Achocho Pwe Om Famili Mi Pochokkul Lon Pekin Ngun
“Oupwe foleniochu ir ren sokkun amirit me fonou me ren ewe Samol.”—EFISUS 6:4.
1. Ifa an Kot we kokkot fan iten ewe famili, nge met a fisita?
“OUPWE NOUNOU o achomongakemi pwe fanufan epwe masou remi.” (Keneses 1:28) Ren ekkena kapas ngeni Atam me If, Jiowa Kot a poputaani ewe kokkotun famili. (Efisus 3:14, 15) Ewe aewin pean pupulu ra tongeni ekkekieki eu fonufan epwe ur ren nour kewe—eu eterengesin aramas mi unusoch me pwapwa lon eu paratis won fonufan ikewe meinisin mi tipeeu lon ar fel ngeni ar we Chon Forata Mi Lapalap. Nge Atam me If ra tipis, me ewe fonufan ese urelo ren aramas mi pwung mi niuokkusiti Kot. (Rom 5:12) Manauen famili a muttir ngauolo, me oput, mwanesol, me nafangauen “chen” a choufetal, akkaewin lon ekkeei “ran le sopolon.”—2 Timoti 3:1-5; Keneses 4:8, 23; 6:5, 11, 12.
2. Met sokkun tufich a nom ren mwirimwirin Atam kewe, nge met epwe lamot pwe eu famili epwe pochokkul lon pekin ngun?
2 Atam me If ra ffor lon lapalapen Kot kewe. Inaamwo ika Atam a fen wiliiti chon tipis, Jiowa a mutata an epwe nounou. (Keneses 1:27; 5:1-4) Ussun chok semer, noun Atam kewe ra tufichin weweiti minne mi pwung me ra tongeni kaeo le esinna minne mi pwung are mwaal. Repwe tongeni kaeo ifa ussun ar repwe fel ngeni ar we Chon Forata me ewe lamoten ar repwe tongei i ren unusen letiper, ngunur, ekiekir, me pochokkuler. (Mark 12:30; Jon 4:24; Jemes 1:27) Pwal och, repwe tongeni kaeo “mine a pwung o eani kirikiroch, . . . pwal tipetekison fan mesen . . . Kot.” (Mika 6:8) Iwe nge, pokiten ir chon tipis, epwe lamot ar repwe achocho pwe ar famili epwe pochokkul lon pekin ngun.
Awora Om Fansoun
3. Ifa ussun sam me in repwe tongeni ‘awora ar fansoun’ pwe repwe foleli semirit Chon Kraist?
3 Pokiten sia manau lon eu fansoun mi osukosuk me weires, a lamot ach sipwe achocho pwe nouch kewe repwe wiliiti aramas mi tongei Jiowa me wesewesen “oput minne mi ingau.” (Kol Fel 97:10) Sam me in mi tipatchem repwe ‘awora ar fansoun’ pwe repwe apwonueta wiiser mi weires. (Efisus 5:15-17, New World Translation) Ika en emon sam are in, ifa ussun kopwe fori ei mettoch? Akkom, kopwe filata ekkewe mettoch kopwe achocho ngeni, me akkomwa “minne mi murinno,” kapachelong ewe angangen asukula me emiriiti noum kewe. (Filipai 1:10, 11) Oruuan, siwili lapalapen manauom pwe kosap kon osukosuk. Epwe wewe ngeni om kopwe ukutiu seni ekkoch foffor rese kon lamot. Are kopwe poutalo ekkoch pisek a weires le tumunu. Pokiten ami sam me in Chon Kraist, ousap niamam pwe oua fen achocho le amaaraata noumi kewe pwe repwe niuokkusiiti Kot.—An Salomon Fos 29:15, 17.
