Älisiir Pwe Repwe Mwittir Achochosefäl!

“Io am aupwele feilo ren? Nge mi chok wor reom ekkewe kapasen manau esemuch.”​—JON 6:68, TF.

1. Atun chommong nöün Jises kewe chon äppirü ra likitalo i, met Piter a apasa?

FÄN eü, chommong nöün Jises Kraist kewe chon käeö ra likitalo i pun rese lükü eü me lein an kewe afalafal. Iwe, a eisini nöün kewe aposel, “Ifa usun, ami ouse mochen pwal feilo?” Nge Saimon Piter a pölüeni, “Samol, io am aupwele feilo ren? Nge mi chok wor reom ekkewe kapasen manau esemuch.” (Jon 6:51-69, TF) Esor ia repwe feilo ie. Lon ena fansoun esor “kapasen manau esemuch” lon ewe lamalamen Jus, iwe, ese pwal wor lon Papilon mi Lapalap, weween, ekkewe lamalam chofona meinisin ikenäi. Iei fansoun ekkewe rese chüen achocho nge ra mochen apwapwaai Jiowa ‘repwe pwata seni möür’ me achochosefäl le fiffiti ewe mwichen siip.​—Rom 13:11.

2. Met sipwe chechchemeni ussun ekkewe mettoch ekkewe elter repwe wisen angang woon?

² Jiowa a lolileniesini chokkewe mi mwälechelo lon Israel. (Älleani Isikiel 34:15, 16.) Pwal ina chök ussun, ekkewe elter Chon Kraist ra mochen älisi ekkewe mi mwälech seni ewe mwichen siip, pwe pwal ina wiser. Ika repwe awisa ngeni emön chon afalafal an epwe käeö ngeni emön ese chüen achocho nge a mochen küna älillis, met ewe chon afalafal epwe föri ika a pwä pwe emönewe a tipis watte? Esap wisen fönöü, nge epwe pesei an epwe fos ngeni ekkewe elter. Ika ese föri, ewe chon afalafal epwe pwisin esile ngeni ekkewe elter.​—Lif. 5:1; Kal. 6:1.

3. Met meefien emön mwän a wor 100 nöün siip lupwen a pwä ewe emön mi mwälechelo?

³ Ewe lesen mwen ei a fos ussun än Jises kapas awewe ussun emön mwän a wor 100 nöün siip. Lupwen emön leir a mwälechelo, ewe mwän a likitalo ekkewe 99 me a lo kütta ewe emön. Lupwen a küna, a mmen pwapwa! (Luk 15:4-7) Pwal ina chök ussun ach pwapwa lupwen emön nöün Kot siip mi mwälechelo a achochosefäl. Fän tong, neman ekkewe elter me pwal ekkoch chon ewe mwichefel ra fen äämwa emönewe ese chüen achocho. Iwe, ra mochen pwe epwe achochosefäl me küna än Kot älillis, tümün, me feiöch. (Tut. 33:27; Kölf. 91:14; SalF. 10:22) Ika ra tufichin awora älillis, met repwe tongeni föri?

4. Met sia weweiti seni Kalesia 6:2, 5?

⁴ Neman repwe tongeni peseer ar repwe fitisefäli ewe mwichefel ren ar äiti ngeniir pwe Jiowa a tongei Nöün kewe siip me a kütta senikich ekkewe chök mettoch sia tongeni föri. Awewe chök, käeö Paipel, fiffiti mwich, me afalafala ewe kapas allim ussun ewe Mwu. Eli a mürinnö ach sipwe älleani Kalesia 6:2, 5 me ereniir pwe Chon Kraist ra tongeni awora älillis ren ar kewe osukosuk, nge “emon me emon sipwe fakkun pwisin en me uwei osan,” weween, wisan ngeni Jiowa. Esor pwal emön epwe tongeni tuppwöl ngeni Kot fän itach, pwe pwisin kich.

Rese Chüen Achocho Pokiten ‘Aürekin Manauer’?

