A Lamot Ngenikich Meinisin Ourur

En mi chechchemeni óm turutiw are chapóló me lekúkkúnum? Neman a kinás poum are totomurar pwásukum. En mi chechchemeni ifa usun inom we a oururuk? Neman a limeti kinásóm we, mwirin a pánteitei. Ka kechiw, nge ren an kapasen ourur mi ekinamwe me an turufukóló, a ekinamweeló letipom. Lón ena atun lón manawom, a mecheres óm kopwe kúna ourur.

Nge atun sia wattetá, a weweiresiló manawach. A torikich ekkewe osukosuk mi watte, me a weiresiló ach sipwe kúna ourur. A elichippúng pún lap ngeni ekkewe esin osukosuk mi tottori ekkewe watte, ese tongeni wesiló ren chék eché pánteit are án emén inelap turufuróló. Áwewe chék, ekieki ekkeei fitu pwóróus.

• Ka fen meefi weiresin óm katowu seni óm angang? Julian a erá pwe a rúké atun a katowu seni an angang, mwirin a meefi riáfféú. Iei met a ekieki: ‘Ifa usun upwe túmúnú ai famili? Pwata ra meefi pwe ese wor lamotei mwirin ai angang weires ngeni ei kompeni ren fite fite ier?’

• • Neman ka meefi chúúpwúl ren ámi mufesen me pwúlúwom. Iei met Raquel a apasa. “Lupwen pwúlúwei we a péútieiló 18 maram a ló, ua meefi och sókkun lólilen mi toriei. A tatakkis letipei.” A pwal erá: “Ua meefi metek lón letipei me pwal inisi. Ua niwokkus ren.”

• Neman a apwangapwang inisum are uruk eú semmwen mi chou nge ka kúna pwe usun ese kisikisiló. Neman a wor atun ka meefieni meefien Hiop, ewe a apasa: “Üa anioputa manauei, üsap chüen mochen manau.” (Hiop 7:16) Eli ka pwal meefieni meefien Luis, emén mwán 80 som ierin, a erá, “Fán ekkóch ua meefi pwe ua chék witiwiti ai upwele máló.”

• Are neman ka fókkun mochen angei ourur pún emén attongeom a má sonuk. Robert a erá: “Lupwen nei we át a máló atun a ákseten efóch sepelin, akkomwan use fókkun lúkú.” A pwal erá, “Mwirin ua meefi ewe esin metek Paipel a apépééi ngeni metekin efóch ketilas mi tikilong lón inisich.”​—Lukas 2:35.

Robert, Luis, Raquel, me Julian ra kúna ourur pwal mwo nge atun ra nóm lón ekkena esin fansoun mi áweires. Ra kúna ewe Emén mi múrinné seni meinisin an epwe oururuur, ina i ewe Kot mi Unusen Manaman. Ifa usun a awora ourur? Epwe pwal awora ngonuk ewe esin ourur mi lamot ngonuk?