Kütta Pworaus mi Enlet Usun Läng
A IFA me mürinnöön ewe äpilükülükün manau lon läng! Ewe äpilükülükün manau mwirin mälo a chöüfetäl lein ekkewe chon Muslim, Hindu, Buddhist me ekkewe tipitipin lamalamen Chon Kraist, pwal mwo nge iir kewe esor ar lamalam. Aramas ra kan anchangei pwe läng, ina eü leeni mi fokkun lingöch me apwapwa, ikena ie aramas ra tongeni ngas seni ar kewe riäfföü me chuursefäli attonger kewe mi fen mälo. Iwe nge, ei mwitun a pwüng ngeni lap ngeni aramas: Meinisin ra mochen feitä läng, nge esor a tipeni an epwe mälo pwe epwe feitä. Pwata a ina usun?
Ika Kot a förikich pwe sipwe mälo me mwirin feitä läng, iwe, itä aramas resap äneänei ar repwe mälo me mwittir feitä läng, usun chök emön semirit a atapwala an epwe mwittir wattetä are emön alüwöl mi mwötöresiti an epwe pwüpwülü? Nge lap ngeni aramas rese tipeni ar repwe mälo.
Inaamwo ika a ina usun meefier, nge ekkan chon afalafal ra erä pwe mwirin ach manau woon fönüfan ekis chök fansoun, sipwe feitä läng pun ina pükün leeniach. Äwewe chök, emön bishop lon Merika itan Theodore Edgar Cardinal McCarrick a erä: “Kot ese förikich pwe sipwe manau woon fönüfan, nge fen lon läng.” Pwal iei alon emön piresitenin loom lon ewe lamalamen Pirostan: “Popun sia manau, pun sipwe elingalo Kot me feitä läng, pun ina wesetään leeniach.”
Fän chommong, lüküen aramas usun manau lon läng mwirin mälo a longolong woon ekis chök pworaus ra küna are rong. Iei alon George Barna, piresitenin eü kompeni mi käeö meefien aramas usun lamalam: “Ekiekin chommong aramas usun manau me manau mwirin mälo a longolong woon sokkopaten mettoch, äwewe chök ren kachito, nikättik, me tutulap.” Emön pastor lon pekin Episcopalian lon Florida a erä: “Sise silei och mettoch usun läng chilon chök ach silei pwe ina leenien Kot.”
Iwe nge, lon Paipel, pworausen läng a wesewesen lamot. Me ren än Kot Kapas, ifa napanapen läng? Itä Kot a föratä aramas ar repwe nonnom läng? Ika aramas ra feitä läng, met repwe föri ikena ie?
[Ekis Pwóróus lón pekin taropwe 3]
Pwata chommong aramas ra mochen feitä läng, nge rese tipeni ar repwe mälo pwe repwe feitä?