4. Ifa ussun eu famili epwe tongeni amwochu ar tipeeu?
4 Ewe fansoun ami sam me in oupwe nonnom ren noumi kewe, akkaewin lupwen oua alisiir lon pekin ngun, esap solap nge epwe efisaata tipeeu lon ewe famili. Ousap chok fori fansoun chok ami tawe. Akkota ewe fansoun oupwe tongeni nonnomfengen. Esap wewe ngeni ami nonnomfengen lon imwemi, nge emon me emon epwe fori chok an mochen. Ekkewe semirit ra mammaaroch ika sam me in ra atenekiir iteiten ran. Repwe pwarata ar tongei me acheni nour kewe iteitan. Pwal mwo nge ewe fansoun me mwen ar filata pwe repwe nounou, ekkewe pupulu repwe ekiekifichi ei wiis mi lamot. (Luk 14:28) Iei ussun ar resap eani ewe sokkun ekiek pwe amaarin semirit eu chok wiis mi aweiresiir. Nge, repwe ekieki pwe ina wesewesen wiiser mi auchea.—Keneses 33:5; Kol Fel 127:3.
Asukuler Ren Kapas Me Foffor
5. (a) An sam me in asukula semirit le tongei Jiowa a poputa ren met? (b) Ifa ewe fon lon Tuteronomi 6:5-7 fan iten sam me in?
5 Ami aiti ngeni noumi kewe pwe repwe tongei Jiowa a poputa ren ami pwisin tongei i. Tong mi pochokkul fan iten Kot epwe amwokutukemi le akkalleasochisi an kewe alluk meinisin. Epwe kapachelong ami foleniochu noumi kewe “ren sokkun amirit me fonou me ren ewe Samol.” (Efisus 6:4) Kot a fonou sam me in ar repwe isetiu ewe leenien appiru fan iten nour kewe, ren ar fos ngeniir, me asukuleer. Tuteronomi 6:5-7 a apasa: “Kopwe echeni ewe Samol mi Lapalap om Kot ren unusen lelukom, ren unusen ngunum, pwal ren unusen tufichum. Ekei kapas ua alluk ngonuk ikenai repwe nom lon lelukom. Iwe, kopwe achocho le aiti ngeni noum kewe ekei kapas, kopwe pwal fos usur lupwen kopwe mot lon imwom pwal lupwen kopwe fetal won al, lupwen kopwe konola pwal lupwen kopwe pwata.” Ren ekkeei emmwen me enniwili poraus, oua tongeni aiti ngeni noumi kewe allukun Kot. Iwe, noumi kewe repwe kuna ami tong fan iten Jiowa me, mwirin oupwe pwal etipetiper le chiechioch ngeni.—An Salomon Fos 20:7.
6. Ifa ussun sam me in repwe alamota an semirit tufichin kaeo seni met ra kuna?
6 Semirit ra fokkun mochen kaeo. Ra tinikken le auseling me nennengeni och mettoch me ra muttir appiru ami foffor. Lupwen ra kuna pwe ouse akkomwa pisek lon manauemi, ei mettoch epwe alisiir le kaeo ifa ussun repwe alleasochisi allukun Jises. Oupwe aiti ngeniir pwe resap aurek ussun pisek nge repwe ‘kuttafichi lom an Kot mu.’ (Mattu 6:25-33) Ren ami kakkapasoch ussun ewe enlet lon Paipel, an Kot mwicheich, me ekkewe elter mi kefilita, oua aiti ngeni noumi kewe ifa ussun repwe sufoliiti Jiowa me aucheaani met a awora lon pekin ngun. Pokiten semirit ra muttir kuna ika oua wiliwilikis, ina minne epwe lamot pwe ami kapasen emmwen epwe fiti foffor me memmeef mi pwarata ami kilisou mi alollon fan iten ekkewe mettochun ngun. Epwe ifa me feiochun sam me in lupwen ra kuna pwe ar foffor murinno a fen uwaani tong watte fan iten Jiowa lon nour kewe!—An Salomon Fos 23:24, 25.
7, 8. Ifa ewe poraus a pwarata ewe lamoten ach emiriiti semirit seni le kukkunur? Ewe sopwoch a fis pokiten io?
