Ineet Epwe War ewe Sópwólóón? Minne Jesus A Apasa

IKKEEI RUU PWÓRÓUS JESUS A APASA USUN EWE SÓPWÓLÓÓN:

“Iei mine oupwe mamasa, pun ousap silei lon meni rän ika kulok Nöün Aramas epwe war lon.”​—MATEUS 25:13.

“Oupwe mamasa o afälikemi, pun ousap silei inet ewe fansoun epwe war lon.”​—MARKUS 13:33.

Ina popun, ese wor emén wóón fénúfan a enletin silei ika ineet epwe war sópwólóón ei ótót. Iwe nge, Kot a fen filaaló ewe “fansoun epwe war” me tichikin ewe “rän are ewe kulok” ewe sópwólóón epwe war lón. (Mateus 24:36) Iwe itá a wewe ngeni pwe sisap fókkun silei ika ewe sópwólóón a arapoto? Esap ina. Jesus a fen ereni néún kewe chón káé ar repwe ékkéúrú fitu mettóch repwe fis mi esissillatá arapotoon ewe sópwólóón.

ESISSIL

Ekkena mettóch repwe fis, ina esissillen “ewe fansoun sopolan.” Jesus a erá: “Fanü me fanü repwe fiufengen o mwü me mwü repwe maunfengen. Epwe wor lengita me chechechin fanü ekis meinisin.” (Mateus 24:3, 7) A pwal erá pwe epwe wor “mätter,” weween ekkewe sókkun semmwen mi mwittir chéúfetál wóón fénúfan. (Lukas 21:11) Ka kúkkúna an a fiffis ekkena mettóch Jesus a oesini usur?

Aramas lón ach ei fansoun ra riáfféú pokiten maun, echik, me chechchechin fénú, me pwal ekkewe sókkopaten semmwen mi chék akkatapw. Áwewe chék, lón ewe 2004 a fis eú watteen chchechin fénú lón ewe Indian Ocean mi efisi eú tsunami mi nieló 225,000 aramas. Lón úkúkún úlúngát, ewe COVID-19 pandemic a nieló ina epwe 6.9 million aramas wóón unusen fénúfan. Jesus a erá pwe ekkena sókkun mettóch repwe ánnetatá pwe sópwólóón ei ótót a arapoto.

“EKEWE RÄNIN LESOPOLAN”

Ewe Paipel a erá pwe ekkewe fansoun mwen chék warotoon ewe sópwólóón, ra iteni “ekewe ränin lesopolan.” (2 Petrus 3:3, 4) Me ren 2 Timoty 3:1-5, atun ekkewe ránin lesópwólóón, epwe ngangngawoló napanapen manawen aramas. (Ppii ewe pwóór “Me Mwen Chék Sópwólóón Ei Ótót.”) En mi kúkkúna ekkewe sókkun aramas lón ei fansoun iir mi ekieki chék pwisin iir, tipemmóng, eáni féfférún akkachofesá, me ese wor ar tong? Pwal ikkena ekkewe pisekin ánnet pwe sia nóm lesopwuchikin ei ótót.

Epwe ifa ttamen ekkena ránin lesópwólóón? Me ren ewe Paipel, pwe ‘a mochomoch chök ewe fansoun.’ Mwirin, Kot epwe nieló “chokewe mi afeiengaua fanüfan.”​—Pwärätä 11:15-18; 12:12.

EWE PARATIS WÓÓN FÉNÚFAN A ARAPOTO!

Kot a fen filaaló ewe rán me kulók epwe asopwaló ei ótót mi ngaw lón. (Mateus 24:36) Nge a pwal wor eú pwóróus allim, pwe Kot “esap mochen pwe eman epwe pöütmwälila.” (2 Petrus 3:9) A suuki ngeni aramas ar repwe káé usun letipan me álleasochisi. Pwata? Pún a mochen ach sipwe manawewu seni sópwólóón ei ótót, me manaw lón an we ótót séfé atun ei fénúfan epwe wiliti eú paratis.

Kot a fen akkóta eú angangen asukul wóón unusen fénúfan pwe epwe álisi aramas le silei ifa usun repwe manaw lón ewe ótót séfé fán nemenien Mwúún we. Jesus a erá pwe kapas allimen ewe Mwúún Kot epwe afalafalfeil “won unusen fanüfan.” (Mateus 24:14) Wóón unusen fénúfan, Chón Pwáraatá Jiowa ra néúni fite billion awa le afalafala me asukula aramas pwóróus seni Paipel mi awora ápilúkúlúk. Jesus a erá pwe ena angangen afalafal epwe fis wóón unusen fénúfan me mwen warotoon ewe sópwólóón.

A chék arapakkan an epwele much án aramas nemenem. Nge a wor eú pwóróus allim, pwe ka tongeni manawewu seni sópwólóón ei ótót mi ngaw, me nóm lón ewe Paratis wóón fénúfan Kot a fen pwonei. En lesen mwirin ei, epwe áweweei ifa usun kopwe tongeni manaw lón ena ótót séfé.