Lupwen Jises a afalafala ewe kapas allim won unusen Palestine, chommong aramas ra kito ren pwe repwe auseling ngeni. (Luk 8:1, 4) Iwe nge, esap meinisin ra wesewesen tongei ewe Kapasen Kot. Ese mwaal chommong ra auseling ngeni pokiten ra mochen kuna ekkewe manaman are pokiten ra pwapwaiti lapalapochun an asukula aramas. Ina popun, Jises a aiti ngeni ekkewe aramas eu kapas awewe: “Emon chon amora a feito, pwe epwe amorafeili fotan pwikil. Iwe, lupwen an amorafeili, ekkoch ra moretiu won ewe al, o aramas purir fan pecher, nge mansusu ra analo. O ekkoch ra moretiu won achau mi wor ekis pwul ie; nge lupwen a mar a pwaselo, pun esor konik lon ewe pwul. O ekkoch ra moretiu lein ira folufol; nge ekkewe ira folufol ra chok marfengen, o ra pwolurelo. Nge ekkoch ra pwal moretiu won pwul murinno, o ra mamarita. Ra uwani ipuku fan eu.”—Luk 8:5-8.
8. Met weween ewe pwikil lon an Jises kapas awewe?
8 An Jises kapas awewe a pwarata pwe esap wewe chok ifa ussun an aramas etiwa ewe kapas allim, nge epwe longolong won lapalapen letipen ewe mi auseling. Ewe foun mi amora a wewe ngeni “an Kot we Kapas.” (Luk 8:11) Are ussun pwal eu porausen ei kapas awewe a apasa, ewe foun a wewe ngeni “kapasen ewe muu.” (Mattu 13:19) Jises epwe tongeni nounou ekkena ruu poraus, pokiten an Kot we Kapas a eani ewe itelap, Muun lang fan nemenien ewe King Jises Kraist, ewe mettoch Jiowa epwe aea le aitochulo pwuungun an nemenem me epinalo itan we. (Mattu 6:9, 10) Weween pwe, ewe pwikil a wewe ngeni porausen ewe kapas allim lon an Kot we Kapas, ewe Paipel. Chon Pwarata Jiowa ra itelapei porausen ei Muu lupwen ra amorafeili pwikil atun ar appiru ewe Chon Amora loom, Jises Kraist. Ifa ussun aramas ra etiwer?
9. Met weween ewe pwikil a turutiu (a) ppen ewe aal? (b) won ewe achau? (c) won ewe ppwul mi ffif ren folufol?
9 Jises a apasa pwe ekkoch pwikil epwe nom ppen ewe aal me aramas repwe puratiu. Ei mettoch a wewe ngeni ekkewe aramas mi kon osukosuk me pwikilin ewe Muu ese tongeni maarita lon letiper. Mwen repwe tongeni amaaraata tong fan iten an Kot we Kapas, “ewe tefil a feito angei ewe kapas seni lon letiper, pwe rete luku o manau ren.” (Luk 8:12) Ekkoch pwikil ra nom won achau. Ei mettoch a wewe ngeni ekkewe aramas mi mochen auselinga porausen ewe Paipel nge ese kku letiper. Ika ekkoch sossot a toriir are lupwen ra weiresin apwonueta alon ewe Paipel, “ra turutiu” pokiten esor warer. (Luk 8:13) Mwirin a wor ekkewe aramas mi rongorong ewe kapas nge ra kkuf ren “aurekin lon ei manau, me ar pisek auchea.” Lo, lo, lo, ussun chok ira mi ffif ren folufol, “ra pwolurelo.”—Luk 8:14.
10, 11. (a) Ewe ppwul murinno a liosueta io? (b) Met sipwe fori pwe sipwe “amwochu” an Kot we Kapas lon letipach?
10 Saingoon, mei wor ewe pwikil mi nom won pwul murinno. Ei mettoch a weneiti aramas mi etiwa ewe poraus ren “letiper mi enlet o murinno.” Pwungun pwe, emon me emon leich mi mochen luku pwe kich mi kapachelong lon ei kinikin. Nge, an Kot ekiek ina ewe mettoch mi lamot. (An Salomon Fos 17:3; 1 Korint 4:4, 5) An we Kapas a apasa pwe ach we “letip mi enlet o murinno” a letelo ren ach foffor seni iei tori ach malo are tori Kot a amuchalo ei otot mi ngau. Epwe och ika sia muttir etiwa porausen ewe Muu. Iwe nge, ekkewe mi eani letip mi enlet o murinno ra etiwa an Kot we Kapas me “amwochu, iwe ra ukuwa lon ar likiitu.”—Luk 8:15.
11 Sipwe tongeni amwochu an Kot we Kapas lon letipach ika sipwe pwisin akkalleani me kakkaeo masouan me lupwen sia mwichfengen me chienach chon luku. A kapachelong ach alamota ewe mongo lon pekin ngun mi kawor seni ewe mwicheich mi kefil pwe epwe tumunu noun Jises kewe chon kaeo lon pekin ngun. (Mattu 24:45-47) Iei ussun, ekkewe ra amwochu an Kot we Kapas lon letiper ra mwokutukut ren tong pwe repwe “ukuwa lon ar likiitu.”
