Ka Silei me Nénnéúnéú Iten Kot we?

Mi wor emén chiechiom nge kese silei itan? Ese wor. Pwal ina meefien emén fin Bulgaria itan Irina, a erá: “Ese fókkun tufich sipwe arap ngeni Kot nge sise silei itan.” Usun met ewe lesen me mwan a fen apasa pwe Kot a mochen sipwe arap ngeni. Iwe nge me ren Paipel, Kot a a pwári usun pwisin i ngenikich ren an apasa: “Ngang Jiowa, ina itei.”​—Aisea 42:8, NW.

Itá mi lamot ngeni Jiowa óm kopwe silei me nénnéúnéú itan we are ese? Ekieki ei mettóch: Iten Kot we a makketiw ren rúáánú mesen mak lón fósun Ipru ra eita ngeni Tetragrammaton, a pwá lón ewe popun afféún Paipel lón fósun Ipru arapakkan fán 7,000. Ewe it Jiowa a kon mak fán chómmóng lón ewe Paipel lap seni ekkewe ekkóch it. Iei esissillen pwe Jiowa a mochen pwe kich sipwe silei me nénnéúnéú itan we.a

Iwe nge, ekkóch ra meefi pwe pokiten Kot mi pin me i ewe mi unusen manaman, epwe osúfélúngaw ach sipwe néúnéú itan we. Pwúngún, epwe mwáál ach sipwe néúnéú iten Kot we lón napanap mi lamotmwáál, usun chék óm néúnéúmwáálli iten chiechiom we. Iwe nge, ina letipen Jiowa pwe chókkewe mi tongei i repwe asamolu me esilefeili itan we. (Kölfel 69:30, 31; 96:2, 8) Chemeni pwe Jesus a asukula néún kewe chón áppirú repwe iótek iei usun: “Semem lon läng. Itom epwe pin.” Sia pwal tongeni eitéchú iten Kot we ren ach esilefeili. Ika sia féri ena sipwe arap ngeni i.​—Mateus 6:9.

Ewe Paipel a affata pwe Kot a fókkun áfánni chókkewe ra “chechemeni itan.” (Malakai 3:16) Iei án Jiowa pwon fán iten ei sókkun aramas: “Üpwe tümwünü i, pun a silei itei. Are epwe köriei, üpwe pälüeni. Üpwe nom ren lon an riafföü.” (Kölfel 91:14, 15) Ach silei me nénnéúnéú iten Jiowa we a fókkun lamot ika sia mochen epwe wor ach ririéch ngeni i.