Ämi Kana Nau, Apöchökkülalo Ämi Mochen Angang Ngeni Jiowa
“Lealualum kopwe chechemeni ewe mi foruk.”—SALAF. 12:1.
1. Ifa ewe etiwetiw ngeni semiritin Israel?
NÖÜN Jiowa we soufos Moses a öüröüra ekkewe samol fel me sou emmwenin Israel 3,500 ier loom, a ereniir: “Iwe, oupwe emwichafengeni ekewe aramas, mwän, fefin me semirit . . . , pwe meinisin repwe rongorong o kaiö usun ar repwe meniniti ewe Samol mi Lapalap ämi we Kot o tümwünüöchü le apwönüetä kapasen ei allük meinisin.” (Tut. 31:12) Iwe, mwän, fefin, me semirit ra mwichfengen pwe repwe fel ngeni Jiowa. Ewer, pwal mwo nge ekkewe semirit ra nonnom lein chokkewe mi aüseling, käeö, me äppirü än Jiowa emmwen.
2. Ifa usun Jiowa a pwäri an chchüngü ekkewe säräfö lon fansoun ekkewe aposel?
2 Le atun ekkewe aposel, Jiowa a chüen pwäralo an chchüngü ekkewe nau. Äwewe chök, a amwökütü ewe aposel Paul an epwe apachaalong kapasen emmwen mi weneiti ekkewe kükkün lon ekkewe taropwe epwe tinalo ngeni ekkewe mwichefel. (Älleani Efisus 6:1; Kolose 3:20.) Ekkewe Chon Kraist nau mi apwönüetä ekkena pesepes ra alapalo ar aücheani Semer we mi tong lon läng, iwe, ra küna feiöch seni.
3. Ikenäi, ifa usun ekkewe nau ra pwäratä ar mochen angang ngeni Jiowa?
3 Itä ekkewe nau ikenäi ra ketiw le mwichfengen pwe repwe fel ngeni Jiowa? Ewer! Ina minne, nöün Jiowa kewe aramas ekis meinisin ra pwapwa le küna än chommong nau lefareni än Paul ei kapasen pesepes: “Ousipwe ekiekifengeni usun ach sipwe tongeni alollolätai chienach ren ach eäni chen me föför mürina. Sisap likiti ach eti ach mwichfengen usun ekoch ra föföri. Nge sipwe fokun apöchökülafengenikich lefilach, pun sia silei pwe Ränin ach Samol a arapoto.” (Ipru 10:24, 25) Chommong semirit ra fiti semer kewe me iner lon ewe angangen afalafala Mwuun Kot we. (Mt. 24:14) Iteiten ier, fite ngeröü nau ra pwäratä ar tongei Jiowa seni letiper ren ar papataiselo, iwe, ra pwapwaiti feiöchün ar wiliti nöün Kraist chon käeö.—Mt. 16:24; Mark 10:29, 30.
Etiwa ewe Etiwetiw Iei
4. Ineet ekkewe nau ra tongeni etiwa än Kot etiwetiw le angang ngeni?
4 Än Salomon Afalafal 12:1 a apasa: “Iwe, lealualum kopwe chechemeni ewe mi foruk.” Epwe fite ierimi fän iten oupwe tufichin etiwa ewe etiwetiwen fel ngeni Jiowa me angang ngeni? Paipel ese affata. Ina minne, kosap pireir me ekieki pwe ka kon kükkün pwe kese tongeni angang ngeni Jiowa me aüseling ngeni. Sia peseok le etiwa ei etiwetiw, ese lifilifil ika fite ierum.
5. Ifa usun ekkewe sam me in ra kan älisi nöür kewe le feffeitä lon ar lükü?
5 Chommong ämi kana nau, sememi are inemi are iir me rüüemön ra älisikemi le feffeitä lon ämi lükü. Iwe, ika ina, oua usun chök Timoti, ewe lon Paipel. Inan we, Iunis, me inan we chinnap Lois ra äiti ngeni kapasen ekkewe taropwe mi pin seni chök le mönükolun. (2 Tim. 3:14, 15) Pwal ina chök usun än semom me inom käeö ngonuk Paipel, etuk le ikkiotek, me uweiuk ngeni ekkewe mwich me mwichelap, me äituk lon ewe angangen afalafal. Jiowa a pwisin awisa ngeni semom me inom ewe wis mi fokkun aüchea ar repwe äituk an kewe al. Ka kan aücheani ar tongeok me chchünguk?—SalF. 23:22.
