Älisi Ekkewe Mi Mwälech Seni Än Kot Mwichen Siip
“Ousipwe fokun pwapwa, pun üa küna nei we sip mi mwalechela.”—LUK 15:6, TF.
1. Ifa ussun Jises a änneta pwe i emön chon masen siip mi tong?
JISES KRAIST, nöün Jiowa äläemön, a iteni “ewe chon masen siip mi lap.” (Ipru 13:20) Ewe Paipel a oesini pwe epwe feito, pwe i emön Chon Masen Siip esor täppin, a kükkütta “ekewe sip mi mwalechela, ir ekewe aramasen Israel.” (Mt. 2:1-6; 15:24) Wesewesen emön chon masen siip epwe tongeni fangolo manauan fän iten tümünün nöün kewe siip. A pwal ina chök ussun Jises, a mälo pwe epwe awora ewe möön kepich fän iten nöün kewe siip mi etiwa an we asor.—Jon 10:11, 15; 1 Jon 2:1, 2.
2. Met popun ekkoch Chon Kraist rese chüen fiti mwökütükütün ewe mwichefel?
2 Mi alolilen pwe ekkoch mi piin aücheani än Jises asor me fangolo manauer ngeni Kot rese chüen fiffiti mwökütükütün ewe mwichefelin Chon Kraist. Eli rese chüen tinikken me angang ngeni Kot pokiten äpilükülüküngaü, apwangapwangen inis, are pwal ekkoch popun. Iwe nge, repwe tongeni küna ewe esin lükülüköch me pwapwa Tafit a kapas ussun lon Kölfel 23 ren chök ar nonnom lon än Kot mwichen siip. Awewe chök, a kölü: “[Jiowa] ai chon mas, üsap osupwang ren och mettoch.” (Kölf. 23:1) A nom ren chon än Kot we mwichen siip mettoch meinisin mi lamot pwe repwe pacheöch ngeni Kot, nge esap ina ussun ren ekkewe siip mi mwälechelo. Iö epwe tongeni älisiir? Ifa ussun epwe kawor älillis? Met epwe fokkun älisiir ar repwe liwinsefälliti ewe mwichen siip?
Iö A Tongeni Älillis?
3. Ifa ussun Jises a aweweei met a lamot ika emön epwe seläni siip mi mwälechelo?
3 A lamot achocho fän iten än emön epwe seläni ekkewe siip mi mwälechelo. (Kölf. 100:3) Jises a eäni ei kapas awewe: “Met oua ekieki? Are eman aramas a nöüni ipükü sip, nge eman leir a mwalechela, ifa usun, esap likiti ekewe tiwe me tiweman won ekewe chuk pwe epwe feila o kütta ewe eman mi mwalechela? Nge are epwe küna ewe eman, enlet, üpwe ürenikemi, ätewe epwe fokun pwapwaäsini ewe eman sip mi mwalechela lap seni an pwapwaäsini ekewe tiwe me tiweman resap mwalechela. Iei usun Semei lon läng esap mochen pwe eman lein ekei kükün epwe mwalechela.” (Mt. 18:12-14) Iö a tongeni älisi ekkewe mi ussun chök siip ra mwälechelo seni ewe mwichen siip?
4, 5. Epwe fet ekiekin ekkewe elter ussun än Kot mwichen siip?
4 Ika ekkewe elter repwe älisi ekkewe siip mi mwälechelo, repwe fokkun chechchemeni pwe ewe mwichen siip, eü mwichefelin aramas mi fangolo manauer ngeni Jiowa, eü ‘mwichen siip’ mi aüchea lon än Kot mälämäl. (Kölf. 79:13) A lamot ngeni ekkena siip mi ächengicheng tümünüöch, weween, ekkewe chon mas mi tong repwe chchüngüür. Epwe watte älillis ngeniir ika ekkewe chon mas repwe äämweer. Ar kewe kapasen apöchökkül epwe tongeni aüfichiiretä pwe repwe pacheöchsefäl ngeni Jiowa me alapalo ar mochen achochosefäl.—1 Kor. 8:1.
5 Ekkewe chon masen än Kot we mwichen siip repwe wisen kükkütta me älisi ekkewe siip mi mwälechelo. Ewe aposel Paul a ächchema ngeni ekkewe elter Chon Kraist lon Efisus loom ussun wiser pwe repwe mammasa ekkewe siip: “Iei mine oupwe mamasakemi me unusen chon ewe mwichefel ewe Ngünmifel a atolongeer fän ämi tümwün. Oupwe chon masen ewe mwichefelin Kot, i a möni ren chaan püsin Nöün we.” (Fof. 20:28) Pwal ina chök ussun, ewe aposel Piter a pesei ekkewe elter mi kepit: “Oupwe tümwünü ewe mwichen sip Kot a ngenikemi, pwe oupwe foleniir ren unusen letipemi, pun iei usun met Kot a mochen pwe oupwe föri, nge esap me lükitipemi. Oupwe föri ämi angang, sap fänäsengesin ämi chök mochen angei liwin, nge seni wesewesen ämi mochen föri ewe angang. Ousap nemenemengau ngeni chokewe mi nom fän ämi tümwün, nge oupwe eu lenien apirü ngeni ewe mwich.”—1 Pit. 5:1-3.