5, 6. (a) Pwata a lamot pwe sipwe aüselingöch ngeni meefien ekkewe rese chüen achocho? (b) Ifa ussun kopwe tongeni älisi chokkewe rese chüen achocho ar repwe weweiti pwe ra apwangapwangelo seni ar rese chüen fiffiti mwich?

⁵ Ren ar repwe älisi ekkewe rese chüen achocho, a lamot ngeni ekkewe elter me ekkewe mi äsimaü lon ewe mwichefel repwe aüselingöch atun repwe pwärawu meefier. Sipwe erä pwe en emön elter ka äämwa rüüemön pwüpwülü rese chüen mwimmwich pokiten ‘aürekin manauer.’ (Luk 21:34) Eli nafangaüen moni are lapoloon wiser lon famili a äsenipato kükkünüloon ar angangen Chon Kraist. Eli ra meefi pwe repwe ekis asösö seni wiser kewe, nge kopwe tongeni awewe ngeniir pwe esap ina ewe alen tipatchem ar repwe imulo seni ewe mwichefel. (Älleani Än Salomon Fos 18:1.) Fän kirekiröch kopwe tongeni eisiniir: “Mwirin ämi ouse chüen fiffiti mwich, mi lapolo ämi pwapwa? Mi mürinnölo ämi famili? Ewe pwapwa seni ämi lükülük woon Jiowa mi chüen nom remi?”​—Ne. 8:10.

⁶ Ekkena kapas eis repwe tongeni älisi chokkewe mi mwälechelo ar repwe weweiti pwe pokiten rese chüen fiffiti mwich, iwe, rese chüen eäni än Jiowa ekiek ussun nonnomur, ina popun, a kisikisilo ar pwapwa me lükü. (Mt. 5:3; Ipru 10:24, 25) Eli sipwe tongeni älisiir pwe repwe weweiti pwe pokiten ar rese chüen afalafala ewe kapas allim a kisikisilo ar pwapwa. (Mt. 28:19, 20) Iwe, ifa ewe alen tipatchem repwe aleni?

7. Met sipwe pese ngeni ekkewe mi mwälech seni ewe mwichen siip ar repwe föri?

⁷ Jises a apasa: “Oupwe afälikemi, pwe lelukemi esap chouchou ren mongömong me ünüpuch, pwal ren öürekin manauen ikenai . . . Oupwe mamasa o iotek fansoun meinisin, pwe epwe wor ämi pöchökül pwe oupwe tongeni sü seni ekei mettoch meinisin lupwen repwe fisitä.” (Luk 21:34-36) Ika chokkewe mi mwälech seni ewe mwichefel ra mochen künasefäli ewe pwapwa ra piin eäni, sipwe peseer ar repwe tingor ewe ngün mi fel me än Kot älillis, me repwe atipeeüfengeni föfförür me ar kewe iotek.​—Luk 11:13.

Mei Wor Mettoch Ra Chepetek Ren?

8, 9. Ifa ussun emön elter epwe tongeni älisi emön mi chepetek?

⁸ Pokiten aramas rese unusöch, a tongeni fis osukosuk lefiler, iwe, emön a tongeni chepetek ren. Eli ekkoch ra chepetek atun rese tipeeü ngeni napanapen emön mei wor süfölün lon ewe mwichefel. Ika ina, ewe elter mi äämwa emönewe epwe awewe ngeni pwe Jiowa esap oturukapa emön. Iwe, itä pwata emön epwe atai an ririöch ngeni Kot me nöün kewe aramas? Iwe nge, epwe chök sopwosopwolo le angang ngeni Kot, me lükülük pwe “ewe Souapwüngün unusen fanüfan” a silei met a fis me epwe awenechara. (Ken. 18:25; Kol. 3:23-25) Ika emön a wesewesen turulo, sap minne epwe chök pposolo nge epwe ütäsefäl.

