Sópwólóón Ewe Fénúfan Niwokkus, Mwétéres Me Lichippúng

Met meefiom usun December 21, 2012, ewe rán lón néún chón Maya we pwinin maram, ewe chómmóng ra apasa pwe epwe fis eú ekkesiwil wóón unusen fénúfan? A lóngólóng wóón met ka ekiekin kúna, eli kopwe meefi pwe ka ngaseló, lichippúng are chipwang. Esap fen pwal ina chék eú oesini mi mwáál fán iten sópwólóón ewe fénúfan?

Nge met weween “lesópwólóón ewe fénúfan” lón ewe Paipel? (Mateus 24:3, King James Version) Ekkóch ra niwokkus pwe ewe fénúfan epwe kkareló. Ekkóch ra mwétéres le mochen kúna met epwele fis lesópwólóón ewe fénúfan, nge chómmóng ra fen chipwang le rongorong usun. Itá ekkena sókkun memmeef ra lóngólóng wóón pwóróus ese pwúng lap seni pwóróus mi pwúng?

Kopwele mmen máirú le silei met ewe Paipel a wesewesen apasa usun sópwólóón ewe fénúfan. Ewe Paipel ese chék awora ngenikich ekkewe popun sipwe mwétéresiti ewe ránin lesópwólóón, nge a pwal fósun ewe lichippúng a tongeni fis ika a nikinikin lu seni ewe atun epwe war ewe sópwólóón. Sia etiwok pwe kopwe nengeni seni ewe Paipel pélúwan ekkóch kapas eis usun sópwólóón ewe fénúfan.

Ewe fénúfan epwe itá kkareló?

PÉLÚWAN ME REN PAIPEL: “[Kot] Ka anükätiu fanüfan won longolongun kewe, pwe esap fokun mwökütüküt tori feilfeilachök.”​—KÖLFEL 104:5.

Ewe fénúfan esap taló, esap ren ekkei are ren och mettóch. Iwe nge, ewe Paipel a asukula pwe ei fénúfan ina leenien aramas tori feilfeiló. Kölfel 37:29 a apasa: “Ekewe chon pwüng repwe fanüeni ewe fanü o nonom won tori feilfeilachök.”​—Kölfel 115:16; Aisea 45:18.

Mwirin án Kot fératá fénúfan, a apasa: “a fokun öch,” me a chúen ina usun meefian. (Keneses 1:31) Ese mwo nge wor lón an kókkót pwe epwe ataieló ei fénúfan, nge a fen pwonei pwe epwe ‘nnieno ekkewe ra ataieno fonufan’ me túmúnú ewe fénúfan seni an epwe tafóchóló.​—Pwärätä 11:18, Ewe Kapasen God (KG)

Eli kopwe ekieki usun 2 Petrus 3:7. Ena wokisin lón Paipel a apasa: “Ekewe läng me ei fanüfan mi nom iei ra iseis ren ewe chök kapasen Kot pwe repwe tala ren ekkei.” Iwe met, esap pwe ei wokisin a affata pwe ewe fénúfan epwe kkareló? Fán ekkóch ewe Paipel a néúnéú kapas áwewe fán iten ekkeei kapas “läng,” “fanüfan” me “ekkei” pwe epwe esissillatá och mettóch. Áwewe chék, atun Kölfel 97:1 a apasa: Ewe “fanüfan epwe meseik,” a néúnéú “fanüfan” pwe epwe wewe ngeni aramas.

Lón 2 Petrus 3:7 a affata pwe ekkewe láng, fénúfan me ekkei, iir kapas áwewe chék. Lón wokisin  5 me 6 a aléllé ngeni ewe Noter lón fansoun Noa we. Nge lón ena atun, ekkewe aramas me lóóm ra taló nge ach ei fénúfan ese móróló. Iwe nge, ewe Noter a nieló ekkewe aramas are “fanüfan” mi eáni féfférún akkachofesá. A pwal ataieló eú sókkun “läng,” weween ekkewe mi nemeni aramas wóón fénúfan. (Keneses 6:11) A pwal ina chék usun ren 2 Petrus 3:7 a oesini usun ekkewe aramas mi ngaw me ar kewe mwú mi pworoingaw repwe tafóch usun itá ren ekkei.

