Älisi Ekkewe Kükkün me Säräfö Ar Repwe Silefichi Än Jiowa Mwicheich
EKKEWE kükkün ra kan mochen silei chommong mettoch. Ekieki mwo, ekkewe semiritin Israel lon Isip, eli ra eäni ekkeei kapas eis lon ewe äeüin pwinin Pasofer: ‘Pwata a kawet ewe nieniföön siip?’ ‘Pwata Papa a tofatä ewe chcha woon ena asam?’ ‘Ia sipwe lo ia?’ Minne Jiowa a allükü ngeni ekkewe sam lon Israel a pwäratä pwe a etiwa ekkena kapas eis. Iei met Jiowa a ereniir usun ar repwe föri Ächechchemen ewe Pasofer: “Lupwen nöümi repwe aisinikemi, ‘Met wewen ei angang?’, oupwe üreniir, ‘Iei asorun än ewe Samol mi Lapalap Pasofer. Pun a lus me won imwen ekewe aramasen Israel lon Isip, lupwen a niela ekewe re Isip, nge esap niikich.’” (Eks. 12:24-27) Mwirin, Jiowa a ächema ngeni ekkewe sam me in lon Israel lamoten ar repwe pölüweni än nöür kewe kapas eis usun “ekewe allük me pwüüng” a fen allükü ngeniir.—Tut. 6:20-25.
A ffat pwe Jiowa a mochen ekkewe kükkün repwe silei pölüwen ar kana kapas eis usun fel mi enlet, pun a tongeni amwökütüür ar repwe tongei Jiowa ar Kot me Chon Amanau. A pwal ina usun meefien Jiowa ren ekkewe kükkün ikenäi. Ekkewe sam me in ra tongeni äiti ngeni nöür kewe ar repwe tongei Kot me nöün kewe aramas seni letiper ika ra älisiir le silefichi än Jiowa mwicheich me ekkewe feiöch repwe angei seni an kewe kokkot. Sipwe nengeni ifa usun ekkewe sam me in repwe föri ena mettoch.
Mwichefel Lon Fönüach
A lamot ekkewe semirit repwe silefichi ewe mwichefel ar famili a fiffiti. Ämi kana sam me in oupwe ukkuwei nöümi kewe ngeni ekkewe mwich iteitan. Ren ämi föri ena, oua apwönüetä än Jiowa ei allük ngeni chon Israel: “Oupwe emwichafengeni ekewe aramas, mwän, fefin me semirit . . . , pwe meinisin repwe rongorong o kaiö usun ar repwe meniniti ewe Samol mi Lapalap ämi we Kot o tümwünüöchü le apwönüetä kapasen ei allük meinisin. Iwe, nöür resamwo silei ei allük repwe rong o kaiö usun ar repwe meniniti ewe Samol mi Lapalap ämi we Kot.”—Tut. 31:12, 13.
Ekkewe semirit ra tongeni poputä le käeö än Kot Kapas seni lemönükolur. Iei alon ewe aposel Paul usun Timoti: “Seni chök lekükünum ka silei kapasen ekewe Toropwe mi Pin.” (2 Tim. 3:15) Ekkewe kükkün semirit ra pwal mwo nge tongeni weweiti ekkewe afalafal me silefichi ekkewe kölün mwich lon ewe Kingdom Hall. Ra pwal käeö ar repwe süföliti ewe Paipel me ekkewe puken äweween Paipel. Pwal och, lon ekkewe mwich repwe meefi ewe tong mi enlet mi esissillatä ekkewe chon Kraist mi enlet. Jises a apasa: “Üpwe ngenikemi eu allük mi fö: Oupwe echenifengenikemi lefilemi. Usun ngang üa echenikemi, iei usun pwal ämi oupwe echenifengenikemi. Are oupwe echenifengenikemi, aramas meinisin repwe silei, pwe ämi nei chok kaiö.” (Jon 13:34, 35) Än ekkewe semirit meefi ewe tong me lükülüköch lon ewe Kingdom Hall epwe älisiir le pwapwaiti me eörenalo ar repwe fiffiti mwich lon unusen manauer.