6. (a) Me ren Kölfel 110:3, met sokkun fel a apwapwaai Jiowa? (b) Met sipwele pworaus usun?
6 Atun oua mämmääritä, Jiowa a mochen oupwe usun chök Timoti le ‘silei letipan, ren met mi mürina me unusöch, pwal met mi apwapwai i.’ (Rom 12:2) Ika ina, kosap chök fiffiti angangen ewe mwichefel pokiten chök mochenin inom me semom, nge pokiten ka pwisin mochen föri letipen Kot. Ika ka angang ngeni Jiowa seni mochenin letipom, epwe apwapwaai I. (Aisea 6:8) Iwe nge, ifa usun kopwe pwäratä pwe ka mochen apöchökkülalo om mochen akkaüseling ngeni Jiowa me älleasochisi an emmwen? Sipwele etittina eü me eü ekkewe ülüngät mettoch mi lamot ka tongeni föri. Ra weneiti käeö, iotek, me föfför.
Silei pwe Jiowa Wesewesen Emön
7. Ifa usun Jises a isetiw leenien äppirü ren an käeö Paipel, me met a älisi le föri ena?
7 Om äkkälleani Paipel iteiten rän, ina eü esissillen om mochen alapalo om angang ngeni Jiowa. Ka tongeni pwäkini om osupwang lon pekin lükü me akkangei silelap mi aüchea seni Paipel ren om äkkälleani iteitan. (Mt. 5:3) Jises a isetiw leenien äppirü. Lon eü fansoun, lupwen a 12 ierin, seman kewe me inan ra küna me lon ewe imwen fel, “a mot lein ekewe sense, a aüseling ngeniir o kapas ais ngeniir.” (Luk 2:44-46) Jises a fen mochen silefichi me weweiti ewe Paipel seni le kükkünün. Met a älisi le föri ena? Pokiten Meri me Josef ra angang ngeni Jiowa, ra wisen äiti ngeni Jises usun Kot seni chök le kükkünün.—Mt. 1:18-20; Luk 2:41, 51.
8. (a) Ineet atun ekkewe sam me in repwe poputä le fotukalong lon letipen nöür kewe ar tongei Kapasen Kot? (b) Apworausa lamoten än sam me in äkkäiti nöür kewe seni le kükkünür.
8 Pwal ina chök usun ikenäi, ekkewe sam me in mi niuokkusiti Kot ra esilla aüchean ar repwe fotukalong lon letipen nöür kewe ar mochen käeö ewe enlet lon Paipel seni chök le kükkünür. (Tut. 6:6-9) Ina met emön pwich itan Rupi a föri mwirin chök uputiwen nöün we mwänichi itan Josef. Iteiten rän a älleani ngeni ewe Nei Puken Pworausen Paipel. Nge lupwen nöün na a wattetä, a älisi le amwöchülükün ekkoch wokisin. Josef a feiöch seni än inan we äkkäiti? Ewer pwe mwirin chök an käeö fos, a tongeni uwawu pwisin meefian woon chommong pworaus seni Paipel. Iwe, atun a nimu ierin, a eäni an äeüin afalafal lon ewe Sukulen Afalafal.
9. Pwata a lamot om äkkälleani me ekilonei pworaus seni Paipel?
9 Ämi kana kükkün, oupwe eöreni le älleani Paipel iteitan. (Kölf. 71:17) Pwata ämi älleani Paipel epwe älisikemi le äsimaüetä? Iei alon Jises lon an iotek ngeni Seman we: “Iwe, iei manau esemuch: Ar repwe silei en, ewe eman chök Kot mi let.” (Jon 17:3) Pwüngün, ewin om alapalo om silei Jiowa, ewin epwe lapolo om lükü pwe i wesewesen emön me epwe pöchökkülelo om tongei i. (Ipru 11:27) Ina minne, iteiten om älleani eü kinikin seni Paipel, a alapalo om silei Jiowa. Pwisin eisinuk: ‘Met ei pworaus a äiti ngeniei usun Jiowa? Ifa usun ei pworaus a pwäri pwe Kot a tongeiei me chchüngüei?’ Om ekilonei ekkeei kapas eis repwe älisuk le silei ekiekin me meefien Jiowa me wisom ngeni. (Älleani Än Salomon Fos 2:1-5.) Kopwe usun chök Timoti le “lükü” met ka käeö seni Paipel, iwe, epwe amwökütuk le mochen fel ngeni Jiowa ren unusen letipom.—2 Tim. 3:14.
