Ifa Usun Sipwe Pwapwaiti Angang Weires

ÁMÁÁRAATÁ EKIEK PWÚNG USUN ANGANG

Ikaamwo ka eáni ewe sókkun angangen ofes are angangen paw, nge mi lamot kopwe mirititi pwe epwe chék wor ‘winnen’ emén ika a féri ese lifilifil sókkun angang weires. (Än Salomon Fos 14:23) Met sókkun win? Angang weires a álisikich le pwákini osupwangach lón pekin aion. Pwúngún pwe Kot a pwonei pwe i epwe ataweei osupwangen chókkewe mi enletin fel ngeni. (Mateus 6:31, 32) Nge a pwal mochen ach sipwe féri wisach ren ach sipwe achocho le angang pwe sipwe pwisin atufichikich.​—2 Tesalonika 3:10.

Ina minne, sia tongeni ekieki pwe ach angang, ina alen ach sipwe tikeri met sia achocho ngeni. Angang a atufichikich ach sipwe apwénúetá wisach kewe. Joshua, 25 ierin, a erá: “A mmen éch ika sia tongeni atufichi pwisin kich. Ika ka tongeni pwisin mééni met ka osupwangan, iwe a pwénútá ewe popun ka eáni ewe angang.”

Pwal och, ach angang weires a pwal álisikich le meefi pwisin aúcheach. Pún angang weires ina chék pwisin weween pún mi weires. Ika sia likiitú le angang nge meit ika me rech usun itá mi áweires are echchipwang, iwe sipwe tongeni pwapwa pwe sia silei pwe sia fen fiti án Kot ekiek mi tekia usun angang. Sia pworacho ngeni chipwang, ach sipwe chék mochen féri minne mi mecheres. (Än Salomon Fos 26:14) Iwe ren ena mettóch, angang a atoto watteen pwapwa. Aaron, ewe a fen mak alon lón ewe lesen mwen ei, a erá: “Ua kan meefi pwapwa mwirin ai angang unusen rán. Inaamwo ika ua pekkus, are ese pwal wor emén a áfánni met ua fen féri nge ua silei pwe mi aúchea minne ua féri.”

FÉRFICHI WISOM LÓN ÓM ANGANG

Ewe Paipel a fós usun emén mwán “mi sipeöch lon an angang” me emén fefin mi “achocho le angang ren pöün.” (Än Salomon Fos 22:29; 31:13) Nge sap minne emén epwe chék tongeni mwittir sipeéchúló lón an angang. Pwal lap ngenikich sise kon lien pwapwa le féri och angang sia lipwákingaw lón. Eli ina ewe popun chómmóng rese pwapwaiti ar angang pokiten rese achocho pwe repwe lipwákéchúló lón.

Ren enletin, emén a tongeni káé le pwapwaiti sókkópaten angang ika a eáni ekiek pwúng ren an epwe achocho pwe epwe sipeéchúló le féri an angang. William, 24 ierin, a erá: “A mmen apwapwa lupwen ka kúna uwaan óm angang weires. Kese tongeni meefi ena sókkun pwapwa ika pwe ka chék féri óm angang lón alemecheres are féri chék ewe úkúkún angang emén a ewisa ngonuk.”

EKIEKI IFA USUN ÓM ANGANG A ÁLISI ARAMAS

Túmúnú pwe kete kon ekkekieki chék úkúkún peioffum. Nge kopwe fen pwisin eisinuk: ‘Pwata a lamot ei angang? Met epwe fis ika ese pwénútá ei angang are ese pwúng fférún? Ifa usun ai angang a álisi aramas?’

A ákkáeúin éch ach sipwe ekkekieki ena sáingoon kapas eis pún sia fókkun pwapwaiti ach angang ika sia silei ifa usun a álisi aramas. Jesus pwisin a erá: “Sia feiöch ren ach fang lap seni ach angei.” (Föför 20:35) Me lúkún ekkewe aramas ra wesewesen kúna feiéchún ach angang, áwewe chék ren ekkewe kastomer me néúch boss, mi pwal wor ekkóch ra kúna feiéch seni. Ikkena iir chón ach famili me ekkewe mi osupwang.

Chón ach famili. Lupwen ewe mékúren famili a angang weires le atufichi an famili, i a álisiir lón ruu mettóch. Áeúin, a túmúnúfichiir lón pekin aion, ren an awora mwéngé, úf me imw. Ina minne a apwénúetá wisan we me ren Kot an epwe túmúnú “an famili.” (1 Timoty 5:8, Testament Mi Fö) Oruuan, féfférún emén mi tinikken le atufichi an famili a áiti ngenikich lamoten angang weires. Shane, ewe a fen mak alon lón ewe lesen mwen ei, a erá: “Semei we, i eú leenien áppirú ren an emén chón angang mi múrinné. I mi wenechar mi angang weires lón unusen manawan, nge lap ngeni ekkena fansoun i a emén chón táikú. Ua káé seni i lamoten ewe sókkun angang wóón paw, féri pisek mi tongeni álilliséch ngeni aramas.”