6. Pwata a äkkäeüin lamot ekkewe chon mas repwe tümünü nöün Kot kewe siip lon ach ei fansoun?
6 A lamot ekkewe elter Chon Kraist repwe äppirü Jises “ewe chon masen siip mi murinno.” (Jon 10:11, TF) A fokkun lolileniesini nöün Kot kewe siip. A menlapei lamoten ar repwe küna tümün lupwen a ereni Saimon Piter pwe epwe “tümwünü nei kewe sip.” (Älleani Jon 21:15-17.) A äkkäeüin lamot lon ach ei fansoun pwe ekkewe siip repwe küna tümün, pun ewe Tefil a kon alapalo an achocho le atai tuppwölün iir kewe mi angang ngeni Kot. Setan a äeä mochenin aramas me ototen ei fönüfan pwe epwe etipetipa nöün Jiowa kewe siip pwe repwe tipis. (1 Jon 2:15-17; 5:19) A mecheres än ekkewe rese chüen fiffiti mwich me afalafal ar repwe tupulo, ina minne, a lamot älillis pwe repwe apwönüetä ewe kapasen pesepes pwe repwe “tipeni pwe ewe Ngünmifel epwe [emweniir].” (Kal. 5:16-21, 25) A lamot ekkewe chon mas repwe tingor än Kot emmwen me an ngün mi fel. Repwe pwal sipeöch le nöünöüfichi an we Kapas.—SalF. 3:5, 6; Luk 11:13; Ipru 4:12.
7. Pwata a lamot än ekkewe elter repwe tümünü chon ewe mwichefel?
7 Lon Israel loom, emön chon masen siip a wokowok wokun we le emmweni nöün kewe siip. Atun ekkewe siip repwe tolong ika towu seni lon tittiir, ewe chon mas epwe wokowok wokun we le älleaniir. (Lif. 27:32; Mika 2:12; 7:14) A pwal lamot ngeni emön chon mas Chon Kraist an epwe silefichi ekkewe siip mi nom fän tümünüan me nonnomun emön me emön leir. (Apöpö ngeni Än Salomon Fos 27:23.) Ina popun, ewe mwichen elter ra kan pworausfengen ussun ar tümünü ekkewe siip. Ra pwal akkota pwe repwe älisi ekkewe siip mi mwälechelo. Jiowa a pwisin apasa pwe epwe kükkütta me tüttümünü nöün kewe siip. (Is. 34:11) Iwe, Kot a pwapwa lupwen ekkewe elter ra pwal achocho le älisi ekkewe siip mi mwälechelo ar repwe liwiniti ewe mwichen siip.
8. Ifa ussun ekkewe elter repwe tongeni älisi ekkewe siip?
8 Epwe eü minen apwapwa me apöchökkül ngeni emön Chon Kraist mi semwen ika emön elter a äämwa. Pwal ina chök ussun lupwen emön mi apwangapwangelo lon an lükü epwe küna älillis seni emön elter. Ekkewe elter repwe tongeni älleani ekkoch wokisin, enniwili menlapen eü lesen, apworausa ekkoch pworaus mi katowu lon ekkewe mwich, iotekfengen me emönewe, me metakkan. Repwe tongeni aweweei pwe chon ewe mwichefel repwe pwapwa ika epwe fitisefäli ekkewe mwich. (2 Kor. 1:3-7; Jem. 5:13-15) Än emön chuuri, köri woon phone, are makke ngeni taropwe epwe fokkun älisi! Epwe pwal lapolo pwapwaan emön chon mas mi tong ika epwe älisi emön siip mi towau seni ewe mwichen siip.
Sipwe Älillisfengen
9, 10. Pwata esap chök ekkewe elter repwe eteneki emön siip mi mwälechelo?
9 Sia nonnom lon fansoun mi fokkun osukosuk me weires, ina pwata epwe tufich ach sisap meefi ika emön chienach chon lükü a towauolo seni ewe mwichefel. (Ipru 2:1) Iwe nge, nöün Jiowa kewe siip ra aüchea mwen mesan. Emön me emön leir ra lamot, ussun chök eü me eü kifetin inisin aramas. Ina minne, a lamot kich meinisin sipwe eteneki pwiich kewe me tümünüfengennikich. (1 Kor. 12:25) A ina meefiom?
