Aúetá eú Ririin Pwúpwúlú mi Péchékkúl me Pwapwa

1-3. Met sókkun osukosuk ekkewe mi pwúpwúlú ra kúkkúna? (Ppii ewe sasing lepoputáán ei lesen.)

EMÉN mwán mi pwapwa 38 ier lón an pwúpwúlú, a apasa: “Ika kopwe enletin achocho me pwáraatá pwe ka mochen óm pwúpwúlú epwe sópwéch, iwe, kopwe tongeni pwapwaiti ekkewe feiéch seni Jiowa.” Ewer, mwán me fefin mi pwúpwúlú ra tongeni pwapwafengen me álillisfengen lón ekkewe fansoun weires.​—SalF. 18:22.

² Ekkewe mi pwúpwúlú ra kan kúkkúna ekkóch “osukosuk lon manauer.” (1 Kor. 7:28) Pwata? Osukosuken iteiten rán a tongeni áweiresi ewe riri lón pwúpwúlú. Pokiten rese unuséch a tongeni fis letipengaw, wewengaw, me ffatangawen pwóppwóróusfengen lefiler. (Jas. 3:2, 5, 8) Chómmóng pwúpwúlú ra kúna weires lón ar angangen moni, nge pwal lón ena atun ra túttúmúnú néúr kewe. Aúrek me mélúlú ra áweiresi ekkóch pwúpwúlú ar repwe awora fansounfengen le apéchékkúla ar ririin pwúpwúlú. Osukosuken moni, semmwen me pwal ekkóch osukosuk ra tongeni ekisikisaaló ar tongfengen me súfélfengen lefiler. Pwal och, lóngólóngun ewe ririin pwúpwúlú mi péchékkúl a tongeni apwangapwangoló ren “ekewe angangen fituk,” ren choweán lisowumwáál, mocheisou, oput, ánini, lólówó, song, me tipefesen.​—Kal. 5:19-21.

³ A pwal lapóló osukosuk pokiten lap ngeni aramas lón ekkeei “ränin lesopolan” ra chék pwisin achéchéér, me rese súféliti Kot. Ekkena napanap ra kan eingawaló ewe riri lón pwúpwúlú. (2 Tim. 3:1-4) Pwal och, ewe chón oput mi fókkun kirikiringaw a achocho le atai ririin pwúpwúlú. Ewe aposel Petrus a éúréúrakich, a apasa: “Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.”​—1 Pet. 5:8; Pwär. 12:12.

4. Ifa usun ewe riri lón pwúpwúlú epwe péchékkúl me pwapwa?

⁴ Emén mwán pwúpwúlú lón Japan a apasa: “Ua nónnóm lón watteen aúrekin moni. Me pokiten use kon pwóppwóróus ngeni pwúlúwei we, iwe, a pwal nóm lón watteen weires. Pwal och, a kerán chék úri eú semmwen mi chou. Ikkena met a efisi ám aupwe áninifengen fán ekkóch.” Mi wor ekkóch osukosuk epwe kan fiffis lón pwúpwúlú, nge sia tongeni ataweer. Ren án Jiowa álillis ekkewe pwúpwúlú ra tongeni pwapwaiti eú riri lefiler mi péchékkúl me pwapwa. (Álleani Kölfel 127:1.) Iei sipwele káé usun nimu alen ach sipwe aúetá eú ririin pwúpwúlú mi péchékkúl me pwapwa. Sipwe pwal káé ika pwata tong a lamot ngeni péchékkúlen ewe ririin pwúpwúlú.

APACHAALONG JIOWA LÓN ÁMI PWÚPWÚLÚ

5, 6. Met ekkewe pwúpwúlú ra tongeni féri pwe repwe apachaalong Jiowa lón ar riri?

⁵ Lupwen eú pea pwúpwúlú a tuppwél me álleasochis ngeni Jiowa, lóngólóngun ar ririin pwúpwúlú epwe péchékkúl. (Álleani Än Salomon Afalafal 4:12.) Ekkewe pwúpwúlú ra apachaalong Jiowa lón ar riri ren ar álleasochisi an kapasen emmwen mi tong. Ewe Paipel a apasa: “Lupwen oua kul ngeni peliifich ika peliimöng, selingemi repwe rongorong me lükün sökürümi, ‘Iei ewe al oupwe aleni.’” (Ais. 30:20, 21) Ikenái ekkewe pwúpwúlú ra “rongorong” ngeni Jiowa ren ar álleafengen án Kot Kapas. (Kölf. 1:1-3) Ra pwal apéchékkúlaló ar ririin pwúpwúlú ren ar féfféri iteitan ar Famili Fel mi apwapwa me áfeifeitáár lón pekin lúkú. Án ekkewe pwúpwúlú ikkiótekfengen iteiten rán a pwal álisiir ar repwe tongeni likiitú fán ekkewe sóssót seni án Satan ei ótót.

