ÁN PAIPEL KEWE KAPAS EIS RA PÉLÚ
Itá lamalam meinisin ra asamolu Kot?
Atun óm akkaúseling ngeni pwóróusen fénúfan, eli ka esilla pwe fán ekkóch minne mi ngaw ra kan fis fán iten lamalam. Esap lamalam meinisin ra pop seni ewe Kot mi enlet. (Mateus 7:15) Ren enletin, chómmóng aramas ra fen tupuló.—Álleani 1 Johannes 5:19.
Inaamwo nge Kot mi áteneki ekkewe aramas mi enletin tongei minne mi múrinné me enlet. (Johannes 4:23) Kot a ekketiwa ekkena esin aramas ar repwe káé ewe enlet seni an Kapas, ewe Paipel.—Álleani 1 Timoty 2:3-5.
Ifa usun kopwe tongeni esilla lamalam mi enlet?
Jiowa Kot a etipeeúfengeni aramas seni sókkópaten lamalam ren an áitiir ewe enlet me áitiir ar repwe tongfengen lefiler. (Mika 4:2, 3) Ina minne, ka tongeni esilla chón ewe lamalam mi enlet ren napanapen ar echenifengeniir.—Álleani Johannes 13:35.
Jiowa Kot a etipeeúfengeni sókkópaten aramas ren ewe fel mi enlet.—Kölfel 133:1
Chón fel mi enlet ra lónguni ar lúkú me napanapen manawer wóón ewe Paipel. (2 Timoty 3:16) Ra pwal asamolu iten Kot we. (Kölfel 83:18)a Me ra esilefeili pwe án Kot we Mwú ina chék ewe ápilúkúlúk fán iten aramas. (Taniel 2:44) Ra áppirú Jesus ren ar mut ngeni ar “saram epwe tittin,” féfféri minne mi múrinné ngeni chón órur. (Mateus 5:16) Chón Kraist mi enlet ra tongeni sil ren ar ló ngeni imwen chón órur kewe pwe repwe afalafala ewe kapas allim usun án Kot we Mwú.—Álleani Mateus 24:14; Föför 5:42; 20:20.
a Ewe kapasen lepoputáán lón ewe Paipel are Testamentin lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”