12. Ifa ewe uwa sipwe likiitu le uwaani?
12 Ewe pwul murinno a uwani met sokkun uwa? Won ei fonufan, ekkewe pwikil mi maarita ngeni ira ra uwani uwa mi masou ren pwikil mi ussun chok ir, iwe, mwirin sipwe tongeni amorafeillirsefal pwe repwe pwal uwa. A pwal ina ussun ren chokkewe mi letip enlet me murinno, pwikilin ewe kapas a maarita lon ir, iwe, a amwokutur le feffeita lon pekin ngun tori repwe pwal amora ewe pwikil lon letipen ekkewe ekkoch. (Mattu 28:19, 20) Ar angangen amorafeili a sinnelo ren ar likiitu. Jises a pwarata ewe lamoten likiitu lon ewe angangen amorafeili lupwen a apasa: “Are emon epwe likiitu tori sopolon, iwe, epwe manau. Iwe, ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.”—Mattu 24:13, 14.
“Uwa Lon Sokkun Angang Mi Murinno Meinisin”
13. Ifa ewe iotek Paul a apasawu mi rifengenni ewe uwa ren silei ussun an Kot we Kapas?
13 Ewe aposel Paul a pwal fos ussun ewe lamoten ach uwaoch me a aririfengenni ach uwaoch ren an Kot we Kapas. A iotek ussun chienan kewe chon luku, “oupwe ur ren ami sinei letipan ren sokkun tipatchemen ngun, pwal sokkun wewe meinisin, o oupwe manaueni ewe sokkun manau mi fich ngeni ach Samol, ewe sokkun manau i epwe unusen pwapwa ren; o manauemi epwe uwa lon sokkun angang mi murinno meinisin.”—Kolose 1:9, 10; Filipai 1:9-11.
14-16. Me ren an Paul we iotek, met sokkun uwa chokkewe mi tongei an Kot we Kapas ra uwani?
14 Ina popun Paul a pwarata pwe sisap chok achocho ngeni ach angei sile ussun ewe Paipel. Nge, ach tongei Kot a amwokutukich le “manaueni ewe sokkun manau mi fich ngeni ach Samol” ren ach sopweilo le ‘uwa lon sokkun angang mi murinno meinisin.’ Menni angang mi murinno? Ewe angangen afalafala ewe kapas allim ussun ewe Muu ina ewe wiis mi auchea fan iten Chon Kraist lon ei ranin le sopwoloon. (Mark 13:10) Pwal och, chokkewe mi tongei an Kot we Kapas ra awora ar monien asor iteitan me ren ukuukun ar tufich fan iten kalisitaan ei angang. Ra pwapwaiti ar apwonueta ei wiis, pun ra silei pwe “Kot a tongei ir mi pwapwaiti fangelo.” (2 Korint 9:7) Ar asor a awora ewe moni mi lamot ngeni mwokutukutun lap seni ipuku Bethel mi emmweni ewe angangen afalafal me lon ekkoch Bethel mi fori Paipel me puken aweween Paipel ie. Ar asor a pwal atufichi liwinin ekkewe mwichelap an Chon Kraist me angangen ekkewe overseer mi saifetal, ekkewe misineri, me ekkewe ekkoch pioneer.
15 Pwal ekkoch angang murinno a wewe ngeni kautaan me tumunun ekkewe leenien fel mi enlet. Tong fan iten an Kot we Kapas a amwokutu noun kewe chon fel le tumunuochu ekkewe Assembly Hall me Kingdom Hall. (Alollo ngeni Nehemaia 10:39.) Pokiten iten Kot a mak won ekkena leeni, a lamot pwe ekkewe leeni lon me lukun repwe limelimoch me ling me fofforun ekkewe mi fel lon ekkena leeni epwe limelimoch. (2 Korint 6:3) Ekkoch Chon Kraist ra tufichin fori angang watte. Tong fan iten an Kot we Kapas a amwokutur le sai touwau pwe repwe tongeni fiti ewe angangen kautaan minefoon leenien fel lon ekkewe leeni ese kon watte moni me tufich ie.—2 Korint 8:14.
16 A pwal kapachelong lon ach “uwa lon sokkun angang mi murinno meinisin,” ach tumunu wiisach ngeni ach famili me pwarata tong ngeni chienach kewe Chon Kraist. Tong fan iten an Kot we Kapas a amwokutukich le ekieki osupwangen “chon ewe einangen luku” me “kaeo lom usun foforun Soulang ngeni lon [ach] pwisin famili.” (Kalesia 6:10; 1 Timoti 5:4, 8) Lon ei mettoch, a murinno ach chuuri ekkewe mi semmwen me aururu ekkewe mi letipeta. Me a ifa me murinnoon ewe angang ekkewe elter lon ekkewe mwichefel me lon ekkewe Hospital Liaison Committee ra fori le alisi chokkewe mi osukosuk ren sokkopaten semmwen! (Fofor 15:29) A pwal lapalo ekkewe feiengau watte—ekkoch leir seni taifun are nooter, nge ekkoch a fis pokiten tiparochen aramas. Ren alillisin ngunun Kot, Chon Pwarata Jiowa ra itoch lon chommong fonu pokiten ar muttir awora ar alillis ngeni chiener kewe chon luku me pwal ekkewe ekkoch mi feiengau seni taifun me accident. Ekkeei mettoch meinisin ra wewe ngeni uwa mi murinno seni ekkewe mi tongei an Kot we Kapas.
