“Esap Chüen Wor Eman Epwe Chechemeni Ekewe Mettochun Lom”

MINNE sia chemeni a tongeni eü feiöch. Ach ekieki ekkewe fansoun mi apwapwa ren attongeach kewe a ekinamwei letipach. Nge pwal fän ekkoch, minne sia chemeni eli epwe äweiresikich. Ka riäfföü ren om chemeni minne a fis lon manauom? Ika ina, eli ka ekieki, ‘Ra tongeni molo ekkeei mettoch ua chemeniir mi eriäfföü? Sia küna pölüwan mi anükünük lon makkeien ewe soufos Aisea.​—Älleani Aisea 65:17.

Jiowa a tipeni an epwe amoielo popunlapen a eriäfföü minne sia chemeni. Ifa usun? Ren an ataielo ei otot mi ngaw fitifengen meinisin an kewe riäfföü me siwil ngeni ekkewe mettoch mi fokkun mürinnö. Me ren Aisea, Jiowa a pwonei: “Nengeni, üpwe föri eu läng mi fö me eu fanüfan mi fö.” Ach weweiti ei pwon a tongeni auralo letipach ren äpilükülük.

Met weween ei läng mi fö? Ewe Paipel a awora ruu minen älillis pwe sipwe tongeni weweiti. Äeüin, pwal rüüemön chon makkeei Paipel ra fos usun ewe läng mi fö, iir me ruu ekkena pworaus ra riri ngeni och siwil watte woon fönüfan. (2 Piter 3:13; Pwarata 21:1-4) Oruuan, lon ewe Paipel ewe kapas “läng” a tongeni wewe ngeni nemenem, are mwu. (Aisea 14:4, 12; Taniel 4:25, 26) Ewe läng mi fö, ina eü mineföön nemenem a tufich an epwe poputääni eü napanap mi pwüng woon fönüfan. A wor eü chök nemenem a tufichin föri ekkena mettoch meinisin. Iwe, Jises a asukulakich ach sipwe ioteki än Kot we Mwu, ewe nemenem lon läng. Ena Mwu epwe efisi pwönütään letipen Kot we mi pwüng woon unusen fönüfan.​—Mattu 6:9, 10.

Met weween ewe fönüfan mi fö? Sipwe nengeni ruu pworaus lon ewe Paipel epwe älisikich le eäni ekiek mi pwüng. Äeüin, lon ewe Paipel ewe kapas “fönüfan” fän ekkoch a wewe ngeni aramas, nge esap wesewesen ewe fönüfan. (Kölfel 97:1) Oruuan, ewe Paipel a oesini pwe fän nemenien Kot, ekkewe aramas mi tuppwöl repwe käeö föfförün pwüng, ina met epwe chöüfetäl woon unusen fönüfan. (Aisea 26:9) Ewe fönüfan mi fö a wewe ngeni eü mwichen aramas mi anomuur fän nemenien Kot me manauer a tipeeü ngeni an kewe allük mi pwüng.

Ka poputä le küna ifa usun Jiowa epwe äwesi ewe popun minne sia chemeni a äweiresi letipach? Arapakkan chök Jiowa epwele unusen apwönüetä an we pwon usun eü läng mi fö me eü fönüfan mi fö. I epwe föratä eü fönüfan mi fö mi pwüng.a Lon ena fönüfan mi fö, esap chüen wor popun ekkewe mettoch sia chemeni nge mi eriäfföükich lon pekin aion, pekin ekiek, me pekin memmeef. Ekkewe aramas mi tuppwöl repwe unusen pwapwaesini manauer. Repwe aücheani minne epwe fis lon manauer mi apwapwa iteiten rän.

Nge epwele fet ewe riäfföwün ekiek me memmeef sia kükküna ikenäi? Än Jiowa we pwon a sopwosopwolo me ren Aisea: “Esap chüen wor eman epwe chechemeni ekewe mettochun lom o ekieki usun.” Epwe morolo ekis me ekis sokkopaten riäfföü sia fen küna lon ei fönüfanen lom. En mi saani ei sokkun äpilükülük? Ika ina, pwata kesap kütta ifa usun kopwe arap ngeni Kot, ewe mi pwonei ei äpilükülük mi amwarar?

[Ekis Pwóróus lón pekin taropwe 12]

Jiowa a tipeni an epwe amoielo popunlapen a eriäfföü minne sia chemeni