⁹ Lon an sotun älisiir le achochosefäl, eli epwe öch ika emön elter epwe ereniir pwe mwirin och fansoun, ekkoch ra küna pwe minne a achepetekiir ese chüen lamot. Ese chüen nom ewe popun ar ra ükütiu le angang ngeni Jiowa. Ika emön a chepetek pokiten an küna kapwüng, an ekilonei fiti iotek epwe tongeni älisi an epwe weweiti pwe mei fich an a küna kapwüng, me itä ürürün esap chepetek ren.​—Kölf. 119:165; Ipru 12:5-13.

A Osukosuk Ren Aweween Eü Afalafal?

10, 11. Ifa ussun sipwe tongeni älisi emön ese tipeeü ngeni eü äitien Paipel?

¹⁰ Eli ekkoch rese chüen fiti än Jiowa mwichen siip pun rese tipeeü ngeni eü äitien Paipel. Ekkewe chon Israel mi ngaselo seni fötek lon Isip “ra müttir manlükala an [Kot] kewe föför” fän äsengesiir me “resap awiti an öüröür.” (Kölf. 106:13) Eli epwe älisi emön ese chüen achocho ika sipwe ächchema ngeni pwe “ewe chon angang mi tuppwel o tipatchem” a kan akkawora möngö lon pekin lükü mi fokkun mürinnö. (Mt. 24:45) A ina ussun än emönewe poputä le käeö ewe enlet me loom. Iwe, itä pwata esap tipemecheres fän iten an epwe alenisefäli ewe alen enlet?​—2 Jon 4.

¹¹ Atun emön elter epwe sotun älisi ekkewe mi mwälechelo, epwe tongeni kapas ussun ekkoch nöün Jises kewe chon käeö ra likitalo pun rese tipeeü ngeni eü an kewe afalafal. (Jon 6:53, 66) Ren ar ükütiu le fiffiti Kraist me nöün kewe chon äppirü mi tuppwöl, a pöüt seniir ar pwapwa, me rese chüen aücheani mettochun Kot. Mei wor ia chokkewe mi ükütiu le fiffiti mwich repwe künökün möngö mi mürinnö lon pekin lükü ie? Aapw, pun esor!

A Tipis?

12, 13. Ika emön mi mwälechelo a pwäri pwe a tipis watte, epwe ifa ussun epwe küna älillis?

¹² Ekkoch rese chüen akkafalafal are fiffiti mwich pun ra tipis watte. Eli ra meefi pwe ika repwe pwäri tipisiir ngeni ekkewe elter, repwe katowu. Nge ika ra fen ükütiu seni ewe föfför mi ü ngeni äitien Paipel me ra enletin aier, resap katowu seni ewe mwichefel. (2 Kor. 7:10, 11) Nge, chon ewe mwichefel repwe etiwasefäliir me ekkewe elter repwe älisiir ar repwe pöchökkülsefäl lon pekin lükü.

¹³ Ika ekkewe elter ra awisa ngonuk om kopwe älisi emön ese chüen achocho, kopwe fet ika a pwär ngonuk pwe a tipis watte? Ussun a fen mak me mwan, kesap pwisin fönöü, nge kopwe pesei an epwe chuuri ekkewe elter. Ika ese mochen föri ena, kopwe änneta om aücheani itöchün Jiowa me feiöchün ewe mwichefel ren om atipeeüfengeni om föfför me än Kot emmwen. (Älleani Lifitikos 5:1.) Ekkewe elter ra silei ifa ussun repwe älisi emön ika a mochen achochosefäl me atipeeüfengeni manauan me letipen Kot. Eli repwe awora kapasen emirit fän tong. (Ipru 12:7-11) Ika emönewe a pwäri pwe a tipis ngeni Kot, ese chüen föfföri ewe föfföringaü, me a enletin aier, ekkewe elter repwe älisi, me Jiowa epwe tongeni omusalo tipisin.​—Ais. 1:18; 55:7; Jem. 5:13-16.

