Ifa Iten Kot?

Atun ka mochen silei emén, ese mwáál kopwe akkomw eisini, “Ifa itom?” Ika ka tongeni eisini Kot ena kapas eis, iwe met Kot epwe erá?

“Ngang Jiowa. Ina itei.”​—Aisea 42:8, NW.

Epwe kerán ina óm rong ena it? Neman ka kerán rong pwe chómmóng ekkewe chón chiyakúúni ewe Paipel ra chék néúnéú iten Kot we fán fitu chék are rese fen néúnéú. Fán chómmóng ra siwili ena it ngeni ewe itelap “SAMOL.” Lón ewe Paipelin Chuuk itan Paipel are Testamentin Lom me Testament Söfö, iten Jiowa we a siwil ngeni ewe itelap “Samol mi Lapalap.”a Nge ren enletin, a mak iten Kot we lap seni fán 7,000 lón ekkewe kapiin Paipel minen lóóm lóóm. A wor lón ena it ekkewe rúáánú osopin lón fósun Ipru, YHWH are JHVH, nge lón fósun Chuuk seni lóóm ra afféúni ngeni ewe it “Jiowa.”

Iten Kot we a mak lón unusen ewe Tesin Ipru me lón chómmóng afféún Paipel

LAMOTEN ITEN KOT WE

A lamot ngeni Kot pwisin itan we. Ese wor a eita Kot nge i pwisin a filatá itan we. Jiowa a apasa: “Iei itei tori feilfeilachök, nge ren ei it oupwe chechemeniei seni eu täppin aramas tori eu täppin.” (Ekistos 3:15) Lón ewe Paipel, iten Kot we a mak fán chómmóng lap seni meinisin itelapan kewe, áwewe chék ren ekkewe itelap, Ewe mi Unusen Manaman, Sam, Samol, are Kot. Pwal ena it a mak fán chómmóng lap seni meinisin iten aramas kewe mi mak lón Paipel, áwewe chék ren Apraham, Moses, Tafit, are Jesus. Pwal och, letipen Jiowa pwe itan we epwe pwápwááló. Iei met ewe Paipel a erá: ‘Repwe silei pwe en ewe mi iteni Jiowa, en chök Ewe mi Unusen Tekia won unusen fanüfan.’​—Kölfel 83:18.

A lamot ngeni Jesus iten Kot we. Lón ewe iótek, aramas ra eita ngeni Semach are Iótekin ach Samol, Jesus a áiti ngeni ekkewe chón tapweló mwirin ar repwe eáni ei tingor ngeni Kot: “Itom epwe pin.” (Mateus 6:9) Jesus pwisin a eáni ei iótek ngeni Kot: “Semei, kopwe alinga itom!” (Johannes 12:28) Jesus a akkomwa lón manawan an epwe elingaaló iten Kot we, iwe ren ena popun a tongeni apasa lón an iótek: “Ngang üa asile ngeniir itom, nge üpwe sopwela ai föri iei usun.”​—Johannes 17:26.

Iten Kot we a lamot ngeni chókkewe mi silei I. Néún Kot kewe aramas lóóm ra weweiti pwe ar kúna túmún me amanaw a riri ngeni iten Kot we mi kkóló aúchean. ‘Iten Jiowa a usun chök eu imw tekia mi pöchökül, ewe chon pwüng a sälong lon o küna manau.’ (Än Salomon Fos 18:10) ‘Iö epwe köri iten Jiowa epwe manau.’ (Sowel 2:32) Ewe Paipel a pwári pwe iten Kot na epwe asokkaalóói chókkewe mi angang ngeni. ‘Chon ekewe mwü meinisin ra fel o aleasochis ngeni ar kewe kot, nge kich sipwe fel o aleasochis ngeni Jiowa ach we Kot tori feilfeilachök.’​—Mika 4:5; Föför 15:14.

MINNE ITEN KOT WE A PWÁRI

Ese pwal wor eú it mi unusen pwáraatá usun Kot. Chómmóng soukáé ra apwúngaló pwe ewe it Jiowa a wewe ngeni “A Efisi An Epwe Wiliti.” Jiowa Kot a álisikich le weweiti weween itan na ren met a ereni Moses usun pwisin i, a erá: “Ngang ngang echök.” (Ekistos 3:14) Lón fósun Ipru, ena itiitin kapas a afféú ngeni “Ngang Upwe Wiliti Met Ua Filatá.” Ina minne, iten Kot we ese chék pwári wisan we usun emén Chón Fératá, ewe mi efisi fisitáán mettóch meinisin. Nge itan we a pwári an tufich le efisi pwisin i me pwal efisi án meinisin férian kewe repwe wiliti met chék a mochen ren an epwe apwénúetá letipan. Itelapen Kot kewe ra tongeni áweweei án Kot tekia, nemenem, are manaman, nge ewe it Jiowa, ina chék met a unusen áweweei usun pwisin I me met a tongeni wiliti.

Ewe it a pwári án Kot áfánnikich. Weween iten Kot we a pwári an túttuppwél ngeni férian kewe, kapachelong kich. Pwal och, án Kot pwáraaló itan we a pwáraatá pwe a mochen ach sipwe silei I. Pwal mwo nge me mwen ach mirititi pwe sia tongeni silei me chiechi ngeni, I pwisin a akkomw pwár ngenikich itan we. A ffat pwe Kot a mochen ach sipwe silei pwe i wesewesen Emén sia tongeni chiechi ngeni, nge esap i emén kot sise tongeni silei are arap ngeni.​—Kölfel 73:28.

Ach nénnéúnéú iten Kot we a pwáraatá pwe sia mochen silei I. Áwewe chék, eli kopwe ereni emén ka mochen chiechi ngeni an epwe chék kér ngonuk itom. Epwe met meefiom ika eménna ese fókkun mochen nénnéúnéú itom? Iwe, ekiseló ese mwáál kopwe ekieki ika eménna a wesewesen mochen chiechi ngonuk. A pwal ina usun ren Kot. Jiowa a fen pwári itan we ngeni chón fénúfan me a pesekich ach sipwe nénnéúnéú. Lupwen sia néúnéú itan we, sia pwári ngeni Jiowa pwe sia mochen arap ngeni. Ren enletin, Jiowa a pwal mwo nge áfánni chókkewe mi “chechemeni itan” are, “akkaúcheani”!​—Malakai 3:16; NW footnote.

Ach silei iten Kot we, ina ewe áeúin mettóch sia féri pwe sipwe silefichi I. Nge ese chék naf ena. Mi lamot sipwe silei ewe Emén mi iteni ena it. Mi lamot sipwe silei napanapan kewe.