⁶ Gerhard seni Tois, a apasa: “Iteiten fansoun an a kisikisiló ám pwapwa pokiten ám kewe osukosuk are wewengawfengen, ekkewe kapasen emmwen lón án Kot Kapas ra álisikem le ámááraatá ewe napanap likiitú me okkomusaló tipis. Ekkeei napanap ra fókkun lamot lón ririin pwúpwúlú mi sópwéch.” Lupwen ekkewe pwúpwúlú ra angang weires le akkapachalong Kot lón ar pwúpwúlú ren ar angangfengen lón ar fel ngeni, ra pacheéch ngeni Jiowa me ar riri a péchékkúleló.

MWÁN PWÚPWÚLÚ MÉKÚREN FAMILI MI TONG

7. Itá epwe ifa féfférún mwán ngeni pwúlúwan?

⁷ Napanapen án ewe mwán pwúpwúlú emmweni an famili a tongeni álisi an epwe aúetá an ririin pwúpwúlú mi péchékkúl me pwapwa. Paipel a erá: “Kraist möküren mwän meinisin, nge mwän möküren fefin.” (1 Kor. 11:3) Met weween ena? A lamot féfférún ewe mwán ngeni pwúlúwan epwe usun chék féfférún Jesus ngeni néún kewe chón káé. Jesus ese fókkun kirikiringaw are eipé ngeniir. Iteitan a pwári tong, kirekiréch, tipemirit, tipepwetete, me tipetekison.​—Mat. 11:28-30.

8. Met ewe mwán epwe féri pwe pwúlúwan we epwe tongei me súféliti?

⁸ Ese pwal lamot án ekkewe mwán pwúpwúlú Chón Kraist repwe eriáni pwúlúwer le súfélitiir. Nge repwe ‘nonom ngeni pwülüer kana fän mirit, [“weweöchüiti usun ar memmef me osupwang,” Agapé] pun inisiir a apwangapwang.’ Me ekkewe mwán ‘repwe meniniti’ pwúlúwer kewe. (1 Pet. 3:7) Ekkewe mwán pwúpwúlú ra pwáraatá pwe ra aúcheani pwúlúwer ren ar kirekiréch me eáni kapas mi asúfél ngeniir ese lifilifil ika lein aramas are atun ar rúúeménúló chék. (SalF. 31:28) Atun ewe mwán a pwári an tong ngeni pwúlúwan, ewe fefin epwe tongei me súféliti i, me Jiowa epwe efeiéchú ar pwúpwúlú.

FIN PWÚPWÚLÚ MI TIPETEKISON ME ÁLLEASOCHIS

9. Ifa usun emén fefin epwe pwáraatá pwe i mi álleasochis?

⁹ Ach pwári ngeni Jiowa ewe esin tong mi pennúkú pwisin mochenin mi lóngólóng wóón an emmwen, a álisikich meinisin ach sipwe átekisonakichetiw fán péún mi manaman. (1 Pet. 5:6) Eú alen án ewe fin pwúpwúlú epwe pwáraatá súfél ngeni án Jiowa nemenem, ina an epwe tipemecheres ngeni pwúlúwan we. Ewe Paipel a apasa: “Ami fefin kena, oupwe alleasochisi puluemi, usun a fich ngenikemi lon ach Samol.” (Kol. 3:18, Testament Mi Fö) Ren enletin, esap meinisin minne ewe mwán a apwúngaló ewe fefin epwe sani. Iwe nge, ika minne a filatá ese pwal ú ngeni án Kot allúk, ewe fefin mi álleasochis epwe tipemecheres ngeni.​—1 Pet. 3:1.

10. Pwata a lamot álleasochis mi fiti tong?

¹⁰ Jiowa a fang ngeni ewe fefin eú wis mi aúchea lón ewe famili. I ‘chiechien’ pwúlúwan we. (Mal. 2:14) Atun eú pea pwúpwúlú a féri kefil fán iten ar famili, fán súfél ewe fefin a apasawu ekiekin me meefian, nge a chék tipemecheres ngeni pwúlúwan. Ewe mwán mi tipachem epwe aúselingéch ngeni meefien pwúlúwan we. (SalF. 31:10-31) Álleasochis mi fiti tong a tongeni atoto pwapwa, kinamwe me tipeeú lón famili. Iwe, mwán pwúpwúlú me fin pwúpwúlú ra tongeni meefi pwapwa pokiten ra silei pwe ra apwapwaai Kot.​—Ef. 5:22.