Ekkewe Feioch Mi Lingemwarar Lon Mwach Kkan
17, 18. (a) Met a fen fiffis ren kamorafeilin pwikilin ewe Muu? (b) Ekiselo chok, met sokkun mettoch mi amwarar chokkewe mi tongei an Kot we Kapas repwele kuna?
17 Kamorafeilin ewe pwikilin ewe Muu a chuen wato feioch watte ngeni aramas. Lon ekkewe ier mi kanoto chok lap seni 300,000 aramas iteiten ier ra fen mut ngeni porausen Paipel an epwe maarita lon letiper, iwe, ra fangelo manauer ngeni Jiowa me ra esissinata ei mettoch ren ar papataiselo. A ifa me amwararen met epwe fis ngeniir lon mwach kkan!
18 Ekiselo chok, ekkewe chon tongei an Kot we Kapas ra silei pwe Jiowa Kot epwe epinalo itan we. “Papilon mi Lapalap,” ewe nemenem lon pekin lamalam chofona, epwe talo. (Pwarata 18:2, 8) Iwe, ewe king, Jises Kraist epwe nnielo chokkewe rese mochen atipeeufengenni manauer ren an Kot we Kapas. (Kol Fel 2:9-11; Taniel 2:44) Mwirin, an Kot we Muu epwe wato ngaselo seni atai alluk, maun, me feiengau seni taifun me met kan. Esap chuen wor lamoten ach sipwe aururu aramas pokiten metek, semmwen, me malo.—Pwarata 21:3, 4.
19, 20. Met sokkun mettoch mi lingemwarar chokkewe mi tongei an Kot we Kapas repwe kuna lon mwach kkan?
19 Mwa met ren amwararen ekkewe angang murinno epwe pwonueta ren chokkewe mi tongei an Kot we Kapas! Ekkewe rese malo lon Armaketon repwe popueta ewe angangen awilalo ei fonufan ngeni eu paratis. Epwe nom rer ewe wiis mi ammeseik, wiisen ammonlata minne mi lamot ngeni ekkewe aramas mi nonnom lon peias mi tongeni manausefal pun Kot a chemeniir. (Jon 5:28, 29) Lon ena fansoun, emmwen mi unusoch epwe tori aramas meinisin seni ewe Epinkepiisom, Jiowa, me ren Noun we, Jises Kraist. Epwe ‘suuki ekkewe puk,’ pwe epwe pwarata an Jiowa kewe alluk fan iten ach sipwe manau lon ewe fonufan sefo.—Pwarata 20:12.
20 Lon an Jiowa we fansoun, meinisin lon ewe mwichen Chon Kraist mi kepit repwe manaueta ngeni liwinir lon lang ussun “chienen Kraist le alemwir.” (Rom 8:17) Atun ewe Engerou Ierin an Kraist Nemenem, ekiekin me inisin aramas meinisin won fonufan mi tongei an Kot we Kapas repwe unusochuelo. Mwirin ra pwarata ar tuppwol fan ewe saingoon sossot, repwe kuna manau esemuch me repwe pwapwaesini ar “eti noun Kot kewe lon ewe ngas mi ling.” (Rom 8:21; Pwarata 20:1-3, 7-10) Mwa met ren apwapwaan ena fansoun! Enlet, inaamwo ika Jiowa a ngenikich apilukulukun lang are won fonufan, ach tongei an Kot we Kapas me ach uppos le manaueni manauach me ren an Kot kokkot epwe tumunukich. Nge lon mwach kkan sipwe ‘kamwochunuk won, pwe i epwe aitochukich.’—An Salomon Fos 4:6, 8.
Kopwe Tongeni Awewei?
◻ Ifa ussun tong fan iten an Kot we Kapas epwe tongeni tumunu kich?
◻ Ifa ewe pwikil lon an Jises kapas awewe, me ifa ussun a amorafetallei?
◻ Ifa ussun sipwe tongeni pwaralo pwe kich “ppwul murinno”?
◻ Met sokkun feioch chokkewe mi tongei an Kot we Kapas repwe tongeni apilukuluku?
[Sasing lon pekin taropwe 26]
Ewe pwikil lon an Jises we kapas awewe a liosueta ewe kapas allim mi mak lon an Kot we Kapas
[Credit Line]
Garo Nalbandian
[Sasing lon pekin taropwe 27]
Chon Pwarata Jiowa ra appiru ewe Chon Amora Mi Lapalap
[Ekkewe sasing lon pekin taropwe 28]
Ekkewe aramas repwe manau seni Armaketon repwe pwapwaesini uwaan ewe fonufan