“Ina Liffangei Ua Kon Sani Seni Meinisin”

Ina meefien emén nengngin 13 ierin atun emén a liffang ngeni emén kolak. Emén fefin mi sópwéch lón an business a erá pwe eú computer seman we a liffang ngeni atun a chúen sukul high school a ekkesiwili manawan. Emén mwán a kerán pwúpwúlú a meefi pwe néún we card pwúlúwan we a pwisin féri pwe an liffang ngeni lón ar we áeúin ierin pwúpwúlú, ina liffangan we mi kon múrinné seni meinisin.

Iteiten ier chómmóng aramas ra áeá ar fansoun me achocho le kúkkútta liffang mi kon múrinné fán iten chiechier are aramaser lón ekkewe rán mi kkóló aúchear. Nge chómmóng chón liffang ra efich le rong pwe ewe ra liffang ngeni a sani ewe liffang, usun chókkewe sia fósur me lepoputáán. Nge en? Ka mochen eáni liffang are angei liffang mi enletin aúchea?

A mmen éch ena sókkun, esap chék ren ifa usun ewe liffang a achchúngú letipen ewe chón angei, nge pwal pokiten met ewe chón liffang a meefi. Iei met Paipel a erá: “Sia feiöch ren ach fang lap seni ach angei mettoch.” (Föför 20:35) Ewer, ewe feiéch are pwapwa sia angei seni ach fangóló, neman epwe pwal lapóló ika ewe liffang a fókkun aúchea me ren ewe emén sia liffang ngeni.

Iwe, met ka tongeni féri pwe óm eáni liffang epwe eú populapen enletin pwapwa ngonuk me ngeni ewe emén ka liffang ngeni? Nge ika ese tufich óm kopwe eáni eú liffang mi kon múrinné, met ka tongeni féri pwe epwe enletin aúchea óm liffang?