OKKOMUSOMUSFENGEN LEFILEMI

11. Pwata a lamot ach sipwe omusaaló tipis?

¹¹ Ren án ewe ririin pwúpwúlú epwe nómoffóch, a lamot ewe mwán me ewe fefin repwe káé ar repwe omusomusfengen. Ika ekkewe pwúpwúlú ra kan “songomangfengen o amusamusfengen” ra apéchékkúlaló ar riri. (Kol. 3:13) Iwe nge, ika ra chék chúen chechchemeni tipisin emén me emén leir me ttufengeni atun ra song, iwe ar ririin pwúpwúlú epwe apwangapwangoló. Usun chék kiáán eú imw mi tongeni apwangapwangaaló, letipengaw me song ra tongeni alapaaló weiresin án ekkewe pwúpwúlú repwe omusomusfengen me angangfengen. Nge ewe riri a tongeni péchékkúleló lupwen ewe mwán me ewe fefin ra omusaaló tipisin emén me emén leir usun chék án Jiowa omusaaló tipisiir.​—Mik. 7:18, 19.

12. Ifa usun tong a “pwölüela chomong tipis”?

¹² Emén mi eáni tong enlet ese kan “chechemeni mine eman a mwäl ngeni won.” Pún ren enletin, tong “a pwölüela chomong tipis.” (1 Kor. 13:4, 5; álleani 1 Petrus 4:8.) Iwe ika sia tongei aramas, ese kaúk fán fite sia tongeni omusaaló tipis. Lupwen aposel Petrus a eis ika fán fite a lamot epwe omusaaló tipisin emén, Jesus a ereni: “Fän fik alea ngeni fisu.” (Mat. 18:21, 22) Met weween alon Jesus na? Weween pwe ese wor aúkúkún án emén Chón Kraist epwe omusaaló tipisin ekkewe ekkóch.​—SalF. 10:12.a

13. Ifa usun sia tongeni okkufu apwangapwangach we ach sise mochen omusaaló tipis?

¹³ Annette seni Tois a apasa: “Ika ekkewe pwúpwúlú rese mochen epichaaló tipisin emén me emén leir, epwe lapóló letipengaw me lúkúlúkúmmang me epwe eingawaló ar ririin pwúpwúlú. Ámi omusomusfengen epwe apéchékkúlaló ámi ririin pwúpwúlú me oupwe pacheéchfengen.” Ika sia pwári kilisou, aúcheani pwúlúwach kewe, me kútta alen ach sipwe apúnger, sia tongeni pworacho ngeni ewe apwangapwang sia kan eáni, ina ach sise mochen okkomusaló tipis. (Kol. 3:15, TF) Iwe, sia tongeni meefi kinamween ekiekich, tipeeú, me nónnóm lón án Jiowa chen.​—Rom 14:19.

APWÉNÚETÁ ÁN JESUS WE PESEPES USUN FÉFFÉRÚCH

14, 15. Ifan án Jesus we pesepes usun féfférúch, me ifa usun ach apwénúetá epwe apéchékkúlaló ach ririin pwúpwúlú?

¹⁴ Ese mwáál ka mochen aramas repwe aúcheanuk me súfélituk. Ka pwapwa atun ra aúseling ngonuk me chúngú meefiom. Nge ka fen rongorong án emén apasa, “Upwe eliwini ngeni met a féri ngeniei”? Fán ekkóch sia weweiti pwata a ina esin meefian. Iwe nge, Paipel a apasa: “Kosap apasa, ‘Ngang üpwe föri ngeni ewe aramas usun mine a föri ngeniei.’” (SalF. 24:29) Jesus a áiti ngenikich eú al mi fókkun múrinné seni ena ren ifa usun kataween osukosuk. Iei an ei pesepes usun féfférúch: “Oupwe föri ngeni aramas usun chök mine oua mochen repwe föri ngenikemi.” (Luk. 6:31) Alon Jesus ei a áiti ngenikich pwe sipwe féri ngeni aramas minne sia mochen repwe féri ngenikich me sisap liwini kirikiringaw ngeni ar kirikiringaw ngenikich. Iwe, a lamot sipwe eáni ekkewe féffér sia mochen sipwe kúna me lón ach we ririin pwúpwúlú.

¹⁵ Lupwen ekkewe pwúpwúlú ra chúngúfengeni meefier ar riri epwe péchékkúleló. Emén mwán lón South Africa a apasa: “Aua achocho le apwénúetá án Jesus we pesepes usun féfférúch. Ewer, a wor ekkóch fansoun aua songfengen, nge aua angang weires le eáni lefilem ekkewe sókkun féffér aua mochen emén epwe pwári ngenikem, ina féffér mi pwári asúfél me aúchea.”

