ÁN PAIPEL KEWE KAPAS EIS RA PÉLÚ

Met weween ewe Ránin Kapwúng?

Lón fansoun lóóm, Kot a néúnéú ekkewe soukapwúng le amanawa néún kewe aramas seni pwúngúngaw. (Soukapwüng 2:18) Ewe Paipel a áweweei pwe ewe Ránin Kapwúng epwe fis lón mwachkkan epwe eú fansoun mi apwapwa. Ina ewe atun Jiowa, ewe Soukapwúng fán iten unusen fénúfan, epwe angasaaló aramas seni pwúngúngaw.​—Álleani Kölfel 96:12, 13; Aisea 26:9.

Kot a fen seikaatá Jesus an epwe aworato pwúngiéch ngeni aramas mi manaw me aramas mi máló. (Föför 10:42; 17:31) Chómmóng aramas ra máló nge rese silei Kot. Atun ewe Ránin Kapwúng, Jesus epwe amanawasefáliir pwe repwe tongeni káé usun ewe Kot mi enlet me repwe silei me tongei i.​—Álleani Föför 24:15.

Pwata ewe Ránin Kapwúng epwe úkúkún engeréú ier ttaman?

Ekkewe mi máló repwe manawsefál atun ewe engeréú ier. (Pwärätä 20:4, 12) A lamot ngeniir och fansoun pwe repwe silei án Kot kewe allúk me álleasochisiir. Pwúngún, chómmóng ra lúkú pwe ekkewe mi máló repwe kapwúng me ren minne ra féri me mwen ar máló, nge ewe Paipel a pwáraatá pwe repwe kúna kapwúng wóón minne ra féri mwirin ar manawsefál.​—Álleani Rom 6:7.

Ewe Paipel a fós usun pwal eú ránin kapwúng epwe mwittir fis me mwen ewe engeréú ier epwe poputá. Sia pwal eita ngeni ena rán ewe sópwólóón, ina met ewe pwóróus lepoputáán ei puk a fós usun. Lón ena rán, Kot epwe amóeló aramas mi ngaw meinisin. (2 Petrus 3:7) Ina minne, mi lamot sipwe achocho le ánnetatá ach tong ngeni Kot.​—Álleani 2 Petrus 3:9, 13.