Satan, Itá a Chék Wewe Ngeni Minne mi Ngaw?

A mecheres ach sipwe ekieki pwe ewe Satan sia állea usun lón Paipel, a chék wewe ngeni meinisin minne mi ngaw. Nge itá ina met wesewesen áitien Paipel? Ika ina, nge pwata ewe Paipel a apasa pwe Satan a piin fós ngeni Jesus Kraist me ngeni Kot mi Unusen Manaman? Sipwe ppii ekkena ruu atun.

ATUN SATAN A FÓS NGENI JESUS

Atun Jesus a poputááni an angangen afalafal, ewe Tefil a achocho le etipetipa ngeni úlúngát sóssót. Akkomwan, Satan a fókkun eriáni Jesus an epwe áeá an manaman seni Kot fán itan pwisin an epwe áwesaaló an echik. Mwirin, Satan a sótun aumwesi Jesus an epwe efeiengawa pwisin manawan me achéchééi pwisin aúchean. Sáingolóón, Satan a ereni Jesus pún a tongeni ngeni nemenem wóón mwúún fénúfan meinisin ika epwe chék fel ngeni i fán eú chék. Jesus a unusen ttii seni meinisin ekkena úlúngát sóssót mi tipachem solá me iteitan a alóni alon Paipel.​—Mateus 4:1-11; Lukas 4:1-13.

Nge ié chék Jesus a fóffós ngeni? Itá ngeni eú napanap mi ngaw lón pwisin i? Me ren Paipel, Jesus a “tolong lon sokopaten sosot usun chök kich, nge esap tipis.” (Ipru 4:15) Ewe Paipel a pwal apasa: “Esap föri och tipis, esap wor eman a rongorong eu kapas chofona seni lon awan.” (1 Petrus 2:22) Jesus a unuséch me a amwéchúnnúkú an tuppwél lón ánein manawan. Esap mwo fán eú a mut ngeni och napanap mi ngaw epwe mááritá lón i. A ffat pwe Jesus ese fóffós ngeni óch napanap mi ngaw mi nóm lón i nge a fóffós ngeni wesewesen emén.

Ena pwal pwóróus a pwal pwáraatá pwe Satan wesewesen emén.

• Chechchemeni pwe ewe Tefil a mochen ngeni Jesus nemenem wóón unusen fénúfan ika epwe chék fel ngeni fán eú chék. (Mateus 4:8, 9) Iwe, ena fósfengen epwe chék lamotongaw ika iwe Satan esap wesewesan. Pwal och, ese wor án Jesus tipemwaramwar pwe a wor watteen án Satan nemenem.

• Mwirin án Jesus unusen ttii seni ekkena sóssót, ewe Tefil a “feila seni lon ekis chök fansoun.” (Lukas 4:13) Lón ena pwóróus itá Satan a itá eú napanap mi ngaw are emén chón koput mi fókkun tipeppós le féri an angang?

• Nengeni pwe ekkewe “chon läng ra feito ren o tümwünü” Jesus. (Mateus 4:11) Ekkena chónláng mi awora apéchékkúl me álillis mi lamot ngeni Jesus, iir wesewesen ngún? A ffat pwe ewer. Iwe, itá pwata sipwe apwúngaló pwe Satan eú mettóch me lúkún emén wesewesen ngún?

ATUN SATAN A FÓS NGENI KOT

Ewe oruuen pwóróus, ina ewe a weneiti Hiop, ewe mwán mi niwokkusiti Kot. Ena pwóróus a apwóróusa usun ruu sókkun pwóróusfengen lefilen ewe Tefil me Kot. Lón ekkena ruu atun, Kot a mwareiti Hiop ren an tuppwél. Satan a apasa pwe Hiop a angang ngeni Kot pokiten an chék mochen feiéch me itá nge Kot a kan liwini án Hiop tuppwél. Ren enletin, usun itá nge ewe Tefil a apasa pwe an silei Hiop a lap seni án Kot. Jiowa a mut ngeni Satan pwe epwe angei meinisin wéún Hiop kewe, nieló néún kewe me angei péchékkúlen inisin.a Mwirin, a fen ffat pwe met Jiowa a ekieki usun Hiop, ina ewe mi pwúng me Satan i emén chón kapas chofona. Kot a efeiéchú Hiop ren an tuppwél.​—Hiop 1:6-12; 2:1-7.

