Lesen 4
Io Ewe Tefil?
Setan ewe Tefil—Ia a feito me ie? (1, 2)
Ifa ussun Setan a otupu aramas? (3-7)
Pwata kopwe u ngeni ewe Tefil? (7)
1. Ewe kapas “tefil” a wewe ngeni emon mi kapas chofona ussun pwal emon. “Setan” a wewe ngeni emon chon oput are emon chon u ngeni. Ewe akkaemonun chon u ngeni Kot a eani ekkeei itelap. Akkom, i emon chonlang mi unusoch lon lang ren Kot. Iwe nge, mwirin och fansoun, a ekieki pwe pwisin i a tekia lap seni minne mi fich, iwe, a mochen angei ewe fel mi chok fich ngeni Kot.—Mattu 4:8-10.
2. Ei chonlang, Setan, a fos ngeni If ren an nounou emon serepenit. Ren an kapas chofona ngeni, a amwokutu an epwe alleasolapa Kot. Ren ena foffor Setan a efisata tipemwaramwar won minne sipwe eita ngeni an Kot we “pwungun nemenem,” are ika a tekia seni meinisin. Setan a efisata tipemwaramwar won murinnon an Kot nemenem me ika epwe ochiti ir kewe a nemenem won. Setan a pwal efisata tipemwaramwar ussun an aramas tuppwol ngeni Kot. Ren an fori ena mettoch, Setan a pwisin wiliiti emon chon u ngeni Kot. Ina pwata a iteni Setan ewe Tefil.—Keneses 3:1-5; Hiop 1:8-11; Pwarata 12:9.
3. Setan a sotun michi aramas pwe repwe fel ngeni i. (2 Korint 11:3, 14) Setan a aea lamalam chofona pwe epwe otupu aramas. Ika eu lamalam epwe asukula aramas och kapas chofona ussun Kot, a wesewesen fori letipen Setan. (Jon 8:44) Eli ekkewe chon fiti ekkewe lamalam chofona ra luku lon letiper pwe ra fel ngeni ewe Kot mi enlet. Nge ra wesewesen angang ngeni Setan. I ewe ‘Koten ei fonufan.’—2 Korint 4:4.
4. Angangen roong, ina pwal eu mettoch Setan a aea pwe epwe nemeni aramas ren. Repwe kori ekkewe ngun pwe ekkewe ngun repwe tumunur, pwe repwe efeiengaua aramas, ren ar repwe esile ngeniir met epwe fis lon fansoun mwer, are fori ekkoch manaman. Setan i ewe manaman mi ngau ekkeei foffor ra popu seni. Ren ach sipwe apwapwai Kot, epwe lamot ach sisap fori ekkewe angangen roong.—Tuteronomi 18:10-12; Fofor 19:18, 19.
5. Setan a pwal otupu aramas ren an aramas fokkun tipetekia ussun ar lewo me an aramas fel ngeni ekkewe mwicheichen muu are nemenem. Ekkoch ra meefi pwe ar muu are chon fonuer kewe ra lapalap seni ekkewe ekkoch. Nge ese enlet. (Fofor 10:34, 35) Pwal ekkoch aramas ra kutta seni ekkewe muu ar repwe pwakini an aramas osukosuk. Ren ar fori ei mettoch, ra likitalo an Kot we Muu. Ina ewe chok mettoch epwe tongeni pwakini ach kewe osukosuk.—Taniel 2:44.
6. Ren an epwe otupu aramas, Setan a pwal sotuni aramas ren mocheniangauen tipis. Jiowa a erenikich ach sipwe tumunukich seni ekkewe fofforun tipis pun a silei pwe repwe efeiengauakich. (Kalesia 6:7, 8) Eli ekkoch aramas repwe mochen om kopwe etiir lon ekkena sokkun foffor. Chechchemeni mwo pwe Setan i ewe emon mi mochen om kopwe fori ekkena mettoch.—1 Korint 6:9, 10; 15:33.
7. Setan epwe pwal tongeni aea riaffou are niuokkus pwe kopwe poutalo Jiowa. Eli ekkoch attongom kewe repwe fokkun song pokiten om kaeo ewe Paipel. Pwal ekkoch repwe turunufaseiok. Nge manauom a popu seni io? Setan a mochen aniuokkusuk pwe kopwe ukkutiu seni om kaeo ussun Jiowa. Kesap mut ngeni Setan an epwe wiin! (Mattu 10:34-39; 1 Piter 5:8, 9) Ika kopwe u ngeni ewe Tefil, kopwe apwapwai Jiowa me pwarata pwe en mi apochokkulata pwungun An nemenem.—An Salomon Fos 27:11.
[Ekkewe sasing lón pekin taropwe 9]
Lamalam mi chofona, angangen roong, me an aramas peppeni en me an muu ra otupu aramas
[Ekkewe sasing lón pekin taropwe 9]
U ngeni Setan ren om kopwe sopwelo le kaeo ussun Jiowa