Ren ämi warekkäi iteitan ngeni ewe Kingdom Hall me pwal ekis nom särin ewe mwich, nöümi kewe ra tongeni chiechi ngeni ekkewe ekkoch. Resap chök chiechi ngeni täppir kewe, nge a öch oupwe paniir me peseer ar repwe pwal chiechi ngeni pwiich kewe meinisin. Ika ra chiechi ngeni ekkewe mi mwukolo, repwe küna watteen ar tipatchem me sile. Sekaraia ewe mi “aiti ngeni [Usia] usun an epwe niuokusiti Kot” a peseöchü ena Kingen Juta lupwen a chök kükkün ierin. Pwal ina chök usun ikenäi, ekkewe mi tuppwöl le angang ngeni Jiowa fitu, fitu ier ra tongeni peseöchü ekkewe kükkün. (2 Kron. 26:1, 4, 5) Lon ewe Kingdom Hall, oua tongeni äiti ngeni nöümi kewe ewe leenien iseis puk, leenien pworaus esilesil me metakkan.
Än Jiowa we Mwicheich Woon Unusen Fönüfan
A lamot ekkewe kükkün repwe weweiti pwe ewe mwichefel ra fiti, ina eü me lein ekkewe 100,000 mwichefel lon än Jiowa we mwicheich woon unusen fönüfan. Äweweei ngeniir kokkotun me angangen ewe mwicheich me met repwe föri pwe repwe älisatä. Apworausa ngeniir pwata oua mwötöresiti ekkewe mwichelap ra fiffis iteiten ier me än ewe elter mi säifetäl chuuri ewe mwichefel.—Nengeni ewe pwor “Käeö Ekkeei Pworaus Atun Än ewe Famili Fel,” lon pekin taropwe 26.
Ika mi tufich, etiwa ekkewe elter mi säifetäl, misineri, chon angangen Bethel me ekkewe pioneer pwe oupwe möngöfengen lon imwemi. Ousap ekieki pwe esor ar fansoun fän iten ekkewe semirit. Ra achocho le äppirü än Jises etiwaöchü me pwoppworaus ngeni ekkewe kükkün. (Mark 10:13-16) Ika nöümi kewe ra rongorong pworauser me küna pwapwaar lon ar angang mi fel, neman repwe pwal mochen angang ngeni Jiowa full-time.
Met unusen ewe famili ra pwal tongeni föri pwe repwe älisi ekkewe semirit le silefichi usun än Jiowa we mwicheich? Ikkeei ekkoch pesepes: Achocho le älleani ewe puk Jehovah’s Witnesses—Proclaimers of God’s Kingdom. Menlapei ifa usun nöün Jiowa kewe chon angang ra pwäratä tong, tipetekison, me tuppwöl. Äiti ngeniir ifa usun Jiowa a nöünöü iir le esilefetälei ewe kapas allim woon unusen fönüfan. Nöünöü ekkewe dvd me kaset, förien än Jiowa we mwicheich, le äiti ngeniir ekkewe pworaus mi lamot a fis loom pwal lon ei fansoun. Ika mi tufich, uweir ngeni ewe branch ofes me imwen Bethel mi kan ngenikemi are pwal lon ekkoch fönü. Ämi föri ena epwe älisi nöümi kewe le mirititi pwe ewe mwichen chon angang mi tuppwöl a kan emmweni än Jiowa mwicheich woon fönüfan, usun chök lon fansoun ekkewe aposel. Ra kokkotöch pwe repwe wisen awora kapasen emmwen me möngö lon pekin lükü.—Mt. 24:45-47; Fof. 15:22-31.