Iotek A Apöchökkülalo Om Tongei Jiowa
10, 11. Ifa usun om iotek epwe älisuk le apöchökkülalo om mochen angang ngeni Jiowa?
10 Oruuan, kopwe tongeni apöchökküla om mochen angang ngeni Jiowa seni letipom ren om kewe iotek. Sia älleani lon Kölfel 65:2: “Pun en ka aüselinga iotek. Aramas meinisin repwe feito reöm.” Pwal mwo nge atun Israel a nom fän ewe pwon lefiler me Kot, ekkewe chon ekis mi feito lon än Jiowa we imwen fel ra tongeni iotek ngeni. (1 King 8:41, 42) Iwe, Kot ese lifilifil aramas. Chokkewe mi älleasochisi an kewe allük ra tongeni lükülük pwe epwe aüseling ngeniir. (SalF. 15:8) Pwüngün, ämi kana nau, oua kapachelong lein ekkewe “aramas” Kot epwe aüselinger.
11 Chiechi mi enlet a longolong woon pwoppworausfengen. Eli ka pwapwa le pwärawu ekiekum me meefiom ngeni chiechiom mi ächengicheng me reom. A pwal chök ina usun om pwoppworaus ngeni ewe chon föruk ren om iotek ngeni seni letipom. (Fil. 4:6, 7) Fos ngeni Jiowa usun chök om pwärawu masouen letipom ngeni inom are semom mi tong, are emön chiechiom. Napanapen om ikkiotek a riri ngeni meefiom usun Jiowa. Kopwe küna pwe ewin a lapolo om chiechi ngeni Jiowa, ewin om kewe iotek repwe pwärawu wesewesen masouen ekiekum me letipom.
12. (a) Pwata ach kewe iotek esap chök ren fos? (b) Met epwe älisuk le mirititi pwe Jiowa a arap ngonuk?
12 Iwe nge, chechchemeni pwe iotek esap chök ren fos. A kapachelong alolloolun meefien letipom. Lon om kewe iotek, kopwe pwäri alolloolun om tong, süföl, me unusen lükülük woon Jiowa. Atun ka weweiti ifa usun Jiowa a kan pölüweni om kewe iotek, kopwe pwisin mirititi pwe Jiowa “a arap ngeni ir meinisin mi köri.” (Kölf. 145:18) Jiowa epwe arap ngonuk me apöchökkülok le ü ngeni ewe Tefil me filiöch lon manauom.—Älleani Jemes 4:7, 8.
13. (a) Ifa usun än emön sister chiechi ngeni Kot a älisi? (b) Ifa usun ach chiechi ngeni Kot epwe älisikich le ü ngeni etipetipaen täppich kewe?
13 Iei pworausen än Cherie pöchökkülelo ren an chiechi ngeni Jiowa. Lon high school, a angei esissillen an angöch lon pekin käeö me lon pekin urumwot. Lupwen a sochungio, a tongeni angei eü scholarship pwe epwe fiti sukul tekia. Iei alon Cherie: “Ina eü sossot ngeniei pun chiechiei kewe me nei kewe kouch ra etipetipaei le etiwa.” Iwe nge, a mirititi pwe an fiti sukul tekia epwe wewe ngeni an epwe äeä watteen fansoun le käeö lon pekin sukul me praktis ekkewe urumwot, nge esap chüen wor fansoun fän iten Jiowa. Met Cherie a föri? A apasa, “Ua iotek ngeni Jiowa, iwe mwirin, use chüen etiwa ewe scholarship, nge ua poputä le regular pioneer.” Iwe, iei a fen pioneer ükükün nimu ier. A apasa, “Use fokkun niamam. Ua pwapwa le silei pwe ai kefil a apwapwaai Jiowa. Pwüngün, ika sia akkomwa Mwuun Kot lon manauach, ekkewe ekkoch mettoch repwap kapach ngenikich.”—Mt. 6:33.
Föfföröch A Pwäri pwe a ‘Limelimöch Letipom’
14. Pwata om föfföröch a lamot me ren Jiowa?
14 Aülüngätin, ka tongeni pwäri pwe ka angang ngeni Jiowa seni letipom ren föfförum kewe. Jiowa a kan efeiöchü ekkewe nau mi limelimöch manauer. (Älleani Kölfel 24:3-5.) Samuel ese äppirü föfföringawen nöün ewe Samol-Fel mi Lap kewe, itan Ilai. Än Samuel föfföröch a pwäpwälo. “Ewe ät Samuel a mämäritä lon löllön o küna ümöümöch me ren ewe Samol mi Lapalap pwal me ren aramas.”—1 Sam. 2:26.