Lón ekkena pwóróusfengen lefilen Kot me Satan, itá Jiowa a fós ngeni och napanap mi ngaw mi nóm lón pwisin i? Ewe Paipel a apasa: “Än Kot kewe föför ra unusen pwüng.” (2 Samuel 22:31) Án Kot Kapas a pwal erá: “A pin, a pin, a pin ewe Samol Kot mi Unusen Manaman.” (Pwärätä 4:8) Ewe kapas pin a wewe ngeni mi fel, liméch, mi imu seni tipis. Jiowa i emén mi unuséch me ese wor tipisin. Ese fókkun tongeni wor ren och napanap mi ngaw.

Nge ekkóch neman repwe apasa pwe pwal mwo nge Hiop esap wesewesen emén, iwe unusen ena pwóróusfengen eú chék kapas áwewe. Nge ena sókkun ekiek a pwúng? Ekkóch wokisin lón Paipel a apasa pwe Hiop i wesewesen emén. Áwewe chék lón James 5:7-11, sia álleani pwe a eáni Hiop eú leenien áppirú le álisi Chón Kraist ar repwe likiitú fán weires me a oururuur pwe Jiowa a efeiéchú ena esin likiitú. Itá epwe wor manamanen pwóróusen Hiop ika i esap wesewesen emén me ekkewe sóssót seni Satan, esap wesewesan? Pwal lón Isikiel 14:14, 20, Hiop mi kapachelong lein Noa me Taniel me iir ekkewe úlúmén mwán mi pwúng. Usun chék Noa me Taniel, Hiop i wesewesen emén, a wor an lúkú mi watte. Ika Hiop i wesewesan, iwe ewe chón oputa i, ewe popun an a kúna riáfféú mwáál esap itá pwal wesewesan?

A ffat me ren Paipel pwe Satan i wesewesen emén ngún. Nge neman kopwe ekieki, ‘Itá Satan mi efeiengaw ngeniei me ai famili lón ei fansoun?’

IFA USUN LÓN ACH EI FANSOUN?

Anchangei mwo pwe a wor eú mwichen chón ipweri allúk ra mwittir le kerán tolong lón ewe leeni ia ka kan nónnóm ie. Iwe, ese chúen kinamwe ewe leeni me manawen aramas a ngawóló. Iwe ekieki mwo ei pwóróus usun chék ena: Satan me néún kewe chónláng mi ngaw, pwal iir wesewesen ngún mi usun chék Satan le ú ngeni Kot, iir meinisin ra mwéchútiw wóón fénúfan. Met a fis pokiten ena? Iwe, ekieki mwo usun met ka kúkkúna me rongorong usun lón leeniom are wóón ekkewe ekkóch fénú.

• Ka kúna lapólóón féfférún akkachofesá ese mwo wor weween inaamwo ika aramas wóón unusen fénúfan ra mochen aúkatiw?

• Ka kúna lapólóón minen apwapwa mi weneiti angangen roong inaamwo ika chómmóng sam me in rese tipeeú ngeni?

• Ka kúna pwe feiengawen fénú, mataw me ásepwál a lallapóló inaamwo chómmóng ra achocho le túmúnúúr?

• Ka fen meefi pwe och mettóch ese fókkun pwúng a fiffis lón ótóten ei fénúfan, usun och manaman a átekini aramas ngeni feiengaw?

Ouse mochen oupwe nengeni met ewe Paipel a apasa ika ié a efisi ewe osukosuk ikenái: “Ewe trakon mi watte a koturuwu lükün, ewe serepenitin lom mi iteni Tefil are Satan, a atupu unusen chon fanüfan. A koturutiu won fanüfan, i me nöün kewe chon läng . . . Nge feiengau ngeni fanüfan me matau, pun Satan a feitiu remi o a fokun lingeringer pokiten an silei pwe a mochomoch chök an fansoun.” (Pwärätä 12:9, 12) Mwirin án chómmóng aramas etittina ekkena pisekin pwáraatá, ra apwúngaló pwe Satan i wesewesen emén ngún mi fókkun efeiengaw, ewe mi ekketipetipa unusen fénúfan.

Neman ka ekieki ika ifa usun kopwe kúna túmún. Mi fókkun lamot ena ekiek. Ewe pwóróus mwirin ei epwe awora ekkóch mettóch mi álilliséch ngonuk.