Jises​—Ifa Usun Manauan

“Anei mongö ai üpwe aleasochisi letipen ewe mi tiniei o awesala ewe angang a awisa ngeniei.”​—JOHANNES 4:34.

ALON Jises ei asan a pwäralo met a akkakkomwa lon manauan. I me nöün kewe chon käeö ra säi unusen lesossor woon ekkewe ppanen Sameria. (Joh 4:6) Nöün kewe chon käeö ra ekieki pwe itä a echik, iwe ra eiti ngeni möngö pwe epwe möngö. (Joh 4:31-33) Minne a pölüwen ngeniir a menlapei popun manauan. Jises a aücheani an föri än Kot angang lap seni möngö. An föfför me kapas ra pwäralo pwe a akkakkomwa letipen Kot. Met a kapachelong lon ei?

▪ Asukula me Afalafala usun än Kot Mwu. Ewe Paipel a affata än Jises we angang: “A fetalfeil lon unusen Kalilea, a aiti ngeni aramas . . . a afalafala ewe Pworaus Allim usun ewe Mwün Kot.” (Mateus 4:23) Ese chök afalafal are esilefeili Mwuun Kot, nge a pwal asukuler ren an öüröürer me äweweöchü pworaus ngeniir. Mwuun Kot ina itelapen an we pworaus.

Lon unusen än Jises angangen afalafal, a äiti ngeni aramas weween än Kot we Mwu me met epwe apwönüetä. Nengeni alon Jises keei lon Paipel mi äweweei usun ewe Mwuun Kot.

▪ Mwuun Kot ina eü nemenem lon läng me Jises ewe King mi seikitä me ren Jiowa.​—MATEUS 4:17; JOHANNES 18:36.

▪ Ena Mwu epwe epinalo iten Kot me apwönüetä letipan woon fönüfan usun chök lon läng.​—MATEUS 6:9, 10.

▪ Jises a ereni ewe chon atai allük: “Kopwe etiei lon Paratis.” Fän nemenien Mwuun Kot fönüfan epwe wiliti eü paratis.​—LUKAS 23:42, 43, NW.

▪ Arapakkan chök ena Mwu epwele apwönüetä letipen Kot woon fönüfan.a​—MATEUS 24:3, 7-12.

▪ A Föri ekkewe Manaman. Jises a äkkäeüin sillelo pwe emön “Sense.” (Joh 13:13) Iwe nge, lon ekkewe ülüngät esopw ierin an afalafal a pwal föri ekkewe manaman. A föri ekkena ren ruu popun. Äeüin, ra ännetatä pwe i a wesewesen künöto me ren Kot. (Mateus 11:2-6) Oruuan, ra pwäratä met epwe föri atun a Kingen ena Mwu, nge epwe fen kon lap seni minne a föri lupwen  a nonnom woon fönüfan. Ikkeei ekkoch me lein ekkewe manaman a föri.

▪ A ammasösölo ewe mölümöl me alüaloi ewe säät.​—MARKUS 4:39-41.

▪ A echikaraatä ekkewe mi samau, ekkewe mi chun, selingepüng, me pechemä.​—LUKAS 7:21, 22.

▪ A awora chommong möngö me amöngööni ekkewe pwiin aramas mi echik.​—MATEUS 14:17-21; 15:34-38.

▪ A mak fän ülüngät an amanauatä ekkewe mi mälo.​—LUKAS 7:11-15; 8:41-55; JOHANNES 11:38-44.

Anchangei mwo usun manauen aramas fän nemenien ena King mi fokkun manaman!

▪ A Pwäralo Napanapen Jiowa Kot. Ese wor emön a tongeni unusen äiti ngeni aramas usun Jiowa me lükün pwisin Nöün we, ewe a fen sillelo pwe i Jises Kraist. Jises a nonnom ren Jiowa lon läng langattam fansoun lap seni ekkewe chon läng pokiten i ewe “mwänichi, a tekia seni förien Kot meinisin.” (Kolose 1:15) A suuk ngeni Jises lon ekkena fansoun an epwe silefichi ekiekin Seman we, minne letipan me an ekiek usun minne mi pwüng me mwääl.

A pwüng än Jises erä: “Esap wor eman a silei ewe Nau, pwe ewe Sam chök, esap pwal wor eman a silei ewe Sam, pwe ewe Nau chök me chokewe ewe Nau a filiiretä pwe epwe pwäri i ngeniir.” (Luk 10:22) Atun Jises a nonnom woon fönüfan, a fokkun pwapwa le pwäratä usun Seman we. Nge an äweweei usun I mi sokkolo pun a fos usun minne a silei me pwisin käeö lupwen a nonnom ren Seman na mi lingemwar me tekia seni meinisin.​—Joh 8:28.

A äiti ngeni aramas tekison minne a fen käeö seni Seman we lon läng. Nge a föri fän eü napanap mi mecheres ngeniir le weweiti me apwönüretä.

Nengeni ruu mettoch mi lamot Jises a pwäralo napanapen Seman we ren.

▪ A pwäratä minne mi enlet usun Jiowa ren itan we, an kokkot me an kewe al.​—JOHANNES 3:16; 17:6, 26.

▪ Föfförün Jises kewe ra pwäralo chommong sorosoröchün Jiowa kewe mi echipwör. A unusen mwirifichi Seman we, ina popun a tongeni erä pwe ‘Ika oua mochen silei usun Semei we oupwe chök silei seni ämi nenengeniei.’​—JOHANNES 5:19; 14:9.

Sia ingemwareiti napanapen manauen Jises. Sipwe tongeni küna feiöch wachemwuk ika sipwe etittina popun an mälo me apwönüetä minne sia käeö.

[Pwóróus fan]