15. Ikkefa ekkoch popun kopwe achocho le föfföröch iteitan?
15 Ach ei fönüfan a ur ren aramas mi ekieki chök pwisin iir, lamalam tekia, älleasolapa semer kewe me iner, rese sile kilisou, ra rawangawei aramas, arochongaw, ra efich pwapwaan fönüfan, nge rese echeni Kot, iwe, ikkena chök ekkoch napanapangaw Paul a eiteita. (2 Tim. 3:1-5) Ina minne, a tongeni weires ngonuk om kopwe föfföröch lein chon ei otot mi ngaw. Iwe nge, iteiten fansoun ka föri minne a pwüng, nge kese fiti föfföringawer, ka ännetatä pwe ka peni än Jiowa pwüüng le nemenem. (Hiop 2:3, 4) Kopwe pwal meefi kinamwe ren om silei pwe ka etiwa än Jiowa tingor mi erä: “Nei, kopwe tipatchem o apwapwai lelukei, pwe üpwe tongeni pälüeni ätewe mi aitengauaei.” (SalF. 27:11) Pwal eü, om silei pwe Jiowa a pwapwa reom epwe apöchökkülatä om mochen angang ngeni.
16. Ifa usun emön sister a apwapwaai letipen Jiowa?
16 Atun emön sister itan Carol a fiti high school, a älleasochisi än Paipel kewe kapasen emmwen, iwe, a pwäpwälo an kewe föfföröch. Met a fis? Chienan kewe chon sukul ra esiita pun mwelien letipan ese mutatä an epwe fiti ekkewe ränin apwapwa me pwal apwapwaan mwuur. Lon ekkena fansoun, a tongeni äwewe ngeni aramas minne a lükü. Chommong ier mwirin, Carol a angei echö taropwe, makkeien emön chienan chon sukul: “Ua mochen erenuk seni chök me loom, ai kilisou ren om föfföröch, leenien äppirü, me pwora ren om kese fiti ekkewe ränin apwapwa. En ewe äkkäemönün Chon Pwäratä Jiowa ua chuuri.” Än Carol leenien äppirü a achchüngü letipen chienan we pwe a poputä le käeö Paipel. A mak ngeni Carol pwe a fen emön Chon Pwäratä Jiowa lap seni fäik ier! Ikenäi, ämi kana nau mi älleasochisi än Paipel kewe kapasen emmwen oua tongeni usun chök Carol le achchüngü aramas mi letip wenechar ar repwe silei Jiowa.
Ekkewe Nau Ra Mwareiti Jiowa
17, 18. (a) Met meefiom usun ekkewe nau lon om we mwichefel? (b) Met ekkewe nau mi süföliti Kot repwe küna lon mwachkkan?
17 Oukich meinisin lon än Jiowa mwicheich woon unusen fönüfan sia meseikeiti ekkewe ngeröün nau mi fiti ewe fel mi enlet fän tinikken! Ekkena nau ra apöchökkülalo ar mochen fel ngeni Jiowa ren ar äkkälleani Paipel iteiten rän, ikkiotek, me etipeeüfengeni manauer ngeni letipen Kot. Ekkena nau ra apwapwaai semer kewe me iner me pwal meinisin nöün Jiowa kewe aramas.—SalF. 23:24, 25.
18 Lon mwachkkan, ekkewe nau mi tuppwöl repwe nom lein chon ewe mwich mi lapalap repwe manaualong lon ewe otot mi fö Kot a fen pwonei. (Pwar. 7:9, 14) Me ikena ie, repwe küna chommong feiöch mi amwarar, ämääraatä ar aücheani Jiowa, me mwareiti i tori feilfeilo chök.—Kölf. 148:12, 13.
Ka Tongeni Äweweei?
• Ifa usun ekkewe nau ra tongeni fiti ewe fel mi enlet ikenäi?
• Pwata a lamot om ekilonei minne ka älleani seni Paipel?
• Ifa usun iotek a älisuk le arap ngeni Jiowa?
• Met mwiriloon än Chon Kraist föfföröch?
[Sasing lon pekin taropwe 17]
Ka kan eöreni le älleani Paipel iteitan?