10 Ikaamwo wisen ekkewe elter ar repwe kütta me älisi ekkewe siip mi mwälechelo, nge esap wiser chök pwe pwal wisach. Chon ewe mwichefel me ekkewe chon mas repwe angechu le älisi me apöchökküla pwiich kewe mi towauolo ar repwe liwiniti ewe mwichen siip. Epwe ifa ussun?
11, 12. Ifa ussun kopwe tongeni wisen älisi emön ese chüen akkafalafal?
11 Fän ekkoch, ekkewe elter repwe tongeni awisa ngeni ekkoch chon afalafal mi äsimaü ar repwe käeö ngeni ekkewe rese chüen mwimmwich me akkafalafal ika ra mochen küna älillis. Popun, pun repwe chemesefäli ar we “tongen le popun.” (Pwar. 2:1, 4) Epwe pöchökkületä ar lükü ren ar käkkäeö ekkewe lesen resaamwo käeö pokiten ar etiwalo ekkewe mwich.
12 Ika ekkewe elter repwe awisa ngonuk pwe kopwe käeö ngeni emön ese chüen kon achocho, kopwe iotek pwe Jiowa epwe emmwenuk me efeiöchuk. Pwüngün, “kopwe lükü ngeni ewe Samol mi Lapalap om angang, pwe mine ka ekiekietä epwe fisöch.” (SalF. 16:3) Ekilonei ekkewe wokisin me ekkewe pworaus mi apöchökkül seni Paipel kopwe tongeni nöünöü atun kopwe käeö ngeni ekkewe rese chüen achocho. Ekilapei än ewe chon künö Paul leenien äppirü mi mürinnö. (Älleani Rom 1:11, 12.) Paul a tipeni an epwe chuuri ekkewe Chon Kraist lon Rom fän iten an epwe apöchökküleretä pwe repwe tipeppos. A pwal ekieki pwe repwe pwal apöchökkülatä i. Esap pwal ina ussun ach ekiek lupwen sipwe älisi ekkewe siip mi mworukolo?
13. Met a öch kopwe pworaus ussun ngeni emön ese chüen achocho?
13 Atun ämi käeöfengen, kopwe tongeni eis, “Ifa ussun ka poputä le käeö ewe Paipel?” Ächchema ngeni ekkewe fansoun apwapwa a piin küna lon an angang ngeni Jiowa me pesei an epwe apworausa apwapwaan ekkewe fansoun a fiffiti ekkewe mwich, ewe angangen afalafal, me ekkewe mwichelap. Ereni ussun apwapwaan ekkewe fansoun oua mwimwmwin le afalafal. Apworausa ussun pwisin om pwapwa le pacheöch ngeni Jiowa. (Jem. 4:8) Apasa om kilisou ren än Kot äkkälisikich pokiten kich nöün kewe aramas, äkkäeüin, ren an aururukich me an ngenikich äpilükülük allim lon fänsoun weires.—Rom 15:4; 2 Kor. 1:3, 4.
14, 15. Ikkefa ekkewe feiöch ekkewe rese chüen achocho ra piin küna epwe öch sipwe ächchema ngeniir ussun?
14 Neman, epwe öch om kopwe ächchema ngeni emönewe ussun ekkoch feiöch a küna seni an fiffiti mwökütükütün ewe mwichefel. Awewe chök, a feiöch ren an silelo än Kot we Kapas me an kewe kokkot. (SalF. 4:18) Atun an piin ‘feffetäl ren ngün,’ neman a mwar ekis mecheres an epwe ü ngeni sossotun tipis. (Kal. 5:22-26) Iwe, lon ewe atun, pokiten miritin letipan a limelimöch, a atufichi an epwe arap ngeni Jiowa lon iotek me eäni ‘än Kot kinamwe mi tekia seni ach tongeni weweiti mi tümünü lelukach me ekiekich lon Kraist Jises.’ (Fil. 4:6, 7) Chechchemeni ekkeei pworaus, pwärawu om letipwenechar le eteneki, me wesewesen peppesei chienom we Chon Kraist an epwe liwiniti ewe mwichen siip.—Älleani Filipai 2:4.
15 Sipwe erä pwe en emön elter mi äämwa rüüemön pwüpwülü rese chüen achocho. Eli kopwe tongeni peseer ar repwe chechchemeni ewe atun ra kerän käeö ewe enlet seni än Kot we Kapas. A ifa me watteen amwararen, weweöchün, me akinamween ewe enlet, a pwal angasakichelo! (Jon 8:32) Ese mwääl, a ussun eü ekkei mi ngetenget lon letiper atun ra käeö ussun Jiowa, an we tong, me an kewe kokkot mi mürinnö! (Apöpö ngeni Luk 24:32.) Ächchema ngeniir pwe Chon Kraist mi apwönüetä ar pwon ngeni Kot ra kan ririöch ngeni me a suuk ngeniir ewe liffangen iotek. Kopwe fokkun pesei ekkewe rese chüen achocho ar repwe achochosefäl le pwapwaiti “ewe kapas allim mi ling me ren ewe Kot mi feioch.”—1 Tim. 1:11.
