PWÓRÓUS LÚKÚNPÉÉNÁN | IFA USUN KOPWE PWAPWAITI ÓM ANGANG
ANGANG WEIRES—Itá mi Chúen Fich Ngeni ei Fansoun?
Alex a angang lón eú kompeni mi kan álisi aramas le áápi pisekiir ngeni eú leeni. Lupwen Alex a ekietá pwal eú pwóór wóón ewe tarakú, a ngasepwichitá me pwisin eisini: ‘Pwata ua chúen angang lón ei esin angang ese wor apwapwaan? Ineet ei upwe tongeni win lón manawei? Epwe fen éch manawei ika usap chúen angang!’
Chómmóng aramas ikenái ra pwal meefieni meefien Alex ren ar rese pwapwaiti angang weires. Iei alon Aaron, emén chón ffér tarakú, “Chómmóng ra meefi pwe iir mi fókkun éch, iwe ese fich ngeniir ar repwe eáni ewe sókkun angang me rer pwe mi tekisosson. Ra kan apasa, ‘Ua chék eáni ei angang tori epwe suuk ngeni ei pwal eú angang mi múrinné seni.’”
Pwata chómmóng ra meefi pwe ese fich ngeniir ar repwe eáni sókkun angang mi weires? Neman ra fen tipetipeló ren met ra kúna me rongorong wóón TV, reitio, Internet me metakkan, ekkewe ra kan menlapei pwe án emén eáni ewe sókkun manaw mi pisekisek me mecheres, i emén mi sópwéch. Matthew, emén mi wisen túmúnú pisekin eú leeni me limeliman, a erá: “Aramas ra ekieki pwe ika ka eáni eú angang mi weires ren atufichin manawom, weween en mi sópwongaw.” Shane, i emén janitor, mi wisen túmúnú eú leeni, a kúna pwal ena esin ekiek án aramas rese chúen mochen angang unusen rán nge ra chúen chék mochen angei unusen peioffur fán iten ena rán.
Nge chómmóng aramas mi sópwéch lón manawer ra enletin pwapwaiti angang weires. Emén chón angangen construction itan Daniel, 25 ierin a erá: “Me rei, angang weires a fókkun efeiéchúkich, ákkáeúin ika sia féri fán iten och mettóch mi múrinné sia mochen tikeri.” Andre, 23 ierin epwe tipeeú ngeni ena, iei alon: “Ua lúkú pwe pwapwa a riri ngeni angang. Kúkkúnúlóón angang esap tongeni eselipato pwapwafóchófóch, nge epwe chék echipwangakicheló.”
Ifa usun Daniel me Andre ra ámááraatá ewe ekiek pwúng usun angang weires? Iir ra apwénúetá án Paipel kewe kapasen emmwen lón manawer. Ewe Paipel a apéchékkúla án emén epwe tinikken me chófó lón an angang. Iwe nge, ese chék apéchékkúla ngenikich ach sipwe angang, a pwal áitikich ifa usun sipwe pwapwaiti angang.
Menni kapasen emmwen lón Paipel a tongen álisuk le meefi pwapwa lón óm angang? Ám aua etiwok le ppii ekkóch me leir, ewe lesen mwirin ei epwe pwóróus usun.