7 Ei poraus seni Venezuela a pwarata aucheaan ach emiriiti semirit seni le kukkunuur. (2 Timoti 3:15) A weneiti eu pean pupulu, Felix me Mayerlin. Ir pioneer. Lupwen nour we at iten Felito a uputiu, ra fokkun achocho le foleliochu nour we pwe epwe enletin fel ngeni Jiowa. Mayerlin a poputa le allea ngeni Felito seni ewe puk Nei Puken Porausen Paipel, forien Chon Pwarata Jiowa. Seni le kukkunun, Felito a nikinikin esinna Moses me pwal ekkoch aramas lon ei puk.
8 Lupwen a chuen kukkun, Felito a poputa le pwisin afalafal. A tikeri an mochen wiliiti chon afalafala ewe Muu, me mwirin a papatais. Lo, lo, lo, Felito a regular pioneer. Seman me inan ra apasa: “Lupwen am aua atola feffeitaan noum we at, am aua miritiiti pwe a fis pokiten Jiowa me an emmwen.”
Alisi Semirit Le Mammaarita Lon Pekin Ngun
9. Met popun sipwe meefi kilisou fan iten ewe emmwen lon pekin ngun sia angei seni ewe chon angang mi tuppwol o tipatchem?
9 Mei wor chommong chassi, fitepuku puk, me fite ngerou poraus won computer ussun amaariten semirit. Fan chommong “ekkewe poraus ra u fengen,” alon eu poraus lon Newsweek ussun semirit. “Nge a pwal mwo nge eu minen alolilen lupwen a pwalo pwe eu poraus ka lukuluk won a fokkun mwaal.” Sia fokkun kilisou pwe Jiowa a fen awora chommong mettoch fan iten alillisin me feffeitaan famili lon pekin ngun! En mi unusen alamota ekkeei alillis ewe chon angang mi tuppwol o tipatchem a awora?—Mattu 24:45-47.
10. Ifa ussun an ewe famili kaeofengen lon Paipel epwe efeiochu sam me in me ekkewe nau?
10 Eu mettoch mi lamot, eu kkotun an ewe famili kaeofengen lon ewe Paipel, nge epwe fiffis iteitan, me lon kinamwe. Ika ewe kaeo epwe asukula, apwapwai, me apochokkula ewe famili, a lamot ar ammonlata. Ika ekkewe sam me in ra pesei nour kewe le uwau meefier, repwe tongeni silei met a nonnom lon letiper me ekiekir. Ika chon famili meinisin ra mwotores le fiti ewe kaeo, a pwalo sopwochun ewe kaeo.
11. (a) Met sokkun mettoch sam me in repwe tongeni alisi nour kewe le achocho ngeni? (b) Met a fisita lupwen emon nengnginin Japan a angang weires le apwonueta met a achocho ngeni?
11 An ewe famili achocho ngeni mettoch lon pekin ngun epwe pwal alisata ar pochokkulelo lon pekin ngun, me sam me in repwe alisi nour kewe le filata met repwe achocho ngeni. Eli repwe tongeni achocho ngeni ar alleani ewe Paipel iteiten ran, wiliiti emon chon afalafala ewe kapas allim, me ar feffeita ngeni ar repwe fangolo manauer ngeni Kot me papataiselo. Eli repwe pwal achocho ngeni pioneer, angang lon Bethel, are wiliiti emon misineri. Lupwen emon nengnginin Japan itan Ayumi a chuen fiti elementary school, a achocho le afalafal ngeni meinisin lon an we class. Ren an epwe alisata an chienan chon sukul mochen le auseling, a tingor ika epwe tongeni walong fitu nouch puken aweween Paipel lon ewe library. Pokiten an achocho, Ayumi a kaeo ngeni 13 lon ewe wonu ier a fiti elementary school. Emon me lein noun kewe chon kaeo me ulumon seni an ewe chon kaeo famili ra papataiselo.
