Ekkewe Feiengaw Watte​—Itá Ikkena Pisekin Ánnet pwe Kot Emén mi Kirikiringaw?

MET EKKÓCH ARAMAS RA ERÁ: “Kot a nemeni fénúfan, iwe i a efisi ekkewe feiengaw watte. Ina popun ese mwáál Kot emén mi kirikiringaw.”

MET EWE PAIPEL A APASA: “Unusen fanüfan a nom fän nemenien Ewe mi Ngau.” (1 Johannes 5:19) Ié na “Ewe mi Ngau”? Ewe Paipel a affata pwe ina i Satan. (Mateus 13:19; Markus 4:15) A weires ach sipwe lúkú ena? Ekieki ei mettóch: Ika a wor án Satan manaman wóón fénúfan, iwe a etipetipa aramas le napanapeni napanapan ren ar repwe tipemmóng, ekieki pwisin iir, me resap ekieki met epwe fis lón mwach. Ei mettóch a tongeni álisikich le weweiti popun aramas ra fókkun nemenemengawa pwisin leenier ei fénúfan. Chómmóng sousilelap ra éúréúra pwe án aramas nemenemengawa fénúfan a tongeni efisi, awatteelói are ámecheresi án aramas feiengaw seni ekkewe feiengaw watte.

Iwe, pwata Kot a mut ngeni Satan an epwe wor an watteen manaman? A pélú ena kapas eis seni minne a fis me lepoputáán uruwoon aramas, lupwen ewe ákkáeúin pean aramas a ú ngeni Kot, ewe Sou Nemenem. Seni ena atun, lap ngeni chón fénúfan ra pwal filatá ar repwe ú ngeni Kot. Lupwen ra filatá ar repwe ú ngeni án Kot nemenem, iwe, ra onómuur fán nemenien Satan, ewe chón oputa Kot. Ina minne, Jesus a eita ngeni Satan “samolun ei fanüfan.” (Johannes 14:30) Nge Satan epwe nemenem feilfeiló chék? Aapw!

Jiowaa a meefi me áfánni ekkewe riáfféú Satan a kan efisatá. A fen weires letipan ren an kúna án aramas riáfféú. Áwewe chék, lupwen ewe mwúún Israel a nóm lón weires, ewe Paipel a erá: “Kot a chök ekieki ar riaföü, lupwen a rongorong ar siö.” (Kölfel 106:44) Fán kirekiréch, Kot a fen akkóta pwe ekiseló chék epwele áwesaaló án Satan nemenem mi kirikiringaw! A fen seikaatá Néún we, Jesus Kraist, an epwe emén King mi pwúng tori feilfeiló chék.

IFA USUN A WENEITUK: Inaamwo ika án Satan nemenem ese túmúnú aramas seni ekkewe feiengaw watte, nge án Jesus nemenem epwe túmúnúúr. Lón eú fansoun, Jesus a túmúnú néún kewe chón káé seni eú ásepwál mi péchékkúl. Ewe Paipel a erá: “Jesus a ütä o kapas ngeni ewe asepwäl, ‘Kopwe manasösötiu!’ A pwal üreni ekewe no, ‘Oupwe lüala.’ Iwe, ewe asepwäl a söötiu, a pwal fokun lüala won matau.” Ekkewe chón káé ra apasa: “Iö chök ätei pwe asepwäl me no ra mwo nge aleasochisi?” (Markus 4:37-41) Ena pwóróus a alúkúlúkúkich pwe lupwen Jesus epwe wisen King, epwe túmúnú meinisin chókkewe mi álleasochisi i.​—Taniel 7:13, 14.