Met epwe fis lesópwólóón ewe fénúfan?

PÉLÚWAN ME REN PAIPEL: “Fanüfan me mettochun lon aramas ra kon mochenia ngeni repwe morola, nge iö a föri letipen Kot epwe manau tori feilfeilachök.”​—1 JOHANNES 2:17.

“Ewe fanüfan” epwe móróló, a wewe ngeni ekkewe aramas manawer ese tipeeú ngeni letipen Kot nge esap wesewesen ei fénúfan. A usun emén tokterin reirei eli epwe reiewu eféú pwo mi kanser pwe epwe álisi ewe mi samau pwe esap máló seni, Kot epwe “poku” ekkewe aramas mi ngaw pwe ekkewe mi múrinné ra tongeni enletin pwapwaesini manawer wóón fénúfan. (Kölfel 37:9, TF) Ren och weween, “lesópwólóón ewe fénúfan” ina eú mettóch mi múrinné.

Ena sókkun ekiek mi múrinné usun “lesópwólóón ewe fénúfan” a pwúngú ngeni ekkóch afféún ewe Paipel, iei usun ra afféwú “lemúchúlóón ewe ótót” are “sopolon ei fansoun.” (Mateus 24:3, TF) Pokiten aramas mi múrinné me ei fénúfan ra chúen nóm mwirin ewe sópwólóón, iwe, a ffat pwe eú ótót sefé epwe fis mwirin. Paipel a kapas usun ena “fansoun epwe feito.”​—Lukas 18:30.

Jesus a eita ngeni ena fansoun, “fansoun mettoch meinisin repwe försefäl.” Lón ena atun, epwe eliwinisefáli ngeni chón fénúfan ewe napanap Kot a fen aotaló me lepoputáán. (Mateus 19:28) Iwe sipwele pwapwaiti

• Eú paratis wóón fénúfan mi núkúnúkéch me esap chúen wor emén epwe osupwang.​—Aisea 35:1; Mika 4:4.

• Angang mi lamot me apwapwa.​—Aisea 65:21-23.

• Chikaretáán meinisin mi samau.​—Aisea 33:24.

• Sáráfésefálin ekkewe chinnap.​—Hiop 33:25.

• Manawsefálin ekkewe mi máló.​—Johannes 5:28, 29.

Ika sia féri “letipen Kot,” minne a mochen sipwe féri, a lamot sisap niwokkusiti sópwólóón ei ótót. Iwe nge sipwe fen mwétéresiti ach sipwe kúna.

Itá sópwólóón ewe fénúfan a fókkun arapoto?

PÉLÚWAN ME REN PAIPEL: “Ina chok pwan ussun, nupwen oua kuna ekkei mettoch a fis, oua sinei pwe ewe Muun God a arapeto.”​—LUKAS 21:31, KG.

Lón ewe puk The Last Days Are Here Again, emén sense itan Richard Kyle a makkeei pwe ekkewe “ekkesiwil mi mwittir fis me án aramas fitikoko ra efisatá an chómmóng aramas repwe oesini usun sópwólóón ewe fénúfan,” ákkáeúin, ika ra weires le áweweei ika pwata a fis ewe ekkesiwil me fitikoko.

Iwe nge ekkewe soufós lón Paipel ra filatá ar resap makkeei usun ewe sópwólóón fán iten ar repwe áweweei ika met popun ekkewe mettóch mi ngaw ra fiffis lón ar na fansoun. Nge Kot a emmweniir pwe repwe fen áweweei ekkewe napanap mi pwári kkanotoon sópwólóón ei ótót. Sipwe ppii ekkóch ekkeei oesini me pwisin filatá ika ra pwéppwénúetá lón ach ei fansoun.