Liwinsefälin ewe Nöün Mwälechelo A Atoto Pwapwa

14. Kopwe apworausa lon pwisin om fos än Jises kapas awewe ussun ewe nöün mwälechelo.

¹⁴ Ewe mi wisen awora älillis ngeni emön mi mwälechelo epwe tongeni äppii ngeni än Jises we kapas monomon lon Luk 15:11-24. Ina pworausen ewe alüwöl a fangeseroulo älemwirian ren föfföringaü. Feil, feil, a nnouesini ngaüen manauan. A echik, a pwos, iwe, a filatä pwe epwele liwiniti leenian! Atun a chüen towau, seman a küna, a ssä ngeni, romi, mitiri, me uren pwapwa. Än emön mi mwälechelo lefareni ena kapas monomon epwe tongeni amwökütü an epwe liwiniti ewe mwichen siip. Pokiten ei ototen fönüfan epwele talo, epwe mwittir ‘liwiniti Jiowa,’ nge esap fokkun mmang!

15. Met popun ekkoch ra pase seni ewe mwichefel?

¹⁵ Lape ngeni chokkewe mi mwälech seni ewe mwichefel rese wesewesen löllö ngeni ewe nau lon ena kapas awewe. Ekkoch ra towauolo ekis me ekis, ussun chök efoch waa a pase seni fönü. Pokiten ra kon osukosuk ren aürekin manauer, pwal ekkoch ra tümününgaüa ar pacheöch ngeni Jiowa. Nge ekkoch ra pwisin kefisitä ar chepetek ren emön chon ewe mwichefel, are ra lo pokiten rese tipeeü ngeni eü äitien Paipel. Ekkoch chök ra tipis watte. Iwe nge, kopwe tongeni nöünöü ekkewe kapasen emmwen mi mak asan le älisi ekkewe mi mwälechelo ar repwe liwinsefäliti Jiowa me mwen an epwe kon mmang.

‘Nei, Sa Kilisou Pun Ka Liwinsefäl!’

16-18. (a) Ifa ussun emön elter a älisi emön brother a mwälechelo lon chommong ier? (b) Pwata a mwälechelo? Ifa ussun a küna älillis? Mei fet meefien ewe mwichefel ngeni?

¹⁶ Emön elter a apasa: “Ewe mwichen elter lon ach ei mwichefel ra meefi lamoten ar repwe äämwa ekkewe rese chüen achocho. Üa chemeni emön brother üa piin käeö ngeni me älisi an epwe silelo ewe enlet. Nge ükükün 25 ier, ese chüen achocho me a fokkun watte an osukosuk. Iwe, üa awewe ngeni pwe ika epwe apwönüetä ekkewe kapasen emmwen lon Paipel, epwe fokkun älisi. Feil, feil, a fitisefäli ekkewe mwich me a mochen käeösefäl fän iten epwe anükünüküsefäli an mochen liwiniti ewe mwichen siip.”

¹⁷ Pwata iwe chienach we a ükütiu seni an angang ngeni Jiowa? A apasa: “Üa akkomwa mettochun fönüfan me aürekin manauei lap seni ai ririöch ngeni Jiowa. Iwe, üa ükütiu le käeö, afalafal, me fiti mwich. Use mwo tepereni, nge üua fen pase seni ewe mwichefel. Nge än ewe elter enletin chchüngüei a älisiei le achochosefäl.” Mwirin än ena brother poputä le käeösefäl ewe Paipel, an kewe osukosuk ra kükkünütiu. A apasa, “Üa mirititi pwe met üa osupwangen, ewe tong me emmwen seni Jiowa me an we mwicheich.