12. Ifa ussun ekkewe semirit repwe tongeni angei feioch watte seni ekkewe mwich?
12 Fiffiti mwich a pwal lamot ika emon epwe pochokkul lon pekin ngun. Ewe aposel Paul a pesei chienan kewe chon luku pwe ‘resap ukutiu seni ar mwichfengen, usun ekkoch ra fori.’ Amwo sisap pwal eoreni ach etiwalo ekkewe mwich, pokiten kukkun me chinnap meinisin ra feioch watte seni ar fiffiti mwich. (Ipru 10:24, 25; Tuteronomi 31:12) Epwe lamot pwe ekkewe semirit repwe kait le auselingoch. Ammonlata fan iten mwich a pwal lamot, pokiten ewe feioch mi watte seni meinisin a feito seni an emon uwau meefian atun mwich. Ekkewe kukkun repwe tongeni poputa ren ar apasa ekkoch chok kapas are ren ar alleani eu kinikinin eu parakraf, nge epwe och ika ekkewe kukkun repwe kaeo le kutta poluen ekkewe kapas eis me awewei lon pwisin ar kewe kapas. Ami sam me in, oupwe isetiu ewe leenien appiru ren ami uwawu meefiemi iteitan? Epwe pwal och pwe emon me emon lon ewe famili epwe wor pwisin nour Paipel, puken kol, me eu kapiin ewe puk are chassi.
13, 14. (a) Met popun sam me in repwe mwin le afalafal me nour kewe? (b) Sam me in repwe fori met pwe ewe angangen afalafal epwe efeiochu me apwapwai ekkewe semirit?
13 Sam me in mi tipatchem repwe emmweni nour kewe le angang ngeni Jiowa atun ra chuen kukkun, me alisiir pwe repwe alamota ewe angangen afalafal lon manauer. (Ipru 13:15) Sam me in repwe tongeni awora minne mi lamot pwe nour kewe repwe wiliiti chon afalafal ‘rese saueiti och mettoch . . . mi forfichi lon ar anganga ewe kapas mi enlet,’ ika ra mwin le afalafal. (2 Timoti 2:15) Iwe, ifa ussumi? Ika en sam are in, oua kan alisi noumi kewe le ammonlata fan iten ewe angangen afalafal? Ika oua fori ei mettoch, iwe, ewe angangen afalafal epwe wiliiti fansoun apwapwa, murinno, me epwe uwaoch fan iter.
14 Met popun an sam me in mwin me nour kewe lon ewe angangen afalafal a murinno? Iei ussun, ekkewe nau repwe tongeni katon me appiru an semer me iner kewe foffor murinno. Lon pwal ena fansoun, sam me in repwe tongeni atola meefien, lapalapen, me tufichin nour kewe. Mwin me noumi kewe lon ekkewe sokkun afalafal meinisin. Ika oua tawe, emon me emon semirit epwe wor pwisin an pwoto le afalafal, kopwe pwal aiti ngeni ifa ussun epwe tumunu limelimochun me torotorochun. Pokiten ami ekkemiriiti me akkalisi noumi kewe, ar repwe aucheaani ewe angangen afalafal epwe lapelo, me repwe kuna pwe sia tongeni pwarata ach tongei Kot me chon oruch kewe ren ewe angangen afalafal.—Mattu 22:37-39; 28:19, 20.
Amwochu Om Pochokkul Lon Pekin Ngun
15. Pokiten a fokkun lamot pwe ewe famili epwe amwochu an pochokkul lon pekin ngun, ifa ussun repwe fori?
15 Kamwochunuk won pochokkulen ewe famili lon pekin ngun a fokkun lamot. (Kol Fel 119:93) Kopwe tongeni fori ei mettoch ren om popporausfengen ussun mettochun ngun me om famili. Oua foffori ewe lesenin ran? Ka akkaporausa ngeniir met a fiffis lon ewe angangen afalafal are och mettoch seni ewe minefoon Leenien Mas me Awake! “lupwen kopwe fetal won al”? Ka chechchemeni om iotekin kilisou ngeni Jiowa iteiten ran fan iten manauom me fan iten kaworan mi chommong “lupwen kopwe konola pwal lupwen kopwe pwata”? (Tuteronomi 6:6-9) Lupwen noum kewe ra kuna om tong fan iten Kot lon mettoch meinisin ka fori, ei mettoch epwe alisiir le alamota ewe enlet.