• Maun, lengita, chechchechin fénú, me sókkópaten semmwen mi nieló aramas.​—Mateus 24:7; Lukas 21:11.

• A fókkun watteeló féffér mi ngaw.​—Mateus 24:12.

• Talóón fénúfan ren aramas.​—Pwärätä 11:18, KG.

• Aramas mi tongei pwisin iir, tongei moni, me aúcheani minne repwe pwisin pwapwa ren, nge resap tongei Kot.​—2 Timoty 3:2, 4, TF.

• Talóón ririin famili.​—2 Timoty 3:2, 3.

• Chómmóng rese áfánni ekkewe esissil usun kkanotoon ewe sópwólóón.​—Mateus 24:37-39.

• Afalafalfeilin ewe kapas allim usun Mwúún Kot wóón unusen fénúfan.​—Mateus 24:14.

Usun met Jesus a apasa, lupwen sia kúna “ekei mettoch”meinisin, sipwe silei pwe sópwólóón ei ótót a arapoto. (Mateus 24:33) Chón Pwáraatá Jiowa ra lúkú pwe mi pwúng ewe pisekin ánnet me ra apwóróusa ar lúkú ngeni aramas ren ar afalafal lón 236 fénú.

Mwáállilóón ewe atun sia ésúkúsúkú ewe ránin sópwólóón a itá wewe ngeni pwe esap chúen war?

PÉLÚWAN ME REN PAIPEL: “Lupwen aramas ra apasa, ‘Mettoch meinisin a kinamwe o nükünüköch’, mürin feiengau epwe müttir toriir usun cheuchen fam a tori eman fefin, nge esap wor eman aramas epwe tongeni sü seni.”​—1 TESALONIKA 5:3.

Ewe Paipel a alélléfengeni katalóón ewe fénúfan me metekin néúnéú, weween metekin ewe inelap epwe fiffis me weiweitá. Ewe fansoun ngeni ewe sópwólóón, a usun ewe fansoun pwopwo, ewe inelap a silei pwe ika a wakkatteló an metek, ina esissillen pwe epwele néúnéúló. Néún we tokter eli epwe chék árere ewe atun epwe néúnéú, nge ikaamwo a luló ewe fansoun, neminnewe a chúen lúkúlúk pwe ekiseló néún we epwe uputiw. Pwal ina chék usun, mwáállilóón án aramas ésúkúsúkú ewe sópwólóón epwe itá war lón, esap siwili ekkewe pisekin ánnet mi affata pwe ikkeei ekkewe “ränin lesopolan.”​—2 Timoty 3:1.

‘Ika ewe esissil a fókkun fataffatéch pwe iei sia akkarap ngeni ewe sópwólóón,’ eli kopwe eis: ‘Nge pwata chék mwo chómmóng aramas rese esilla?’ Ewe Paipel a affata pwe atun epwe arapakkanoto ewe sópwólóón, chómmóng repwe tunaló ekkewe pisekin ánnet. Lap seni ar repwe fen mirititi lamoten ekkena ekkesiwil atun ewe ránin lesópwólóón, ra fen esiita ren ar apasa: “Seni chok fansoun semach kewe ra mourelo, mettoch meinisin ra usun we chok seni popun lom.” (2 Petrus 3:3, 4, TF.) Nge a fataffatéch esissillen ewe ránin le sópwólóón, nge chómmóng ra chék tunaló.​—Mateus 24:38, 39.

Lón ei lesen a wor ekkóch pisekin ánnet seni Paipel pwe ewe sópwólóón a arapoto.a En mi mochen alapaaló óm silei? Ika ina, iwe, pwata kese fós ngeni ekkewe Chón Pwáraatá Jiowa pwe ka mochen repwe káé ngonuk ewe Paipel, nge ese kamé? Ekkena fansoun káé a tongeni fis lón imwom, lón pwal eú leeni a kinamwe ngonuk, are fen pwal wóón phone. Nge ewe eú chék mettóch kopwe awora, ina óm fansoun, nge ewe feiéch kopwe kúna a kon luló múrinnéén.