¹⁸ Mei fet meefien chon ewe mwichefel ussun ena brother? A erä: “Üa meefi pwe üa ussun ewe nöün mwälechelo lon än Jises kapas awewe. Enlet, iei alon emön chinnap sister mi nom lon ewe mwichefel 30 ier loom nge a chüen tuppwöl le angang ngeni Jiowa: ‘Nei, sa kilisou pun ka liwinsefäl!’ A wesewesen kküü letipei. Üa meefi kinamwe pun ewe mwichefel, iei wesewesen ai famili. Üa mochen pwäratä ai kilisou chapur fän iten än ewe mwichefel me ena elter tong, älillisöch, mosonottam, me chchüngüei. Ar tongei Jiowa me chon orur kewe a wesewesen älisiei ai upwe liwiniti ewe mwichen siip.”

Peseer Ar Repwe Achochosefäl Iei Chök!

19, 20. Ifa ussun kopwe tongeni pesei ekkewe rese chüen achocho ar repwe achochosefäl iei chök? Ifa ussun kopwe tongeni äiti ngeniir pwe Kot esap kütta senikich minne sise tufichin föri?

¹⁹ Sia nonnom lon ekkewe rän le sopwoloon, nge epwele muchulo ototen ei fönüfan. Ina popun, pesei chokkewe mi mwälechelo ar repwe mwittir fitisefäli ach kewe mwich. Ächchema ngeniir pwe Setan a sotuni le atai ar ririöch ngeni Kot, me a mochen ar repwe ekieki pwe ika repwe likitalo ewe fel mi enlet, repwe ngaselo seni weiresin manauer. Kopwe tongeni alükülüküür pwe repwe enletin kinamwe ika repwe tuppwöl le äppirü Jises.​—Älleani Mattu 11:28-30.

²⁰ Ächchema ngeni ekkewe rese chüen achocho pwe Kot a mochen sipwe achocho ükükün ach tufich. Lupwen Meri, fefinen Lasarus we, a ninatiu lö mi mömmong woon möküren Jises me mwen an epwe mälo, ekkoch ra esiita, nge Jises a apasa: “Oupwe likitala neminei. . . . “Neminei a föri ükükün met a tongeni.” (Mark 14:6-8) Jises a mwareiti ewe fefin mi mä seni pwülüwan nge a chök kükkün an asor lon ewe imwenfel. A chök pwal föri ükükün an tufich. (Luk 21:1-4) Chommong leich sia tufichin fiffiti ach kewe mwich me afalafala ewe kapas allim. Ren än Jiowa älillis, chommong me lein ekkewe mi mwälechelo ra pwal tongeni föri ekkena mettoch.

21, 22. Met kopwe tongeni alükülükü ngeni chokkewe mi kulsefäliti Jiowa?

²¹ Ika emön mi towauolo a säüeiti an epwe künasefäli chienan kewe Chon Kraist, eli kopwe ächchema ngeni ewe pwapwa ewe nöün mwälechelo a küna lupwen a liwinsefäl. A pwal ina ussun pwapwaan chon ewe mwichefel ren chokkewe mi achochosefäl. Peseer ar repwe ü ngeni ewe Tefil me arap ngeni Kot iei chök.​—Jem. 4:7, 8.

²² Chokkewe mi kulsefäliti Jiowa repwe ketiw fän pwapwa. (KölK. 3:40) Fansoun ra angang ngeni Kot me loom, ra küna pwapwa chapur. Chokkewe mi liwinsefäliti ewe mwichen siip repwe pwal küna chommong feiöch lon mwachkkan!

Ifa Ussun Kopwe Pölüweni?

• Ifa ussun kopwe tongeni älisi emön Chon Kraist a chepetek me apwangapwangelo lon pekin lükü?

• Met sokkun pworaus epwe tongeni älisi emön a likitalo än Kot mwichen siip pokiten ese tipeeü ngeni eü afalafal?

• Epwe ifa ussun sipwe tufichin älisi emön mi pireir le liwiniti ewe mwichefel?

[Sasing lón pekin taropwe 19]

Aüselingöch atun emön chon lükü mi mwälechelo a pwärawu meefian

[Sasing lón pekin taropwe 21]

Eli ekkoch repwe fitisefäli ewe mwichen siip ika repwe ekilapei än Jises we kapas awewe ussun ewe nöün mwälechelo