16. Met ekkewe pwúpwúlú resap fókkun féri lefiler?

¹⁶ Kosap apwóróusa ngeni aramas apwangapwangen pwúlúwom we are ngúnúngúnúngaw ren féfférún mi asongok, kosap pwal mwo nge eáni kapasen urumwot. Chechchemeni pwe pwúpwúlú esap eú minen okkuffengen an epwe ffat ika ié leimi a péchékkúl, léúwommóng an chúwérúwér, are ié a tongeni apasa och kapas mi kon ámmetek. Ewer, kich meinisin sise unuséch me fán ekkóch sia eletipengawa ekkewe ekkóch. Nge ese fókkun wor eú popun mi múrinné ewe mwán are ewe fefin epwe ásáwa pwúlúwan are apasa kapas mi ámmetek, nge ewe a fen kon ngaw ar repwe tiitifengen lefiler are kawetfengen.​—Álleani Än Salomon Fös 17:27; 31:26.

17. Ifa usun ewe mwán pwúpwúlú epwe apwénúetá án Jesus we pesepes usun féfférúch?

¹⁷ Lón eérenien ekkóch fénú, ekkewe mwán ra kan pwúnúchéú ngeni pwúlúwer kewe are awater pwe epwe ánnetatá pwe iir mi péchékkúl. Nge ewe Paipel a apasa: “Eman mi mang ngeni song a mürina seni eman mi pöchökül, nge eman mi püsin nemeni letipan a mürina seni eman mi liapeni eu telinimw.” (SalF. 16:32) Ren án emén epwe áppirú Jesus Kraist, ewe mwán mi lap seni meinisin mi manaw wóón fénúfan, a lamot ngeni och sókkun péchékkúlen letip pwe epwe tongeni nemeni meefian. Emén mwán mi pwúnúchéú ngeni pwúlúwan are awata, i emén mi apwangapwang, me epwe péút seni an riri ngeni Jiowa. Ewe soumakken kélfel, Tafit i emén mi péchékkúl me pwora, iei alon: “Are oua song, oupwe afälikemi pwe ousap tipis ren. Oupwe ekieki ei lon lelukemi, lupwen ämi konola lon kiemi fän mosonoson.”​—Kölf. 4:4.

“OUPWE ECHENIFENGENIKEMI”

18. Pwata a lamot ach sipwe pwáppwáratá tong?

¹⁸ Álleani 1 Korint 13:4-7. Tong ina ewe napanap mi lamot seni meinisin lón pwúpwúlú. Iei alon Paipel: “Oupwe pwilitalong womi tong, kirikiröch, tipetekison, lukpwetete me mosonotam. Nge lükün ekei föför meinisin oupwe echenifengenikemi lefilemi, pun chen a pilüküfengeni ekei mettoch meinisin, pwe ra unusöch lon ar chufengen.” (Kol. 3:12, 14) A lamot ekkewe pwúpwúlú repwe pwáraatá lefiler ewe esin tong mi pennúkúóló pwisin mochenin me áppirú Kraist, ewe a tipemecheres le fangóló manawan fán iten aramas. Ika ewe ririin pwúpwúlú a lóngólóng wóón ena sókkun tong, epwe fókkun péchékkúl inaamwo ika a wor ekkewe esin féffér sise sani nge pwúlúwach a eérenaaló le féfféri, riáfféú seni semmwen mi chou, osukosuken moni, me weires seni án pwúlúwach famili.

19, 20. (a) Ifa usun ekkewe pwúpwúlú ra tongeni aúetá ar riri mi péchékkúl me pwapwa? (b) Met sipwe káé lón ewe lesen mwirin ei?

¹⁹ A lamot tong, tuppwél, me angang weires fán iten sópwéchún ewe riri lón pwúpwúlú. Lupwen a ppiitá osukosuk lón pwúpwúlú, a lamot ekkewe rúúemén resap mwittir fangetá wóón ar riri, nge repwe fen tipeppós le apéchékkúlaló. Ekkewe pwúpwúlú mi tongei Jiowa me tongfengen lefiler repwe tipeppós le pwákini ar kewe osukosuk, pokiten “chen epwe nonomola tori feilfeilachök.”​—1 Kor. 13:8; Mat. 19:5, 6; Ipru 13:4.

²⁰ Pokiten sia nónnóm lón ekkeei “fansoun weires,” iwe, a kon áweiresiló ach sipwe aúetá eú ririin pwúpwúlú mi péchékkúl me pwapwa. (2 Tim. 3:1) Nge ren án Jiowa álillis sia tongeni féri ena. Iwe nge, a chúen lamot ekkewe pwúpwúlú repwe fiffiu ngeni án ei fénúfan umwesimwesin lisowu. Lón ewe lesen mwirin ei sipwe káé ifa usun ekkewe pwúpwúlú ra tongeni túmúnú ar pwúpwúlú seni tipisin lisowumwáál.