16. Met popun a lamot pwe ekkewe semirit repwe pwisin kaeo?
16 Fan ekkoch, ekkewe semirit repwe osupwangen emmwen fan iten ar repwe sopwoch le pwakini osukosuk are pwal och fitikoko a piita. Lape ngeni om chok ereniir met repwe fori, eli kopwe tongeni aiti ngeniir ifa ussun repwe silei an Kot ekiek ussun ewe osukosuk ren ar pwisin kaeo. Ika kopwe aiti ngeni ekkewe semirit ifa ussun repwe aea ekkewe minen alillis me puk ewe ‘chon angang mi tuppwol’ a awora, kopwe alisiir le alapalo ar ririoch me Jiowa. (1 Samuel 2:21b) Me lupwen ra aiti ngeni chon ewe famili uwaan ar kaeo, pochokkulen ewe famili lon pekin ngun a pwal lapelo.
Unusen Eani Lukuluk Won Jiowa
17. Met popun sam me in mi lipich resap letipechou ussun ar foleli nour kewe pwe repwe wiliiti Chon Kraist?
17 Ifa ussun ekkewe famili mei wor emon chok sam me in repwe tongeni pochokkul lon pekin ngun? Pwal och osukosuk ussun amaarin semirit a tori ekkeei sokkun famili. Nge ami sam me in mi lipich, ousap letipechou! Oupwe tongeni sopwoch. Sam me in mi lipich mi fen eani lukuluk won Kot, ra fen apwonueta alon an emmwen, me ra fen amaaraata semirit mi murinno me pochokkul lon pekin ngun. (An Salomon Fos 22:6) Pwungun pwe, a lamot an sam me in mi lipich unusen eani lukuluk won Jiowa. A lamot ar luku pwe Kot epwe alisiir.—Kol Fel 121:1-3.
18. Sam me in repwe tumunu menni osupwangen nour kewe lon pekin ekiek me aion, nge menni repwe akkomwa?
18 Sam me in mi tipatchem ra miritiiti pwe ‘a wor fansoun takir pwal fansoun pworuk.’ (An Salomon Afalafal 3:1, 4) Fansoun asoso me kunou mi ukuukoch me murinno a lamot ngeni maaritaan ekiekin me inisin ewe semirit. Kol mi och me akkaewin ekkewe kol mi mwareiti Kot epwe alisi ewe semirit le maaroch, me apochokkulata an ririoch me Jiowa. (Kolose 3:16) Fansoun sarafo ewe fansoun repwe ammonlata ngeni ar wiliiti aramas mi niuokkusiiti Kot, pwe repwe tongeni sopweilo le pwapwaesini manau feilfeilo lon paratis won fonufan.—Kalesia 6:8.
19. Met popun sam me in repwe tongeni luku pwe Jiowa epwe efeiochu ar achocho le foleni nour kewe?
19 JIowa a mochen pwe ekkewe familien Chon Kraist meinisin repwe amwochu ar pochokkul lon pekin ngun. Ika sia enletin tongei Kot me fori ukuukun ach tufich le alleasochisi an we Kapas, epwe efeiochu ach foffor me epwe ngenikich ewe pochokkul mi lamot pwe sipwe apwonueta an emmwen. (Aisea 48:17; Filipai 4:13) Chechchemeni mwo pwe ewe fansoun le asukula me emmweni noum kewe mi aukuk me esap chuen fisisefal. Kopwe achocho le apwonueta ewe fon lon an Kot we Kapas ren ukuukun om tufich, me Jiowa epwe efeiochu om angang le apochokkula om famili lon pekin ngun.
Met Sia Fen Kaeo?
• Met popun a lamot ach kamo ewe fansoun mi fich lupwen sia emiriiti semirit?
• Met popun a lamot pwe sam me in repwe isetiu leenien appiru mi murinno?
• Ikkefa ekkoch minen alillis mi lamot repwe alisata an semirit maarita lon pekin ngun?
• Ifa ussun eu famili epwe amwochu an pochokkul lon pekin ngun?
[Pictures on page 18, 19]
Famili mi pochokkul lon pekin ngun ra kakkaeo an Kot we Kapas, fiffiti mwich, me mwin le afalafal