ÁN PAIPEL KEWE KAPAS EIS RA PÉLÚ

Ekkewe chónláng ra tongeni álisikich?

Jiowa Kot a fératá fite million chónláng langattam fansoun me mwan an a fératá aramas. (Hiop 38:4, 7) Ekkena chónláng iir férien Kot nge iir mi manaman fán iten án Kot kewe angang, fán ekkóch ra titiito me ren Kot pwe repwe emmweni me túmúnú néún kewe chón angang wóón fénúfan. (Kölfel 91:10, 11) Ikenái, ekkewe chónláng ra álisi aramas le kúna feiéch seni ewe pwóróus allim néún Jesus kewe chón áppirú ra afalafala.​—Álleani Pwärätä 14:6, 7.

Itá sipwe iótek ngeni ekkewe chónláng fán iten álillis? Aapw. Iótek eú féfférún fel mi fichiiti chék Kot. (Pwärätä 19:10) Pokiten ekkewe chónláng iir néún Kot chón angang, ra álleasochisi alon Kot nge esap alon aramas. Ina minne sipwe ikkiótek ngeni Kot chék me ren iten Jesus.​—Álleani Kölfel 103:20, 21; Mateus 26:53.

Mi wor chónláng mi ngaw?

Ekkewe chónláng, iir usun chék aramas, ra fférútá nge a wor ar tufichin pwisin filatá me ra tongeni filatá le féri minne mi pwúng are minne mi ngaw. A mmen eletipechou pún chómmóng chónláng ra ú ngeni Kot. (2 Petrus 2:4) Ewe akkomw me leir ina i Satan, mwirin, ekkóch ra tapweló me ra wiliti chónláng mi ngaw. Lón ekkewe fansoun ra ló, Satan me néún kewe chónláng mi ngaw ra kóturuwu seni láng ngeni fénúfan.​—Álleani Pwärätä 12:7-9.

A lapóló féfféringaw me féfférún akkachofesá seni ewe ier 1914, ra pwáraatá pwe ekiseló chék Kot epwele aúkatiw án Satan me án ekkewe chónláng mi ngaw angang. Mwirin, Kot epwe eniwili fénúfan ngeni pwúkún met a tipeni seni me lóóm.​—Álleani Pwärätä 12:12; 21:3, 4.