Ekkewe mi osupwang. Aposel Paulus a fénéú ekkewe Chón Kraist ar repwe “achocho le angang pwe . . . [repwe] pwal tongeni alisi ekewe mi wöüngau.” (Efisos 4:28) Pwúngún pwe lupwen sia angang weires le atufichi pwisin kich me ach famili, a pwal tongeni suuk ngenikich ach sipwe álisi chón osupwang. (Än Salomon Fos 3:27) Ina minne, angang weires a tongeni atoto ngenikich pwapwa wachemwuk seni ach fangafangéch.

FÉRI LAP SENI MET EMÉN A KÚTTA SONUK

Lón án Jesus we afalafal mi iteféúló me wóón ewe chuuk a erá: “Are eman sounfiu epwe arianuk pwe kopwe uwei pisekin lon ükükün eu mail, kopwe fen etala ruu mail.” (Mateus 5:41) Ifa usun kopwe tongeni apwénúetá lón óm angang ena kapasen emmwen? Lap seni óm kopwe chék féri ewe úkúkún angang noum boss a erenuk kopwe féri, ppii ifa usun kopwe féri pwal ekkóch mettóch mi fen lap seni ena. Ekieki met ka mochen achocho ngeni, me achocho le aéchúeló are emwittiraaló napanapen óm féri óm angang. Unusen féréchú óm angang pwal mwo ekkewe ákkáekisin angang.

Lupwen ka féri lap seni met noum boss a kútta sonuk, ese mwáál epwe lapóló óm pwapwaiti óm angang. Pwata? Pún ka pwisin nemeni óm féffér. Ka féri lap seni met emén a kútta sonuk pokiten ina pwisin mochenum, nge esap pokiten emén a eriánuk. (Filimon 14) Iwe ren ena mettóch sia tongeni chemeni ewe kapasen emmwen lón Än Salomon Fos 12:24, a erá: “Eman mi achocho le angang epwe nemenem, nge eman mi chipwang epwe wisen föri angangen kinroosi.” Pwúngún, lap ngenikich esap kich slave fán emén masta. Iwe nge, emén mi féri met chék néún boss a ereni, epwe tongeni meefi pwe i emén slave chón ataweei mochenin ekkewe ekkóch. Nge ika emén a pwisin filatá le féri angang mi lap seni met néún boss a kútta seni, iwe epwe meefi pwe a pwisin nemeni manawan me met a mochen féri.

EÁNI EKIEK MI ITEPÉK ME RÚÚEPEK USUN ANGANG

Inaamwo ika sia ingeló ren ewe mettóch angang weires, nge sipwe chechchemeni pwe mei pwal wor mettóch mi lamot lón manawach me lúkún angang. Pwúngún, ewe Paipel a pesekich ach sipwe tinikken lón ach angang. (Än Salomon Fos 13:4) Nge ese pesekich ach sipwe akkangangoló chék iteitan. Än Salomon Afalafal 4:6 a apasa: “A öch än eman epwe kisikis pisekin, nge a kinamwe, lap seni än eman epwe watte pisekin ren an angang weires fän ruofoch pöün, nge a turufi asepwäl chök.” Met weween ei wokisin? Emén mi akkangangoló chék iteitan ese tongeni pwapwaiti uwaan an angang pún an angang a fen angealó unusen an fansoun me péchékkúl, iwe a fen lamotmwáál an angang, usun “a turufi asepwäl chök.”

Ewe Paipel a tongeni álisikich le ámááraatá eú ekiek pwúng usun angang. Inaamwo ika a erá pwe mi lamot sipwe angang, nge a pwal pesekich ach sipwe túmúnú le “filätä mine a fokun mürina.” (Filipi 1:10) Ikkefa ekkena mettóch mi fókkun múrinné? A kapachelong ach awora fansoun fán iten ach famili me chiechiach kewe. Nge a ákkáeúin lamot ach fel ngeni Kot, áwewe chék ren ach álleani me ekilonei án Kot we Kapas.

Chókkewe mi eáni ewe sókkun manaw mi itepék me rúúepek epwe lapóló ar pwapwaiti ar angang. William, ewe a fen mak alon me mwan, a erá: “Emén mwán ua piin angang ngeni a fókkun eáni ekiek mi itepék me rúúepek usun angang. A angang weires, me néún kewe kastomer ra fókkun sani pún a angangéch. Nge sárin an angang, a silei pwe epwele mwo wes le angang me awora fansoun fán iten an famili me an fel ngeni Kot. Nge ka silei met? I emén me lein ekkewe aramas mi fókkun pwapwa ua sissileer!”