Sopwelo le Pwäratä Tong Ngeniir
16. Apworausa eü pworaus mi pwäratä pwe a sopwöch än emön älisi ekkewe rese chüen achocho.
16 A wesewesen sopwöch minne a mak asan? Ewer. Awewe chök, emön ät a poputä le afalafal atun a 12 ierin nge a ükütiu lupwen a 15 ierin. Iwe nge, mwirin och fansoun, a achochosefäl. A angang lon Bethel ükükün 23 ier, iwe mwirin, a sopwosopwolo le pioneer 9 ier tori ikenäi. A fokkun kilisou ngeni ewe elter mi älisi i an epwe pöchökkülsefäl!
17, 18. Ikkefa ekkoch napanap epwe atufichuk le älisi emön mi mwälechelo seni än Kot we mwichen siip?
17 Tong a amwökütü Chon Kraist ar repwe älisi ekkewe rese chüen achocho ar repwe achochosefäl le fiffiti ewe mwichefel. Jises a ereni nöün kewe chon äppirü: “Iei üpwe ngenikemi eu allük mi fö: Oupwe echenifengenikemi lefilemi. Usun ngang üa echenikemi, iei usun pwal ämi oupwe echenifengenikemi. Are oupwe echenifengenikemi, aramas meinisin repwe silei pwe ämi nei chok kaiö.” (Jon 13:34, 35) Enlet, tong, ina esissillen Chon Kraist mi enlet. Sipwe fokkun pwäratä tong ngeni Chon Kraist mi fen papataiselo nge rese chüen achocho! Nge ika sipwe awora älillis, a lamot sipwe napanapeni ekkewe sokkopaten napanapen Kot.
18 Ikkefa ekkewe napanap kopwe pwäratä ren om kopwe älisi emön mi mwälechelo seni än Kot we mwichen siip? Lükün tong, eli a pwal lamot om kopwe pwäratä kirekiröch, tipefesir, me mosonottam. Eli fän ekkoch, epwe pwal lamot om kopwe okkomusalo tipis. Paul a makkei: “Oupwe pwilitalong womi tong, kirikiröch, tipetekison, lukpwetete me mosonotam. Oupwe songomangfengen o amusamusfengen are eman a chou ngeni eman. Oupwe fokun amusamusfengen usun ach Samol a amusala ämi tipis. Nge lükün ekei föför meinisin oupwe echenifengenikemi lefilemi, pun chen a pilüküfengeni ekei mettoch meinisin, pwe ra unusöch lon ar chufengen.”—Kol. 3:12-14.
19. Pwata a lamot ach sipwe tinikken le älisi nöün Jiowa kewe siip ar repwe fitisefäli än Kot mwichen siip?
19 Lon ewe lesen mwirin ei, sipwe käeö met popun ekkoch ra mwälechelo. Epwe pwal äiti ngenikich ifa ussun sipwe etiwa ekkewe mi achochosefäl. Atun kopwe käeö ena lesen me pwal ekieki ussun ei lesen, kopwe lükülükü pwe a fokkun lamot om älisi ekkewe siip pwe repwe liwinsefäliti än Kot we mwichen siip. Lon ei otot, chommong aramas ra achocho lon unusen manauer pwe repwe pisekisekilo, nge manauen emön a lamot seni wöün fönüfan meinisin. Jises a menlapei ena pworaus lon an we kapas awewe ussun ewe siip mi mwälechelo. (Mt. 18:12-14) Amwo kopwe fokkun chechchemeni ena pworaus atun kopwe tinikken le älisi nöün Jiowa kewe siip mi ächengicheng nge ra mwälechelo ar repwe liwinsefäliti än Jiowa we mwichen siip.
Ifa Ussun Kopwe Pölüweni?
• Ifa wisen ekkewe chon mas Chon Kraist ngeni ekkewe siip mi mwälechelo seni än Kot we mwichen siip?
• Epwe ifa ussun kopwe tongeni älisi iir kewe rese chüen fiffiti mwökütükütün ewe mwichefel?
• Ikkefa ekkewe sokkun napanap repwe atufichuk om kopwe älisi iir kewe mi mwälech seni ewe mwichen siip?
[Sasing lón pekin taropwe 16]
Fän tong, ekkewe chon mas Chon Kraist ra tinikken le älisi iir kewe mi mwälechelo seni än Kot we mwichen siip