Asukula Semirit me ren Minne mi Fich ngeni Emön me Emön
Äppirü napanapen än Jises asukula nöün kewe aposel atun kopwe asukula noum kewe. Fän eü, Jises a ereniir: “Mi chüen wor chomong mettoch üpwe ürenikemi, nge epwe fokun weires ngenikemi iei.” (Jon 16:12) Jises ese äiti ngeni nöün kewe chon käeö chommong pworaus fän eü chök, nge ekis me ekis, a pwär ngeniir pwe repwe weweöchütiir. Pwal ina chök usun, ousap achommonga met oupwe äiti ngeni nöümi kewe fän eü chök, pwe ete weires ngeniir. Ika oua asukuler ekis me ekis iteitan usun än Jiowa mwicheich, iwe, repwe pwapwaiti le käkkäeö. Iwe, atun ra mämmääritä, epwe sissiwil minne a lamot ngeniir, ina minne, oua tongeni enniwili me alapalo minne oua asukula ngeniir.
Ewe mwichefelin Chon Kraist a wesewesen älisi ekkewe kükkün le apöchökküla ar ririöch ngeni Jiowa, me ar tinikken le föri angangen ewe mwichefel epwe atufichiir le ü ngeni än Setan kewe minen otuputup. (Rom 12:2) Aua lükülük pwe oupwe fokkun pwapwa lon ämi älisi nöümi kewe le silefichi än Jiowa we mwicheich. Ren an älillis, amwo nöümi kewe repwe amwöchü ar tuppwöl ngeni an we mwicheich me ewe Kot mi tong sia angang ngeni.
[Pwóór/Sasing lón pekin taropwe 26]
Käeö Ekkeei Pworaus Atun Än ewe Famili Fel
Ikkeei ekkoch pworaus mi weneiti än Jiowa mwicheich oua tongeni käeö atun ämi we Famili Fel.
▪ Pworausfengen usun uruwoon ämi mwichefel. Ineet me ifa usun a poputä? Menni ekkewe Kingdom Hall oua fen äkkäeä? Pwata ouse etiwa emön mi fen fiti ämi mwichefel langattam fansoun pwe epwe tongeni pölüweni än nöümi kewe kapas eis?
▪ Äweweei ngeni nöümi kewe popun an a kawor eü me eü ekkewe mwich me mwichelap, me ifa usun repwe küna feiöch seniir.
▪ Pworaus woon ewe popun ach mwicheich a poputääni ekkewe sokkopaten sukul. Apworausa uwaöchün angangen ekkewe chon sochungio seni ekkena sukul.
▪ Älisi ekkewe kükkün le mirititi lamoten ar wiliti chon afalafala ewe kapas allim iteitan. Äiti ngeniir ifa usun repwe tongeni kapachelong lon repotun ewe angangen afalafal woon unusen fönüfan mi mak lon nöüch we Yearbook.
▪ Pworaus woon ekkewe sokkopaten angangen full time mi suuk ngeni ekkewe kükkün me säräfö lon än Jiowa we mwicheich. Ren äweweöchün ekkena angang, nengeni Ach Angangen Afalafala ewe Mwu, minen March 2007, pekin taropwe 3.
▪ Älisi ekkewe kükkün me säräfö le weweiti lamoten ar repwe älleasochisi kokkotun ewe mwichefel. Äweweei lamoten ar resap pwisin nemenemeniir nge repwe nom fän emmwenien än Jiowa mwicheich, pwal mwo nge lon minne mi kisikis. Äiti ngeniir ifa usun repwe älisatä kokkotöchün ewe mwichefel ren ar fiffiti än ekkewe elter emmwen.
[Sasing]
Ekkewe sam me in ikenäi, usun chök chokkewe lon Israel loom, ra achocho le pölüwenöchü än nöür kewe kapas eis usun än Jiowa mwicheich
[Ekkewe sasing lón pekin taropwe 26]
Nöümi kewe repwe feiöch ren ar chiechi ngeni ekkewe mi angang ngeni Jiowa langattam fansoun