Án Paipel Kewe Kapas Eis Ra Pélú

Kot, i met sókkun Kot?

Kot, i emén sise tongeni kúna. A féri láng, fénúfan me ménúmanaw meinisin. Ese wor emén a fératá Kot me ese wor poputáán. (Kölfel 90:2) Kot a mochen án aramas repwe kúkkútta i me silei ewe enlet usun.​—Álleani Föför 17:24-27.

Sia tongeni silei iten Kot. Sia tongeni esilla ekkóch me lein napanapan kewe ren ach ekiekifichi ekkewe mettóch a fériiretá. (Rom 1:20) Nge ren ach sipwe silefichi Kot, mi lamot sipwe káé an we Kapas, ewe Paipel, ewe mi áiti ngenikich napanapen Kot kewe mi fiti tong.​—Álleani Kölfel 103:7-10.

Met meefien Kot usun pwúngúngaw?

Jiowa, ach we Chón Fératá, a oput pwúngúngaw. (Tuteronomi 25:16) Me a fératá aramas lón napanapan. Ina pwata lape ngenikich sia oput pwúngúngaw. Ekkewe pwúngúngaw mi fiffis, esap efisien Kot. A ngeni aramas ewe tufichin pwisin filatá. Nge solapan pwe chómmóng aramas ra áeángawei ar tufichin pwisin filatá me féfféri minne mi pwúngúngaw. Iwe, letipen Jiowa a “fokun weires ren.”​—Álleani Keneses 6:5, 6; Tuteronomi 32:4, 5.

Jiowa a efich pwúng me esap mut ngeni pwúngúngaw an epwe nómoffóch. (Kölfel 37:28, 29) Ewe Paipel a pwonei pwe ekiseló chék, Kot epwele asopwaló pwúngúngaw meinisin.​—Álleani 2 Petrus 3:7-9, 13.