ÁN PAIPEL KEWE KAPAS EIS RA PÉLÚ

Lón mwachkkan, epwe ifa nónnómun aramasen fénúfan?

Ese wor tipemwaramwar pwe epwe chúen sópwósópwóló feffeitáán án aramas angang lón pekin science. Nge met, ren pwisin ar tufich ra tongeni féri pwe aramas meinisin repwe wesewesen tongefengeniir? Aapw. Ikenái, ei ótót a uren aramas mi ekieki chék pwisin iir me tipemmóng. Iwe nge, minne Kot a tipeni fán iten aramas a fókkun múrinné.​—Álleani 2 Petrus 3:13.

Án Kot we Kapas a fós usun eú fansoun lón mwachkkan lupwen aramas meinisin repwe tongefengeniir. Aramas repwe manaw fán núkúnúkéch, me esap wor emén epwe efeiengawer.​—Álleani Mika 4:3, 4.

Met epwe amóeló án aramas ekieki chék pwisin iir?

Lupwen Kot a kerán féri aramas, ese nóm rer ewe napanap ar repwe chék ekieki pwisin iir. Nge ewe áeménún aramas a filatá le álleasolapa Kot, iwe a péút seni an unuséch. Sia álemwiri seni Atam ewe napanap ach sipwe chék ekieki pwisin kich. Iwe nge, Kot epwe néúnéú Jesus le eliwinisefáli ewe manaw mi unuséch ngeni aramasen fénúfan.​—Álleani Rom 7:21, 24, 25.

Jesus a féri letipen Kot lupwen a máló pwe manawan epwe eú asor mi áwesi minne a fis pokiten án ewe áeménún mwán álleasolap. (Rom 5:19) Iwe, ren án Jesus féri ena, a suuk ngenikich ewe fansoun lupwen aramas meinisin repwe ngaseló seni ewe napanap ar ekieki chék pwisin iir ren ar féri minne mi ngaw.​—Álleani Kölfel 37:9-11.